1-2 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, Sei Yîpîn wece cewru tak esko. Iitono komo waihkacho ekatîmko hara.

3 On wara kasko yîwya so, Ai, Sei Yîpîn pono komo amyamro, on wara men kesî Kporin komo awya so, awaparî komo me tak was okwe. Oyamorî ke awetapan̂e komo me was oko. Pohnî me ro mak tak wiir̂asî awekenhîrî kom okwe.

4 Awewtonthîrî komo wakn̂iyasî kr̂a. Iipono komo exihra ro mak tak nas okwe. Ero yimaw on wara mîîkexe opoko, Kporin komo xa mîk ham, mîîkexe.

5 Ixaw Yana komo xatî pîn komo amyamro pahxanî rma okwe. N̂examro kamxukutho men̂epetken̂e kacipara imo ke okwe. N̂examro pen yetwîrîmetaw mîparaxketken̂e okwe. Kicicme ehtoponhîrî komo yepemetîketaw owya ero wara mîxatken̂e Ixaw Yana komo poko.

6 Ero ke yaaro tan wîîkes awya so, waipîn me xa wasî, kacho wara rma nasî on omtapotarî yaaro xa, Aporin komo Kaan Ow wîîkesî, tkamxukaxmu me tak kiir̂axe so amyamro hara. Awenatîkexe so akamxukuthîrî komo yen̂epen̂e kom hara. Kamxuku yen̂epetopo xatî pîn me exihra mîxatken̂e okwe. Ero ke akamxukuthîrî komo yen̂epen̂e komo awenatîkexe so hara okwe.

7 Ero yimaw iiponomnî me ro mak tak Sei Yîpîn wiir̂asî. Ero poi tîtosom komo Ow porohkesî, ero pona tîtosom komo marha.

8 On wara wîîr̂asî iitono îîpî, wawronohketîkesî waihkaxa pen komo yokoputho ke. Matîwîn pona so n̂epîrkexe kacipara imo ke waihkaxapu komo okwe, arowonthîrî komo pono pona so. Tarenakem yaw so marha n̂epîrkexe, awoskaranthîrî komo pona so marha.

9 Eroromero wiir̂asî pohnî me arowonthîrî komo. Pohnî me ro mak tak nasî awewtonthîrî komo. Ero yimaw on wara mîîkexe opoko, Kporin komo xa Mîk ham, mîîkexe.

10 On wara mîîketken̂e Ixaw Yana komo poko, Xuta komo poko marha, N̂examro tak naxe kanton komo me. Yîrowonthîrî komo marha tak nasî keken komo me, mîîketken̂e kica iito rma oyexitaw Ow Aporin komo.

11 Yaaro tan wîîkesî, Waipîn me wasî, kacho wara rma nasî tan omtapotarî yaaro xa, Aporin komo Kaan Ow. Ixaw Yana komo poko mîrwonatken̂e ayopono me exirî ke so. Yiixera so ro mak mîxatken̂e okwe. Ero ke ero wara awehtoponhîrî komo yaw rorono komo wekyasî awaparî komo me hara. Iitono me oyehtopo tak n̂een̂axe Ixaw Yana komo awemetanmekyataw so amn̂e owya.

12 Ero yimaw on wara mîîkexe opoko, Kporin komo xa Mîk ham, mîîkexe opoko. Kicicme so mîmtapowatken̂e Ixaw Yana komo yîpîn poko. Ero wara amtapotachonhîrî komo wencekn̂e. On wara mîîketken̂e, Ixaw Yana komo yîpîn tak nasî pohnî me ro mak. Knahsîrî komo me tak nas okre, koh komo nahmacho me tak ehtome, mîîketken̂e kica.

13 Oyopono wara mîmtapowatken̂e kica. Miya ro mak mîmtapowatken̂e Ooxatî pîn me ro mak kica. Ero wara amtapotachonhîrî komo wencekn̂e.

14 Ero ke on wara wîîkesî apoko so, Aporin komo Kaan Ow wîîkesî, pohnî me tak wiir̂asî arowonthîrî komo amn̂e. Ero yimaw ahnoro roowo poko hakno komo naxe tahwore.

15 Mahwowatken̂e amyamro pohnî me exitaw Ixaw Yana pen komo rowontho. Ero ke ero wa xa marha kiir̂axe so amyamro hara. Pohnî me xa marha nasî arowonthîrî kom hara amn̂e okwe. Ero wara maxe amyamro Sei Yîpîn pono komo, ahnoro Eton rowon pono pen komo. Ero yimaw tak on wara mîîkexe opoko, Kporin komo xa Mîk ham, mîîkexe opoko, kekn̂e. Ero wa kekn̂e Kporin komo owya.