1-2 Ero yinhîrî Kporin komo mtapotarî wencekn̂e xa hara. On wara kekn̂e hara owya, Ai, tooto xîkrî, on wara wîîkes hara awya, Amonita komo wece enko hara, n̂examro pen waihkacho marha ekatîmko.

3 On wara kasko yîwya so, Ai, Amonita komo, Kporin komo Kaanî mtapotarî ka entacoko. On wara kesî Noro awya so, kokon̂oro omîn xakn̂e tîwîrîmaxi. Pohnî me marha xakn̂e Ixaw Yana komo rowon. Xuta yepamtho komo naar̂atken̂e waapa komo miya anarî roowo pona. Ero yimaw, Ai okre, mîîketken̂e kica.

4 Ero ke kahsîpexe so meyeno komo ya, resce n̂ixan komo ya. Acheka so rma cetarî komo n̂iir̂axe. Iina rma tîmîn komo n̂iir̂axe. Anatîrî komo yeperîrî nahyaxe, awokuthîrî komo mownu n̂eer̂axe marha okwe.

5 Haba tak wiir̂asî woskara me, cuupu yewtî me waapa yoku kameru nahrî yewtî me. Ahnoro Amonita komo rowon wiir̂asî oper̂a yetîrapotopo me. Ero wara ciriche owya on wara tak mîîkexe opoko, Kporin komo Mîk ham, mîîkexe.

6 On wara kesî Kporin komo Kaan awya so, On wara mîxatken̂e Ixaw Yana komo poko n̂examro pen waihketaw waapa ya, arîche marha, knowknow mîîketken̂e, knuw mîîkekn̂e marha ahtarî ke so. Ero wara mîîketken̂e tahwore awexirî ke so. Ixaw Yana komo xera ro mak mîxatken̂e ham okwe.

7 Ero ke ketapoyankesî tak awahsîtome so okwe. Mîk hak rowon pono komo nar̂marî me kiir̂axe so okwe. Ero yimaw exihra tak maxe, Amonita komo mîkyam, kacho kom ha. Kîhcamnoyaxe so kr̂a anarî yana komo exitaw so rma. Ero yimaw tak on wara mîîkexe opoko, Kporin komo Mîk ham, mîîkexe, kesî Kporin komo awya so, kasko Amon komo ya, kekn̂e. Ero wara kekn̂e Kporin komo owya.

8 On wara kes hara Kporin komo Kaan, On wara kexe Moabita komo, Sei Pono komo marha, Encoko ka, Xuta yepamtho komo naxe mîk hak rowon pono komo wara rma, kexe.

9 Ero wa karî ke yîwya so Moabita komo yewtonî mko wakn̂ipesî waapa komo ya. Yîrowon komo yemyatwono mko wakn̂ipesî. Beci-Xesimoci, Baaw-Meion, Kiriatain, ero warai mko ewto mko wakn̂ipesî. Kir̂wanî ro ewto mko mîn, kacho mko rma mîn wakn̂ipes okwe waapa ya.

10 Moabita komo war̂mapesî mehxa mohxapu komo ya, resce n̂ixan komo ya. Amonita komo yakro rma war̂mapesî yîwya so. Ero yimaw Amonita komo yosotî nîhcamnoyaxe mîk hak rowon pono komo ahnoro.

11 Moabita komo wemetanmekyasî. Ero yimaw tak on wara kexe n̂examro, Kporin komo xa Mîk ham, kexe. Ero wara tak kexe Moabita komo, kesî Kporin komo. Ero wara kesî.

12 On wara marha wîîkesî, Aporin komo Kaan Ow ha, On wara xatken̂e Eton pono komo, Xuta yepamtho komo poko n̂esepanîyatken̂e. Ero yanme kicicme ro mak n̂examro ween̂asî.

13 Ero ke on wara wîîkes Owî, Aporin komo Kaan, oyamorî ke Eton pono komo yahsîn̂e wara wasî. N̂examro pen waihkesî kîrkomo pen, iyokuthîrî komo marha. Pohnî me tak wiir̂asî yîrowonthîrî komo. Teman pona roro pohnî me nasî. Kacipara imo nparaxkatho me waihyaxe Tetan pono pen komo.

14 Eton pono komo poko tak kesepanîyas Ow. Oyanan komo ke rma kesepanîyasî poko so, Ixaw Yana komo ke. Kîrwonasî Eton pono komo poko. Ero ke oyepanîyasî oyanan komo. Ero yimaw oyesepantopo tak nîhtînoyaxe Eton pono komo, wîîkesî. Aporin komo Kaan ero wara wîîkesî.

15 On wara marha wîîkes Ow, Aporin komo Kaan ha, On wara xatken̂e Piristew kom hara, tîrwon̂e xa n̂esepanîyatken̂e. Xuta yepamtho pen komo waihkatîka xe xatken̂e okwe. Pahxa rma nîrwonatken̂e Ixaw Yana komo poko, ero wara rma nîrwonatken̂e kokon̂oro n̂he xa hara okwe.

16 Ero ke on wara wîîkesî, Aporin komo Kaan Ow wîîkesî, Piristew komo wetapesî marha oyamorî warai ke. Kerecita komo marha waihkesî. Tuuna imo yecihtawno komo ahnoro waihkesî etîmtoxapunhîrî komo.

17 N̂examro poko kesepanîyas Ow hara. Tîrwon̂e xa n̂examro wemetanmekyasî. Ero yimaw, oyesepanîyataw tak on wara kexe, Kporin komo xa Mîk ham kemetanmekn̂e komo, kexe. Ero wara kexe Piristew komo amn̂e, wîîkesî, kekn̂e. Ero wara kekn̂e Kporin komo owya.