Ero yinhîrî Kporin komo mtapotarî wencekn̂e xa hara. 12 cimn̂ipu tak xakn̂e Babiron̂a komo chew amna yehtoponho. 12-nhîrî nuun̂i po wencekn̂e, yihcirî kaamo po. Ero po xa Kporin komo mtapotarî wencekn̂e.

2 On wara kekn̂e owya, Ai tooto xîkrî, Paraw pen pînîn yaw awratakî xa hara. On wara kasko noro poko awratarî me, Ai, Paraw, reaw xîkrî warai mak amoro, mîk hak rowon pono komo chewno warai. Watwa imo warai marha amoro tuuna imo kwawno warai. Tuuna yepu nasî arowon po ero kwawno wara masî ewcokocokoman̂e wara. Ahtarî ke mewcokocokomesî. Tuuna yepu mukuturesî marha kica arowon pono mko.

3 On wara wîîkes awya, Aporin komo Ow, Kaan ha. Omîyen yaka kemcinoyasî. Mer̂pono pîn komo yakro rma amna awemcinoyaxe so, tooto komo yakro. Omîyen yaw rma ahxikyaxe so n̂examro ecihtaka.

4 Roowo pona kar̂mesî. Woskara po tak knomyasî. Iito tak kwacinama komo nîhces apona. Apunthîrî tak non̂exe kamara warai komo ahnoro roowo poko hakno komo. Tmaxmitaxi ro awon̂exe okwe.

5 Apunthîrî pahyasî Ow miya so ro mak îh pona so. Takawayemu mko warîhcesî apunthîrî ke.

6 Roowo wîhyasî akamxukuthîrî ke. Tuuna yaporî wara mak cesî akamxukuthîrî, îh pona roro cesî. Copoyi nasî yarinho mko aake.

7 Ero yimaw aweyuru weihkesî. Ero yimaw marha kaapu wahruyasî. Xir̂ko marha weihketîkesî. Kaamo wahruyasî kaapu smun ke. Katpareno cirihra marha nasî nuun̂i.

8 Ahnoro katpareno rin̂e komo wahruyasî kah yawno mko, awepoyino mko ha. Arowon tak wawarparesî, wîîkesî. Ero wara wîîkes Ow Aporin komo Kaan.

9 Mer̂pono pîn komo werepokesî awaiketaw owya. Anarî yana komo ya wekatîmyasî awaikacho, anîhtînotorî komo ya. Ero wara n̂examro werepokesî.

10 Yaaro wîîkesî, mer̂pono pîn komo werepokesî awaikarî ke. N̂examro wece meero pokupoku wîîkesî okaciparan ke. Ero yimaw n̂eraswaxe ro mak tatanîmso ro. Ow pen marha men kwaihyasî, kexe kokmamso ro. Ero wa n̂eraswaxe awaikacho yencetaw.

11 On wara marha wîîkes Ow, Aporin komo Kaan, Babiron̂a komo kayaritomon mokyasî awaparî me. Kacipara imo ke cemyarke mokyasî.

12 Karitî komo mîkyam Babiron̂a komo sowtatun komo, waapa me cehsom komo xa kopi, mîk hak rowon pono komo yopono ha. Kacipara imo ke cemyarke so mokyaxe. Karitî xa amna, kan̂e komo mîkyam Exitu pono komo. N̂examro pen yetapan̂e wara tko wasî, cor̂or̂oman̂e wara ha. Mer̂pora rma re naxe amaywen komo sowtatu kom ha. N̂examro penî tko waihkesî ahnoro okwe.

13 Mer̂pora nasî Exitu pono komo tunarî. Ero yecihtaw so n̂etîrapesî n̂examro yoh komo paaka. Noro yipu komo meero tko waihkes Ow. Yutunathîrî komo ewcokocokomara tak nasî tooto tîhtarî ke so. Yukuturera marha nasî iyoh kom hara tîhtarî ke so.

