Ero yinhîrî ohyaka tak mokyatken̂e Ixaw Yana poritomon komo yaake n̂he. 7 cimn̂ipu xakn̂e waapa nahsîtho me amna yehtoponho. 5-nhîrî nuun̂i po mokyatken̂e, 10-înhîrî kaamo po mokyatken̂e. Kporin komo mtapotarî yentaxi tî mokyatken̂e. Oyepatai n̂eremetken̂e.

2-3 Ero yimaw Kporin komo mtapotarî wencekn̂e xa hara. On wara kekn̂e owya, Ai, tooto xîkrî, amtapotakî n̂examro yakro, Ixaw Yana poritomon komo yakro. On wara kasko yîwya so, Ai, oyakno komo, on wara kesî Kporin komo Kaan awya so, Omtapotarî yentaxi mîmohcow ha? Omtapotarî yentamexpora tko was awya so, kesî Noro, kasko yîwya so.

4 Tooto xîkrî, amoro rma na n̂examro men̂eke? Kicicme ehtopo komo mekatîmya yîwya so? Taa, kasko rma. Wara rma kicicitho me ro mak n̂examro porin pen komo yehtoponho marha ekatîmko yîwya so.

5 On wara kasko yîwya so, Ai oyakno komo, on wara men kesî Kporin komo Kaan awya so, Pahxa Ixaw Yana komo men̂ekekn̂e Ow oyanan komo me. Xako yepamtho komo ya oyehtopo wenpekn̂e Exitu po exitaw so. On wara wîîkekn̂e yîwya so, Aporin komo Ow, ponaro awehtopo komo. Yaaro xa ero wa wîîkekn̂e etowîn me ro mak. Kapockanwakn̂e, Yaarono tan omtapotarî ha, kacho kuknon me.

6 On wara marha wîîkekn̂e yîwya so, Exitu pono komo chewnonho tak kaar̂axe so miya anarî roowo pona hara. Mer̂pora nasî paaka mown iito. Mer̂pora marha nasî ween iito. Tuuna yepu wara ro mak nasî mer̂pora. Cenporem xa mîn roowo anarî roowo pono komo yeserepokacho xa mîn ha. Ero yipu wepor̂akn̂e roowo aweken komo me. Iina tak kaar̂axe so. Yaaro xa tan wîîkesî. Kapockanwasî, yaarono xa tan omtapotarî, kachome, wîîkekn̂e yîwya so.

7 On wara marha wîîkekn̂e yîwya so ero yimaw rma, Kicicitho tak men ar̂macoko pona entoponhîrî awya so. Etwîrîmara tak ehcoko mîk hak warai me ciixaputho poko, ponaro Exipsiu komo yehtopo poko. Ow mak Aporin komo, ponaro awehtopo kom ha, wîîkekn̂e yîwya so.

8 Omtapotarî tko nanwekyatken̂e n̂examro aporin pen komo okwe. Oyewetîra xatken̂e. Kicicitho mko yar̂mara rma xatken̂e okwe, pona entoponhîrî tîwya so. Ciixaputho yar̂mara xatken̂e, ponaro Exipsiu komo yehtopo. Ero ke on wara wîîkekn̂e, N̂examro pen poko tak kîrwonîmtîkesî ro ma kî. Tan Exitu po rma n̂examro wemetenmekyasî tîrwon̂e rma, wîîkekn̂e cma re.

9 Oyosotî ponaro tko wîxakn̂e. On wara wîîkekn̂e, N̂ewrexe men okwe Xenciu komo opoko, yîchew so naxe oyanan komo n̂examro n̂ewrexe okwe. Oyanan komo yîwîrîmache n̂examro wero ro n̂ewrexe opoko. N̂examro ya rma tko oyehtopo wenpekn̂e Ixaw Yana komo yarîrî ke Exitu poi, wîîkekn̂e.

10 Ero ke Ixaw Yana komo waar̂akn̂e Exitu poi. Pohnîntaka waar̂akn̂e.

11 Iito tak owya panatanmekno ritopo wekatîmyakn̂e yîwya so. Ero wa men ehcoko waipîra awehtome so, kacho wekatîmyakn̂e yîwya so.

12 Oyepokaretopo mko marha wîhtînomexpekn̂e yîwya so. Ero po so men epokarecoko, Kporin komo xa nasî ponaro xa kehtopo komo, kacho ponaro awehtome so. Kporin komo xa nasî kir̂wan̂he kiin̂e me, kan̂e me marha awehtome so epokarecoko ero po so, wîîkekn̂e yîwya so.

