Ero yinhîrî ohyaka tak mokyatken̂e Ixaw Yana poritomon komo, anarî komo mak. Oyepatai tak n̂eremetken̂e.

2-3 Ero yimaw Kporin komo mtapotarî wencekn̂e xa hara. On wara kekn̂e owya, Ai, tooto xîkrî, on wara naxe n̂examro, ciixaputho komo ponaro xa naxe. Yîpînîn yaw xa naxe, yîpînînka xera ro mak naxe okwe. Ero mko yanme kicicitho cheka cepîrkaxmu wara naxe okwe. Ero ke ahce wa wai n̂examro poko? N̂examro mtapotarî weyukya ha ma re awya?

4 Ero ke amtapotakî n̂examro yakro. On wara kasko yîwya so, Oyakno komo, on wara naxe anarî komo Ixaw Yana kom ha, ciixaputho komo ponaro mak naxe okwe. Ero mko pînîn yaw xa naxe okwe. Ero mko yanme kicicme cheka cepîrkaxmu wara naxe okwe. Ero yipu ponaro cehsom komo rma mokyaxe weronomano rin̂e mtapotarî yentaxi. Ero ke Owî rma n̂examro weyukyasî. Aporin komo rma Ow ha. Cerewre kîmtapowasî akro so mer̂pora exirî ke ciixaputho ponaro ehtopo komo kica.

5 Ero wara kîmtapowasî Ixaw Yana komo yakro yîropotarî komo yahsîtome tak owyan me. Oroto ooxatînhîrî komo tak naxe cetowso so hara okwe ciixaputho ponaro cexirî ke so okwe.

6 Ero ke on wara kasko Ixaw Yana komo ya, Oyakno komo, on wara kesî Kporin komo Kaan awya so, Ponaro awehtoponhîrî komo poxunkacoko. Kicicitho pokono ro mak amyamro kica. Ero ke poxunkacoko.

7 On wara na natu anarî komo, Ixaw Yana komo, anarî yana komo marha Ixaw Yana chewno komo, ohyai na n̂etowyatu, mîk hak warai me ciixaputho ponaro tak na natu kica. Ero mko yanme kicicme so naxe okwe, ponaro mak na natu, ponaro xa tak ha. Noro yipu komo rma na mokyatu weronomano rin̂e yaka omtapotarî yentaxi. Noro yipu mokyataw Owî rma kîmtapowasî noro yipu komo yakro, omtapotarî yekatîmn̂e ken̂ehra. Aporin komo Ow ha.

8 Noro yipu komo yîwîrîman̂e me xa tak wasî. N̂examro wemetanmekyasî twerî tak ehtome anarî komo, n̂examro yehtoponho yentan̂e komo. Noro pen warahra men cexpore nasî, kexe cepanatanmekyataw so. Noro yipu tak Ow waihkesî, oyanan mera tak nasî. Ero yimaw on wara tak mîîkexe opoko, Kporin komo xa Mîk ham, mîîkexe.

9 Anarimaw on wara na nai weronomano rin̂e, anarî komo mtapotarî na n̂ewehca. Ero ke tohnaw ro mak n̂ekatîmya kica. Ero wara ekatîmn̂e me exitaw on̂iritho me rma nasî, ero yipu yekatîmn̂e me on̂iritho me ha. Wara rma noro yipu tak wahsîyasî, waihkesî marha. Oyanan mera tak nasî, Ixaw Yana mera.

10 Kicicitho mîkro, kacho me men nasî, tohnaw weronomano rin̂e. Kicicme cehtoponhîrî yepetho nahsîyasî, yîmtapotarî yentaxi mohxapu komo wara xa marha. Etîme re nahsîyaxe.

11 Ero wara waihkano wiir̂asî ohyai etowra tak ehtome Ixaw Yana komo. Oyewetîn̂e pîn me roro cehtoponhîrî komo ke esmurera so marha naxe. Ero ke oyanan me tak naxe. Ponaro xa n̂examro yehtopo me marha tak was Ow hara, wîîkesî. Ero wara wîîkes Ow Aporin komo Kaan.

12-13 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, on wara wasî tooto komo poko, onok na rowon pono komo poko, kicicme roro na natu opoko. Oyewetîra roro na natu okwe. Ero wara exitaw so n̂examro tak wîwîrîmexe. Cetînakaxmu me wiir̂as okwe, rooma pokono me xa okwe. Iitononhîrî pen komo waihkesî, iyokuthîrî pen komo marha.

