1-2 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, on wara tak amtapotakî Xerusaren pono komo yakro. Kicicme ro mak n̂examro yehtopo ekatîmko yîwya so.

3 On wara kasko yîwya so, Ai, oyakno komo, on wara kesî Kporin komo awya so, Xerusaren pono komo ya. Kanan pono komo chew mewruyakn̂e. Amohew komo xatken̂e aporin pen wara, Etew komo xatken̂e anocwan pen wara hara.

4 Awewrutoponhîrî po apon̂wetîthîrî awotora xakn̂e. Akorokara marha xatken̂e cukuywe ke kir̂wan̂he awehtome. Yîmîtî ke sekeseke kahra xatken̂e apun pore. Awomtora marha xatken̂e poono ke.

5 Apînîn yawra ro mak xatken̂e iitono komo. Ockon̂e, kahra ro mak xatken̂e apoko. Ero ke apon̂wetîthîrî awotora xatken̂e, akorokara marha xatken̂e. Woskara pona xa matko awar̂metken̂e okwe. Awîrîyaketken̂e mak okwe awewrutoponhîrî po kaamo po.

6 Ero yimaw itoxari kîwcekn̂e Ow hara. Keen̂akn̂e takî, akamxukuthîrî chew rma awehmamarî ween̂akn̂e. Iito rma awexitaw akamxukuthîrî chew rma on wara wîîkekn̂e awya, Waipîra cik esko okwe, wîîkekn̂e awya. Yaaro, waipîra cik esko okwe, wîîkekn̂e. Ero wa wîîkekn̂e awya.

7 Kpor̂mamnoyakn̂e naatî wara rma, mararî pono wara. Mîpor̂mamyakn̂e tak cetîtîkaxi ro. Cenpore xa tak mîxakn̂e. Tmanatke tak mîxakn̂e. Kaw tak xakn̂e ahpoci. Ponomra ro makî tko mîxakn̂e okwe.

8 Ero yinhîrî ahyari kmokyakn̂e hara. Keen̂akn̂e tak. Cetîtîkaxi tak keen̂akn̂e. Ciin̂ontaxmu me tak mîxakn̂e. Ero ke oponon mapirî ke tak kpononcekn̂e ponomra ro mak exihra awehtome. Opici me tak kahsîyasî, eroromero kahsîyasî, wîîkekn̂e awya. Yaaro xa wîîkekn̂e towîhnî me ro mak. Apici me wasî, mîîkekn̂e amoro hara, yaaro cma re mîîkekn̂e. Ero ke opici me tak mîxakn̂e.

9 Kîhyakn̂e tak tuuna ke. Akamxukuthîrî korokekn̂e. Akorokache apun wîkapekn̂e.

10 Poono tak wamrupekn̂e awya kir̂wan poono, tporokyem. Ahtarî marha wamrupekn̂e awya, wiir̂a picho warai mîn ahtarî wamrupekn̂e awya. Kir̂wanî ro ke kpononcekn̂e riin̂u kahxapu ke, cepethîkem ke okre.

11 Kporokucekn̂e marha okre. Awemeknarî wîmyakn̂e awya yaake, awarî marha.

12 Awewnar̂akan marha wîmyakn̂e awya emekna warai. Apanatarîn marha wîmyakn̂e. Karokocekn̂e marha okre.

13 Ero wa tak mîxakn̂e, tporokye mîxakn̂e ooru ke, prata ke marha. Riin̂u kahxapu xakn̂e aponon. Cepethîkem yaw mîxakn̂e poono yaw. Tporokye marha xakn̂e aponon. Puruma aposokaxapu marha xakn̂e awru, ween xakn̂e an̂emerî. Aseci ke anahrî mîpoxurekn̂e okre. Cenpore xa tak mehtîkekn̂e okre. Kayaritomo pîci me tak mîxakn̂e okre.

