1-2 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, on wara wîîkes hara awya, awratakî Ciru pono komo pînîn yaw. Amtapotakî marha awratarî me.

3 On wara kasko Ciru pono komo ya awratarî me, Ai, Ciru pono komo, tuuna imo yecihtawno komo amyamro. Twarawantaxmu komo amyamro mîk hak pono komo yakro, tuuna imo yecihtawno komo yakro. On wara kesî Kporin komo awya so, Ai, Ciru pono komo, on wara mîîketken̂e, Cewtoporem xa amna okre, mîîketken̂e.

4 Awewkuru wara rma xakn̂e tuuna imo. Kir̂wan̂he ro mak amîn komo n̂iir̂atken̂e amîn ciin̂e komo.

5 Siprexte yepu n̂iir̂atken̂e amîn me. Mehxa n̂ekyatken̂e siprexte yepu Sen̂i poi. Setru yepu marha n̂ekyatken̂e Ribanu poi akanawarî yecepu me ciisom.

6 Basan poi n̂ekyatken̂e kahpar̂u yepu awayaru komo me ciisom. Siprexte yepu n̂ekyatken̂e akanawarî komo me ciisom. Mahpin ke ero yipu porokucetken̂e kanawa ciir̂ataw.

7 Riin̂u kahxapu n̂ekyatken̂e Exitu poi akanawarî yecepu pono me. Tporokutoxapu n̂ekyatken̂e riin̂u kahxapu kir̂wanî ro okre. Ero poko so rma mîmewretken̂e awewton komo kuknon. Awawarpamacho komo me xakn̂e poono tîswayem, camnarexapu marha. Erisa poi tî ero n̂ekyatken̂e.

8 Siton pono komo, Ahpace pono komo, ero warai komo xatken̂e kweikwei kan̂e me akanawarî komo yaw. Iito awewton po xatken̂e mîn hak poko ehcamhokaxapu komo. Noro yipu komo xatken̂e akanawarî kor̂man̂e komo me.

9 Xebaw pono komo marha cetken̂e akanawarî komo yaw, poritomo komo, ehcamhokaxapu komo. Akanawarî yahkoroman̂e me xatken̂e okoropo warai ke. Anakwataka mokyatken̂e ahnoro tuuna kwaw tîtosom komo, kanawa yaan̂e komo. Awakro so warawantaxi mokyatken̂e.

10 Pehsa komo xatken̂e asowtatun komo me, Rica pono komo marha, Puce pono komo marha. Amîn komo wacan pona nakrîyatken̂e cecen̂an komo, tîxapikan komo marha. Ero wara awewton komo n̂iir̂atken̂e eserepokano ritopo me xa okre.

11 Asowtatun komo yakro xatken̂e Ahpace pono kom hara sowtatu komo, Kamace pono komo marha. Mîîmoci yaw so n̂examro xatken̂e awacan komo kanahtawno yaw. Waapa yekaiporen̂e mîn yaw so xatken̂e. Amîn komo wacan pona nakriyatken̂e cecen̂an komo. Ero wa amîn komo porokucetken̂e cenpore xa cehso ro.

12 Tahsisi pono komo warawanwatken̂e awakro so mer̂pora ro mak exirî ke awemyawno komo, cepethîkem kom ha. Awya so nîmyatken̂e prata, pehu, estan̂u, xumbu, ero warai nîmyatken̂e awya so awemyawno komo yepetho me.

13 Xapan pono komo marha warawanwatken̂e awakro so, Tubaw pono komo, Meseke pono komo, ero warai komo. Awya so nîmyatken̂e awanton komo, paayu, bronse ciixapu, ahce na ciixapu marha bronse. Ero yipu nîmyatken̂e awya so awemyawno komo yepetho me.

14 Tokahma pono komo marha warawanwatken̂e awakro so. Kawaru komo nîmyatken̂e n̂examro reha awya so. Tawsîn̂em yaan̂e komo mîk nîmyatken̂e kawaru, sowtatu yaan̂e komo marha. Muura komo marha nîmyatken̂e awya so. Noro yipu komo nîmyatken̂e awya so awemyawno komo yepetho me.

15 Tetan pono komo marha warawanwatken̂e awakro so. Miyan pono komo rma warawanwatken̂e awakro so tuuna imo yecihtawno komo. Erepanci yorî ke awepemetken̂e so n̂examro reha, ebanu yepu ke marha.

16 Siriu komo marha warawanwatken̂e awakro so mer̂pora ro mak exirî ke awemyawno komo, an̂irithîrî kom ha. Ero pona so awepemetken̂e esmerawta ke, poono camnarexapu ke, poono porokotuxapu ke, riin̂u kahxapu ke, koraw ke, akata ke, ero warai ke awepemetken̂e so.

17 Xuta komo warawanwatken̂e awakro so, Ixaw Yana komo marha. Awemyawno komo n̂epemetken̂e puruma ke, Min̂ici pono komo natîtho ke, anahrî komo tîkporem ke, weenu ke, aseci ke, bawsamu ke, ero warai ke awepemetken̂e so.

