1-2 Ero yinhîrî Kporin komo mtapotarî wencekn̂e xa hara. On wara kekn̂e hara owya, Ai, tooto xîkrî, on wara wîîkes awya, tooto pen waihkan̂enho yewton xa tak na men̂eke? Yaaro, kicicitho me n̂examro yehtoponho ekatîmtîkakî yîwya so.

3 On wara kasko yîwya so, On wara men kesî Kporin komo Kaan, Apoyino pen komo kamxukutho yen̂epen̂enho amyamro. Ero yanme awîrîmacho komo awepor̂axe so okwe awanme ro so rma. Mekicicirexe marha mîk hak warai me ciixaputho poko awexirî ke so okwe.

4 Kicicitho moxam, kacho me tak maxe waihkano rirî ke awya so. Cetwîrîmaxi maxe an̂irithîrî komo poko awexirî ke. Ero ke pahnoke tak nasî awaitopo komo. N̂eexi tak acimn̂ipuntacho komo tan roowo po. Ero wara awexirî ke so Owî rma kiir̂axe so mîk hak rowon pono komo nîwîrîyakarî me, mîk hak rowon pono komo yetaporetopo me ha.

5 Miya so cekaiporesom mîkyam apono komo, Xerusaren pono komo. On wara kexe apoko so, Wara ro mak kan̂e komo mîkyam, kexe. Meyeno pîn komo awîrîyakexe so amn̂e, meyeno komo marha.

6 Ahnoro Ixaw Yana yantoman̂e komo naxe waihkano rin̂e me, Xerusaren pono komo waihkan̂e me ha.

7 On wara marha naxe apono komo, tîîm komo nîwîrîyakexe, tînocwan komo marha. Tîchewno komo n̂emetanmekyaxe. Yîmîhnî komo marha n̂emetanmekyaxe rikomo pen komo. Ecin̂onkaxapu komo marha n̂emetanmekyaxe wooxam kom hara.

8 Ero pîntho me ro mak n̂een̂axe omîn yawno mko. Oyepokaretopo n̂ikicicirexe marha okwe.

9 Kicicitho me nîmtapowaxe apono komo tpoyino komo poko waihkachome so okwe. N̂eseresmexe marha îh po so. Kicicitho poko ro mak naxe kica.

10 Tîîm pici poko naxe kica. Wooxam komo poko marha naxe roopo exitaw so kica, Kaan mîn yaka tohnî me ka exitaw so.

11 Kicicitho me nasî anarî tîmîtwono komo pici poko. Anarî nasî tumumuru komo pici poko. Anarî nasî cepeka poko rma, tîîm yemsîrî poko okwe.

12 On wara marha naxe apono komo, waihkano n̂iir̂axe epethîrî pona mak okwe. Apurantan mîmyaxe apoyino komo yemyaka. Mer̂pono pînî tko metahcaxe ero poko ehtamci okwe. Puranta marha mahsîyaxe apoyino komo yerasperî ke mak kica. Opoko tko meponarononketken̂e ro mak okwe, wîîkes Ow Aporin komo Kaan.

13 Knaiknai wîîkesî oyamorî ke apurantan yahsîtopo poko, kicicitho me mahsîyaxe kica. Ero wara marha wîîkesî tooto pen kamxukutho yen̂eperî ke awya so.

14 Ahwokara ma re mai amn̂e awîrîmacho imo komo yekpoche owya aapo so? Kar̂pe ma re nai awamorî komo ero yimaw? Awîrîmacho imo komo men wekpesî, wîîkai. Aporin komo Kaanî rma Ow ero wa wîîkai. Ero ke ero wa kacho yaw roro wiir̂asî.

15 Mîk hak rowon pono komo cheka kakpexe so, miyan komo cheka rma okwe. Ero wara wowyasî tusmui xa awehtoponhîrî komo.

16 Kicicitho me mehtîkexe mîk hak rowon pono komo wero ro rma. Ero yimaw tak on wara mîîkexe opoko, Kporin komo xa Mîk ham, mîîkexe. Ero wara mîîkexe ero yimaw.

17-18 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, on wara wîîkes hara awya, on wara naxe Ixaw Yana komo owya, prata smuntho wara mak naxe owya. Prata yukuyataw ero pokono ro komo ya ero yenho yaw rma nasî bronsetho, estan̂utho, pehutho, xumbutho, prata smuntho me kica. Ero wara naxe Ixaw Yana komo owya, prata smuntho wara mak naxe kica.