14 Ero ke miya so mekaiwakn̂e. Cenporem me awehtopo n̂encetken̂e mîk hak rowon pono komo. Kir̂wanî ro me oyehtopo rma wîmyakn̂e awya kir̂wan̂he xa tak awesenpotome, wîîkesî. Ero wara wîîkes awya Ow Aporin, Kaan ha.

15 On wara tko mîxakn̂e okwe, cenpore xa awehtopo pona tak meen̂akn̂e okwe. Cekaiporesom xa ow ham. Ero ke mîk hak poko tak wasî, mîîkekn̂e tak okwe. Mîk hak mak mahsîyakn̂e ahyari tîtosom kom ha.

16 Apononthîrî rma miir̂akn̂e awacan me îh pono me. Cucurem ke, tîswayem ke, tîxewekem ke, ero warai ke awacan mîporokucekn̂e. Ero yaw so tak mîk hak poko mîxakn̂e kica. Ero wara exihra ro mak cexpore nasî, pîra ro mak okwe.

17 Aporokuthîrî marha miir̂akn̂e anarme. Onîmîtho mîn xakn̂e ooru, prata marha. Awya wîmyakn̂e. Ero tak miir̂akn̂e kîîrî warai me hara kica. Ero poko tak mepohketken̂e ro mak kica.

18 An̂irithîrî tak mîpononcekn̂e apononthîrî ke rma, tporokyem ke rma okwe. Aseci marha mîmyakn̂e yîwya so, kotoporem marha. Awya onmîtho mîn mîmyakn̂e an̂irithîrî ya.

19 Anaputhîrî marha mîmyakn̂e yîwya so awya onmîtho kica. Puruma aixapu, aseci, weenu, ero yipu mîmyakn̂e yîwya so kica. Ero yipu makn̂iyakn̂e kotoporem me an̂irithîrî tawakeretopo. Ero wa mîxakn̂e kica, wîîkesî. Aporin Ow Kaan ha.

20 On wara marha mîxakn̂e okwe, amrerî komo ciki mahsîyakn̂e, awemsîrî komo cik marha. Omxîkrî me rma tko mewruyakn̂e n̂examro mahsîyakn̂e. Noro yipu komo makn̂iyakn̂e an̂irithîrî ya tîmsom me kica. Kir̂wan̂he rma amna xakn̂e ero wara, mîîke ha ma re awya so?

21 Omxîkîtho penî rma mîkyam xatken̂e. Noro yipu komo makn̂iyakn̂e okwe an̂irithîrî ya tîmsom me kica.

22 Ero wa mîxakn̂e kica. Kicicme ro mak mîxakn̂e kica. Mîk hak poko mîxakn̂e. Ero wara awexitaw rikomo me awehtoponhîrî ponarora ro mak mîxakn̂e. Ero yimaw ponomra ro mak mîxakn̂e. Mehmamekn̂e mak akamxukuthîrî chew rma okwe. Ero wara awehtoponhîrî ponarora mîxakn̂e okwe.

23-24 Metwîrîmesî ro mak amn̂e, metwîrîmesî ro mak okwe. Anarmerpan poko mîxakn̂e kica kicicitho poko. Ero yinhîrî tak on wara mîxakn̂e hara, roowo menmekyakn̂e mîn hak yaw so ewto yesamarî yaw so. Ero mko meretwo so makîhcekn̂e mîk hak ya tîmsom yakn̂itopo.

25 Ero yipu makîhcekn̂e esama yaw so watohnî me ro makî. Cenporem me rma mîxakn̂e. Cenporera tak awen̂atken̂e anarî yana komo. Metîmyakn̂e mer̂pono pîn komo ya, ahyari mohxapu komo ya.

26 Exitu pono komo ya metîmyakn̂e yipici wara. Amîtwono komo mîkyam, mîk hak poko cepohkaxmu komo kica. Mîk hak pokono me mehtîkekn̂e. Ero wa Ow mîrwonmekyakn̂e ro mak kica.

27 Ero ke awemetanmekn̂e me tak wîxakn̂e. Wahra mak tak anahrî wîmyakn̂e awya. Kahsîpekn̂e tak aaxatî pîn komo ya, Piristew yemsîrî komo ya. Kica, ketken̂e tko n̂examro apoko. Awîrîyaketken̂e kicicme xa awexirî ke.

