1-2 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, omtapotarî ekatîmko xa hara apoyino komo ya. On wara kasko yîwya so, Ai, oyakno komo, on wara kesî Kporin komo awya so, anarimaw anarî rowon pono komo waparî na wekya, ewto pono komo waparî. Ero yimaw on wara natu iitono komo, tpoyino komo men̂eketu waapa yekaiporen̂e me.

3 Ero ke noro yipu tak na n̂een̂a waapa, kacipara imo ke cemyarkem kom ha. Waapa yenîche tuu nîîke raatî ke ewto pono komo weronomachome, Waapa mokyaxe kopi, kachome yîwya so.

4 Iito na nai anarî hara ewto pono. Tuu kacho rma re n̂ence. Ponarora tko nai, tohnawno wara mak n̂ence okwe. Ero yinhîrî waapa komo mokyatu ewto pona. Tuu kacho ponarono pîn tak na waihketu okwe. Ero wa apoyino waihyataw noro pen pona rma n̂ecir̂asî waihtoponhîrî.

5 Tuu kacho rma re n̂ence, ero ponarora makî tko nai. Ero wara exirî ke noro pona rma thakwa nasî waihtoponhîrî. Tuu kacho ponaro cexitaw anarî hara noro tak n̂emahciyasî waipîra cehtome.

6 Anarimaw hara on wara tko na nai waapa yekaiporen̂e, waapa komo rma re n̂een̂a cewton wece mokrî komo. Tuu kahra ro mak nai okwe ewto pono komo weronomacho. Ero ke mokyatu rma waapa komo. Iitono pen waihketu ha na. Ero wa waihyataw iitononhîrî pen kicicme cehtoponhîrî yepetho me rma waihyasî. Waapa yekaiporen̂e pona tko wiir̂asî waihtoponhîrî okwe.

7 Ero ke awya wîîkes hara, tooto xîkrî amoro, Ixaw Yana komo waparî yekaiporen̂e me kiire. Ero ke omtapotarî mencesî Ixaw Yana komo weronomacho. N̂examro men weronomakî oyanme.

8 On wara na wîîke kicicitho pokono ya, Ai, kicicitho pokono amoro. Ero ke thakwa mîwaiyasî, wîîke. Ero yinhîrî noro yakro yîmtapotara ro mak na mai amoro. Ero wa awehtoponhîrî ahsîpînkakî, kahra ro mak na mai yîwya okwe. Ero ke thakwa waihyasî noro pen okwe. Ero wara awexitaw apona men wiir̂asî noro pen waihtoponho okwe.

9 Anarimaw na kicicitho pokono yakro rma mîmtapowa. Kicicitho pokohra tak men esko, mîîke na yîwya. Wara rma amtapotachonhîrî ponarora na nai okwe. Cehtoponhîrî yai etowra rma na nai. Ero wara exitaw waihyasî thakwa noro yipu pen. Kicicme mas amoro, kahra was awya noro yipu pen waihtoponho poyero.

10 Ai, tooto xîkrî, on wara marha kasko Ixaw Yana komo ya, On wara mîîkexe, Amna yerewnukn̂e wara nasî kicicme amna yehtoponho, amna panatanmetopo yanwetoponho. Asak mak tak amna n̂ehtîkesî ero wara amna exirî ke okwe. Ahce wa thakwa re waipîra nai amna? mîîkexe.

11 On wara n̂examro eyuhko, On wara tko kesî Kporin komo Kaan awya so, waipîn me wasî, kacho wara nasî tan omtapotarî yaaro xa, tawake exihra ro mak wa wasî kicicitho komo waihyataw. Anarimaw kicicme cehtoponhîrî komo yai n̂etowyatu. Ero ke waipîra tak natu. Ero wa exitaw so tawake was okre. Ero ke etowcoko amyamro kicicme awehtoponhîrî komo yai. Etowcoko ha men. Ahce kacho mîwaiyat okwe, kesî Kporin komo awya so, Ixaw Yana komo ya. Ero wara kesî Kporin komo, kasko yîwya so.

