1-2 Ero yinhîrî Kporin komo mtapotarî wencekn̂e xa hara. 10 cimn̂ipu xakn̂e ero yimaw Babiron̂a po amna yehtoponho. 10-înhîrî nuun̂i po kekn̂e, 12-nhîrî kaamo po. On wara kekn̂e owya, Ai, tooto xîkrî, on wara wîîkes hara awya, Paraw wece cewru tak esko hara, Exipsiu komo kayaritomon wece. Noro yîwîrîmacho ekatîmko hara, ahnoro Exipsiu komo yîwîrîmacho ha.

3 On wara kasko Paraw ya, Ai, Paraw, Exipsiu komo kayaritomon amoro. On wara wîîkes awya, awîrîmacho tak wîhtînoyasî. Watwa imo warai mak amoro awewkuru kwawno warai. On wara mîîkesî, oyewkuru ro mîn N̂iru yepu. Owî rma wiir̂akn̂e oyewkuru ro me, mîîkesî kica.

4 Kiiwi ke tko kahsîyasî ayohyarî yahsîn̂e ke. Ootî marha n̂etahsîyasî apîpîthîrî poko. Ero wara nasî ootî awewkuru kwawno komo. Oyanme mak ero wara nasî. Ero yinhîrî kanîmyasî awewkuru kwai. Ootî rma nasî cetahsîso apîpîthîrî poko. Ero wa n̂etahsîyasî ahnoro awewkuru kwawno ootî komo.

5 Axawa imo po rma knomyasî. Awakro rma wînomyasî ootî komo awewkuru kwawnonho komo. Woskara po rma mepîrkesî. Awepîrkache awanmîra ro mak naxe tooto komo. Amaywen komo yenmekîra naxe. Kamara yotî me mak knomyasî, kwacinama yotî me marha.

6-7 Ero wa awexitaw tak on wara kexe ahnoro Exipsiu komo opoko, Kporin komo xa Mîk ham, kexe. Ixaw Yana yamoyin wara rma re mîxakn̂e amoro Paraw, cukmano wara hatko. Tamorî ke so awahsîn̂e wara xatken̂e. Ero wara exitaw so cetatukmaxmu wara mîxakn̂e okwe. Awanme marha n̂examro motarî n̂esewkekn̂e oko. Apona ecececetaw so metaxikwekn̂e n̂examro petî yenîhmatome mak oko.

8 Ero ke on wara kesî Kporin komo Kaan awya Paraw, Awaparî komo wekyasî kacipara imo ke cemyarkem kom oko. Amaywen pen komo waihkexe okwe, iyokuthîrî pen komo marha okwe.

9-10 Pohnî me tak nasî Exitu ero yimaw, axawa me mak. Ero yimaw on wara kexe iitononhîrî komo opoko, Kporin komo xa Mîk ham, kexe. Ero wara kexe. On wara mîîkekn̂e amoro Paraw, Oyewkuru ro mîn N̂iru yepu. On̂iritho rma mîn ha, mîîkekn̂e kica. Ero ke awaparî me rma was Ow hara. Awewkuru wapainokesî. Wemronho me tak wiir̂asî awewtonthîrî mko okwe. Pohnî me mak wiir̂asî arowonthîrî. Ero wara roowo wiir̂asî Mikitow pona rorono, Sien̂e pona rorono marha. Miya rorono ero wara wiir̂asî arowon Eciopia rowon wokpan pona roro.

11 Arowonthîrî pore tohra ro makî tak nasî tooto, okno marha. Tooto yewton mera ro mak nasî pahkî 40 cimn̂ipu pahkînon ha.

12 Pohnî me ro mak Exitu rowontho wiir̂asî. Yîmîtwononho komo rowontho meero wiir̂asî pohnî me. Pohnî me marha nasî Exipsiu komo yewtontho. Ero wara nasî 40 cimn̂ipu okwe. Exipsiu pen komo wakpayasî mîk hak rowon pono komo cheka. Mîk hak rowon po tak naxe ero yimaw.

13 On wara marha kesî Kporin komo awya so, 40 cimn̂ipu exiche tak Exipsiu komo wekyas hara. Anarî yana komo cheka akpaxapunhîrî komo wekyas hara.

14 Waapa nahsîtho me ehxapunhîrî wekyas hara Patîros rowon pona, n̂examro porin pen rowontho pona ha. Iito tak naxe tkayaritomoi ha re, kar̂pen me tko naxe okwe.

15 Anarî komo xawyaka n̂he nasî Exipsiu komo kayaritomon. Pahxa Mîk hak rowon pono komo yopono me ka xatken̂e Exipsiu kayaritomon komo. Ero warahra ro mak tak nas amn̂e. Kar̂pen me tak n̂examro wiir̂asî. Mîk hak rowon pono komo yantoman̂e mera ro mak tak naxe.

16 Exipsiu kayaritomon pona enîhra ro makî tak naxe Ixaw Yana komo ero yimaw. Kicicme n̂examro yehtoponho ponaronoman̂e me mak tko nasî. Kicicme tîxatken̂e kica pahxa Exipsiu kayaritomon pona een̂ataw kîwya so kica, kexe tak noro yîhtînoyataw. Ero yimaw on wara marha kexe opoko, Kporin komo xa Mîk ham, kexe. Ero wara kexe, kekn̂e Kporin komo owya.

17 Ero yinhîrî Kporin komo mtapotarî wencekn̂e xa hara. 27 cimn̂ipu tak xakn̂e Babiron̂a po amna yehtoponho. Yihcirî nuun̂i po wencekn̂e, yihcirî kaamo po marha, ero po yîmtapotarî wencekn̂e. On wara kekn̂e owya,

18 Ai, tooto xîkrî, on wara wîîkes awya Nabukotonoso poko, Babiron̂a kayaritomon poko, tîsowtatun komo nantometîkekn̂e Ciru pono komo yar̂marî poko. Pahkî n̂etapicketîketken̂e ero poko. Ero poko n̂ehpoketken̂e noro sowtatun komo ahnoro, n̂ekr̂amankekn̂e marha n̂examro motarî oko. Cepethîrî tko ahsîra xakn̂e Nabokotonoso, noro sowtatun komo marha ahsîra xatken̂e, Ciru pono komo yar̂matamci yahsîra.

19 Ero ke on wara wîîkes Ow, Aporin komo awya, Exipsiu pen komo war̂mapesî Nabukotonoso ya, Babiron̂a pono komo kayaritomon ya. N̂examro purantantho naar̂asî. Ahnoro iitono komo yemyawnonho nahsîyasî, naar̂asî marha tîsowtatun komo yepetho me.

20 Exipsiu pen komo war̂mapesî yîwya Ciru pono pen komo yar̂matoponho yepetho. Oyanme rma n̂examro n̂etapicketken̂e. Ero ke wepemesî, wîîkesî. Ero wara wîîkes Ow, Aporin kom ha.

21 Ero yimaw paaka meretîtho warai me tak n̂ehtîkesî Ixaw Yana komo kayaritomon. Karitî me n̂he n̂ehtîkesî. Ero yimaw marha tîmtapotaxmu me kiir̂as hara n̂examro chew. Ero yimaw on wara kexe Ixaw Yana komo opoko, Kporin komo xa Mîk ham, kexe. Ero wara kexe, kekn̂e. Ero wara kekn̂e Kporin komo owya.