28 Erepotan me ro mak mîxakn̂e. Ero ke Asiriu komo poko mîxakn̂e wooxam wara, kîîrî pohkan̂e ro wara. Wara rma erepotara rma mîxakn̂e okwe.

29 Kawtew komo poko marha mîxakn̂e kica, meyeno komo ya. Twarawantaxmu komo mîkyam. Wara rma erepotara rma mîxakn̂e hara okwe.

30 Kar̂pera ro mak nai ham okwe aropotarî, wîîkesî. Aporin Kaan Ow ha. Kar̂pera awehtopo menpesî mîk hak ya awetîmrî ke kica. Kicicitho ow ham kica, kan̂e pînî ro mak amoro, aano yai rono rma okwe.

31 Ponaro awehtopo mîn mîîr̂akn̂e esama mapitaw so watohnî me ro mak. Noro yipu komo ya tîmsom yakn̂itopo marha makîhcekn̂e esama yaw so. Kîîrî pohkan̂e ro pîn komo warahra tko mîxakn̂e. Ow epemakî opoko awehtome so, kahra mîxakn̂e amoro reha.

32 Kîîrî pici warai xa matko amoro, ciin̂o yairono warai okwe.

33 On wara naxe tweno pîn komo, wooxam komo, Ow epemakî opoko awehtome tak, kexe. Ero warahra mîxakn̂e amoro reha. Yiixe awehtopo komo mepemekn̂e amoro reha. Tanhamyan komo rma mepemekn̂e awenaka mohtome so.

34 Mîk hak ya awetîmyataw anarî komo warahra mas amoro, tweno pîn komo warahra. Tanme ro so epohkara naxe apoko. Tooto mepemesî awenaka mohtopo yepetho. Awepemara ro mak naxe awenaka tmohsom komo reha. Ero wara mas amoro reha okwe.

35-36 Ero ke on wara wîîkes awya, Aporin Ow, Kaan ha. Cikicicintaxmu ro mak amoro. Ponomra mesenpekn̂e mîk hak ya kica, yiixe awehtopo komo ya ha. Kicicitho ro mak miir̂atken̂e ponaro awehtopo komo. Ero yipu ya rma mîmyakn̂e amxîkîthîrî komo kamxukutho okwe.

37 Ero ke on wara tak kiir̂asî, ahnoro yiixe awehtoponhîrî komo wekpesî ahyaka, poko so mepohkekn̂e n̂examro. Yiixe awehtoponhîrî komo wekpesî, yiixera awehtoponhîrî komo marha. Mehxarpa n̂examro wekpesî awaparî me so okwe. N̂examro wero ro tak kpononkesî. Ponomra ro mak awehtopo tak n̂een̂axe.

38 Ero yinhîrî tak ken̂ekesî. On wara wîîkes awya, Cemetanmekpore xa naxe wooxam komo, ciin̂o pîn pokono ro komo, waihkano rin̂e komo marha. Ero ke ero wa cemetanmesom me tak mas amoro hara, wîîkesî tak awya. Anwaikathîrî komo wepanîyas, tîrwon̂e xa tak wepanîyasî. Awewyomacho ke marha kîrwonasî apoko.

39 Ero yimaw kar̂mapesî yiixe awehtoponhîrî komo ya. N̂examro tak n̂ixkexe an̂irithîrî mîntho. Ponaro awehtopo ya tîmsom yakn̂itoponho marha n̂ixkexe, îîpî meretwononho mko. Apononketîkexe, aporokuthîrî naar̂axe cepethîkem okwe. Iito kr̂a tak anomyaxe ponomnî me ro mak okwe.

40 Sowtatu komo n̂ekyaxe awaparî me mer̂pono pîn komo. N̂examro tak awetapexe toh ke oko. Aparaxkexe marha kacipara imo ke okwe.

