1-2 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, on wara wîîkes hara awya, Xerusaren wece tak enko. Omîn yakn̂itopo ekatîmko, ahnoro Ixaw Yana rowon pono komo yemetanmetopo marha ekatîmko.

3 On wara kasko Ixaw Yana rowon pono komo ya, Ai, oyakno komo, on wara men kesî Kporin komo awya so, Awaparî komo me tak was okwe. Okaciparan tak mohkesî een yai. Ahnoro amyamro pen kwaihkexe so kir̂wan pen komo, kicicitho pen komo marha.

4 Ero wa waihkano wiir̂asî, kir̂wan pen komo waihkesî, kicicitho pen komo marha. Ero wara waihkano rirî ke owya okaciparan mohkesî xa hara ahnoro tooto pen komo waihkachome xa hara okwe. Suu n̂ixan pen komo waihkesî, nohce n̂ixan pen komo marha.

5 Ero wa waihkano riyataw owya on wara tak kexe tooto komo ahnoro, Tkaciparan mohkai ham oko Kporin komo een yai. Enkapîra men nai hara oko, kexe. Ero wa kexe tooto komo ero yimaw.

6 Ero ke on wara esko amoro, tooto xîkrî, Okwe, okwe, kasko cerewre ro mak. Ahwora ro mak esenpoko.

7 Ero yinhîrî on wara kexe apoyino komo awya, Ahce yanme okwe, okwe, mîîke? kexe. Ero wa ketaw awya on wara eyuhko, Kpoyino komo yekaci yentarî ke okwe wîîkesî. Ero yipu yentache amn̂e awya so ahwora ro mak tak maxe amyamro hara ahnoro. Awamorî komo tak nasî kar̂pera. Awosokmuru komo marha nasî kar̂pera, tuuna wara mak nasî kar̂pera. Ahwora ro mak maxe ahnoro. On wara kesî Kporin komo Kaan, Apoyino pen komo waihkacho me n̂enmayas amn̂e, yaaro men tan wîîkesî, kesî. Ero wara kesî Kporin komo awya so.

8-9 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, on wara wîîkes hara awya, omtapotarî ekatîmko xa hara apoyino komo ya. On wara kasko yîwya so, Oyakno komo, on wara men kes hara Kporin komo awya so, Kacipara imo ween̂asî, kacipara imo xa oko. Iyohtoxapu mîn oko, sekseke kaxapu mîn tpepeyure cehso ro.

10 Iyohtoxapu xa mîn waihkano ciitopo xa tak okwe. Cenporeso nasî pepe kan̂e wara esenpotome. Ero ke ahce wa thakwa re tahwore tatu? Kayaritomo yamoyinî rma re nai omumuru yemyaw. Ero nîhkocesî ro mak. Ahnoro weewe mko namesî.

11 Kaanî mtapotarî yanme rma kacipara imo poko sekeseke ketken̂e. Noro yanme marha ero nahsîyaxe sowtatu komo tamorî ke so. Tîyohtoso nasî, tpepeyure marha nasî waapa komo yemyaw oko.

12 Awratakî amoro tooto xîkrî. Okwe okwe, kasko oyanan komo pînîn yaw. N̂examro waparî yemyaw rma nasî kacipara imo, Ixaw Yana yantoman̂e komo waparî me ha. Oyanan komo yîwîrîmacho me xa tak nasî ero yimaw, anarmerpan ke yîwîrîmacho komo me. Kacipara ke tamaxmu me marha naxe okwe. Ero ke esewankatapakî, Okwe, kacho me.

13 Oyanan komo yukukmacho me nasî ero yimaw. Ero yimaw kayaritomo yamoyin meero nîhkocesî kr̂a. Ero yinhîrî kayaritomo yamoyin n̂ehcamnoyasî okwe, kesî. Ero wara kesî Kporin komo awya so.

14 On wara marha kekn̂e Noro owya, Ai, tooto xîkrî, omtapotarî ekatîmko xa hara. Knowknow kasko. Kacipara imo ke etapano riyatawno wara kasko. Asak ro kasko, osorwaw ro xa. Kacipara imo kuknon me ero wa kasko waihkano ritopo kuknon me, antomano rin̂enho pen komo waihkacho kuknon me rma okwe. Mehxarpa mokyaxe kacipara imo ke cemyawnoyem komo oyanan komo yamtakponî ro yaka rma.

15 Ero ke nahwokexe ro mak oyanan komo. Mer̂pono pîn n̂epîrkexe paraxkaxapu pen komo. N̂examro yewton metatan pokono me so tkaciparayem komo wamtopekn̂e waihkano ritopo poko. Pepe kan̂e wara ro mak n̂esenpesî kacipara imo. Ero nahsîyaxe waapa komo waihkano ritopo okwe.

16 Ai, kacipara imo awya wîîkesî, capa kasko poowa n̂ixan komo yamachome, capa kasko kari n̂ixan komo yamachome hara okwe. Ahna so exitaw ayorî capa kasko amano ritohme.

17 Ow marha knowknow wîîkes Ow hara riiwoxe xa oyexirî ke. Ero yinhîrî takî ketîrwoxinkes hara. Ero wara wîîkes awya so, Aporin komo Ow ha, kekn̂e. Ero wara kekn̂e Kporin komo owya.

