1-2 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, on wara wîîkes awya, tpoxwe enîhra na matu yatî warai mko. Weewe yopo katî meen̂atu comota pono yopo?

3 Wayapu me katî menpor̂atu yatî warai, yawaka mosotu me xa katî, ahce na me menpor̂atu poko awehtopo komo me? Kwahsî yakritopo me katî menpor̂atu yatî warai? Pîra ro mak.

4 Wehto ywaka xa matko mar̂mexe yatî warai. Iito tak n̂ecakya yîmîtîthîrî, yar̂pîthîrî, ahnoro mak. Ecakîche ahce na me ero menpor̂atu yatî waraitho?

5 Pîra ro mak, ahce na me enporira maxe ecakîra ka exitaw. Soroso xa ahce na me enporira ro mak maxe ecakîche.

6 Ero ke on wara wîîkes Owî, Aporin komo Kaan, yatî warai natîkwasî comota chewno. Wehto kamerî me mak ero yipu wakîhcekn̂e. Ero warai me xa marha Xerusaren pono pen komo wiir̂asî.

7 Twaihkaxmu me tak n̂examro ween̂asî. Wehto chewnonho n̂epataketu na waipîra rma. Anarî cheka cexe hara ecahtome so tak okwe. Twaihkaxmu me n̂examro yeen̂ataw owya ero yimaw on wara mîîkexe opoko, Kporin komo xa Mîk ham, mîîkexe.

8 Pohnî me ro mak n̂examro rowontho wiir̂asî ohyai etowrî ke so pahkî ro mak okwe. Ero wara wîîkes Ow Aporin komo Kaan ha.