41 Amînthîrî komo nakn̂iyaxe. Miyan ke rma awemetanmekyaxe wooxam komo wero ro, mer̂pono pîn komo wero ro. Kporohkesî tak poko awehtoponhîrî komo yaka tohra ro mak tak awehtome. Kîrkomo yepemara tak masî awenaka tmohsom komo.

42 Ero yinhîrî tak ketîrwoxinkesî tak apoko. Tîrwon̂e awewyomachonhîrî ponarora tak was hara. Eserepokara tak wasî ero yimaw, yîrwomra marha. Ero wara wasî.

43 Ero wara men was apoko. Emasî me ka awehtoponhîrî ponarora ro mak mîxakn̂e. Mîk hak poko awehtopo ke Ow mîrwonmekyakn̂e okwe. Ero ke akanakatapan̂e wara wasî kicicme awehtoponhîrî yepetho me oko. Ero yimaw tak kicicme awehtoponhîrî yîhremara tak esko mîk hak ya awetîmtopo ke hara kica, wîîkesî. Ero wa wîîkes Ow, Aporin, Kaan ha.

44 On wara naxe anarî komo, poritomo penî mtapotachonho nukukmexe. Ero yipu kukman̂e komo nîmtapowaxe apoko marha. On wara kexe apoko, poritomo penî mtapotachonho ha, Tînocwan yehtoponho yaw roro rma nasî emsîrî hara, kexe apoko.

45 Yaaro ero wa kexe apoko, anocwan pen yemsîtho me ro mak maxe. Ciin̂o xera ro mak xakn̂e anocwan pen komo, tîmxîkîthîrî komo xera marha xakn̂e okwe. Awakno komo yakno ro me marha mai ham. Ciin̂o xera ro mak xatken̂e awakno komo, tîmxîkrî komo xera marha xatken̂e. Etew komo mîkyam xatken̂e anocwan pen komo. Amohew komo mîkyam xatken̂e aamo pen hara.

46 Samaria pono mîk xakn̂e awakno, poturu ha. Nohce n̂ixa xakn̂e noro yeken. Iito xakn̂e cemsîrî komo yakro. Sotoma mîk xakn̂e awakno hara. Suu n̂ixa xakn̂e noro yeken hara. Iito xakn̂e noro cemsîrî komo yakro.

47 Kicicme rma re xakn̂e anocwan pen, awakno komo marha. N̂examro warahra tko mîxakn̂e amoro reha. Wahra meen̂akn̂e ham kicicme n̂examro yehtoponho. N̂examro yopo tak mîxakn̂e amoro kicicme xa tak okwe. Ahce na poko awexitaw kicicme ro mak mîxakn̂e okwe.

48 On wara wîîkes Ow, Aporin komo Ow, Kaan ha, yaaro wîîkesî, waipîn me ro mak wasî, kacho wara rma nasî tan omtapotarî. Kicicme rma re xakn̂e awakno Sotoma, noro yemsîrî komo marha. Awarara tko xatken̂e n̂examro. Kicicme xa tak mîxakn̂e amoro reha awemsîrî komo yakro.

49 Enko xe, on wara xakn̂e awakno Sotoma, kicicme ehtoponhîrî ha. Cehcoyoponkaxmu me xatken̂e noro cemsîrî komo yakro. Yînahpen̂e marha xatken̂e, nuwun̂watken̂e marha miya xe ro mak. Emyawnomnî komo yakronomara marha xatken̂e, yînapumnî komo yînahmara marha xatken̂e okwe.

50 Cehcoyoponkaxmu me xatken̂e kica. Kicicitho poko marha xatken̂e owero ro. Ero ke n̂examro pen Ow waihkekn̂e.

51 Kicicme rma re xakn̂e Samaria. Kicicme awehtoponhîrî xawyakan me rma tko xakn̂e noro yehtoponho. Kicicme xa tak mîxakn̂e awakno yopo ro mak okwe. Kicicme xa tak awexirî ke takîhsom wara rma awakno komo menpes hara.