14 Tpar̂ar̂amutwe tak wiir̂asî yutunathîrî komo ero yimaw. Kir̂wan̂he tak nîhcesî yutunathîrî komo katî wara, wîîkes Ow Aporin komo.

15 Pohnî me tak wiir̂as amn̂e Exitu rowon. Oroto ka mer̂pora nasî iitono komo yemyawno. Amn̂e tak ero yipu exihra ro mak tak nas iito. Iitono pen komo wetapesî. Ero yimaw on wara kexe opoko, Kporin komo xa Mîk ham, kexe. Ero wara kexe, kekn̂e Kporin komo. Ero wara kekn̂e owya.

16 On wara naxe tooto komo amn̂e, nîwracexe wooxam komo, mîk hak rowon pono komo yemsîrî. Exipsiu komo pînîn yaw nîwracexe, mer̂pono pîn pen komo pînîn yaw, kesî Kporin komo. Ero wara kesî.

17 Ero yinhîrî Kporin komo wencekn̂e xa hara. Ero cimn̂ipu po rma wencekn̂e 12-nhîri po. 15-nhîrî kaamo po wencekn̂e.

18 On wara kekn̂e owya, Ai, tooto xîkrî, on wara wîîkes awya, awratakî tak amoro Exitu pono komo pînîn yaw, mer̂pono pîn komo pînîn yaw ha. Ewtarî imo yaka tîtosom thakwa amyamro, kasko n̂examro poko. Ero wara xa marha kasko mîk hak rowon pono yemsîrî komo poko hara, cekaiporesom komo yemsîrî poko. Ewtarî imo yaka tîtosom komo yakro rma etocoko, kasko yîwya so.

19 On wara marha kasko yîwya so, Onok warai komo yopono katî amyamro cenporem me cehsom komo yopo xa? Etocoko xa matko etanpikan komo cheka. Iitono komo yakro tak maxe okwe, kasko.

20 Mer̂pora naxe kacipara ke waihkaxapu pen komo. N̂examro cheka rma cexe Exitu pononhîrî pen kom hara. Tmohkaxi tak nasî kacipara imo een yai. Ero ke n̂examro pen n̂ixihcowpe mer̂pono pîn pen kom ha.

21 On wara kexe ewtarî imo yawno komo, kayaritomo pen komo, karitî pen komo, Mohcow tak ham Exitu pononho kom ha, n̂examro yakronoman̂enho komo marha. Etanpikan komo yawxari rma n̂etîrapexe, kacipara imo ke waihkaxapu pen komo yawxari, kexe.

22 Iito naxe Asiriu pen komo, n̂examro sowtatun pen komo marha. N̂examro mamhoko nasî n̂examro pen yewtarî, waihkaxapu pen komo yewtarî. Kacipara imo ke waihkaxapu pen komo mîkyam okwe.

23 Ewtarî imo yaw rma naxe n̂examro pen yewtarî yuhnaw n̂he tko. Ero yipu mamhoko naxe tîrapo so n̂examro sowtatun pen komo. Pahxa waipîra ka cexitaw so eraspeno ciin̂enho mîkyam kopi. Noro yipu komo ahnoro tak naxe twaihkaxi kacipara imo ke oko.

24 Eraw pono komo marha naxe iito. N̂examro yewtarî mamhoko nasî n̂examro pen yewtarî hara. Ahnoro naxe waapa nwaikatho me, kacipara imo ke waihkaxapu me oko. Waipîra so ka cexitaw so waipîn komo xa marha n̂eraspetken̂e n̂examro. Ero yinhîrî tko cetken̂e roowo yatumnaka etanpikan me rma okwe. Cehn̂axmu me thakwa n̂esenpexe ewtarî imo yaka toxapu pen komo yakro rma.

