Ai, tooto xîkrî, on wara wîîkes hara awya, Ixaw Yana komo yîpîn yehtopo ekatîmko hara. On wara kasko yîwya so, Ai, Ixaw Yana komo yîpîn amyamro, Kporin komo mtapotarî men wekatîmyas awya so.

2 On wara kesî Kporin komo, On wara ketken̂e Ixaw Yana xatî pîn komo, Okre, Ixaw Yana komo yîpîntho tahsîce ham. Pahxantho mko tak nasî keken komo me okre, ketken̂e kica.

3 Ero ke omtapotarî ekatîmko îîpî komo ya. On wara kasko, On wara men kesî Kporin komo Kaan awya so. Pohnî me rma re awir̂atken̂e so mîk hak rowon pono komo. Mehxa mehxa wara mokyatken̂e awahsîn̂e komo. N̂examro yeken me tak mîxakn̂e okwe. Kicicme so nîmtapowatken̂e anarî yana komo apoko so kica.

4 Ero ke kîmtapowasî awakro so. Ixaw Yana komo Yîpîn amyamro. Aporin komo Kaan Ow ha. On wara wîîkesî îîpî komo ya, matîwîn komo ya, eepu komo ya, woskara komo ya, pohnî komo ya, ewtotho komo ya, ecahxapu komo ya, ahsîpînkaxapu komo ya marha wîîkesî. Mîk hak rowon pono komo nakn̂iputho mîn ewtotho komo, amîtwono komo nakn̂iputho ha. N̂examro yetaporetopo me xakn̂e ewtotho komo okwe.

5 On wara wîîkes Ow Aporin komo Kaan, orwon me ro mak kîmtapotai mîk hak rowon pono komo poko, yîwîrîmacho komo poko. Eton pono komo yîwîrîmacho poko marha kîmtapotai. Orowon nahsîyatken̂e n̂examro ceken komo me. Nahwowatken̂e ro mak ahsîyataw, Ixaw Yana nîwîrîyaketken̂e marha. Ero wara orowon nahsîyatken̂e, ero woskaran pono yaatome tak cemyawno komo me, wîîkesî.

6 Ero ke omtapotarî ekatîmko amoro, Esekiew, Ixaw Yana komo rowon pokono. Amtapotakî îîpî komo yakro, matîwîn komo yakro, tarenakem komo yakro, woskara komo yakro. On wara kasko yîwya so, On wara men kes awya so Kporin komo Kaan, Tîrwon̂e xa kîmtapowasî mîk hak rowon pono komo yakro. Awewyomacho me kîrwonakn̂e. Awîrîyaketken̂e so n̂examro kica. Ero ke ero wara kîmtapowasî n̂examro poko.

7 Oroto on wara wîîkes Ow n̂examro poko, Aporin komo Kaan Ow wîîkesî, amn̂e tak on wara naxe mîk hak rowon pono komo amîtwono komo, n̂examro makîrha tak naxe yîwîrîyakaxapu me hara. Yaaro tan wîîkesî, tapockantaxi wîîkesî towîhnî me ro mak.

8 On wara tko maxe amyamro, Ixaw Yana komo yîpîn amyamro, weewe komo tak natîkwasî aapo so tperemkem komo. N̂eperwasî marha oyanan komo nahrî me, Ixaw Yana komo nahrî me. Pahnoke tak nasî n̂examro mohtopo hara cekenhîrî komo pona hara.

9 Aponaro so wasî, îîpî mko ponaro. Awece cewru tak was amn̂e. Mararî pomexe oyanan komo amn̂e aapono. Iina marha n̂iir̂axe tînatîrî komo.

10 Aapono komo marha wepamnoyasî. Ixaw Yana komo mîkyam wepamnoyasî. Tooto tak naxe ewto po so. Ewtotho mko n̂iir̂axe cewton komo me so hara.

11 Aapono komo wepamnoyasî, iyoh komo marha wepamnoyasî. Mer̂pora nîmxîkwaxe okre, mer̂pora tak naxe okre. Pahxa tooto n̂esekenmetken̂e apona ero wa xa marha ekenmano wiir̂as hara apona xa hara. Tînahke rma xatken̂e pahxan pen komo aapono pen komo. Amn̂e tak tînahke xa tak naxe aapono komo, pahxa tînahke xatken̂e ero yopo okre. Ero yimaw on wara tak mîîkexe opoko, Kporin komo xa Mîk ham, mîîkexe.