52 Awakno komo mîwîrîyakekn̂e. Ero ke awîrîyakacho tak yînîmko kicicme xa awexirî ke n̂examro yopo okwe. Wara n̂he naxe n̂examro kir̂wan̂he ayopo. Ero ke ahyapamko tak amoro, awîrîyakacho mak yînîmko. Kicicme xa awexirî ke awakno komo menpesî takîhso n̂he ha re.

53 On wara xatken̂e Sotoma pononho pen komo, waapa narîtho me xatken̂e anarî komo. Noro yemsîtho komo yakro rma xatken̂e waapa narîtho me. Ero wa xa marha xatken̂e Samaria pononho pen komo, noro yemsîtho pononho pen komo marha, waapa narîtho me xatken̂e. Pahxaro tko n̂examro wekyas hara ekenhîrî komo pona hara. N̂examro yakro rma awewton pononho komo wekyas hara waapa narîthonhîrî komo.

54 Ero wara kwakrexe so awehtoponhîrî yîwîrîyakachome tak awya, ahyapamtome marha awehtoponhîrî pona kopi. N̂examro mîhyapamhokekn̂e ha re kicicme awehtoponhîrî yenporî ke yîwya so.

55 Pahxaro tak awakno komo naxe cehtoponhîrî komo yaw roro hara. Ero wara naxe Sotoma, emsîrî komo yakro rma. Ero wa xa marha naxe Samaria hara, noro yemsîrî komo yakro rma. Ero yimaw ero wara xa marha maxe amoro hara, awemsîrî komo yakro rma. Awehtoponhîrî komo yaw roro xa marha maxe amyamro hara.

56 Pahxa cehcoyoponkaxmu me awexitaw awakno Sotoma poko amtapota xera ro mak mîxakn̂e.

57 Ero wa mîxakn̂e esenpora ka exitaw kicicme xa awehtoponhîrî. Oroto tak awîrîyakexe Siriu kom hara, yîmîtwono komo marha. Piristew yemsîrî komo marha awîrîyakexe. Ahnoro amîtwono komo awîrîyakexe oroto.

58 Mesemetanmekyasî xa tak amn̂e kicicme ro mak awehtoponhîrî yepetho me okwe. Ero wa wîîkes Ow Aporin kom ha.

59 On wara men wîîkes awya, Aporin Kaan Ow ha, Yaaro kemetanmekyasî kicicme awehtoponhîrî yaw roro rma. Yaarono me cma re mîmtapowakn̂e omtapotachonho yewetîtopo poko. Omtapotachonho tko mîwîrîyakekn̂e kica, ewetîra mîxakn̂e okwe. Ero ke kemetanmekyasî.

60 Wara rma awakro kîmtapowakn̂e emasî me ka awexitaw, awakronomacho poko kîmtapowakn̂e, Ero ke ero wara omtapotachonho ponaro rma wasî. Amn̂e tak kîmtapowasî xa hara awakronomacho poko. Eroromerono poko tak kîmtapowasî.

61 Ero yimaw kicicme awehtoponhîrî tak mîhtînoyasî. Mîhyapamyasî marha tak awakno komo mokuche ahyaka. Ero warai komo mokyaxe ahyaka, apoturu komo, axawyakan komo marha. N̂examro wîmyas awya awemsîrî me. Pahxa kîmtapowakn̂e awakronomacho poko ero wa kachonho yanmera rma tko n̂examro wiir̂asî awemsîrî me.

62 Ero yimaw kîmtapowasî xa hara awakronomacho poko. Kporin komo xa Mîk ham, mîîkexe tak opoko ero yimaw.

63 Ero yimaw kicicme awehtoponhîrî yîhcamnopîra masî. Ero pona mîhyapamyasî. Tîtken̂e tak masî miya roro ahyapamnotoponhîrî yîhtînorî ke mak awya. Ero wara tak masî amn̂e kicicme awehtoponhîrî yahruyataw owya, wîîkesî. Aporin Kaan Ow ha. Ero wara wîîkesî.