1-2 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, omtapotarî ekatîmko xa hara. On wara kasko Exipsiu komo kayaritomon ya, On wara kesî Kporin komo Kaan awya, Awratakî tak. Okwe ro mak, kacho me tak men n̂enmayas amn̂e okwe.

3 Pahnoke tak nasî Kporin komo yîrwonîmtopo okwe. Awarapape men n̂enmayas amn̂e. Mîk hak rowon pono komo yîwîrîmacho me n̂enmayas okwe.

4 Exipsiu pen komo waparî mokyaxe ero po, kacipara imo ke cemyarkem kom ha. Eciopia pono komo marha n̂esemetanmekyaxe tîwrataxi ro. On wara marha naxe Exipsiu komo waihyataw, n̂examro yemyawnonho naar̂axe waapa komo. Yîmînthîrî komo marha nakn̂iyaxe, mapatanthîrî marha mohkexe.

5 Eciopia pono komo, Puce pono komo, Ruce pono komo, ahnoro Arabia pono komo, Kube pono komo, miyan komo rma n̂epîrkexe ero yimaw, Exipsiu pen yakronoman̂enho pen komo. Kaciparayem komo nparaxkatho me rma waihyaxe oko.

6 On wara marha kesî Kporin komo, n̂epîrkexe amn̂e Exipsiu yakronoman̂enho pen komo. Exipsiu pen komo marha n̂epîrkexe, Mîk hak rowon pono komo yopono xa amna karitî, kan̂enho komo. Mikitoro pona rorono komo n̂epîrkexe, Sien̂e pona rorono komo marha. Iitono komo waihyaxe kacipara imo ke rma oko.

7 Pohnî me mak nasî Exipsiu komo rowontho. Yîmîtwononho komo rowontho marha nasî pohnî me. Ewtotho me marha nasî Exipsiu komo yewtontho, yîmîtwononhîrî yewtontho marha.

8 Ahnoro Exipsiu yewtontho wakn̂iyasî. N̂examro yakronoman̂enho pen komo waihkesî. Ero wara ciino wiir̂as amn̂e. Ero wara cexiche so tak on wara kexe Exipsiu komo, Kporin komo xa Mîk ham kîwîrîman̂enhîrî komo, kexe. Ero wara kexe.

9 On wara naxe Eciopia pono komo, erasîn me ro mak naxe waapa pona. Kporin komo yîrwonîmtopo me enmapuche tko n̂examro yeraspen̂e komo wen̂epesî kanawa imo yaw. Exipsiu pen komo waihyaxe ero po. Ero po marha Eciopia pono pen komo n̂eraspexe on̂en̂eperî komo. Nahwokexe ro mak Exipsiu pen komo waihtoponho yentache. Ero wara men n̂examro pen ciitopo me n̂enmayas amn̂e.

10 On wara marha wîîkesî Exipsiu komo poko. Aporin komo Kaan Ow wîîkesî, mer̂pora rma re naxe Exipsiu komo. Waihkano tko n̂iir̂asî Nabukotonoso, Babiron̂a kayaritomon. Ero yimaw mer̂pora exihra ro mak tak naxe mer̂pono pînînhîrî.

11 Nabukotonoso wekyasî, noro sowtatun komo marha. Waapa me cehsom xa mîkyam mîk hak rowon pono komo yopo. Noro yipu komo wekyasî Exipsiu komo rowon yîwîrîmachome. Iitono pen komo namexe kacipara imo ke okwe. Tawronohkatîkaxi tak nasî Exipsiu komo yewtontho okoputhîrî komo ke rma.

12 Ero yimaw tuuna yepu wapainokesî. Iitononhîrî pen komo rowontho wîmyasî kicicitho komo ya, epethîrî pona wîmyasî. Exipsiu komo rowontho wîwîrîmapesî anarî yana komo ya. Ero pono mko marha wîwîrîmapesî ahnoro yîwya so. Aporin komo rma Ow ero wara on̂irirî wekatimyasî.

