1-2 On wara marha kekn̂e Kporin komo owya, Ai, Esekiew, Ixaw Yana yantoman̂e pen komo pînîn yaw awratacho tak mewreko. On wara kacho mewreko, Ai, Ixaw Yana komo, reaw wara xakn̂e anocwan, woosî wara. Noro n̂etîrapekn̂e reaw komo chew, kar̂pamxan warai komo chew. Tîmxîkrî komo por̂mamnoyakn̂e.

3 Cewn̂e tak men̂ekekn̂e tîmxîkrî tînpor̂mamnorî me. Kar̂pe tak n̂ehtîkekn̂e noro. Totowaxmu me tak xakn̂e. Tooto pen marha non̂ekn̂e.

4 Ero yinhîrî noro yehtopo tak n̂encetken̂e mîk hak rowon pono komo. Ero ke noro pen tak nahsîyatken̂e ewtarî yaka, tînahtothîrî komo yaka. Ahsîche noro pen tak naar̂atken̂e Exitu pona. Kanawa mici warai ke noro nîhremiyatken̂e iina aatome.

5 Ero ke ahwora xakn̂e reaw yon. Totowaxmu me exihra tak nai ham okwe omxîkîtho pen, kekn̂e. Ero ke anarî tak por̂mamnoyakn̂e hara tîmxîkrî. Kar̂pamxan warai me por̂mamnoyakn̂e.

6 Reaw komo yakro n̂etar̂akn̂e yîmxîkrî por̂mamnoxapu. Kar̂pe tak xakn̂e. N̂ehcamhokekn̂e tootî yahsîtopo poko. Tooto pen komo marha non̂ekn̂e.

7 N̂examro kayaritomon komo mîn n̂een̂akn̂e. Ewtotho me mak n̂iir̂akn̂e ewton komo. Pohnî me mak xakn̂e roowo noro yanme. Mîn hak pono komo n̂eraswatken̂e noro mtapotarî yencetaw, hihihi kacho yencetaw. Ero wa xatken̂e roowo pono komo.

8 Ero yinhîrî noro waparî me tak mokyatken̂e mîk hak rowon pono komo, yîmîtwono komo rma. Tîmîyen komo n̂iir̂atken̂e noro yesamarî yaka emcinotome. Ewtarî yaka xa noro pen nahsîyatken̂e, tînahtothîrî komo yaka.

9 Kanawa mici warai ke tak noro pen marha nîhromiyatken̂e. Kayora yaka nahruyatken̂e. Ero yaw tak naar̂atken̂e Babiron̂a kayaritomon yaka. Ero yinhîrî kahrutopo yaka tak noro pen nahruyatken̂e okwe. Noro mtapotarî esentara takî xakn̂e îh po so, Ixaw Yana rowon pono po so ha. Ero wa xakn̂e reaw xîkîtho pen okwe.

10 Taa, on wara marha xakn̂e anocwan komo, uupa yatî wara xakn̂e anatîrî komo wara. Tuuna yecihtawno wara xakn̂e. Iito cexirî ke tperemke so xa xakn̂e, n̂eperwakn̂e marha okre.

11 Cewaxke xa xakn̂e peremru. Kayaritomo yamoyin me ciisom me xakn̂e peremru okre. Kaw xa natîkwakn̂e weewe peremru yopo. Mooxe n̂esen̂akn̂e kaw xa exirî ke, mer̂pora exirî ke peremru marha.

12 Ero rma mohketken̂e tîrwon̂em komo. Roowo pona nar̂metken̂e. Nuskuruminwakn̂e marha eperîthîrî ocowo ke, resce n̂ixan ke. Eperîthîrî n̂emaraketîkekn̂e okwe. Peremthîrî tak nasî yîpîrîtho me cewaxkemînhîrî penî rma okwe. Ero yinhîrî n̂ecakyakn̂e naatî peremtho okwe.

13 Oroto on wara tak nasî ero uupa yatî warai, meye tak nasî ciiso hara turpem pona roowo pona. Iina mokuhra nasî tuuna okwe.

14 Iito exitaw wehto tak n̂etahsîyakn̂e ero peremru poko. Miya tak n̂esenmamyakn̂e wehto. Uupa warai yeperîtho tak n̂ecahtîkekn̂e okwe. Cewaxkem exihra tak nasî peremru kayaritomo yamoyin me ciisom exihra okwe. Ero wa nasî uupa yatî warai okwe. Taa, ero wa nasî awratacho komo. Ero yukukmacoko awracetaw so, kekn̂e. Ero wa kekn̂e Kporin komo owya.