18 Tamasku pono komo marha warawanwatken̂e awakro so mer̂pora exirî ke awemyawno komo, anarmerpan exirî ke marha cepethîkemu mko. Awepemetken̂e n̂examro reha kawaxiyem ke, Ewbon pono komo n̂iritho ke ha. Oper̂a pocitho ke marha awepemetken̂e so, tumutwem ke.

19 Taan pono komo marha warawanwatken̂e awakro so, Xapan pono komo marha, Usaw pono komo xa. Awemyawno komo n̂epemetken̂e pehu ke, yukuyixapu ke, kasia ke, karamu ke, ero yipu ke awepemetken̂e so n̂examro reha.

20 Tetan pono komo marha warawanwatken̂e awakro so. Kawaru mkarî yaam ke awepemetken̂e so n̂examro reha.

21 Arabia pono komo marha warawanwatken̂e awakro so emapona roro, Keta pono komo marha. Kahn̂eru ke awemyawno komo n̂epemetken̂e, kahn̂eru xîkrî ke, boce ke marha.

22 Saba pono komo marha warawanwatken̂e awakro so, Haama pono komo marha. Anahrî komo poxun ke awemyawnonhîrî komo n̂epemetken̂e, toopuci enporixapu mko ke, ooru ke, ero warai ke awemyawno komo n̂epemetken̂e.

23 Aran pono komo marha warawanwatken̂e awakro so, Kan̂e pono komo, Eten pono komo, Saba pono komo, Asiriu komo, Kiwmace pono komo, ero warai kom ha.

24 Poono ke marha awemyawno n̂epemetken̂e cenporem ke okre, tîswayem, porokutoxapu, ero warai ke awepemetken̂e so poono ke. Ketapitopo yaam ke marha awepemetken̂e so, tmewrem komo ke. Xapopo warai ke kahxapu mîn xakn̂e ketapitopo yaam. Ero warai ke awepemetken̂e so.

25 Tahsisi pono komo kanawarî xakn̂e awemyawno komo yaan̂e me. Copoyi ro mak nasî awemyawno yîmtotopo mko. Ciwya pono amoro tuuna imo kwawno pono.

26 Miya so awar̂atken̂e so amaywen komo kweikwei kan̂e kom ha. Awetapetken̂e so ha tko ocowo imo, resce n̂ixan. Akanawarî komo n̂ekararakekn̂e tuuna imo rakataw rma okwe.

27 Amn̂e tak awîrîmacho komo me xa tak n̂enmayas okwe. Ero yimaw tak ahnoro ahyawno komo n̂enor̂asî ro mak okwe tuuna imo rakataw rma. Apurantanthîrî komo n̂enor̂asî, awemyawnonhîrî komo, poko twarawantaxmunhîrî, akanawarî yaan̂enho komo, akanawarî yakîhton̂enho komo, ahce na tîmn̂e komo epethîrî pona, asowtatun pen komo, ahnoro awewton pononho pen komo n̂enor̂axe tuuna imo kwaka rma okwe.

28 N̂esewsîyasî tak woskara komo akanawarî yaan̂e komo mtapotarî yentache, Amna n̂enor̂as okwe, kacho yentache ha.

29 Ero yimaw tîkanawarî komo nahsîpînkexe kr̂a ahnoro kweikwei kan̂enho komo. Ahnoro kanawa yaan̂e komo n̂ecececexe ecihtaw mak.

30 Okwe okwe, kexe apînîn yaw so. Cerewre ro mak nîwracexe. N̂ekanapupurexe roowo ke, wermonho cheka marha n̂ehmamexe.

31 N̂ekanamurinkexe apînîn yaw so cexirî ke so. Kumixitho namruyaxe. Ahwora ro mak nîwracexe apînîn yaw so. Wara ro mak kexe tîwratarî me so.

32 On wara kexe apînîn yaw tîwratarî komo me, Ahto ma re nai anarî ewto imo Ciru warai hara? Ahto ma re nai ero warai ewto pen tuuna imo kwaka ar̂maxaputho okwe? kexe.

33 Awemyawno komo yaar̂ataw tuuna imo kwaw anarmerpan komo mereporetken̂e mer̂pono pîn kom ha. Kayaritomo komo meero memyawnometken̂e roowo poko hakno komo mer̂pora exirî ke awemyawno komo, cepethîke so exirî ke marha.

34 Amn̂e tak tar̂matîkaxi tak maxe okwe tuuna imo ke rma. Cenoriso maxe okwe weyuntaw ro mak okwe. Cenoriso marha nasî awemyawnonhîrî komo, amaywenînhîrî pen komo marha.

35 Ahnoro tuuna imo yecihtawno komo naxe ahwora ro mak awar̂marî ke so. Tatanaxe mak kayaritomon komo. Cerahsom wara mak tak n̂esenpexe okwe.

36 Kuu kexe tak twarawantaxmu komo, anarî yana komo, apoko so ceserepokarî ke so. Okwe, kacho me xa tak maxe yîwya so. Eroromero mexponkexe okwe, kasko, kekn̂e Kporin komo owya. Ero wara kekn̂e.