1-2 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, on wara wîîkes hara awya, anarî pokono warai ekatîmko Ixaw Yana komo n̂entarî me. N̂examro panatanmetopo me ekatîmko.

3 On wara kasko yîwya so, Ai, oyakno komo, on wara kesî Kporin komo Kaan awya so, Pahxa yaimo warai mokyakn̂e Ribanu pona. Porin mîk xakn̂e. Kar̂pe xakn̂e aporî. Kaw marha xakn̂e aporî poci. Mer̂pora xakn̂e noro poci, anarmerpa xakn̂e, tumutwe, cucure, cicwiye, anarmerpa xakn̂e yîhpoci.

4 Noro tak n̂etahsîyakn̂e setru yepu pona yarihtaka xa. Iitono tak naxikwekn̂e peremru. Axikwoche miya tak naar̂akn̂e twarawantaxmu komo rowon pona tînatîrî me. Iina tak n̂iir̂akn̂e twarawantaxmu komo yewton pona.

5 Ero yinhîrî iitono komo natîrî yatho nahsîyakn̂e noro, yaimo warai. Ero tak n̂iir̂akn̂e mararî pona ewtî mexan pona. Tuuna yecihtawno pona rma n̂iir̂akn̂e, sawkeru yepu cicir̂asî tuuna yecihtaka ero wara n̂iir̂akn̂e.

6 Natîkwakn̂e tak okre. Yatî me mak natîkwakn̂e kawno pîn me, miya so natîkwakn̂e roopore mak. Cin̂enhîrî wece rma natîkwakn̂e ero peremru. Yuhnaw rma xakn̂e yimicin. Ero wa por̂mamyakn̂e yatî porinme cehso ro. Tperemke xakn̂e, taake marha okre.

7 Ero yinhîrî anarî mokyakn̂e hara yaimo warai porin xa marha. Noro yaporî marha xakn̂e kar̂pe. Kir̂wan̂he marha xakn̂e noro poci hara. Ero ke noro wece makîrha cimicin kor̂mekn̂e yatî warai. Mooxe cimicin n̂ewkor̂mekn̂e noro wece cewtî ro poi. Owî cma re mîhyasî, kan̂e wara xakn̂e. Tperemru marha kor̂mekn̂e noro wece.

8 Ewtî mexan pona xakn̂e ciiso yaimo warai n̂iritho. Tuuna yecihtaw xakn̂e kir̂wan̂he por̂mamtome, epetachome marha. Ero wara xakn̂e yaimo warai n̂iritho.

9 Taa, on wara kasko Ixaw yana komo ya, On wara men kesî Kporin komo Kaan awya so, Ahce wa nai yaimo natîrî awya so? Kir̂wan̂he ma re por̂mamtîke awya so? Mohkara ma re nai ciin̂enhîrî yimicinthîrî meero? Eperîrî papupra ma re nai? Ero wa ciriche aawaipîra ma re nai awya so? Ahnoro atîkronthîrî waihyasî. Apehceme rma n̂emohkesî yimicinthîrî meero. Tapokaritî komo xera nai mohkan̂e, mer̂pono pîn komo xera marha nai ehn̂ara ehtome so mohkacho poko. Apehceme n̂emohkesî. Ero wara men nasî.

10 Iito nai ciiso. Ahce wa nai awya so, tahwore ma re natîkwa iito awya so? Ocowonataw amn̂e, resce n̂ixa ocowonataw naawaiyasî ro mak okwe. Ewtî mexan po ka natîkwakn̂e iito rma naawaiyas hara okwe. Ero wa men nasî yatî warai okwe.

11-12 Ero yinhîrî Kporin komo mtapotarî wencekn̂e xa hara. On wara kekn̂e owya, On wara kasko moxam ya, kanwekn̂e ro komo ya ha, Ai, oyakno komo, takîhso mentacow omtapotarî? kasko yîwya so. On wara marha kasko yîwya so, Pahxa n̂he Xerusaren pona cekn̂e Babiron̂a kayaritomon. Xerusaren pono komo kayaritomon naar̂akn̂e, n̂examro yantoman̂e komo marha. Babiron̂a pona naar̂akn̂e.

13 Ero yimaw marha anarî tak n̂iir̂akn̂e Xerusaren pono komo kayaritomon me. Kayaritomo pen komo yepamtho mîk n̂iir̂akn̂e. Ciriche on wara kamexpekn̂e noro ya, kayaritomo me ciixapu ya, Awewetîn̂e me wasî eroromero. Yaaro xa tan wîîkesî etowîn me ro mak, kamexpekn̂e yîwya. Ero yinhîrî Xuta yepamtho sowtatun komo naar̂akn̂e.

14 Antomano rin̂e pîn komo mak tak nînomyakn̂e iito, Kanme ro so mak cehcerî, kan̂e pîn komo mak ehtome iito. Oyewetîn̂e me mak tak na natu kir̂wan̂he cehtome so, kekn̂e. Ero wa kekn̂e Babiron̂a pono komo kayaritomon.

