1-2 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, Ciru pono komo yantoman̂e yakro tak amtapotakî. On wara kasko yîwya, Ai, apa on wara kesî Kporin komo Kaan awya, On wara mîîkesî, Kaan me cehsom ow ha. Kaan me cehsom komo yapon pono rma ow, tuuna imo rakatawno pono ha, mîîkesî kica. Tooto mak mexe amoro, Kaan me cehsom pînî ro mak. Tohnaw ro mak wa mîîkesî, Takîhso cesehtînosom xa ow, Kaan yesehtînotopo me rma kesehtînoyas ha, mîîkesî.

3 Takîhso cesehtînosom me rma re mai Tan̂iew yopo. Ahce na poko camkî natu tooto komo ero poko camkîra ro mak masî amoro reha.

4 Takîhso ro mak masî ahce na poko, yuhnari marha mîhtînoyasî ahce na poko. Ero wara awexirî ke awemyawno mepamnoyakn̂e. Apurantan mîn yaw so ooru mepamnoyakn̂e, prata marha.

5 Awemyawno poko camkîra xa mîwarawanwasî tooto komo yakro. Ero ke awemyawno mepamnoyakn̂e. Mer̂pora ro mak exirî ke awemyawno pen anarî komo yopono me tak mesehtînoyasî kica.

6 Ero ke on wara kesî Kporin komo Kaan awya, On wara mîîkesî, Kaan me cehsom komo warai rma ow, mîîkesî kica.

7 Ero wara awesehtînorî ke anarî yana komo tak wekyasî awaparî me okwe. Anarî rowon pono komo mîkyam, waapa me cehsom xa tko okwe. Tîkaciparan komo mohkexe een yai awemyawno komo yamachome cenporemînhîrî ha. Kir̂wanînhîrî ro mak namexe okwe, takîhso ciixapunhîrî.

8 Ewtarî imo yaka tak awar̂mexe. Waapa nwaikarî me mas okwe amoro pen. Tuuna imo rakataw rma awaikexe so.

9 Ahce wa tak mîîke ero yimaw? Kaan xa ow ha, mîîke ha ma re ero yimaw awaparî komo ya? Tooto me mak masî ero yimaw, Kaan me exihra ro mak masî. Ero wa masî awaparî komo ya.

10 Noro pîntho wara rma mîwaiyasî anpikan komo wara rma okwe. Anarî yana komo rma awaikesî. Ero wara wîîkes Ow Aporin komo Kaan ha, kekn̂e. Ero wara kekn̂e Kporin komo.

11-12 Ero yinhîrî on wara kekn̂e xa hara Kporin komo owya, Ai tooto xîkrî, Ciru pono komo kayaritomon pînîn yaw tak awratak hara. Awratarî me on wara kasko yîwya, Ai, Ciru pono komo kayaritomon, on wara kesî Kporin komo Kaan awya, Pahxa kir̂wanî ro me mîxakn̂e okre. Takîhso xa mîxakn̂e. Cenporem me marha mîxakn̂e.

13 Eten po mîxakn̂e pahxa, Kaan natîrî yewtî po. Anarmerpan ke ceporokutoso mîxakn̂e, toopuci enporixapu ke. Sahton̂ia, topasiw, ciamanci, turkesa, on̂ixi, xaspe, sapira, kahmunkuru, esmerawta, ero warai ke ceporokutoso mîxakn̂e okre. Ooru marha xakn̂e aporokru. Asamaporan marha n̂iir̂akn̂e Kaan, aratîn marha cecesom. Ero wara awir̂akn̂e Kaan pahxa awakîtotoponhîrî po rma.

14 Kerubin amoro, kîhkapekn̂e oyeken yahrun̂e me. Kaan yîpînî ro po ka mîxakn̂e. Toopu chere metar̂akn̂e wehto ke cetahsîsom chere.

15 Kicicitho mîkro, kacho mera ro makî ka mîxakn̂e. Ero wara roro ka mîxakn̂e awakîtotoponhîrî n̂ixa ro kicicitho me tak awehtoponhîrî pona roro hara okwe.

16 Miyan komo yakro rma twarawantaxmu me mîxakn̂e. Ero yanme waapa me awehtopo tak mîhtînotîkekn̂e okwe. Kicicme tak mîxakn̂e okwe. Ero ke ken̂epekn̂e kr̂a Kaan yîpîn poi. Ero wara ken̂epekn̂e toopu chewnonho, wehto ke cetahsîsom chewnonho ha. Kerubinînhîrî amoro Kaan yeken yahrun̂enho.