13 Oyanwekyatken̂e rma tko Ixaw Yana komo pohnîntaw cexitaw so. Owya tpanatanmetopo komo nanwekyatken̂e okwe, Ero wa men ehcoko, kacho owya. Apanatanmetopo komo yewehcataw waipîra maxe okre, kachonho nîwîrîyaketken̂e okwe. Kicicme ro mak xatken̂e oyepokaretopo po so. Ero ke on wara wîîkekn̂e, N̂examro tak men war̂mesî ro mak tîrwon̂e xa. Axawa imo po rma n̂examro pen waihkesî ahnoro, wîîkekn̂e cma re.

14 Oyosotî ponaro rma tko wîxakn̂e. Xenciu komo wero ro Ixaw Yana komo wekyakn̂e Exitu poi. Ixaw Yana pen komo waihketaw ponan̂e rma noro pîntho me tak oyen̂axe okwe, wîîkekn̂e. Ero wa oyenîra ehtome so waihkatîkano cirihra wîxakn̂e.

15 Taa, axawa imo po exitaw so on wara wîîkekn̂e yîwya so, Arowon komo cma re wîmyakn̂e awya so. Kir̂wan mîn roowo, paaka mownu ken̂arî xa, weenu ken̂arî marha mer̂pono pîn ken̂arî. Cenporem xa mîn roowo anarî roowo pono komo yeserepokacho xa mîn ha. Wara rma ero pona awarîra so tak men was okwe. Yaaro tan wîîkesî, wîîkekn̂e yîwya so. Kapockanwakn̂e, Yaarono tan ha omtapotarî, kacho yîhtînomexpotome yîwya so.

16 Ero wa porohkano wiir̂akn̂e owya tpanatanmetopo komo yewetîra exirî ke so. Ero wa men ehcoko, kacho nanwekyatken̂e okwe. Oyepokaretopo marha nîwîrîmetken̂e kica. Mîk ha warai me tîn̂irithîrî komo ponaro mak xatken̂e okwe. Ero ke n̂examro porohkekn̂e.

17 Yîpînîn yaw so rma tko wîxakn̂e. Ero ke n̂examro waihkatîkara rma wîxakn̂e axawa imo po.

18 On wara mak wîîkekn̂e n̂examro xîkrî komo ya, Ai, okopuci komo, aporin komo ya apanatanmetopo komo ewetîra ehcoko, Ero wa exihra ehcoko, kacho yîwya so. N̂examro n̂enporitho poko marha etwîrîmara ro mak ehcoko.

19 Aporin komo Ow ha, ponaro awehtopo komo. Owya apanatanmetopo komo men ewetîcoko.

20 Oyepokaretopo po awemyawno komo pokohra ehcoko, Kaan yanan komo xa kîwyam, kacho ponaro awehtome so. Ero wa awexitaw so tak on wara mîîkexe opoko, Kporin komo xa Mîk ham, ponaro kehtopo komo, mîîkexe.

21 Oyanwekyatken̂e rma tko yîmxîkrî komo meero. Owya tpanatanmetopo komo yewetîra xatken̂e. Ero wa men ehcoko waipîra awehtome so, kacho nanwekyatken̂e okwe. Oyepokaretopo nîwîrîmetken̂e okwe. Ero ke on wara wîîkekn̂e xa hara, N̂examro pen men wemetanmekyasî tîrwon̂e xa okwe. Ero wa orwon wenatkesî wîîkekn̂e cma re.

22 Wara rma waihkano cirihra rma wîxakn̂e akpîn me oyenîra ehtome so Xenciu komo. Xenciu wero ro Ixaw Yana komo waar̂akn̂e Exitu poi. Oyosotî yîwîrîyakara ehtome n̂examro waihkara rma wîxakn̂e.

23 On wara tko wîîkekn̂e yîwya so axawa imo po exitaw so, Ai, Ixaw Yana komo, miya so tak kakpayaxe so Xenciu komo chere, mîk hak rowon pona so, wîîkekn̂e. Yaaro xa ero wara wîîkekn̂e towîhnî me ro mak. Kapockanwakn̂e, Yaarono tan ha omtapotarî, kacho yentachome yîwya so.

24 Ero wara wîîkekn̂e yîwya so owya tpanatanmetopo komo yewetîra exirî ke so. Ero wa men ehcoko, kacho nanwekyatken̂e. Oyepokaretopo marha nîwîrîmetken̂e okwe. Ciixaputho pona marha n̂een̂atken̂e ponaro tporin komo yehtoponho pona. Ero wa xatken̂e okwe.