25 Eraw pono komo kayaritomon yîrapotopo n̂iir̂atken̂e waihkaxapu pen komo chew rma. Noro maywenînho pen komo yewtarî nasî tkayaritomon komo yewtarî mamhoko, mer̂pora ewtarî nasî. Etanpikan komo re mîkyam. Waihkaxapu pen komo mîkyam kacipara imo ke. Eraspeno ciin̂enho komo mîkyam kopi waipîn komo chew cexitaw so. Wara rma cehn̂axmu me thakwa tak n̂esenpexe ewtarî imo yaka toxapu pen komo yakro rma. Waihkaxapu pen komo chewno me marha naxe n̂examro pen okwe.

26 Iito marha naxe Meseke pono komo kayaritomon, Tubaw pono komo kayaritomon marha. Iito marha naxe n̂examro sowtatun pen komo tkayaritomon komo yewtarî mamhoko. Etanpikan komo marha mîkyam. Pahxa waipîn komo chew cexitaw so eraspeno n̂iir̂atken̂e. Wara rma cehn̂axmu me thakwa n̂esenpexe ewtarî imo yaka toxapu pen komo yakro rma.

27 Pahxa xatken̂e anarî komo sowtatu komo, etanpikan kom ha. N̂examro pen waihyatken̂e. Wehto imo ywaka rma cetken̂e. Tuwuhrethîrî komo yakro rma cetken̂e. Tkaciparanthîrî komo n̂iir̂atken̂e tîhtîpîthîrî komo makataka. Iyochîrî komo yerewnukn̂e wara tko nasî kicicme ehtoponhîrî komo. Ero wara naxe okwe eraspeno ciin̂enho pen komo waipîn komo chew cexitaw so ka. Wehto imo ywaw mak tak naxe okwe.

28 Ero wara xa marha mas amoro hara Paraw. Taxikwoso me thakwa mas amn̂e. Etanpikan komo cheka xa marha metîrapesî, kacipara imo ke waihkaxapu pen komo cheka.

29 Eton pono pen komo marha naxe iito. N̂examro kayaritomon pen komo marha naxe iito, n̂examro yantoman̂e pen komo marha. Karitînhîrî komo mîkyam xatken̂e. Wara rma kacipara ke waihkaxapu pen komo yawxaw thakwa naxe oroto. Etanpikan pen komo yawxaw naxe, ewtarî imo yaka toxapu pen komo yawxaw ha. Ero wa naxe Eton pono pen komo okwe.

30 Iito marha naxe nohce n̂ixan komo, antomano rin̂enho pen komo. Siton pono pen komo marha naxe iito ahnoro. Karitî komo mîkyam xatken̂e. Eraspeno ciin̂enho komo mîkyam kopi. Oroto tko waihkaxapu pen komo yakro naxe ewtarî imo yaw. Cehn̂axmu me thakwa n̂esenpexe. Iito thakwa naxe tîrapo so etanpikan me. Waihkaxa pen komo yawxaw rma naxe. Cehn̂axmu me thakwa n̂esenpexe ewtarî imo yaka tîtosom komo yakro rma okwe.

31 N̂examro pen tak n̂een̂asî Paraw. Tîsowtatun pen komo yakro rma n̂een̂asî. N̂examro pen yenîche n̂erepowas hara ahwokaxapunhîrî. Tîsowtatun pen komo waihkarî ke waapa ya nahwokesî noro. Anarmerpan yana pen komo tko n̂een̂asî. Kacipara imo ke waihkaxapu pen komo n̂een̂asî. N̂examro pen yenîche n̂erepowas hara, nîîkesî Aporin komo Kaan ha.

32 Pahxa eraspeno n̂iir̂akn̂e Paraw, waipîn komo n̂eraspekn̂e oyanme rma. Amn̂e tko etanpikan komo cheka tak cesî noro pen, tîsowtatun pen komo yakro rma. Kacipara imo ke waihkaxapu pen komo yawxari naxe ha, wîîkes Ow Aporin komo Kaan, kekn̂e. Ero wa kekn̂e Kporin komo owya.