17 Miyan komo yopono me rma mesehtînyoyakn̂e, cenporem me xa awexirî ke. Takîhso cesehtînosom me awehtoponhîrî maknamekn̂e kicicme awehtopo pona hara. Ero wa mîxakn̂e cenporem me awexirî ke marha okwe. Roowo pona tak kar̂mekn̂e. Kayaritomo komo wero ro rma kar̂mekn̂e awentome tak yîwya so.

18 Mer̂pora tak xakn̂e kicicme awehtoponhîrî. Kicicitho me mîwarawanwakn̂e kica. Ero wara awexirî ke amînî ro mko mîwîrîmekn̂e kica. Ero ke wehto tak wahrunkekn̂e ahyawnonhîrî rma. Ero rma awakn̂iyakn̂e. Ero wara wemronho me tak kiir̂akn̂e, roowo pore pahxapu warai me. Ero wa kiir̂atken̂e awehtoponhîrî yenîn̂e komo wero ro rma.

19 Anarî yana komo xatken̂e awehtopo yentan̂e komo. N̂examro n̂eserepoketken̂e awar̂machonhîrî yentarî ke. Noro yipu amoro okwe. Okwe ro mak okwe, kexe ro mak anarî yana komo apoko. Mexponkesî tak exihnî me ro mak, kasko yîwya, kekn̂e. Ero wara kekn̂e Kporin komo owya.

20-21 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, on wara wîîkes hara awya, Siton pono komo wece cewru tak esko hara. Iitono komo yîwîrîmacho ekatîmko hara.

22 On wara kasko yîwya so, Ai Siton pono komo, on wara men kesî Kporin komo Kaan awya so, awemetanmecho komo tak wîhtînoyasî. Kayaritomo me xa oyehtopo wenpesî ero wara awirirî komo ke. On wara tak mîîkexe opoko amn̂e awîrîmache so owya, Kporin komo xa Mîk ham, mîîkexe. Kaan me xa tak kesenpesî awar̂marî komo ke.

23 Siton pono pen komo wiir̂asî eper̂a nahsîrî me. N̂examro kamxukutho marha wen̂epesî esamarî yaw so. N̂examro yewton po rma iitononhîrî pen komo naxe paraxkaxapu me. Ero wa n̂examro ya wîmyasî kicicme ehtoponhîrî komo yepetho. Mehxarpa mokyaxe waparî komo okwe, kacipara imo ke cemyarkem kom ha. Ero yimaw on wara tak kexe Siton pono komo opoko, Kporin komo xa Mîk ham, kexe. Ero wara kexe.

24 Ero yimaw Ixaw Yana xatî pîn komo exihra tak naxe yîmîtwono kom ha. Cekyekyem warai mîkyam xatken̂e oko. Ixaw Yana komo nîwîrîyakexe mak okwe. Ero wa exihra tak naxe yîmîtwono komo amn̂e. Ero yimaw tak on wara kexe Ixaw Yana komo, Kporin komo xa Mîk ham, kexe tak hara.

25 On wara marha wîîkes Ow, Aporin komo Kaan ha, On wara naxe Ixaw Yana komo amn̂e, takpaxi so naxe anarî yana komo chew. Yîchei so tko n̂examro wekyas hara. Ero yimaw on wara tak kexe Xenciu komo, Kaan xa nai ham Ixaw Yana komo chew okre, kexe. Ero yimaw tîrowonî ro po tak naxe Ixaw Yana komo. Roowo wîmyakn̂e oyanton ya, Xako ya ero po n̂axe Ixaw Yana komo.

26 Iitono ro me tak naxe tukurui okre. Tîmîn komo n̂iir̂axe, tînatîrî komo marha n̂iir̂axe uupa yatî. Mokuhra ro mak tak naxe n̂examro waparî komo. Yîmîtwononho pen komo wîwîrîmesî Ixaw Yana yîwîrîyakan̂enho pen komo. On wara kexe ero yimaw opoko, Kporin komo xa Mîk ham, kexe. Ero wara kexe Ixaw Yana komo, kekn̂e. Ero wara kekn̂e Kporin komo owya.