1-2 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, on wara ketken̂e poritomo pen komo, Uupa nahce yîîm komo yupuyutho. Ero yanme rma yîmxîkrî yorî nasî kawawape ro mak kica, ketken̂e. Ero wa kacho rma mukukmexe amyamro Ixaw Yana komo poko. Ahce kacho ero wa mîîketu?

3 Aporin komo Kaan Ow ha. Waipîn me wasî, kacho wara rma nasî tan omtapotarî yaaro xa. On wara wîîkesî, ero yukukmara tak maxe amn̂e amyamro Ixaw Yana komo, wîîkesî.

4 Owyan me maxe ahnoro tooto komo, Yîîm nasî owyan me, yumumuru marha nasî owyan me. Etîme re naxe owyan me. Kicicme ehxapu komo makî reha waihyaxe.

5 On wara na nai anarî, takîhso na nai. Owya apanatanmetopo komo yaw roro na nai, takîhso ro mak na nai okre.

6 Îh po eseresmara na nai mîk hak ya tîmtopo mîtwo. Mîk hak pona n̂een̂axe Ixaw Yana komo ciixaputho pona, noro yipu pona enîhra tko na nai noro reha. Tîmîtwono pici yikicicirera marha nai. Wooxam pokohra ro mak nai roopo exitaw.

7 Emetanmekno cirihra ro mak na nai. Tpoyino yemyaka marha na nîmya tupurantanthîrî. Ahce na nahsîya ahsîn̂e yemyawno puranta yîramantome xa hara. Eronhîrî rma na nîmya hara osomunhîrî ya. Emyawnano poko en̂epamra ro mak na nai. Rooma pokono komo marha na nînahme, ponomnî komo marha na pononme.

8 Tupurantan marha na nîmya tpoyino komo ya, On men tîmko hara owya amn̂e, on poko awehtamci meero tîmko owya, kan̂e pîn me na nai. Kicicme exihra ro mak na nai. Tohnaw en̂ekano cirihra ro mak na nai.

9 Owya apanatanmetopo komo yaw roro mak na nai etowra. Omtapotarî mak na n̂ewehca, Ero wara men ehcoko, kacho. Ero wara exitaw roro noro kir̂wan̂he xa nai ham okre. Ero ke waipîra nasî, wîîkes Ow Aporin komo Kaan.

10 Taa, anarme ro makî tko na nai noro yipu mumuru hara. Cen̂epan̂em me na nai okwe. Waihkano rin̂e me marha na nai. Miyan poko rma na nai kicicitho poko.

11 Ero wa men ehcoko, kacho marha ewetîra na nai. N̂eseresme marha na îh po so, tîmîtwono pici marha n̂ikicicire.

12 Emyawnomnî komo marha na n̂emetanmekya, yupurantamnî kom ha. Emyawnano poko marha na n̂en̂epana. Tupurantan na nîmya tpoyino ya. Ahce na nahsîya tpoyino yai tupurantanthîrî yîramantome xa hara. Ero tko tîmîhra ro mak tak na nai hara osomunhîrî ya. Mîk hak warai me ciixaputho pona mak na n̂een̂a. Kicicitho pokono me na nai kica.

13 Tupurantan na nîmya tpoyino ya. On men yîramanko hara amn̂e, kesî. On poko awehtamci meero tîmko owya mer̂pora, kesî marha okwe. Ero wa na nai takîhsom mumuru hara okwe. Ahce wa nai noro awya, takîhsom mumuru ha? Waipîra ma re nai noro yipu? Waihyasî rma wa okwe. Ero yipu poko cexirî ke noro pen waihyasî. Tanme ro rma nasî twaihkaxmu me.

14 Ero yinhîrî noro mumuru na nai hara. Kicicme tîîm yehtoponho na n̂een̂a hara. Ero ke n̂esehtînoya tak na noro takîhso. Tîîm yehtoponho yukukmara ro mak tak na nai.

15 Eseresmara na nai îh po so. Mîk hak warai me ciixaputho pona enîhra na nai, Ixaw Yana komo n̂iritho pona. Tîmîtwono pici yikicicirera marha na nai.

16 Emetanmekno cirihra ro mak na nai. Tupurantan tîmyataw tpoyino yemyaka ero poko ehtamci etacira na nai. Emyawnano poko en̂epamra ro mak na nai. Rooma pokono komo marha na nînahme, ponomnî komo marha na pononme.

17 Yupurantamnî komo yemetanmekîra na nai. Tupurantan tîmyataw yupurantamnî ya on wara kahra marha na nai, On men yîramanko amn̂e. On poko awehtamci meero tîmko owya amn̂e, kahra ro mak nai. Owya apanatanmetopo komo yaw roro na nai. Omtapotarî mak na n̂ewehca, Ero wa men ehcoko, kacho. Ero wa na nai noro mumuru, kicicitho mumuru. Waipîra tko nasî noro yipu tîîm yehtoponho yanme. Twaihkaxmu mera ro mak nasî.

