Ero yinhîrî tamorî ke oyahsîn̂e wara xakn̂e Kporin komo. Oyar̂akn̂e tak Noro Yekatî. Woskara pona oyar̂akn̂e. Tooto pen yocho xakn̂e iito woskara po. Mer̂pora ro mak xakn̂e iyochîrî mko woskara pen tawronohkatîkaxi ro okyo.

2 Ero chere oyar̂akn̂e Kporin komo. Mer̂pora ro mak tooto pen yocho ween̂akn̂e iito woskara po. Turpem xa mîn xakn̂e.

3 Ero yinhîrî on wara kekn̂e Kporin komo owya, Ai, tooto xîkrî, ahce wa mîhtînoya? Tooto me n̂etakîce hara on iyochîrî, karitî me n̂etakîce hara awya? kekn̂e owya. On wara mak weyukyakn̂e, Apohana Apa. Oporin xa Amoro ponaro oyehtopo. Amoro mak ero yipu mîhtînoyasî, wîîkekn̂e yîwya.

4 Ero yinhîrî on wara kekn̂e hara Noro owya, Taa, omtapotarî ekatîmko iyochîrî mko ya. On wara kasko yîwya so, Ai, tooto pen yocho amyamro, turpemtho. Kporin komo mtapotarî wekatîmyas awya so. Ero ke omtapotarî ka entacoko.

5 On wara kesî Kporin komo Kaan awya so, kesehsîtopo wiir̂asî ahyaka so. Ero yanme tak karitî me maxe okre.

6 Apun micin marha wiir̂asî apona so. Tuhn̂em me mak kiir̂axe so, tîhcîpîke so marha. Awesehsîtopo wiir̂asî awewnarî yaka so. Ero ke karitî me tak maxe okre. Ero yimaw Aporin komo me tak Ow meen̂axe, kasko iyochîrî mko ya, kekn̂e owya.

7 Ero ke Kporin komo mtapotarî wekatîmyakn̂e, Ero wara ekatîmko, kacho yaw roro. Ero wa ekatîmyataw rma owya ahce na wencekn̂e. Cereicerei wara n̂esencekn̂e. Etpoko so n̂etasîsîknoyatken̂e iyochîrî mko.

8 Ero yinhîrî etpona toxapu komo ween̂akn̂e xa hara. Yupun micin n̂etakîcekn̂e etasîsîknoxapu poko. Tuhn̂em me so tak xakn̂e, tîhcîpîke so marha. Esehsîtopo ken̂ehra tko xatken̂e okwe.

9 Ero yinhîrî on wara kekn̂e hara Kporin komo owya, Tooto xîkrî, omtapotarî ekatîmko xa hara. Ocowo ya kasko hara. On wara kasko yîwya, Ai ocowo amoro, on wara kesî Kporin komo Kaan awya, mehxarpanî mko apepenîmko xiya. On okoputhîrî po so apepenîmko karitî me tak ehtome so, kasko, kekn̂e.

10 Ero ke yîmtapotachonhîrî wekatîmyakn̂e ocowo ya. Ero ke esehsîtopo tak n̂ewomyakn̂e ewnarî komo yaro. Karitî me tak xatken̂e okre. Piiri nawomyatken̂e mer̂pono pîn sowtatu komo okyo.

11 Ero yinhîrî on wara kekn̂e hara Kporin komo owya, Tooto xîkrî, on wara wîîkes awya, Ixaw Yana komo warai rma on tooto yocho. On wara kexe Ixaw Yana komo, N̂ewturpamtîkai okwe kyochîrî. Kir̂wan̂he taxe amn̂e, kacho yîhtînopîra ro mak taxe okwe. Twaihkaxmu mak kîwyam okwe, kexe thakwa okwe.

12 Ero ke omtapotarî ekatîmko xa hara yîwya so. On wara kasko yîwya so, Oyakno komo, on wara kesî Kporin komo Kaan awya so, Oyanan komo amyamro, on wara wîîkes awya so, amn̂e tak awokoputhîrî komo yewtarî wahrunkesî. Ero yai so kanîmyaxe so. Ixaw Yana rowon pona kekyaxe so hara.

13 Oyanan komo amyamro. Awewtathîrî komo yahrunkache owya, awanmîche so hara on wara tak mîîkexe opoko, Kporin komo xa Mîk ham, mîîkexe.

