1-2 Ero yinhîrî Kporin komo mtapotarî wencekn̂e xa hara. On wara kekn̂e hara owya, Ai, tooto xîkrî, on wara wîîkes hara awya, Pahxa wooxam xatken̂e asakî. Noro re yemsîrî mîkyam xatken̂e, wooxam yemsîrî.

3 On wara xatken̂e n̂examro, Exitu po ka cexitaw so kicicme xatken̂e kîrkomo yakro. Ero wa xatken̂e emasî me ka cexitaw so. N̂etwakremekpetken̂e kîrkomo ya. Cenaw so rma kîrkomo nahsîyatken̂e. Ero wa xatken̂e iin̂omra rma ka cexitaw so.

4 On wara xakn̂e n̂examro yosotî, Aora, poturu yosotî, Aoriba, akno yosot hara. Opici warai me mîkyam xatken̂e. N̂ewruyatken̂e omumuru me so, oyemsîrî me so marha. Osotî wentamexpes awya so, Samaria rma mîk Aora, kacho. Xerusaren reha mîk Aoriba, kacho hara.

5 On wara xakn̂e Aora, opici me rma cexitaw, wara rma ohyai ro mak xakn̂e anarî poko. Tîîxatî komo poko n̂epohkekn̂e Asiriu komo poko. Yîmîtwono komo mîkyam xatken̂e Asiriu komo.

6 Cenporem mîkyam xatken̂e Asiriu komo ahnoro. Kar̂pamxan me so xatken̂e. Sowtatu yantoman̂e komo mîkyam xatken̂e anarî komo, kayaritomo me so xatken̂e anarî kom hara. Camnarexapu yaw so xatken̂e poono yaw. Kawaru mkaw so tîtosom mîkyam xatken̂e.

7 Ero ke ohyai ro xakn̂e noro n̂examro poko. Karitî komo xa mîkyam xatken̂e Asiriu komo. Ciixaputho pokono komo mîkyam xatken̂e. Ero ke ero yipu poko marha n̂ikicicinwakn̂e noro okwe.

8 Kîrkomo poko cehtopo n̂enpamyakn̂e Exitu po cexitaw. Ero wara cehtopo yahsîpînkara xakn̂e okwe. Pahxa n̂he noro yenaka n̂etakriyatken̂e Exitu pono komo. N̂etwakremekpekn̂e yîwya so. Kicicme so xatken̂e noro yakro kica. Ero wa cehtopo yahsîpînkara xakn̂e okwe.

9 Ero ke Aora pen wahsîpekn̂e yiixatî komo ya rma. Asiriu komo poko n̂epohkekn̂e. Ero ke n̂examro ya rma noro wahsîpekn̂e.

10 Noro pen pononketken̂e kr̂a. Yîmrerî komo naar̂atken̂e, emsîrî komo marha. Noro pen tak waihketken̂e kacipara imo ke okwe. Noro yosotî n̂etahcatken̂e wooxam komo kicicitho me kica. Ero wara noro waihketken̂e kicicme ehtoponhîrî yepetho me. Ero wa xakn̂e Aora pen okwe.

11 Taa, Aora yehtoponho rma re n̂een̂akn̂e noro yakno, Aoriba. Wara rma kicicme tak n̂ehtîkekn̂e noro hara. Takno yopo ro mak n̂epohkekn̂e anarî ro komo poko. Noro yipu komo poko marha n̂ikicicinwakn̂e kica. Ohyai ro xa tak xakn̂e noro okwe.

12 Asiriu komo poko marha n̂epohkekn̂e noro, tîmîtwono komo poko. Cenporem me mîkyam xatken̂e, kar̂pamxan me so xatken̂e. Kir̂wanî ro yaw so xatken̂e poono yaw. Sowtatu yaan̂e komo mîkyam xatken̂e, antomano rin̂e me so marha xatken̂e. Kawaru mkaw so tîtosom me xatken̂e. Ero wara xatken̂e Asiriu komo, yiixe noro yehtopo komo.

