Ero yinhîrî Kporin komo mtapotarî wencekn̂e xa hara. Ero yimaw 9 cimn̂ipu tak xakn̂e ahsîxapu me amna yehtoponho. 10-nhîrî nuun̂i po wencekn̂e, 10-nhîrî kaamo po. Ero po xa Kporin komo mtapotarî wencekn̂e. On wara kekn̂e owya,

2 Ai, tooto xîkrî, on kaamo kuknon mewreko, on kaamo kuknon xa. On kaamo po rma Xerusaren wamtocow Babiron̂a pono komo, Nabukotonoso maywen kom ha. Iitono komo yar̂machome wamtocow.

3 On wara marha amtapotakî Ixaw Yana komo n̂entarî me, kanwekn̂e ro komo n̂entarî me ha. On wara kasko yîwya so, Ai, oyakno komo, on wara kesî Kporin komo Kaan awya so, Tahrem akricoko wehto yepona. Tuuna arkacoko ero yaka.

4 Wooto yîknocoko ero kwaka, kir̂wan wooto ha. Petîthîrî akpotucoko, apothîrî marha. Tahrem copoyinkacoko tpoxwem ke wooto ke.

5 Kar̂pamxan oper̂a waihkakî awotî komo me, kir̂wan ha. Akpotuche tak iyochîrî meero enmeko tahrem makataka wehto kamerî me. Pahkî tîyoko. Akpotuxapu n̂enukpe ero yaw.

6 Ero ke on wara kesî Kporin komo Kaan, Waapa, kapore nasî Xerusaren pono komo ya, tooto pen kamxukutho yen̂epen̂enho komo ya ha. Tahrem wara rma nasî Xerusaren tusmuyem wara. Etowra nasî yusmunthîrî okwe. Wooto tak anîmko tahrem yawno. Men̂ekacho ke yukuknomanî ro anîmko wahra so.

7 Ewto po rma nasî tooto pen kamxukutho yîn̂en̂epethîrî komo. Tooto pen kamxukutho nukmamyatken̂e toh pona mak. Roowo pona yukmamra xatken̂e roowo pupuntho ke ahrutome.

8 Owî rma ero wara wir̂pekn̂e yîwya so orwonîmtome iitono komo poko, waikaxapu pen komo yepantome ha. Toh pona rma tooto pen kamxukutho wirpekn̂e yîwya so etahrura ro mak ehtome roowo cheka.

9 Ero ke on wara wîîkes Ow, Aporin komo Kaan, Xerusaren pono komo waparî men mokyaxe tooto pen kamxukutho yen̂epen̂e me exirî ke so okwe. Ow marha wehto kamerî wenmekyasî mer̂pora ro mak.

10 Ero ke wehto yiriko. Kamehtoko n̂he mer̂pora. Wooto warai tîyoko pahkî ecotome kir̂wan̂he. Asîsî warai cirko ero kwaka tpoxwe ehtome. Wooto yochotho akn̂iko.

11 Ero yinhîrî tahrem akriko wehto yepona yarîhra rma. Iito tak n̂ecocoronpepe. Ocoro xa n̂expe tpoture cehso ro bronse, tahrem ha. Ero wa exitaw yusmunthîrî tak n̂ecahtîkesî kir̂wan̂he cehso ro.

12 Cemaronwatken̂e iitono komo merpora. Poketken̂e mak tak tîcemarontarî ke rma. Etakir̂wamara rma nasî tahrem. Wehto chew tak n̂expe yusmunthîrî.

13 Kicicitho poko mîxakn̂e kica. Ero rma nasî asmunthîrî warai. Awakir̂wamacho komo cma re wukukmekn̂e. Etakir̂waman me thakwa mîxatken̂e okwe. Ero wa etowra ro mak nasî asmunthîrî miya roro. Orwon me xa kemetanmekyaxe so. Awemetanmetîkache so mak tak n̂etowyasî asmunthîrî komo.

