1-2 Ero yinhîrî Kporin komo mtapotarî wencekn̂e xa hara 11-nhîrî cimn̂ipu po. 3-nhîrî nuun̂i po wencekn̂e, yihcirî kaamo po ha. Ero po wencekn̂e. On wara kekn̂e owya, Ai, tooto xîkrî, omtapotarî ekatîmko xa hara Paraw ya, noro sowtatun komo ya marha mer̂pono pîn komo ya. On wara kasko yîwya, Ai, Paraw, kayaritomo xa amoro. Anarî komo yopono xa amoro kayaritomo me cehsom xa. Onoke katî nai awarai?

3 Asiriu kayaritomon yîhtînoko. Ribanu pononho mîk xakn̂e setru yepu warai. Cenpore xakn̂e ero peremru. Comota yawarpamacho me xakn̂e. Kaw xakn̂e ero peremru comota yarî yopo.

4 Iito tuuna xakn̂e yuhnaw ero tîhn̂e. Ero yanme kaw xa por̂mamyakn̂e. En̂exa n̂etakpayakn̂e tuuna yepu yaake. Mîn hak tîhn̂e me xakn̂e weewe mko tîhn̂e me.

5 Ero ke kaw xa por̂mamyakn̂e anarî weewe yopo xa. Mer̂pora n̂eseknacekn̂e. Kaw xa n̂ehtîkekn̂e peremru. Ero wara por̂mamyakn̂e mer̂pora exirî ke tuuna iito.

6 Ero peremru pona tîmîn n̂iir̂akn̂e torowo komo ahnoro. Ero yawarpanaw okno komo n̂ewruyakn̂e. Mîk hak rowon pono komo n̂esekenmetken̂e ero yawarpanaka karitî me cehsom komo rma.

7 Cenporem xa mîn xakn̂e weewe ehyatkaw so xakn̂e peremru okre. Yuhnaka n̂imicinwakn̂e tuuna kwaka mer̂pono pîn kwaka.

8 Kir̂wan̂he rma re xakn̂e setru komo Kaan natîrî komo ero warahra ha tko. Kir̂wan̂he rma re xakn̂e siprexte yepu komo ero warahra marha. Kawra xakn̂e siprexte peremru. Kir̂wan̂he marha re xakn̂e anarî yepu komo ero warahra marha. Wahra xakn̂e anarî peremru. Ero xakn̂e cenporem me xa ahnoro weewe mko yopo Kaan natîrî yopo.

9 Owî rma noro wiir̂akn̂e cenpore xa. Tperemke xa wiir̂akn̂e. Eten pono mko pohnîmtopo me xakn̂e okre, Kaan natîrî komo pohnîmtopo me ha.

10 Ero ke on wara wîîkes Ow, Aporin komo Kaan, Kaw xa xakn̂e ero weewe. Ero yarihtarî xakn̂e kaw xa anarî yopo. N̂ehcoyoponkekn̂e tko kica kaw xa cexirî ke.

11 Ero ke ero pen wtak ar̂mapesî anarî rowon pono kayaritomon ya. Noro rma n̂emetanmekyasî. Ero wen̂epekn̂e kr̂a miya kicicme exirî ke.

12 Ero tak nametken̂e anarî yana komo. Waapa komo xa mîkyam, mîk hak rowon pono komo yopo. Amache nînomyatken̂e. Îh pona n̂epîrkekn̂e peremthîrî, woskara pona so marha. Miya so tak nasî peremthîrî taxikwoso okwe. Tuuna yaporî yecihtaw so nasî roowo poko hakno yecihtaw. Miya so tak cetken̂e anarî yana komo, roowo poko hakno komo. Ero yawarpanawnonhîrî komo cetken̂e weewe yepu yai.

13 Yîpîrîtho me tak nas okwe. Ahnoro tarin̂em komo tak n̂etahsîyaxe ero peremtho pona. Ero peremtho mîtkoso mokyaxe okno kom ahnoro.

14 Erotho wamapekn̂e ehcoyoponkara ro mak tak ehtome so anarî weewe komo yopo cexirî ke, kaw xa cexirî ke ha. Kaw xa por̂mamtîkara exi xe wasî anarî peremru yopono me. Ero wara exi xera wasî weewe komo tuuna yecihtawno kom ha. Twaihkaxmu me xa matko naxe noro yipu komo. Roowo yatumnaka tar̂maxmu me mak naxe waixapu pen komo cheka, ewtarî imo yawno komo cheka.

15 On wara wîîkes Ow, Aporin komo Kaan, ewtarî imo yaka cetaw noro weewetho warai yîspeno wiir̂akn̂e. Tuuna wahruyakn̂e noro pînîn yaw. Tuuna yepu Ow wahkocekn̂e. Ahnoro iitono wahkocekn̂e tuuna pen mer̂pono pîn. Ahwon wara wîîr̂akn̂e Ribanu ero yimaw. Ahnoro weewe komo xakn̂e taatupe so ero yimaw.

16 Mîk hak rowon pono komo Ow tatarekn̂e noro pen yepîrkacho yentarî ke. Ero wara ciino wiir̂akn̂e noro pen yar̂metaw owya, ewtarî imo yaka ar̂metaw ha. Ewtarî imo yawno komo cheka war̂mekn̂e. Iito ewtarî yaw xatken̂e yaake weewe Eten pononho komo. Ribanu pononho pen komo marha xatken̂e iito, kir̂wanînhîrî pen komo, tuuna ke atîkrexapunhîrî pen komo. N̂examro tak xatken̂e cerepore n̂he noro pen yenîrî ke tak. Ero wara xatken̂e roowo yatumnawno komo.

17 Noro pen yawarpanawnonho pen komo marha cetken̂e ewtarî imo yaka noro pen yakro rma. Noro yakronoman̂enho komo mîkyam iina cetken̂e, mîk hak rowon pono komo. Kacipara imo ke waihkaxapu pen komo cheka rma cetken̂e.

18 Yaake xatken̂e Eten pononho komo weewe komo. Kir̂wanînhîrî komo mîkyam xatken̂e. N̂examro yopo tko mîxakn̂e amoro reha kir̂wan me, karitî me marha. Noro yipunhîrî rma tko amoro rma mîîcesî roowo yatumnaka weewetho wara, Eten pononho wara. Tîrapo tak masî etanpikan komo chew, kacipara imo ke waihkaxapu pen komo chew. Paraw pokono mîn, Weewetho, kacho. Noro pen maywenînho pen komo pokono marha mîn, wîîkesî, kekn̂e. Ero wara kekn̂e Kporin komo Kaan owya.