Ero yinhîrî Kporin komo mtapotarî wencekn̂e xa hara. 11 cimn̂ipu xakn̂e ahsîxapu me amna yehtoponho. Yihcitopo kaamo po xa wencekn̂e, nuun̂i yihcitopo po ha.

2 On wara kekn̂e owya, Ai, tooto xîkrî, on wara ketken̂e Ciru pono komo Xerusaren poko, Ai okre, tar̂maxi tak naxe Xerusaren pono komo, mîk hak pono komo yesamarî potawnonho komo. Tahrunkaxi tak nasî esama mîk hak rowon pono komo yakan. Takn̂iso tak nasî Xerusaren pen. Ero ke kemyawno komo tak tahsîyaxe mer̂pora okre, ketken̂e kica.

3 Ero ke on wara wîîkesî, Aporin komo Kaan Ow wîîkesî, Ai, Ciru pono komo, on wara was apoko so, awaparî komo me tak was okwe. Mîk hak rowon pono komo wekpesî awaparî komo me. Emahyaka re mokyaxe esewcokocokomacho wara tuuna imo kwawno wara. Ero wara mîk hak rowon pono komo mokyaxe awaparî komo me.

4 Ciru wacantho tak macakexe n̂examro. Mîîmoci marha n̂ixkexe waapa yekaiporen̂e mîntho mko. Ewtotho tak naiwexe toopu wara ro mak tmemehse.

5 Tuuna imo ke twamtoso rma tak nasî ewtotho amn̂e, anîmn̂e komo mîyen yuturpamnotopo me nasî. Ciru pono komo yemyawnonho naatîkexe mîk hak rowon pono komo, wîîkesî. Ero wara wîîkes Ow Aporin komo.

6 Ciru yemsîrî warai komo naxe woskara po so ewto mko. Ero pono komo marha waihyaxe kacipara imo ke. Ero yimaw tak on wara kexe opoko, Kporin komo xa Mîk ham, kexe.

7 On wara wîîkesî, Aporin komo Kaan Ow wîîkesî, Ciru pono komo waparî me wekyasî Nabukotonoso, Babiron̂a kayaritomon. Kayaritomo komo kayaritomon mîk ha. Mehxa wekyasî nohce n̂ixa. Kawaru mkaw so mokyaxe anarî komo noro sowtatun komo, tarara yaw so mokyaxe anarî kom hara. Mer̂pora ro mak mokyaxe.

8 On wara tak awir̂axe so noro, awemsîrî warai pen komo tak waihkesî kacipara imo ke oko, woskara pono pen kom ha. On wara awir̂axe so amyamro hara, roowo n̂enmekpesî amamhoko so. Waaca marha n̂irpesî amamhoko so cecen̂an komo me.

9 Waaca macakacho ro ke awacan komo macakesî. Waapa yekaiporen̂e mîn marha nametîkesî yawaka ke.

10 Mer̂pora ro mak nasî noro yoku kawaru. Noro yipu mokyataw tosuhtosuh kesî roowo pupuntho. Ero rma nas awahrun̂e me kaweresî wara. Awacan komo tak nîrîrîmesî mer̂pono pîn mokrî ke kawaru mkawno komo, tarara yawno komo marha. Ero yinhîrî awacan metatan yaro so n̂ewomyaxe ewto pona. Waaca awkaxapu yaro cepatakaxmu komo wara rma n̂ewomyaxe awewton komo pona.

11 Awesamarî komo yaw so n̂etapikyasî noro yoh komo kawaru. Ahnoro awewtonthîrî komo pono pen komo waihkexe kacipara imo ke. Amîn komo mapatanî marha macakexe porinî mko rma.

12 Apurantanthîrî komo naatîkexe, awemyawnonhîrî komo marha naar̂axe ahnoro. Awewton komo wacantho macakexe. Amînthîrî komo n̂ixkexe kir̂wanînhîrî okwe. Ero yinhîrî toopu mko nar̂mesî tuuna kwaka, amîn me ciixapunhîrî, awacan me ciixapunhîrî marha. Weewe marha nar̂mexe iina yukwaka amîn me ciixapunhîrî. Roowo marha nar̂mexe iina awewtonthîrî yewtî me ehxapunhîrî. Ero yipu mko nar̂mexe tuuna kwaka.

13 Awewanomacho komo tak wîtîtmamnoyasî. Esentara tak nas aratîn komo, ahpa kom ha.

14 Toopu meretîrî wara tak nasî awewtonthîrî. Iito tak ootî yanîmn̂e komo nuturpamnoyaxe tîmîyen komo. Ero yinhîrî esewtoman me ro mak tak nas hara awewtonthîrî komo. Ero wara wîîkes Ow Aporin komo.

15 On wara marha wîîkes Ow, Aporin komo Kaan Ow wîîkesî, Ciru pono komo ya wîîkesî, Meyeno komo tak tatanaxe tuuna imo yecihtawno komo awaikachonhîrî komo yentache. Ciru pono pen komo waihkace ham okwe. Aka, aka, kace paraxkaxapunhîrî pen komo. Ero wa waihketken̂e Ciru pono pen komo, kacho n̂encexe.

16 Ero wara kacho yentache tapon komo poi tak nawomyaxe tuuna yecihtawno komo kayaritomon komo. Tponon komo tak mohkexe kawno, kayaritomo ponon ha. Anarî marha mohkexe tponon komo tporokyem hara. Erahtîmtopo tak nasî n̂examro ponon warai me. Roowo pona mak n̂eremexe. Tatanaxe ro mak. Apoko so n̂eserepokexe ro mak, Ciru pono pen komo poko.

17 Nîwracexe marha tak n̂examro apînîn yaw so. On wara kexe tîwratarî me so, Ahce kacho mexixkai okwe Ciru. Miya so cekaiporesomunhîrî amoro. Yaana me xa xatken̂e apononhîrî pen komo tuuna imo kwaw tîtotopo komo poko. N̂eraswatken̂e tuuna imo yecihtawno komo apono komo pona.

18 Oroto tak tatanaxe hara tuuna imo yecihtawno komo awaikacho komo yentarî ke. N̂eraswaxe ro mak ciwya pono komo awaikarî komo yentarî ke. Ero wara naxe okwe, kexe tîwratarî komo me.

19 On wara marha wîîkes awya so, Aporin komo Kaan Ow wîîkesî, Pahxaro ewtotho me tak kiir̂asî. Pohnîtho meen̂axe ewtotho mko, ero warai me kiir̂as amoro hara Ciru. Tuuna imo marha wekpesî awenorinokan̂e me. Weyun kwaw tak mas okwe.

20 On wara marha wîîkes apono pen komo ya, ero yimaw pahxan pen komo yaka tak kaar̂axe so, ewtarî imo yaka ha. Roowo yatumnawno me tak maxe okwe. Ewtotho pono wara tak maxe ero yimaw. Iito tak maxe ewtarî imo yaka tîtosom komo yakro. Tooto yewton me exihra ro mak tak mas hara amn̂e. Kir̂wan komo reha wîîr̂asî waipîn komo rowon po.

21 N̂eraswaxe tak mer̂pono pîn komo awaikacho komo yentache. Exihra tak maxe okwe. Awepor̂axe so rma re, awenîra ro mak tak naxe okwe. Ero wara kiir̂axe so amn̂e, wîîkes awya so. Aporin komo Kaan Ow ero wara wîîkesî, kekn̂e. Ero wa kekn̂e Kporin komo owya.