14 Ero wara wîîkesî, Aporin komo Ow. Omtapotachonho yaw roro rma tak kiir̂axe so. Wahra mak kemetanmekyaxe so, kacho mera ro mak. Apînîn yaw so exihra ro mak tak wasî. Kicicme awehtoponhîrî komo wepanîyasî, awehtoponhîrî komo yaw roro rma wepanîyasî. Awehtoponhîrî komo rma nasî awen̂ekan̂e komo me, wîîkesî. Ero wara wîîkes Ow, Aporin komo Kaan ha, kekn̂e. Ero wara kekn̂e Kporin komo owya.

15-16 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, on wara wîîkes hara awya, Oroto yiixe awehtoponhîrî pen tak waar̂asî ahyai. Yohno ro mak waar̂asî. Wara rma yîwratara esko, ewyotara marha esko.

17 Okwe okwe, mîîke rma na re ehtura mak. Tîyanan pen komo waipuche okwe, okwe, kexe tooto komo kar̂pe ro mak, ero wa kahra esko amoro. Tîhtîwomke rma esko, tîhtake marha. Amtarî yahrura esko. Tîwrataxmu nahrî ro apupra marha esko, kekn̂e. Ero wara kekn̂e Kporin komo owya.

18 Ero ke Kporin komo mtapotachonho wekatîmyakn̂e opoyino komo ya. Kokon̂i tak opici pen waihyakn̂e okwe. Enmapuche Kporin komo mtapotachonho yaw roro rma wîxakn̂e.

19 Ero ke on wara ketken̂e opoyino komo owya, Ahce kacho ero wa mai? Ahce yekatîm xe mai amna ya ero wa awehtopo ke? ketken̂e.

20-21 Ero ke on wara wîîkekn̂e yîwya so, Kporin komo mtapotarî wentai. On wara kekn̂e owya, On wara kasko Ixaw Yana komo ya, On wara kesî Kporin komo awya so, pahnoke tak nas omîn yîwîrîmacho owya. Pona awehcoyoponkacho mîn ha, cenporem xa awya so, awahworetopo komo, ero rma wîwîrîmesî. Amumuthîrî pen komo mînomye meye, awemsîthîrî komo marha. N̂examro pen tak waihyaxe kacipara ke paraxkaxapu me.

22 Ero yimaw owara rma maxe amyamro hara. Amtarî yahrura maxe. Tîwrataxmu nahrî ro yapupra marha maxe.

23 Tîhtîwomke rma maxe, tîhtake marha. Yîwratara marha maxe. Mahwoketîkexe mak kicicme awehtopo ken̂e rma okwe. Okwe okwe mîîkexe ehtura mak, aropotaw so mak.

24 Awehtopo komo kuknon me nasî Esekiew. Noro nasî ero wa xa marha maxe amyamro hara. Ero wara awexitaw so tak amn̂e on wara mîîkexe, Kporin komo Kaan xa Mîk ham, mîîkexe tak opoko.

25-26 On wara marha wîîkes awya, tooto xîkrî, on wara mas amn̂e, pona apoyino komo yentopo wîwîrîmes amn̂e. Ponaro n̂examro yehtopo xa mîn, n̂examro yahworetopo xa, yiixe ro mak ehtopo komo. Ero wakn̂iyasî. Yumumuthîrî pen komo marha waihkesî, emsîthîrî pen komo marha. Ero kaamo po rma waapa yai emahcixapu n̂ekatîmyasî awya tooto pen waihkachonho, omîn yakn̂itoponho marha.

27 Ero yimaw tîmtapotaxmu me tak mas hara. Emahcixapu yakro mîmtapowasî. Yîmtapotan me exihra tak masî. Apoyino komo yehtoponho yenpon̂e me masî. Ero yimaw on wara tak kexe opoko, Kporin komo xa Mîk ham, kexe. Ero wara kexe, kekn̂e Kporin komo.