1-2 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, on wara wîîkesî xa hara awya, oper̂a yosom wara naxe Ixaw Yana yenîn̂e komo. Ero ke omtapotarî ekatîmko n̂examro yen̂ekacho hara. On wara kasko yîwya so, Ai, oyakno komo, on wara kesî Kporin komo awya so, oper̂a yenîn̂e warai komo ya, Oper̂a yenîn̂e warai komo amyamro, Ixaw Yana komo yenîn̂e. Awîrîmacho komo xa takî tî awepor̂atu so amn̂e okwe. On wara maxe amyamro, metînamexe amyamro mak okwe. Oper̂a nahman̂e pîn me katî nai oper̂a yenîn̂e komo awya so?

3 Oper̂a katîtho mahyaxe. Yîhpocithîrî mîkahyaxe aponon komo me. Yupurukrexapu mîwaikexe. Oper̂a yînahmara ro mak maxe okwe.

4 Kar̂pen komo karihtora mîxatken̂e okwe. Tamotosom komo yehcemara marha mîxatken̂e. Etaxikwoxapu komo yimihra mîxatken̂e. Miya en̂epexapunhîrî yekîhra mîxatken̂e yîmîn komo yaka hara. Tacixapu komo yeposo tohra marha mîxatken̂e. Miya xe xa matko mantometken̂e. Yîpînîn yaw so exihra ro mak mîxatken̂e okwe. Ero wa mîxatken̂e an̂enîrî komo poko, oper̂a warai komo poko.

5 Ero ke miya so n̂etakpayatken̂e oper̂a warai komo cenîn̂e komo exihtorî ke okwe. Keskan̂e komo yotî me mak tak xatken̂e okwe. Ero wara xatken̂e cetakpache so okwe.

6 On wara marha xatken̂e oyok warai komo, oper̂a warai komo, waimamyatken̂e ro mak îh pore so, miyan pore rma. Matîwîn pore marha waimamyatken̂e. Roowo poko hakî n̂etakpayatken̂e oyok warai pen komo. Exihra ro mak xakn̂e eposo tîtosom okwe.

7-8 Ero ke on wara wîîkesî awya so oper̂a yenîn̂e komo, Kporin komo mtapotarî men entacoko. On wara kesî Noro awya so, Waipîn me wasî, kacho wara rma nasî tan omtapotarî yaaro xa. Oyok warai komo yenîn̂e exihra ro mak xakn̂e okwe. Ero ke keskan̂e yotî me mak xatken̂e okwe. Miya so etakpache so oyok pen yeposo tohra ro mak xatken̂e okwe oyok yenîn̂e komo. N̂eseresmetken̂e mak enîn̂e komo. Oyok yînahmara xatken̂e okwe.

9-10 Ero ke Kporin komo mtapotarî entacoko amyamro oper̂a yenîn̂e komo. On wara men kesî Kporin komo Kaan awya so, Oper̂a yenîn̂e komo wen̂ekesî. Oyok warai komo wepanîyasî. Oyok nahman̂e mera tak naxe. Etînamara marha tak naxe oyok yenîn̂e komo. Oyoku wukurunpesî iyotî komo mera tak ehtome so.

11 On wara wîîkes Owî, Aporin komo Kaan, Owî rma kîwcesî oyok warai komo yeposo. Miya so wepor̂asî censo ro.

12 On wara naxe oper̂a yenîn̂e komo tooku yaar̂ataw, etakpache, miya so cesî eposo. Ero wa xa marha was Ow hara. Miya so ro mak cetakpaso nasî oyoku oper̂a warai komo. Awarpape xakn̂e kaapu ero yimaw etakpatoponhîrî komo po, tuuna yewru ken̂e xakn̂e. Etakpatoponhîrî komo yai so tko wekyas hara.

13 Anarî yana komo chew so naxe oyok warai pen komo, mîk hak rowon po so naxe. En̂exa wekyasî yîrowonî ro komo pona. Ixaw Yana komo yîpînî ro po tak n̂examro wînahmesî, tuuna yecihtaw so marha, ewton komo po so marha.

14 Kir̂wan wenpesî yîwya so yînahrî komo. Ixaw Yana yîpîn po so nasî yîmîn komo kawno po so. Iito tak n̂etîrapexe mîîmo yaw kir̂wan yaw waca yaw. Tînahrî komo marha nahyaxe Ixaw Yana yîpîn po so, yînahrî ken̂arî po so xa.

15 Ero wara oyok warai komo wînahmesî. Ero wa marha n̂examro yetîrapotopo wenpesî yîwya so, wîîkes Ow Aporin komo Kaan.

16 Tacixapu komo wepor̂asî. En̂epexapunhîrî komo wekyas hara. Etaxikwoxapu komo wimiyasî, kar̂pen komo karihcesî. Tupurukyem pen komo reha Ow waihkesî, karitî pen komo marha. N̂examro pen wînahmesî emetanmetopo komo ke makî reha.