12 Ero ke on wara wîîkes hara awya, tooto xîkrî amoro, on wara kasko hara apoyino komo ya, Ai, oyakno komo, on wara na nai tooto anarimaw, kir̂wanînhîrî tak nai kicicme hara okwe. Tpanatanmetopo yewetîra tak na nai. Ero wa exitaw twaihtopo yai etîmtora nasî kir̂wanînhîrî me cexirî ke mak. Anarimaw on wara na nai kicicitho pokononho hara, ero wa cehtoponhîrî yai tak na n̂etakname. Ero wa exitaw waipîra rma nasî kicicitho poko ehxapunhîrî me cexirî ke. Kicicme exitaw kir̂wanînhîrî waipîn me exihra marha nasî noro yipu kir̂wan̂he ehxapunhîrî me cexirî ke.

13 On wara na wîîke kir̂wan ya, Kir̂wan amoro ham. Ero ke waipîra masî, wîîke. Ero yinhîrî on wara na nai hara noro, Kir̂wan xa ow ham okre oyanme ro mak, ketîkes okwe. Kicicme xa matko nai hara okwe. Ero wara exitaw, kir̂wan̂he noro yehtoponho ponarora tak wasî. Waihyasî tak noro yipu pen kicicme cexiri ke okwe.

14 Anarimaw kicicitho pokono weronomesî tak hara Ow. Mîwaiyasî men okwe, wîîke na yîwya. Ero yinhîrî kicicme cehtoponhîrî yai tak na n̂etakname. Kir̂wan̂he tak na nai hara okre.

15 Yîhyaw tak na nai noro poyino yemyawno, Apurantan wîramanîyas hara amn̂e, kachonho. Ero rma na nîmya hara osom ya. Anarimaw on wara na nai cen̂epan̂em, tpoyino yemyawnonho nîmya hara tînarîthîrî. Ahnoro apanatanmetopo komo na n̂ewehca, waipîn me awin̂e kom ha. Kicicme exihra tak na nai. Ero wa cexitaw waipîra rma nasî.

16 Kicicitho poko noro yehtoponho ponarora tak wasî. Takîhso tak nai, apanatanmetopo komo tak n̂ewehca ham. Ero wa cexirî ke waipîra nasî, kasko. Ero wara kasko yîwya so.

17 On wara tko kexe apoyino komo, Akpîra nai ham okwe Kporin komo kpoko so kica, kexe. N̂examro yehtopo xa matko nasî akpîra okwe.

18 On wara na nai kir̂wanînhîrî, kir̂wan̂he cehtoponhîrî yai n̂etakname. Kicicme tak na nai okwe. Ero wa cexitaw waihyasî men okwe ero wara cehtopo yanme rma.

19 On wara na nai kicicitho hara, kicicme cehtoponhîrî yai n̂etakname. Kir̂wan̂he tak nai okre. Tpanatanmetopo marha n̂ewehca. Ero wa cexitaw twaihkaxmu me exihra tak nasî kir̂wan̂he cexirî ke.

20 Ahce kacho on wara mîîketu, Akpîra kiin̂e Mîk Kporin komo okwe, mîîketu? On wara wîîkes awya so, Ixaw Yana komo ya, Ken̂ekexe so men amn̂e okwe ahnoro. Awehtoponhîrî komo yaw roro rma wa ken̂ekexe so, kekn̂e. Ero wa kekn̂e Kporin komo owya.

21 Ero yinhîrî ohyaka mokyakn̂e Xerusaren poi emahcixapu. 12 cimn̂ipu xakn̂e waapa nahsîtho me amna yehtoponho. Ero cimn̂ipu po mokyakn̂e, 10-înhîrî nuun̂i po mokyakn̂e, 5-nhîrî kaamo po. On wara kekn̂e owya tmokuche, Xerusaren pono pen komo nahsîce waapa kom okwe, kekn̂e owya. Ero wa kekn̂e.