13 Ero ke kicicme noro yehtopo ween̂akn̂e. Ero wara re xatken̂e, noro, akno hara. Kicicme re xatken̂e asakno roro rma.

14 Miya xe xa tko n̂ikicicinwakn̂e noro, Aoriba. Kîrkomo kuknon n̂een̂akn̂e mîîmo wacan poko mewrexapu. Kawtew komo kuknon mîn n̂een̂akn̂e. Cucure so xakn̂e noro yipu komo kuknon.

15 Taan̂apotui so xakn̂e yukuknon. Tîhtîwomke so marha xakn̂e kawno ke. Sowtatu yaan̂e wara n̂esenpekn̂e yukuknon komo. Babiron̂a pono komo wara xakn̂e yukuknon komo, Kawtew rowon pono komo wara ha. Ero po ewruxapu me mîkyam xatken̂e.

16 Noro yipu komo kuknon yenîche rma n̂examro poko n̂epohkekn̂e. Tîmtapotarî yekatîmn̂e komo n̂en̂epekn̂e yîhyaka so.

17 Ero ke mokyatken̂e tak Babiron̂a pono komo yîhyaka. Noro yenaka n̂etakriyatken̂e kica. Noro n̂ikiciciretken̂e poko cexirî ke so. N̂etîmyakn̂e noro yîwya so kica. Ero yinhîrî yiixera so tak xakn̂e hara.

18 N̂examro mokuche rma ha ka mîk hak xe cehtopo n̂ekatîmyakn̂e yiwya so. N̂epononkekn̂e marha kica wero ro so. Ero ke noro wahsîpînkekn̂e. Pahxa noro yakno wahsîpînkekn̂e, ero wara xa marha Aoriba wahsîpînkekn̂e hara okwe.

19 Wara rma miya xe xa n̂ehtîkekn̂e kîîrî pohkan̂e ro wara kica. Pahxa emasî me cehtoponhîrî ponaro rma xakn̂e. Cehtoponhîrî nîhtînoyakn̂e tpoxwe. Exitu po cexitaw kicicme xakn̂e ero wa cehtoponhîrî tpoxwe nîhtînoyakn̂e kica.

20 Tîîxatî komo poko n̂epohkekn̂e. Kicicitho ke tupunkem mîkyam xatken̂e. Buhu pun wara xakn̂e yupun komo. Kawaru kuru wara marha xakn̂e yukuru komo kica.

21 Ero wara tpoxwe cehtoponhîrî nîhtînoyakn̂e, Exitu po cexitawno ha. Ero yimaw apun wakremekyatken̂e Exitu pono komo emasî manatîke awexirî ke.

22 Ero ke on wara wîîkes awya, Aoriba amoro, aaxatînhîrî komo tak wiir̂asî aaxatî pîn me. Anîxatîmnokathîrî komo wiir̂asî ceserepokaxmu me apoko. Awaparî me n̂examro wekpesî xehxa mehxa wara.

23 Babiron̂a pono komo wekpesî, Kawtew komo ahnoro, Pekoci pono komo, Soa pono komo, Koa pono komo, Asiriu komo marha wekpesî n̂examro yakro. Kîrkomo cenporem mîkyam wekpesî, kar̂pamxan kom ha. Kopenato komo, antomano rin̂e komo, sowtatu yaan̂e komo, noro yipu komo wekpesî, cekaiporesom kom ha. Kawaru mkaw so mokyaxe ahnoro.

24 Awaparî me mokyaxe. Tarara yaw so mokyaxe. Tarara yaw so marha n̂ekyaxe cemyawno komo. Kawaru mkaw so marha mokyaxe anarî komo. Mer̂pora ro mak mokyaxe sowtatu komo. Awamcexe tak okwe. Kuripara mîn yixapikan komo. Cecen̂an ke cemyarkem marha mîkyam. Porin komo ke cemyarke so naxe, wahrai ke so marha. N̂examro tak wiir̂asî awen̂ekan̂e me. N̂examro rma kicicme awehtoponhîrî n̂epemexe tînîhtînorî ro komo yaw roro rma.