17 Taa, on wara wîîkesî awya so, Ai, oyok warai komo amyamro, awakro so kîmtapowasî hara, Aporin komo Kaan Ow ha, kîcherenonkexe so tak, xiya wiir̂asî kir̂wan komo, oper̂a warai komo, miya wiir̂asî kicicitho kom hara, oper̂a warai komo. Xiya wiir̂asî oper̂a komo, miya wiir̂asî boce kom hara.

18 Kir̂wan mahtîketken̂e anahrî komo. N̂eexi tak, kahra tko mîxatken̂e. Anarî komo nahrî mapikyaxe kica. Kir̂wan meer̂atken̂e tuuna tpar̂ar̂amutwem okre. Ahce kacho ero yerîche tuuna mukuturetu ahtarî komo ke kica?

19 Ahce nahyatu oyok warai komo? Anapikîthîrî komo thakwa mak nahyaxe okwe. Ahtono thakwa re n̂eer̂at hara tuuna, ahtarî komo ke anukuturethîrî komo mak n̂eer̂at okwe.

20 Ero ke on wara kesî Kporin komo oyok warai komo ya, Owî rma men kîcherenonkexe so. Xiya wiir̂asî tupurukyem komo oper̂a, miya wiir̂asî takporosom kom hara.

21 On wara maxe kar̂pen komo poko, oper̂a warai poko, ciki mîîkexe kar̂pen poko awawci komo ke, amotarî ke so marha. Ameretîrî ke so marha ciki mîîketken̂e kar̂pen komo poko okwe. Ero wa oyok warai komo makpayatken̂e kica.

22 Ero ke Ow tak oyok warai komo wukurunpesî. An̂emetanmekrî komo mera tak naxe. Ero wa kîcherenonkexe so amyamro oper̂a warai komo. Xiya wiir̂asî anarî komo, miya wiir̂asî anarî kom hara.

23 Ero yimaw cewn̂e mak tak wiir̂asî n̂examro yenîn̂e me. Oyanton mîk wiir̂asî n̂examro yenîn̂e me, Tapi ha. Noro tak nasî n̂examro nahman̂e me, enîn̂e me marha.

24 Owî rma tak wasî ponaro n̂examro yehtopo, Aporin komo Ow. Oyanton nasî n̂examro yantoman̂e me, Tapi ha. Owî rma ero wara wîîkesî, Aporin kom ha.

25 Ero yimaw marha oyanan komo yakro kîmtapowasî yukurunpetopo komo poko. Kamara warai komo Ow waihkesî, okoyi komo, ahnoro keskan̂e kom ha. Yîrowon komo po exihra tak nasî. Ero ke erasîra ro mak tak oyanan komo n̂esekenmexe axawa imo po. Kir̂wan̂he marha n̂enmayaxe comota chew.

26 Akronomano rin̂e me tak n̂examro wiir̂asî. Ero warai me xa marha oyîpîn mamhokono komo wiir̂asî. Tuuna marha wekpesî mohtopo ro po roro. Tuuna tmohsom wara mokyasî n̂examro yakronomacho owya.

27 Ero yimaw tak yînatîrî komo n̂eperwasî roro weewe komo, ceperkem komo. Tumn̂e marha nasî yîyporî komo. Erasîra tak n̂enmayaxe tîrowon komo po. N̂examro yahsîn̂e komo ya wahsîpînkapesî. Wowyaxe so tak ahsîpînkan me ro mak antomaxapunhîrî komo. Ero yimaw on wara kexe, Kporin komo xa Mîk kakronomexe so, kexe.

28 Mîk hak rowon pono komo n̂emetanamekrî mera tak naxe. Keskan̂e komo n̂eskatorî me marha naxe. Mokuhra ro mak nasî waparî komo, emetanmekn̂e komo marha. Erasîra ro mak n̂enmayaxe okre.

29 N̂examro mararîn komo wepetanmekyasî kir̂wan̂he ro mak tak. Miya so n̂ekaiwasî n̂examro mararîn cepetaxmu me xa exirî ke n̂examro natîrî. Ero yimaw cekar̂kaxi ro yîromamra tak naxe. Kicicitho mîkyam kica, kacho mera ro mak tak naxe mîk hak rowon pono komo ya.

30 On wara kexe ero yimaw, Kakrono ro me so xa tak nai ham okre Kporin komo Kaan. Noro yanan me xa tak taxe kîwyam hara Ixaw Yana kom ha, kexe, wîîkesî. Ero wara wîîkes Ow Aporin komo Kaan.

31 Oyoku warai amyamro, onînamarî ro komo. Tooto amyamro, Kaan Ow ha, ponaro awehtopo komo, wîîkes Ow awya so. Aporin komo Kaan Ow ha, kekn̂e. Ero wara kekn̂e Kporin komo owya.