13 On wara marha wîîkes Ow Aporin kom ha, ciixaputho mko marha wîhcamnoyasî, ponaro n̂examro pen yehtoponho. Ero yimaw exihra tak nasî mîk hak warai me ciixaputho Nope po. Exihra marha nasî Exipsiu komo yantoman̂e hara. Cerahsom me tak wiir̂asî Exipsiu komo.

14 Pohnî me tak wiir̂asî Patîros. Sowan pononho wakn̂iyasî mîîmotho. Noo pono komo marha wemetanmekyasî kicicme exirî ke so.

15 Kîrwonasî Sin pono pen komo poko. Exipsiu sowtatun komo yewton mîn Sin ha. Noo pono pen komo waihkesî mer̂pono pînînhîrî pen komo.

16 Exipsiu komo yewtontho wakn̂iyasî. Sin pono pen komo n̂erewaxe ro mak oko. Noo wacan nawkexe waapa komo. N̂esemetanmekyaxe Menpisi pono komo enmar̂atîxera okwe.

17 Apen pono pen komo waihyaxe kacipara ke kar̂pamxan pen komo, Pi-Besece pono pen komo marha. Iitono komo rma tak naar̂axe waapa komo.

18 Awarpape tak nasî kaapu ero yimaw Tapn̂ese to. Ero wara nas amn̂e antomano rin̂e mera tak Exipsiu komo riyataw owya. Ero yimaw ehcoyoponkara ro mak tak naxe, Karitî xa amna ayopo so, kahra tak naxe iitono komo. Ewtotho tak nahruyasî ero yimaw, Tapnesetho ha. N̂examro yemsîrî pen komo naar̂axe waapa komo ero yimaw.

19 Ero wara Exipsiu pen komo wîwîrîmesî. Ero yimaw on wara kexe opoko, Kporin komo xa Mîk ham, kexe. Ero wara kexe Exipsiu komo opoko ero yimaw.

20-21 Taa, 11 cimn̂ipu tak xakn̂e Babiron̂a po amna yehtoponho. Ero po Kporin komo mtapotarî wencekn̂e xa hara. Yihcirî nuun̂i po wencekn̂e, 7-nhîrî kaamo po. On wara kekn̂e owya, Ai, tooto xîkrî, on wara marha wîîkes awya, Paraw wapoxwoi Exipsiu komo kayaritomon pen. Eronhîrî yimihra xakn̂e kehceman̂e, ecetî cirihra marha xakn̂e ecihtome. Ero ke kar̂pera nasî noro yapotho kacipara yahsîrî yarohra thakwa.

22 Ero ke on wara wîîkes Owî Aporin komo Kaan. Paraw waparî me tak was Ow, Exipsiu komo kayaritomon waparî me. Noro yapotho tak waxikwesî asakno roro rma. Axikwoxapu waxikwes hara, axikwonînhîrî marha waxikwesî. Ero wara noro pen wîwîrîmesî noro kaciparan yepîrkachome amorî yai.

23 Exipsiu pen komo tak wakpayasî mîk hak rowon pono komo chere. Miyan komo cheka so rma wen̂epesî.

24 Babiron̂a kayaritomon yaporî Ow karihcesî. Okaciparanî rma wîmyasî noro yemyaka. Paraw yapotho reha waxikwesî. Noro pen n̂emkutunasî paraxkaxapu wara, coro yaw paraxkaxapu wara. Nabukotonoso yeepatai rma n̂emkutunasî.

25 Babiron̂a kayaritomon yaporî Ow karihcesî. Tarore mak tko nasî Paraw yaporî kar̂pera exirî ke. Babiron̂a Yana kayaritomon yemyaka wiir̂asî okaciparanî rma. Capacapa kesî tak noro ero ke Exipsiu komo yamacho poko. Ero yimaw on wara kexe Exipsiu komo opoko, Kporin komo xa Mîk ham, kexe.

26 Ero yimaw Exitu pono komo wakpayas anarmerpan komo cheka. Miyan komo cheka rma wen̂epesî. Ero yimaw tak on wara kexe opoko, Kporin komo xa Mîk ham, kexe. Ero wara kexe Exipsiu komo.