14 Ahce wa na natu noro yipu komo, yîchew so exitaw moxam hara osorwaw, Noe, Tan̂iew, Xoo, n̂examro ha? Iito exitaw so, n̂examro mak waipîra naxe kir̂wan̂he cexirî ke so. Yîchew so ehtopo komo watohra ro mak wasî waihkara n̂examro yanme. Waihkesî rma yîchew so ehtopo komo okwe. Ero wara wîîkes Ow Aporin komo Kaan.

15 Anarimaw ohyai etowxapu komo cheka na wen̂epe kamara komo, okoyi komo, onok na komo, eskan̂e kom ha. Iitono komo xîkîtho pen na waihketîke. Ero yinhîrî pohnî me tak na nai n̂examro rowontho, iitoxa re tohra ro mak tak na natu tooto komo keskan̂e ken̂e xa exirî ke okwe.

16 Yaaro tan wîîkesî, Aporin komo Kaan Ow. Yaaro wîîkesî, Waipîn me nasî Kaan, kacho wara rma nasî omtapotarî yaaro xa. Noe, Tan̂iew, Xoo, n̂examro 3 exitaw iitono komo chew tumumuthîrî pen komo yukurunpera naxe, cemsîthîrî pen komo marha yukurunpera. Waihyaxe rma yîmxîkîthîrî pen komo okwe. Yîîm komo mak waipîra naxe. Pohnî me tak nasî roowo iitononhîrî pen komo yekenho.

17 Anarimaw waapa na wekpe ohyai etowxapu komo waparî. On wara na wîîke, Tkaciparayem komo mohcowpe n̂examro waparî me, wîîke na. Ero wa na iitono pen komo waihke Ow, iyokuthîrî pen komo marha.

18 Yaaro tan wîîkesî, Aporin komo Kaan Owî. Waipîn me nasî Kaan, kacho wara rma nas omtapotarî yaaro xa. N̂examro 3 exitaw so iitono komo chew tumumuthîrî pen komo meero yukurunpera naxe, cemsîthîrî pen komo marha yukurunpera naxe. Waihkesî rma yîmxîkîthîrî pen komo okwe. N̂examro mak waipîra naxe osorwaw, yîîm kom ha.

19 Anarimaw na eper̂a wekpe iitono komo waparî me. Tîrwon̂e xa wekpe waihkano ritohme okwe. Ero wa iitono pen komo waihkesî, iyokuthîrî pen komo marha.

20 Yaaro tan wîîkesî, Aporin komo Kaan Owî. Waipîn me nasî Kaan, kacho wara rma nas omtapotarî yaaro xa. Iito exitaw so Noe, Tan̂iew, Xoo komo, tumumuthîrî pen komo yukurunpera thakwa naxe okwe, cemsîthîrî pen komo marha yukurunpera naxe okwe. N̂examro mak waipîra naxe, yîîm komo mak, kir̂wan̂he cexirî ke so.

21 On wara marha wîîkes Ow, Aporin komo Kaan, soroso xa tak n̂etwîrîmexe Xerusaren pono pen komo amn̂e owya en̂epetaw 4 rma iitono komo waparî kom ha. Kacipara ke waihkano rin̂e komo, rooma, eskano rin̂e komo, eper̂a, ero warai komo wen̂epesî iitono komo waparî me. Ero yipu ke iitono pen komo waihkesî xa tak okwe, iyokuthîrî pen komo marha.

22 N̂etîmcexe rma tko anarî komo, iitono pen mumutho komo, emsîthîrî komo marha. N̂examro wukurunpesî waapa nwaikarî mera. Ahyaka mokyaxe. Ahwora ka maxe Xerusaren pono komo yîwîrîmachonho yentache awya so. Anarmerpa yîwîrîmacho komo mencexe yiipo so on̂ekîtho. Wara rma etîmtoxapu komo yeen̂ataw hara awya so merepowaxe tak hara.

23 N̂examro tak awerepotanmekyaxe so okre. Kîr̂wanhe n̂examro yehtopo meen̂axe okre. Ero ke cerepore maxe. Ero yimaw on wara mîîkexe, Yaaro rma iitono pen komo nîwîrîmekn̂e Kporin komo. Tohnaw yîwîrîmano cirihra ro mak xakn̂e ham, mîîkexe. Ero wara wîîkes Ow Aporin komo Kaan, kekn̂e. Ero wara kekn̂e Noro owya.