22 On wara wîxakn̂e kokon̂i Xerusaren poi emahcixapu komo mohtopo ponan po kokmamrî po, omtarî karihcekn̂e Kporin komo. Ero ke enmapuche hara noro mokyataw tîmtapotaxmu me tak wîxakn̂e. Yîmtapotan me exihra tak wîxakn̂e.

23-24 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, on wara kexe ewtotho pono komo, Ixaw Yana rowon pono komo, Cewn̂e mak xakn̂e Abraaw pen. Noro yipu rma on nahsîyakn̂e roowo ceken me. Mer̂pono pîn tak reha kîwyam. Soroso xa on nîmyasî roowo Kporin komo kîwya so, kexe okwe.

25 Ero ke on wara kasko yîwya so, Ai, oyakno komo, on wara kesî Kporin komo Kaan awya so, On wara maxe amyamro, awotî komo mon̂exe kamxukre rma, ciixaputho pona meen̂axe kica, waihkano marha miir̂axe okwe. Noro yipu komo ma re roowo yosom me mat awya so?

26 On wara marha maxe, akaciparan komo pona mak meen̂axe akurun komo me okwe. Kicicitho poko ro mak maxe kica. Apoyino komo pici mîwîrîmexe marha kica. Noro yipu komo ma re roowo yosom me mat awya so? kasko yîwya so.

27 On wara marha kasko yîwya so, Ai oyakno komo, on wara men kesî Kporin komo Kaan awya so, Yaaro tan wîîkes awya so. Waipîn me wasî, kacho wara rma nasî omtapotarî yaaro xa, ewtotho pono pen komo tak waihyaxe kacipara ke. Woskara pono pen komo wîmyasî kamara warai komo yotî me. Sowtatu wacan yawno pen komo waihyaxe eper̂a yaka, ero wara xa marha waihyaxe ewtarî yawno pen komo.

28 Pohnî me ro mak tak wiir̂asî yîrowonthîrî komo. Ero wara wiir̂asî yîrowonthîrî komo, pona awehcoyoponkachonhîrî komo. Ar̂man me ro mak taxe iito kexitaw so krowonthîrî po, kexe. Ero wara kahra tak naxe amn̂e. Pohnî me ro mak tak nasî îîpî, Ixaw Yana rowon pono. Ero ke ero mko pore tohra ro mak naxe ahna na tîtosom komo.

29 Ero wara wiir̂asî yîrowonthîrî komo, pohnî me ro mak wiir̂asî kicicitho pokono ro me exirî komo poyero. Ero yimaw on wara kexe opoko, Kporin komo xa Mîk ham, kexe. Ero wara kexe.

30 On wara wîîkes awya, tooto xîkrî, on wara naxe apoyino komo apoko, apoko nîmtapowaxe mîîmo mîtwo so, mîîmo metataw so marha. Apoko n̂esencexe. On wara kexe takno komo ya, Mîmokyaxe cma re Kporin komo mtapotarî yekatîmn̂e yentaxi, kexe.

31 Ero ke mokyaxe tak oyanan komo tmohtopo ro komo yaw roro rma. Awepatai n̂eremexe. Amtapotarî n̂encexe. Ewetîra tko naxe okwe. Ooxatî wara rma re naxe tîmtarî ke so mak okwe. Tîropotaw so tko cemyawno komo yahsîtopo ponaro mak naxe okwe.

32 Waano yaan̂e wara mak masî yîwya so centaporem yaan̂e wara. Cexeporem wara maxe yîwya so. Raatî yorkan̂e wara masî yîwya so yaana me iyorkan̂e wara. Amtapotarî n̂encexe rma re, ewetîra tko naxe okwe.

33 Amn̂e tak yîwîrîmacho komo me tak nas okwe. Pohcira ro mak nasî yîwîrîmacho komo, mekatîmye yîwya so ero warai. Ero yimaw on wara kexe, Kweronoman̂e xa mîk ham Esekiew, kexe. Ero wara kexe amn̂e apoko.