14 Ero yimaw Oyekatî wiir̂asî aropotaka so. Karitî me tak maxe okre. Arowonî ro pona kekenmexe so. Ero yimaw on wara mîîkexe, Kporin komo xa Mîk ham n̂ekatîmyakn̂e kakîhtotopo komo, Noro marha tîmtapotachonhîrî yaw roro rma kiice so ham, mîîkexe. Ero wara wîîkes Ow Aporin komo, kekn̂e. Ero wara kekn̂e Kporin komo owya.

15-16 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, on wara wîîkes hara awya, amoyi ahsîko awamoyin me. Ero pona mewreko on wara kacho, Xuta yamoyin on, noro yakrono komo yamoyin marha, Ixaw Yana komo poyino yamoyin ha, kacho mewreko ero pona. Ero yinhîrî anarî ahsîko hara amoyi. Ero pona mewreko on wara hara, Eprain yamoyin on, Xose yamoyin ha. Noro yakrono komo yamoyin marha on, Ixaw Yana komo poyino yamoyin ha, kacho mewreko ero pona hara.

17 Ero wara mewreche iina re tak yimiko cewn̂e tak ehtome amoyi awemyaw asak haknonhîrî.

18 Ero yinhîrî on wara kexe apoyino komo awya, Ahce kacho ero wara mîmewrew amoyi mko, cewn̂an me marha miir̂e asak haknonhîrî? Ahce kacho ero wara miire? kexe awya.

19 Ero wara ketaw awya on wara n̂examro eyuhko, On wara kesî Kporin komo Kaan awya so, Amn̂e Xose yamoyin tak wahsîyasî Eprain yemyawnonho. Noro yakrono komo marha wahsîyasî Ixaw Yana poyino komo. Ero wasîsîknoyasî Xuta yamoyin poko. Cewn̂an me tak wiir̂asî asak haknonhîrî. Ero wa nasî oyemyaw cewn̂an me ha.

20-21 Asakno roro rma enpoko yîwya so amoyi mko, pona mîmewrei ero mko ha. Enpetaw on wara kasko yîwya so, Oyakno komo, on wara kesî Kporin komo Kaan awya so, Ixaw Yana komo wekyas hara amn̂e mîk hak rowon pono komo cheka toxapunhîrî. Mehxarpan komo wekyasî yîrowonî ro komo pona hara.

22 Noro re maywen me tak n̂examro wiir̂asî. Ixaw Yana yîpîn pona wekenmesî. Cewn̂e mak tak nasî n̂examro kayaritomon. Asak hakno me exihra ro mak tak naxe, asak marha exihra naxe kayaritomon komo.

23 Ero yimaw yikicicintara ro mak tak naxe ciixaputho poko, ponaro ehtoponhirî komo poko ha. Kicicitho mko pokohra tak naxe ero yimaw. Omtapotarî yanwekn̂e me cehtoponhîrî komo yai marha n̂etowyaxe. Ekenhîrî komo yai marha wowyasî, kicicitho poko xatken̂e iito so, ero mko yai wowyasî. N̂examro tak wakir̂wamesî tak okre. Ero yimaw oyanan me tak naxe. Ponaro n̂examro yehtopo me was Ow hara.

24 Oyanton nasî n̂examro kayaritomon me, Tapi ha. Cewn̂e mak nasî n̂examro yenîn̂e. Omtapotarî yaw roro tak naxe ero yimaw, owya tpanatanmetopo komo n̂ewehcaxe okre.

25 Pahxa roowo wîmyakn̂e oyanton ya hara, Xako ya, aporin pen komo xatken̂e iitono ro me ha. Iitono ro me marha tak naxe yîmxîkrî kom hara, parî komo marha miya rorono kom ha. Oyanton nasî n̂examro yantoman̂e me, Tapi ha.

26 Ero yimaw kîmtapowasî n̂examro yakro. Kukurunpexe so, wîîkesî yîwya so. Eroromerono me kîmtapowasî ero poko. Ar̂man me ro mak n̂examro wiir̂asî, wepamnoyasî marha mer̂pora cehso ro. Omîn wiir̂asî yîchew so eroromerono me.

27 Tîmîye tak wasî yîchew so. Ponaro n̂examro yehtopo me tak wasî. Oyanan me naxe n̂examro hara.

28 Ero yimaw on wara kexe mîk hak rowon pono komo, Tîyananî ro me tak Ixaw Yana komo n̂iir̂a ham Kporin komo, kexe. Ero wara kexe amn̂e omîn exitaw Ixaw Yana komo chew iitono ro me. Ero wara kexe ero yimaw.