18 Noro yîîmî reha waihyasî kicicme cehtopo ro yepethome. Emetanmekno n̂iir̂akn̂e cerewre ro mak. Emyawnano poko n̂en̂epanakn̂e. Tpoyino wero ro kicicme ro mak xakn̂e. Ero wara cehtopo yanme noro pen waihyasî.

19 On wara tko mîîkexe amyamro, Ahce kacho kicicme yîîm yehtoponho cirihra nai Kaan yumumuru pona hara? On wara keyukyaxe so, Takîhso nasî yumumuru. Owya apanatanmetopo komo ponaro nasî, ewetîn̂e me marha nasî. Ero wa cexirî ke waipîra nasî.

20 Kicicme ehxapu makî reha waihyasî. Kicicitho me amumuru komo yenîhra wasî yîîm yehtoponho yanme. Kicicitho me enîhra marha wasî yîîm komo yumumuru komo yehtoponho yanme hara. Kir̂wan mîkro, wîîkesî kir̂wan poko. Kicicitho mîkro, wîîkesî kicicme cehsom komo poko hara.

21 On wara tko nasî kicicme ehxapunhîrî kicicme cehtoponhîrî na nahsîpînke. Owya apanatanmetopo komo tak n̂ewehca, kir̂wan̂he tak nai. Ero wara cexitaw waipîra nas okre.

22 Kicicme ehtoponhîrî wîhcamnoyasî ahnoro. Kir̂wan̂he cexirî ke tak waipîra nasî.

23 On wara wîîkes Ow, Aporin komo, Kaan ha, Tawake ma re wai awya so kicicitho pen waihyataw? Tawake xa matko wasî kicicme cehtoponhîrî yahsîpînketaw waipîra tak cehtome.

24 On wara na nai kir̂wanînhîrî hara, kir̂wan̂he cehtoponhîrî tak na nahsîpînke. Kicicitho pokono me na nai hara kica kicicme ehxapu komo wara rma, yiixera ro mak oyehtopo poko na nai. Ero wa cexitaw waipîra ma re nai awya so? Waihyasî rma men. Kir̂wan̂he ehtoponhîrî wîhcamnoyasî ahnoro. Kicicme cexirî ke waihyasî, kicicme cexîrî ke ha.

25 On wara tko mîîkexe amyamro, Kir̂wan̂he exihra rma tko nasî Kporin komo, mîîkexe. On wara wîîkes awya so Ixaw Yana komo ya, Kir̂wan̂he exihra ma re wai awya so? Kir̂wan̂he exihra xa matko maxe amyamro kica.

26 On wara na nai kir̂wanînhîrî, kir̂wan̂he cehtoponhîrî na nahsîpînke. Ero wara cexitaw waihyasî men okwe. Kicicme cehtoponhîrî yepetho me rma waihyasî.

27 On wara marha na nai kicicme ehxapunhîrî hara, kicicme cehtoponhîrî na nahsîpînke. Kir̂wan̂he tak na nai hara takîhso mak, apanatanmetopo komo n̂ewehca. Ero wara cexitaw waipîra rma nasî.

28 Kicicme cehtoponhîrî poko na n̂esehtînoya, hara nahsîpînke marha. Ero wara cexirî ke waipîra nasî.

29 Wara rma on wara mîîkexe amyamro Ixaw Yana komo, Kir̂wan̂he exihra nasî Kporin komo, mîîkexe okwe. Kir̂wan̂he was Owî reha. Amyamro xa matko maxe kir̂wan̂he exihra okwe. Ero wara maxe amyamro Ixaw Yana komo.

30 Ero ke on wara wîîkes awya so Ixaw Yana komo ya, Aporin komo Kaan Ow ha, ken̂ekexe so kicicme awexitaw so. Kir̂wan̂he awexitaw so reha ero wara awehtopo komo marha wetahcasî. Ero ke kicicme awehtoponhîrî komo tak poxunkacoko. Kicicme awehtoponhîrî komo ahsîpînkacoko cetwîrîmaxmu me exihra tak awehtome so.

31 Kicicitho poko awehtoponhîrî komo ahsîpînkacoko. Yaxan tak ahsîcoko aropotarî komo, awekatî komo marha ahsîcoko yaxan ha. Ahce kacho twaihkaxmu me matu okwe amyamro Ixaw Yana komo?

32 Tawake exihra ro mak wasî tooto waihtopo poko, pîra ro mak, wîîkesî. Aporin komo Kaan Ow ha. Ero ke awehtoponhîrî komo poxunkacoko waipîra awehtome so, wîîkesî. Ero wara wîîkesî, kekn̂e Kporin komo owya.