19 Ero ke on wara wîîkesî, Aporin komo Kaan Ow, prata smun warai me tak maxe ahnoro. Ero ke Xerusaren pona kekyaxe so amn̂e.

20 On wara naxe tooto komo, prata nahsîyaxe, bronse, pehu, xumbu, estan̂u komo. Ero yipu n̂enkayaxe tahrem yaka yukuitome. Wehto naipexe ocoro xa tak ehtome oco. Ero wara xa marha kenmekyaxe so Ow ewto pona. Kîrwonasî xa tak apoko so. Ero ke iina kenmekyaxe so. Iito tak akuyin̂e wara wasî.

21 Kenmekyaxe so tak. Awenmekîche so owya puu wîîkes apoko so wehto yaipon̂e wara. Orwon me ro mak puu wîîkesî. Ero ke yuxukrapamnoxapu wara tak maxe ewto po rma.

22 Nuxukrapamyasî prata tahrem yaw ero wa xa marha muxukrapamyaxe ewto po. Ero yimaw tak on wara mîîkexe, Kporin komo xa Mîk ham kemetanmekyaxe so tîrwonîmri ke okwe, mîîkexe. Ero wara mîîkexe ero yimaw, kekn̂e Kporin komo owya.

23-24 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, on wara kasko Ixaw Yana komo rowon ya, Ai, Ixaw Yana rowon, on wara wîîkes awya, comota wara mak maxe acpokunî ro wara. Axawa imo wara marha maxe, tuuna mohtopo pîn wara.

25 On wara naxe iitono weronoman̂e komo, waihkano ritopo poko n̂esencexe okwe. Reaw wara mak naxe, tootî yarixkan̂e wara oko. Tooto tonon̂e wara mak naxe okwe, emyawnanotho nahsîyaxe cepethîkem okwe. Merpora naxe wooxam iito yin̂in̂onkathîrî komo okwe.

26 On wara marha naxe apono komo, tîmsom pokono kom ha, owya apanatanmetopo komo nanwekyaxe ro mak okwe. Omîn yawno komo n̂ikicicirexe. Owyanî ro me cirihra ro mak naxe owya tîmxapu mko. Ero pîntho wara rma n̂iir̂axe. Ekicicirexapu komo n̂enmekyaxe ekiciciren komo yakro rma kica. Oyepokaretopo ponarora ro mak naxe okwe. Ero ke yukurumîkno pîn me mak oyen̂axe n̂examro npanatanmekîtho komo.

27 Robu komo wara mak naxe apono yantoman̂e komo, tootî yarixkan̂e wara naxe. Waihkano n̂iir̂axe okwe puranta yahsîtome, emku me nahsîyaxe okwe.

28 On wara naxe apono komo weronoman̂e komo, waacatho yumuturen̂e wara naxe, warai makno ke yumuturen̂e wara. Awehtopo komo ween̂asî pahxarono, kexe tpoyino komo ya tohnaw ro mak kica. Ero nasî awehtopo kuknon me, kexe. Cemaronwaxe mak kica. On wara men kesî Kporin komo Kaan, kexe anarî komo ya, yîmtapotara ro mak oyexitaw kica.

29 Ixaw Yana rowon pono komo naxe emetanmekno rin̂e me okwe. Emyawnanotho poko n̂en̂epanaxe marha. Emyawnomnî komo meero n̂emetanmekyaxe. Achewno komo marha n̂emetanmetîkexe tohnaw ro mak okwe.

30 Ero ke on wara wîxakn̂e, n̂examro poyino wepor̂akn̂e waaca ciin̂e warai. Waaca yewtarî yaw cececetosom wepor̂akn̂e iitono komo poko tîmtapotaxmu me oyakro, N̂examro pînîn yaw cma re masî, kan̂e owya. Ero wara kan̂e exitaw n̂examro waihkatîkara wasî. Enîhra ro makî tko wîxakn̂e ero wara kan̂e okwe.

31 Ero ke n̂examro poko kîrwonasî ro mak okwe. N̂examro yakn̂in̂e wara wasî orwonîmrî ke xa. Kicicme ehtoponhîrî yanme rma n̂examro yemetanmekn̂e wasî kanakatapan̂e komo wara, wîîkesî. Ero wara wîîkes Ow Aporin komo Kaan, kekn̂e. Ero wara kekn̂e Kporin komo owya.