25 Ero ke on wara wîxakn̂e Ow hara n̂examro poko, kir̂wan pîn Ow mewrepekn̂e yîwya so panatanmekno ritopo. Ero wa ehcoko, kacho mewretken̂e n̂examro kayaritomon komo, kicicitho pokono rma kica. Ewetîra ro mak cehsom mewretken̂e tpanatanmetopo komo. Ero yipu Ow mewrepekn̂e yîwya so panatanmetopo komo.

26 Taa, n̂etwîrîmacowpe tînmîthîrî komo ke rma, wîîkekn̂e. Tîmxîkîthîrî komo pen nakn̂icowpe rma onok na ya tîmsom me. Ero wara n̂etwîrîmacowpe, Kicicme ro mak taxe okwe, kachome tak yîwya so, Kporin komo xa Mîk ham, kachome opoko hara. Ero wara kachome yîwya so kicicitho yewetîn̂e me rma n̂ehcowpe, wîîkekn̂e.

27 Taa, tooto xîkrî, on wara marha kasko Ixaw Yana komo ya, Ai, oyakno komo, on wara kesî Kporin komo Kaan awya so, kicicitho me tîmtapotaxmu me rma xatken̂e aporin pen komo oyahsîpînkarî ke.

28 Pahxa yîrowon komo poko kîmtapowakn̂e akro so. Kanan wîmyas arowon komo me, wîîkekn̂e. Kapockanwakn̂e yaarono me xa omtapotarî yentachome yîwya so. Ero yinhîrî iina n̂examro waar̂akn̂e omtapotachonho yaw roro rma. Ero yimaw îîpî n̂een̂atken̂e kawno, weewe marha n̂een̂atken̂e taakem xa okre. Iito rma anarî ya tîmsom nakn̂iyatken̂e kica. Orwonmekn̂e me xatken̂e ero wa tîmsom yakn̂irî ke. Kotoporem nakn̂iyatken̂e, wooku marha nukmamyatken̂e anarî ya tîmsom me kica.

29 On wara wîîkekn̂e yîwya so, Ahce mîn îîpî, meretkoso mîîcetu ero? wîîkekn̂e. Ero ke ero me n̂esosocekn̂e ero îîpî, Bama me rma n̂esosocekn̂e. Ero wara rma nasî yosotî oroto.

30 Ero ke on wara kasko Ixaw Yana komo ya, Oyakno komo, on wara kesî Kporin komo Kaan awya so, Mekicicirexe amyamro hara, aporin pen komo wara xa marha kica. Kicicitho poko maxe kica ciin̂o yairono wara wooxam wara okwe. Kicicitho poko ro mak maxe aporin pen komo wara xa marha okwe.

31 Anarî ro ya tîmsom mîmyaxe. Amumuru komo makn̂iyaxe yîwya so tîmsom me okwe. Ero wa tîmyataw awya so mekicicirexe okwe ciixaputho poko okwe. Ero poko rma maxe oroto. Ero ke amtapotarî komo ma re weyukya awya so? Aweikura so ro mak wasî amyamro Ixaw Yana kom ha. Waipîra wasî, kacho wara rma nasî omtapotarî yaaro xa. Aporin komo Kaan Owî.

32 On wara mîîkexe, Xenciu wara cexpore nasî, anarî rowon pono komo wara. Enporixapu ponaro xa naxe n̂examro, weewe enporixapu anarimaw, toopu enporixapu anarimaw. Ero wa xa marha cexpore nasî kîwyam hara, mîîkexe kica. Ero wara awesehtînotopo komo yaw roro rma tko exihra ro mak men maxe.

33 Waipîn me wasî, kacho wara rma nasî omtapotarî yaaro xa, akayaritomon Ow ha. Ero wa oyexirî ke kemetanmekyaxe so okwe. Karitî xa on oyamorî. Ketapoyankesî awemetanmetome so okwe. Kîrwonîmtîkesî apoko so. Aporin komo Kaan Ow ha.

34 Takpaxi maxe amn̂e anarî yana komo chew tanhamyan komo chew. En̂exa tko kekyaxe so hara ohyaka. Kemetanmekyaxe so ero yimaw orwonîmrî ke. Tapokar̂pe oyehtopo wenpesî, ketapoyankesî ahce wa na awitome so.

35 Axawa imo pona kekyaxe so anarî yana komo yaxawan pona. Iito tak ken̂ekexe so. Awya ro so xa tak wîîkesî.

36 Pahxa aporin komo wen̂ekekn̂e pohnîntaw, Exitu mîtwono po, ero wa xa marha ken̂ekexe so amyamro hara, kesî Kporin komo Kaan awya so.