15 On wara tko n̂ehxe Xerusaren pono komo kayaritomon, Babiron̂a kayaritomon tak nanwekyakn̂e. Tmaywen komo n̂en̂epekn̂e Exitu pona. Kawaru yapontome n̂en̂epekn̂e, sowtatu yapontome marha mer̂pono pîn. Ero wa xakn̂e Xerusaren pono komo kayaritomon. Ahce wa nai awya, ehn̂ara ma re nai awya so? N̂etowya ma re noro ero wara ehxapu, Babiron̂a kayaritomon maywenînho? Tukurui ma re nai tîmtapotachonhîrî town̂enho ha? Pîra ro makî.

16 On wara wîîkes awya so, Aporin komo Kaan Ow ha. Waipîn me wasî, kacho wara rma nasî tan omtapotarî yaaro xa, Xerusaren pono komo kayaritomon men waihyasî Babiron̂a pono komo kayaritomon yeken po. Kayaritomo me cma re noro n̂iir̂akn̂e Babiron̂a kayaritomon. On wara kamexpekn̂e yîwya, Awewetîn̂e me wasî eroromero etowîn me ro mak, kamexpekn̂e yîwya. Tîmtapotachonhîrî nowyakn̂e okwe, Yaaro xa wîîkesî, kachonho rma. Ero pîntho me n̂een̂akn̂e tîmtapotachonhîrî kica. Ero ke Babiron̂a po waihyasî.

17 Mer̂pora rma re naxe Paraw sowtatun komo. Kar̂pe so marha naxe. Wara rma Xerusaren kayaritomon yakronomara naxe waparî komo mokuche. Ewto wacan yawnutopo n̂iir̂axe waapa komo, waaca marha n̂iir̂axe ewto pono komo wahkototopo. Ero warai n̂iir̂axe ewto pono komo waihkachome mer̂pono pîn pen komo okwe. Ero yimaw Xerusaren pono komo yakronoman̂e me exihra ro mak nasî Paraw okwe.

18 Ero pîntho me ro mak n̂een̂akn̂e tîmtapotachonhîrî. Nowyakn̂e kica. Babiron̂a kayaritomon yamorî meero nahsîyakn̂e yaaro xa kachome. Wara rma tîmtapotachonhîrî nowyakn̂e, Exitu pona n̂een̂akn̂e hara okwe. Ero ke n̂etwîrîmesî ro mak emahcin me thakwa okwe.

19 Ero ke on wara wîîkesî, Aporin komo Ow, Kaan ha. Waipîn me wasî, kacho wara rma nasî tan omtapotarî yaaro xa wîîkes on wara hara, omtapotachonho rma mîn xakn̂e, Awewetîn̂e me wasî eroromero. Etowîn me ro mak tan wîîkesî, kachonho ha. Omtapotachonho mîn nowyakn̂e. Ero ke noro kanakatapan̂e wara was oko.

20 Omîyen warai wiir̂asî noro yesamarî yaka. Ero yaka noro wemcinoyasî. Babiron̂a pona tak wekyasî. Iito tak noro wemetanmekyasî oyemîknon̂enho me exirî ke kica.

21 Noro sowtatun pen komo n̂emahciyaxe, waihyaxe marha kacipara nparaxkatho me. Etîmtoxapu komo n̂etakpayaxe miya so ro mak. Ero wa exiche so on wara mîîkexe, Kporin komo xa Mîk nîmtapowakn̂e ham kpoyino pen komo yîwîrîmacho poko, mîîkexe tak.

22 Taa, kîmtapowasî xa hara. Aporin komo Kaan Ow ha. On wara wîîkesî, Owî rma tak waxikwesî setru yepu yarihtawno xa. Ero wiir̂asî onatîrî me. Yarkwetkuru rma mîn waxikwesî yarihtawno xa. Ero wiir̂asî onatîrî me. Îh pona wiir̂asî kawno pona.

23 Ixaw Yana rowon pono pona rma wiir̂asî îh pona. Ero tak n̂eseknacesî, n̂eperwasî marha. Kir̂wanî ro me tak nas okre setru me. Ero peremru po n̂etahsîyasî mîk hak warai tarin̂em kom ha. Iito n̂enmayaxe on̂iritho yawarpanaw.

24 Ero yimaw on wara kexe ahnoro weewe yepu komo comota pono, Kawnonhîrî komo yaman̂e Mîk ham Kporin komo weewe yaman̂e. Kawno pînînhîrî reha natîkresî hara kaw xa tak. Taakemînhîrî n̂iir̂asî yîpîrîtho me okwe. Yîpîrîtho me ehxapunhîrî natîkres hara kaw xa tak okre, kexe. Ero wara rma men wiir̂as amn̂e. Aporin komo rma Ow ha. Ero wara wîîkesî.