18-19 Ero yinhîrî Kporin komo mtapotarî wencekn̂e xa hara. On wara kekn̂e hara owya, Ai, tooto xîkrî, roowo pore mewreko esama kuknon, Babiron̂a kayaritomon yesamarî kuknon, kacipara ke cemyarkem yesamarî kuknon ha. Cewn̂e yatî ka mewreko cetakpaxmu me hatko. Miya tak asakî mewreko esama. Ewto imo yesamarî tan ha, kacho marha mewreko weewe poko. Ero pasahtoko esama yetakpacho na.

20 Anarî esama kuknon mewreko hara, Haba yesamarî kuknon takî, Amon komo yesamarî kuknon ha. Anarî esama kuknon mewreko hara Xuta yepamtho komo yesamarî kuknon hara, Xerusaren yesamarî kuknon ha. Sowtatu yeken mîn Xerusaren, ero yesamarî kuknon mewreko.

21 Esama yetakpacho to n̂ecececesî Babiron̂a pono komo kayaritomon. Asakî esama yetakpacho to n̂ecececesî cesamarî yîhtînotome. Yaskomo mtapotarî n̂encesî yîhtînotome, waiwî marha nar̂mesî roowo pona. Mîk hak warai ciixaputho mko mtapotarî marha n̂encesî. Paaka yeretho marha n̂een̂asî cesamarî men̂ekachome.

22 Kayaritomo yemyaka tak n̂epîrke Xerusaren pona totopo, kaari n̂ixan yaka. Ero ke iina tîtotopo nîhtînoyasî. Ero ke on wara kesî, Iina kaikatko Xerusaren wacan macakacho ciiso, Waapa me kaikatko, kaxi, emtarakaxi marha, waaca metatan yakuhr̂apotopo ciiso, roowo yahtoso kecen̂an komo me, waaca ciiso marha kecen̂an komo, kesî kayaritomo.

23 On wara rma re kexe Xuta yepamtho komo, Nabukotonoso maywen me etaponxapu komo, Noro maywen me tak wasî, yaaro xa tan wîîkesî, kan̂e komo, Apohana, camkî mak na cesamarî nîhtînopu kayaritomo, kexe. Wara rma kicicme Ixaw Yana komo yehtoponho ponaro nasî Kporin komo. Ero ke iinan me Nabukotonoso n̂esewkor̂mesî Ixaw Yana komo yahsîtome.

24 Ero ke on wara kesî Kporin komo Kaan awya so, Ixaw Yana komo ya, Owya mesenpexe kicicme ro mak. Ahce poko so na awexitaw kicicme mesenpexe okwe. Ero wara awexirî komo ke waapa awahsîyaxe so okwe.

25 Taa, Ixaw Yana komo kayaritomon amoro, on wara wîîkes awya. Kaan yîhtînon̂e pînî ro mak amoro, kicicitho ro mak amoro. Oroto takî awaikacho me n̂enmapu okwe. Kicicme awehtoponhîrî tak n̂enahcasî oroto.

26 On wara marha kesî Kporin komo Kaan, Noro yarokorî mohkacoko. Anarme tak naxe amaywen komo ahnoro, antomano rin̂e pînînhîrî komo tak ciicoko antomano rin̂e me. Antomano rin̂enho komo tak ciicoko anto me so mak hara okwe.

27 Pohnî me ciicoko ewto, pohnî me ciicoko. Owî rma pohnî me wiir̂asî. Iitono komo kayaritomon exihra tak nasî pahkî. Pahxaro tak anarî mokyas hara kayaritomo me cehsom xa, Noro ro mak. Noro tak wiir̂asî kayaritomo me, kekn̂e. Ero wara kekn̂e Kporin komo owya.

28 Taa, on wara wîîkes hara awya tooto xîkrî, omtapotarî ekatîmko anarî komo pokono hara. Amonita komo pokono ekatîmko hara. Oyanan komo nîwîrîyakexe okwe. Ero ke n̂examro pokono ekatîmko. On wara kasko, Kacipara imo ween̂as hara, een yai mohkaxapu ween̂asî. Sekeseke kaxapu marha mîn ween̂asî paraxkano ritohme tak. Tooto pen waihkacho ro mîn. Pepe kan̂e wara ro mak n̂esenpesî.

29 Awehtopo yenpotopo tî n̂een̂atu yaskomo komo, tohnawno makî tko n̂een̂axe kica. Kir̂wan̂he awehtopo yenpotopo tî n̂een̂at hara cemaro me mak ha tko kica. Kacipara imo tko nasî kicicitho komo pîmtakan me. Tîpîmkotosom me naxe noro yipu komo. Noro yipu komo waihkacho me tak n̂enmapu, kicicme ehtoponhîrî komo tak n̂enahcasî.

30 Kacipara imo tak enkacoko hara. Ken̂ekexe so awakîtotoponhîrî komo po rma, awewrutoponhîrî po rma ken̂ekexe so.

31 Iito tak orwon yukmamn̂e wara was apoko so. Wehto wara ro mak nasî orwon. Ero wiriyasî awakn̂itopo komo me. Waapa komo ya kar̂mapesî apînîn yawno pîn komo ya. Waihkano ritopo poko ehcamhokaxapu xa mîkyam okwe.

32 Wehto kamerî wara mak maxe ero yimaw. Akamxukuthîrî n̂en̂epexe arowonthîrî komo po rma. Ero yinhîrî awosotî komo tak n̂ehcamnoyasî, twen̂ekarî tak naxe apoko so. Ero wa men kiir̂axe so. Aporin komo rma Ow ero wa wîîkesî, kekn̂e. Ero wa kekn̂e Kporin komo Amonita komo poko.