25 Kîrwonasî tak apoko awewyomacho ke. N̂examro tak awar̂mexe tîrwon̂e ro mak oko. Awewnakexe so oko, apanakexe so marha oko. Etîmtoxapu komo tak waihkexe kacipara imo ke oko. Amumuthîrî komo naar̂axe, awemsîthîrî komo marha. Etîmtoxapu komo ciki nakn̂iyaxe oco.

26 Apononkexe ero yimaw. Aporokuthîrî marha naar̂axe cepethîkem okwe.

27 Ero yimaw yikicicintara tak masî mîk hak poko. Tîî kan̂e me tak kirmexpesî. Mîk hak ya cetîmsom mera kiir̂asî. Pahxa Exitu po mihciyakn̂e ero wara awehtopo, ero warahra tak kirmexpes amn̂e. Exitu pono komo ponarora tak masî.

28 On wara wîîkes Ow, Aporin, Kaan ha, kahsîpesî tak yiixera ro mak awehtopo komo ya. Anîxatîmnokathîrî komo ya rma kahsîpesî.

29 Aaxatî pîn me ro mak naxe n̂examro. Awemyawno naatîkexe okwe. Ponomnî me ro mak tak anomyaxe hara. Kir̂wantaw tak n̂esehtînomexpesî mîk hak pokononho me awehtoponhîrî. Kicicitho me ro mak mesenpesî.

30 Ero wara kemetanmekyasî mîk hak poko awepokarî ke Xenciu komo poko. Yîn̂irithîrî komo poko mekicicirekn̂e, ponaro n̂examro yehtopo poko.

31 Awakno pen yehtoponho yaw roro rma mas amoro hara. Ero ke noro wokutho ke rma kwokpesî.

32 On wara wîîkes awya, Aporin Kaan Ow ha, Awakno wokutho poi rma meer̂asî amoro hara. Porinî ro mîn noro parakwentho. Mer̂pora wooku nasî ero yaw. N̂ewrexe tak anarî yana komo apoko. N̂etaporexe ro mak apoko hara. Mer̂pora wooku nasî noro parakwentho yaw.

33 Mîwenasî ro mak amn̂e, mahwoketîkesî marha. Awîrîmacho xa tak mîn awakno pen wokrutho, pohnî me ro mak awehtopo mîn ha. Ero wa awin̂e me nasî awakno wokrutho, Samaria wokrutho ha.

34 Ero meetîkes amn̂e. Erîche enhîrî mahkesî. Amanatîrî yarixkan̂e wara rma mas oko. Ero wara masî ahwora ro mak awexirî ke. Omtapotarî xa mîn ero wa kacho. Aporin Ow ha, Kaan ha.

35 On wara marha wîîkes awya, Opoko twen̂ekarî tak mîxakn̂e okwe. Amkai oyen̂epen̂e wara kr̂a mîxakn̂e okwe. Ero ke mîk hak poko awehtoponhîrî yepetho tak mepemes okwe, akicicitatoponhîrî yepetho ha. Ero wara wîîkes Ow, Aporin Kaan ha, kekn̂e owya.

36 Ero yinhîrî on wara kekn̂e hara Kporin komo owya, Ai, tooto xîkrî, Aora, Aoriba komo yen̂eka xe so na mai? Taa, kicicme ro mak ehtoponhîrî komo ekatîmko yîwya so.

37 N̂ekiciciretken̂e okwe. Tooto pen kamxukutho yen̂epen̂enho me marha naxe. Ciixaputho poko n̂ekiciciretken̂e marha okwe. Ero yipu ya tîmsom me tîmxîkrî komo rma nakn̂iyatken̂e. Omxîkrî me rma n̂ewruyatken̂e, noro yipu komo rma nakn̂iyatken̂e waihkachome okwe.