37 Oyamoyin makatari kaar̂axe so. Awehtopo komo wukuknomesî ero wa awcetaw so. Omtapotachonho yaw roro tak kiir̂axe so, Owya apanatanmetopo yewetîra awexitaw so kemetanmekyaxe so, kacho yaw roro rma kiir̂axe so.

38 Oyanwekn̂e komo tak waihkesî achewnonhîrî pen komo, omtapotacho yanwekn̂enho kom ha. Noro yipu komo wekyasî mîk hak rowon pono komo chewnonho. Ixaw Yana rowon pona tko arîhra wasî. Ero wa yîcherenonkano riche owya on wara mîîkexe opoko, Kporin komo xa Mîk ham, mîîkexe.

39 On wara marha wîîkes awya so, Ixaw Yana komo amyamro, Aporin komo Kaan Ow wîîkesî. Taa, omtapotarî yewetî xera awexitaw so, etocoko rma ahnoro, ciixaputho poko rma ehcoko yiixe awexitaw so. Wara rma oyosotî yîwîrîyakamexpora tak maxe ciixaputho ya tîmsom yakn̂irî ke.

40 Mînto nai îîpî, owyanî ro, kawno. Ixaw Yana rowon po nai. Iito tak owya tîmsom nakn̂iyaxe Ixaw Yana komo amn̂e, yîrowon pono komo ahnoro. Ero yimaw yînmîthîrî komo poko tawake wasî. On wara wîîkesî yîwya so, Oona mak ehcoko owya tîmsom, akn̂itome. Oona amararîn komo pono yeperîrî ehcoko yihcirî me epetaxapu. Ahnoro owya anîmrî komo oona ehcoko, wîîkesî.

41 Ero yimaw tawake was apoko so, kotoporem wara maxe owya. Ero wara was apoko so awekyataw so anarî yana komo chewnonho, mîk hak rowon pono komo chewnonho, takpaxi ehxapunhîrî ha. Ero yimaw twerî tak naxe Xenciu komo opoko awakronomarî komo yenîrî ke owya.

42 Ixaw Yana komo rowon pona kekyaxe so. Pahxa wîîkekn̂e aporin pen komo ya, Ero roowo wîmyas awya so, wîîkekn̂e. Yaaro wîîkekn̂e, kapockanwakn̂e meero omtapotacho yentachome yaaro xa. Ero pona kekyaxe so. Ero yimaw on wara tak mîîkexe opoko, Kporin komo xa Mîk ham, mîîkexe.

43 Iito tak kicicme awehtoponhîrî komo poko tak meserepokexe. Kn̂irithîrî komo ke cekiciciretken̂e ham kica, mîîkexe. Ero yimaw kicicme ro makî tak mesen̂axe amyamro rma kicicitho poko roro awexirî komo ke.

44 Ero yimaw on wara tak mîîkexe opoko, Kporin komo xa Mîk ham, mîîkexe. Ero wara mîîkexe awakronomarî ke so owya oyosotî yîhtînomexpotome miyan komo ya rma. Kicicme awehtoponhîrî komo yaw rorohra kakronomexe so. Ixaw Yana komo amyamro. Ero wa wîîkes Ow Aporin komo Kaan ha, kekn̂e. Ero wara kekn̂e Kporin komo owya.

45-46 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, suu wece cewru esko. Iitono yîwîrîmacho ekatîmko. Enko comota iitono. Ero yakn̂itopo ekatîmko.

47 On wara kasko ero comota ya, suu pono ya, Ai comota, Kporin komo mtapotarî tan wekatîmyas awya. Ero ke omtapotarî entakî. On wara men kesî Kporin komo Kaan awya, Wehto men wiriyasî awakn̂itopo. Ahnoro weewe komo n̂ecakyasî, taakem komo, yîpîrîtho komo marha. Eseikara ro mak nasî wehto. Ahnoro awepatarî komo n̂ipikesî suu n̂ixan pen komo, nohce n̂ixan pen komo marha.

48 Wehto n̂een̂axe tooto komo ahnoro. Ero ke on wara kexe, Wehto oco, Kporin komo n̂iritho xa mîn oco. Ero ke eseikara ro mak nai ham, kexe.

49 Ero yinhîrî on wara wîîkekn̂e, Ai, apa Kaan, ponaro amna yehtopo xa Amoro, on wara kexe Ixaw Yana komo opoko, Anarî ponan me mak na n̂ekatîmya noro, kexe, wîîkekn̂e. Ero wa wîîkekn̂e.