12 Tooto komo wewyar̂asî aapore. Oyanan komo rma mîkyam wewyar̂asî iina, Ixaw Yana kom ha. Awahsîyasî tak, n̂examro yeken me tak maxe, yîrowon komo me ha. N̂examro yîmxîkan̂e mera tak masî, pîra ro makî.

13 On wara wîîkes awya îîpî mko ya, Aporin komo Kaan Ow wîîkesî, on wara rma re kexe tooto komo apoko, waihkano rin̂e ro mîn okwe. Tîîpono komo yîmxîkan̂e mîn okwe, kexe apoko.

14 Ero ke waihkano rin̂e mera tak mas amn̂e, aapono yîmxîkan̂e mera. Ero wara wîîkes awya. Aporin komo Kaan Ow wîîkesî.

15 Mîk hak rowon pono komo ya awîrîyakacho yentara tak masî ero yimaw. Apoko etaporera ro mak tak naxe anarî yana komo. Aapono komo yîhrokan̂e mera marha mas amoro, wîîkesî. Ero wara wîîkes awya so. Aporin komo Kaan Ow ha, kasko yîwya so, îîpî mko ya, kekn̂e. Ero wara kekn̂e Kporin komo owya.

16-17 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, on wara wîîkes hara awya, pahxa tîrowon komo po xatken̂e Ixaw Yana komo. Ero yimaw tîrowon komo nîwîrîmetken̂e kicicme cehtopo komo ke, kicicitho poko cexirî ke so okwe. Nuun̂i po roro kicicme nasî wooxam roopo exitaw ero wara xa marha ween̂asî n̂examro yehtopo kica.

18 Tooto pen kamxukutho n̂en̂epetken̂e orowon po ero yîwîrîmacho me. Ciixaputho ke marha orowon nîwîrîmetken̂e, ponaro cehtopo komo ke kica. Ero ke kîrwonakn̂e poko so emetanmetome so tak okwe.

19 Mîk hak rowon pono komo cheka n̂examro pen wakpayakn̂e. Miya so n̂etakpayatken̂e anarî pona so, roowo pona so. N̂examro wemetanmekyakn̂e ehtoponhîrî komo yaw roro rma, yin̂irithîrî komo yaw roro marha.

20 Ahna so na cetaw so mîk hak rowon pono komo cheka iito oyosotî xakn̂e tîwîrîyakaxmu me n̂examro poyero rma kica. Kir̂wanî ro oyosotî okwe. On wara ketken̂e iitono komo Ixaw Yana komo poko, Kaan yanan komo tî re moxam. Wara rma Noro rowon poi cetken̂e okwe, ketken̂e kica.

21 Oyosotî ponaro xa tko wîxakn̂e. Tîwîrîyakaxmu me oyosotî n̂iir̂atken̂e Ixaw Yana komo kica. Ero wa xatken̂e mîk hak rowon pono komo yîchew so n̂examro yehtopo komo. Ixaw Yana komo poyero rma oyosoti nîwîrîyaketken̂e okwe.

22 Ero ke on wara kasko Ixaw Yana komo ya, On wara men kesî Kporin komo awya so, Ai, Ixaw Yana komo amyamro, kakr̂onomexe so amn̂e. Kir̂wan̂he awehtoponhîrî komo yanme awakr̂onomara wasî. Kir̂wan̂he oyosotî yenpo xe mak wasî. Mîk hak rowon pono komo cheka mîîcetken̂e iitono komo tak oyosotî nîwîrîyakexe kicicme awehtopo komo poyero. Ero ke kir̂wanî ro me tak enpo xe was hara yîwya so.

23 Cekaiporesom xa mîn oyosotî. Twerî cetacisom me tak oyosotî wenpesî. Tîwîrîyakaxmu me oyosotî menpetken̂e mîk hak rowon pono komo cheka awtoche so. Aake so rma tko kir̂wanî ro me oyehtopo wenpesî yîwya so amn̂e yîchew so awehtopo komo ya. Ero yimaw on wara tak kexe opoko, Kporin komo Mîk ham, kexe. Awenîrî ke so rma ero wa kexe, ponaro xa awehtopo komo me oyosotî yenpon̂e me awexitaw so, wîîkesî. Aporin komo Kaan Ow wîîkesî.

24 On wara kiir̂axe so, mîk hak rowon pono komo chei kekyaxe so hara, mîn hak poi roowo poi. Arowon komo pona kekyaxe so hara.