38 On wara marha xatken̂e opoko, omîn n̂ikiciciretken̂e. Oyepokaretopo marha nîwîrîmetken̂e. Ero kaamo po rma ero wara xatken̂e okwe.

39 Tîmxîkîthîrî pen komo waihkache ponaro cehtopo komo ya tîmsom me ero kaamo po rma mokyatken̂e omîn yaka yikicicireso. Ero wara xatken̂e omîn yaw okwe.

40 On wara marha kasko yîwya so, Meyeno komo man̂ikpekn̂e. An̂ikn̂e men̂epekn̂e. Ero ke mokyatken̂e anan̂ikpothîrî komo. Ero ke meyehyatken̂e kir̂wan̂he awesenpotome yîwya so. Mecpomekn̂e marha, meporokucekn̂e marha.

41 Aapo pona tak meremetken̂e cepethîkem pona. Awepataw so miir̂akn̂e anahrî yapon. Ero pona miir̂akn̂e aseci, kotoporem marha. Onmîtho rma mîn xakn̂e aseci, kotoporem marha.

42 N̂examro mokuche wara hak kacho tak n̂esencekn̂e Aoriba mîn yaw. Mer̂pora xatken̂e iito. Axawa imo pono komo meero mokyatken̂e twenîmsom komo kica. Kicicitho komo mîkyam mokyatken̂e. Emeknumci n̂iir̂atken̂e wooxam komo yemeknu poko. Aroko marha n̂iir̂atken̂e yîhtîpîrî komo pona hara, cenporem xa aroko. Ero wa xatken̂e yîhyaka so mohxapu komo.

43 On wara xakn̂e noro, wooxam, kîîrî ya cetîmtopo komo poko cenpamso ro mak xakn̂e pahkî cexirî ke ero poko. Ero ke on wara wîîkekn̂e n̂examro poko, noro yipu poko ma natu kîrkomo oroto? N̂etîmya ha ma wooxam yîwya so hara? wîîkekn̂e.

44 N̂etakriyatken̂e rma tko noro yenaka okwe. Kîrkomo cexe tpohkan̂e ro yenaka ero wara cetken̂e noro yenaka. Ero wara xatken̂e Aora poko, Aoriba komo poko. Kicicitho mîkyam wooxam komo.

45 On wara tko kexe kir̂wan komo apoko, Kicicitho ro mak mîkyam kica wooxam komo, kîîrî pokono ro komo, waihkano rin̂e komo marha. Ero wara kexe n̂examro poko kîîrî pokono ro me exirî ke so, waihkano rin̂e ro me exirî ke so marha.

46 On wara kesî Kporin komo Kaan, N̂examro waparî komo an̂ihko, mer̂pono pîn komo. On wara kasko n̂examro poko wooxam poko, Cemetanmesom me naxe okwe, cemyawnonkaxmu me marha, kasko.

47 N̂examro waparî mokuche n̂examro pen n̂etapexe toh ke oko. Waihkexe tak kacipara imo ke. N̂examro mretho pen komo waihkexe, emsîthîrî pen komo marha. Yîmînthîrî komo marha nakn̂iyaxe okwe.

48 Ero wa kicicitho poko n̂examro yehtoponho wîhcamnoyasî. Ero pokono komo exihra tak naxe arowon komo po. Ero wara kiir̂asî ahnoro wooxam komo panatanmetome, mekiciciretken̂e ero warahra ro mak cexpore nasî, kachome tak yîwya so.

49 Ero wara kicicitho poko awehtoponhîrî komo tak awepemexe so, ciixaputho poko awehtoponhîrî komo yepetho mîmyaxe okwe. Ero wa awexitaw so tak on wara mîîkexe, Kporin komo xa Mîk ham, mîîkexe tak opoko, kekn̂e. Ero wara kekn̂e Kporin komo owya.