25 Kîcaramexe so kir̂wan ke tuuna ke. Ero yimaw kir̂wan̂he tak maxe okre. Kicicme awehtoponhîrî komo wowyasî aropotawnonhîrî komo. Ciixaputho mko marha wîhcamnoyasî ahnoro ponaro awehtoponhîrî komo.

26 Yaxan tak wîmyas awya so aropotarî komo. Yaxan marha wiir̂asî aropotaka so awekatî komo. Toopu warai mak mîn aropotarî komo. Erotho wowyasî, tooto pun me cehsom tak wîmyas hara awya so aropotarî komo me.

27 Oyekatî marha wiir̂asî aropotaka so. Owya apanatanmetopo komo yewetîn̂e me kiir̂axe so. Ero wa exihra men ehcoko, kacho yewetîn̂e me tak kiir̂axe so.

28 Arowon komo pono me marha tak maxe, pahxa aporin pen komo ya wîmyakn̂e ero pono me ha. Oyanan me tak maxe. Kaan me xa tak Ow meen̂axe ponaro awehtopo komo me ha.

29 Kicicme awehtoponhîrî komo yai kowtîkexe so. Amararîn komo yeperîrî wekpesî puruma, ero warai komo marha. Mer̂pora wepamnoyasî anahrî komo me. Aroman komo yekpora ro mak wasî.

30 Cepetaxmu me xa tak wiir̂asî anatîrî komo weewe komo. Tumuntaxmu me marha wiir̂asî ayporî komo, paari komo, naapi komo ahce na komo. Pahxa mîk hak rowon pono komo awîrîyaketken̂e so kica rooma poko awexirî ke so. Ero yanme awîrîyakara tak naxe amn̂e.

31 Ero yimaw kicicme awehtoponhîrî komo pona tak mîhyapamyaxe xa, kicicitho poko awehtoponhîrî komo pona. Kicicitho poko ro mak tîxatken̂e kica, mîîkexe.

32 On wara kacho ponaro xa tko awexi xe so wasî, kir̂wan̂he awehtopo komo yanmera ro mak ero wara kakir̂wamexe so, kacho ponaro xa awexi xe so wasî. Aporin komo Kaan Ow ero wara wîîkesî. Kicicme awehtoponhîrî komo pona rma ahyapamcoko amyamro Ixaw Yana komo. Cetwîrîyakaxmu me rma ka ehcoko amyamro rma, wîîkesî.

33 On wara marha wîîkesî Ow Aporin komo Kaan ha, Amn̂e tak kicicme awehtoponhîrî komo wowyasî aropotai so. Ero yimaw rma awewtonthîrî komo pona kekenmexe so hara. Awewtonthîrî komo wirpes hara awya so.

34 Mararî ken̂e tak nasî arowon komo. Oroto pohnî me mak nasî iitoxari tîtosom komo wero ro. Amn̂e tak pohnî me mak exihra nasî.

35 On wara kexe arowon komo pore tîtosom komo, Pahxa on roowo xakn̂e pohnî me ro mak okwe. Oroto Kaan natîrî wara nas okre, Eten pononho wara. Pahxa pohnî me marha xakn̂e ewtonthîrî komo. Cecahso xakn̂e okwe, cixkaxi so marha xakn̂e mîîmotho. Oroto tak tooto yeken me nas okre. Twacaye so marha nas okre, kexe.

36 Ero yimaw on wara tak kexe mîk hak rowon pono komo, amîtwono komo, Kporin komo Mîk ham n̂examro yewtontho n̂irpekn̂e hara, Noro marha n̂examro mararîntho n̂irpekn̂e hara yîwya so peen ken̂e ehxapunhîrî, kexe. Ero wara men kexe ero yimaw. Aporin komo rma Ow ero wara awehtopo komo yekatîmn̂e. Owî rma ero wara kiir̂axe so.

37 On wara wîîkes Ow Aporin komo Kaan, pahxaro tak Ixaw yana komo mtapotarî wencesî. N̂examro wakronomesî yîmtapotarî komo yanme. N̂examro wepamnoyasî mer̂pora oper̂a wara cehso ro okre.

38 Mer̂pora nasî oper̂a Xerusaren po owya tîmsom me cehsom. Mer̂pora ro mak nîmyaxe owya tahwotacho komo me exitaw. Ero wicakî xa marha Ixaw Yana komo wepamnoyas hara. Tooto pen mer̂pora tak naxe n̂examro yewtotho po so ha. Ero yimaw on wara kexe opoko, Kporin komo xa Mîk ham okre, kexe. Ero wara kexe opoko, kekn̂e. Ero wara kekn̂e Kporin komo owya.