1-2 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, tooto xîkrî, on wara wîîkes hara awya, Koke wece tak enko hara emetanmekn̂e wara. Makoke wece marha enko ero wara. Meseke pono komo yantoman̂e ro mîk Koke, Tubaw pono komo yantoman̂e marha. Omtapotarî ekatîmko n̂examro yemetanmecho pokono.

3 On wara kasko, Koke amoro, Meseke pono komo yantoman̂e ro, Tubaw pono komo kayaritomon marha amoro. Kîmtapowasî oroto awemetanmecho komo poko. Aporin komo Kaan Ow kîmtapowasî.

4 On wara kiir̂asî, kewyaknames amn̂e. Kiiwi warai wiir̂asî amtaka awahsîtopo. Ero ke rma kaar̂asî. Asowtatun komo marha waar̂asî ahnoro. Awoku kawaru marha, kawaru mkawno komo, ahnoro waar̂asî. Cenporem yaw xa n̂epatakexe n̂examro poono yaw. Mer̂pora ro mak naxe. Cemyarke so cexe cecen̂an komo ke porin ke, wahrai ke marha. Kacipara imo ke cemyarke so marha cexe ahnoro.

5 N̂examro yakro Pehsa komo marha n̂epatakexe, Eciope komo, Puce komo, n̂examro marha cexe awakro. Cemyarke so marha n̂examro cexe cecen̂an ke, n̂examro xapikan marha nasî kuripara.

6 Kome marha cesî noro sowtatun komo yakro ahnoro. Tokahma yepamtho komo marha cexe n̂examro sowtatun komo yakro. Nohce n̂ixan komo mîkyam. Mer̂pora naxe awakronoman̂e komo.

7 Awuhre komo akîhtocoko. Awtotopo komo ponaro ehcoko. Awakronoman̂e komo marha ponaronomakî. Awtotopo komo ponaro men ehcoko, kasko yîwya so. N̂examro yantoman̂e me esko amoro.

8 Mer̂pora kaamo yenmapuche tak awar̂axe so awantoman̂e komo. Tooto komo waparî me mîîcexe. Waihkaxapu komo poyinonho waparî me mîîcexe. Pahkî xatken̂e Ixaw Yana komo yîpîn pohnî me ro mak. Iina xa hara n̂esenmekyatken̂e osomunhîrî komo. Mîk hak rowon pono komo chewnonhîrî komo mîkyam. Tîrowon po tak naxe cerepore, waapa pona erasîra.

9 Amoro tak mîîcesî. Asowtatun komo maar̂asî. Anarî yana komo marha maar̂asî sowtatu kom hara mer̂pora. Ocowo imo wara mîîcexe iina. Kaweresî wara mîîcexe roowo yahrun̂e wara.

10 On wara wîîkes awya, Aporin komo Kaan Ow wîîkesî, Ero yimaw iina awtorî poko mesehtînoyasî. Kicicitho me mesehtînoyasî kica.

11 On wara mîîkesî, Mînto naxe tooto tîrowon komo po. Wacamra ro mak nasî n̂examro yewton. Cereporem komo waparî me kîwcesî, erasîn komo waparî me. Iito naxe wacamra ro mak, metatamra marha, metatan yecetî ken̂ehra marha.

12 N̂examro yemyawnonho waar̂asî. Iito naxe cewtothonhîrî komo pono me hara. Mîk hak rowon pono komo chewnonho mîkyam. Mer̂pora nasî n̂examro yoku, emyawno komo marha. Roowo rakatawno komo mîkyam, mîîkesî.

13 Ero yimaw Saba pono komo nîmtapowaxe awakro, Tetan pono komo, Tahsisi pono komo marha, twarawantaxmu kom ha, reaw xîkrî komo yakro rma kexe. On wara kexe awya, Emyawnano yaaso mîmoko? Mer̂pora ro mak mekyasî awakro sowtatu komo. N̂examro menmekye emyawnano yaan̂e me mak? Prata maar̂a, ooru marha? Okno pen maar̂a, iitono komo yemyawnonho marha? Mer̂pono pîn yahsîso mîmoko ha? kexe awya.

14 Ero ke on wara wîîkes awya, tooto xîkrî amoro. Omtapotarî ekatîmko Koke ya. On wara kasko yîwya, On wara men kesî Kporin komo Kaan awya. Ero kaamo po tak erasîn me naxe oyanan komo Ixaw Yana komo. Ero ke n̂examro ponaro exihra ma re mai ha? Ponaaro so rma masî.

15 Ero ke mehxa mîmokyasî aweken poi, nohce n̂ixan poi. Anarî yana komo mekyaxe awakro mer̂pono pîn komo ro mak. Ahnoro mokyaxe kawaru mkaw so. Mer̂pora ro mak mokyaxe matarawra wara ro makî.

16 Oyanan komo waparî me mîmokyaxe Ixaw Yana komo waparî me. Kaweresî wara ro mak mîmokyaxe roowo yahrun̂e wara. Koke amoro, on wara wîîkes awya, eromanhîrî kaamo yimaw ero wara kekyaxe so orowon pono komo waparî me. Ero wara kekyaxe so kir̂wanî ro me oyentome mîk hak rowon pono komo ya. Awîrîmarî komo ke rma ero wara oyen̂axe.

17 On wara marha wîîkes awya, Aporin komo Kaan Ow ha. Pahxa rma omtapotarî wentamexpekn̂e oyanton komo ya, Ixaw Yana weronoman̂e komo ya. Apokono rma mîn wentamexpekn̂e yîwya so. Yaake cimn̂ipu n̂examro pen n̂ekatîmyakn̂e omtapotarî. Koke komo wekyasî pahxaro Ixaw Yana komo waparî me, kesî Kporin komo, ketken̂e apoko rma. Ero wara ketken̂e.

18 On wara wasî ero kaamo po, Ixaw Yana komo waparî me mokyataw Koke komo, cewîrwoxe xa tak wasî okwe. Ero wara wîîkes Ow Aporin komo Kaan.

19 Cerewre xa tak orwonataw wîîkekn̂e Ixaw Yana komo rowon poko. N̂esewsîyasî tak Ixaw Yana komo rowon. N̂esewsîyasî ro mak kopi, wîîkekn̂e.

20 Omokyataw ahnoro roowo poko hakno komo tatanaxe cerahtîke so. Tooto pîn komo marha tatanaxe, ootî komo, tuuna imo kwawno komo, tarin̂em komo, kaikokoro tîtosom komo, okno komo, woskara pono komo, sehrere me tîtosom komo, roowo pore tîtosom kom ha. Ero warai komo tatanaxe omokyataw. Îîpî komo n̂emerurkesî marha. N̂etamerenakesî cawawa komo. Ahnoro waaca komo n̂emacakesî. Ero wa nas okwe orwonataw xa.

21 Kacipara imo marha wekpesî ero yimaw Koke komo waparî me, oyîpîn pono komo waparî me. Ero wara wîîkes Ow Aporin komo Kaan ha. Ero yimaw tak n̂etamexe ro mak etakno re me cehsom komo rma.

22 N̂examro poko wîwîrîmesî eper̂a ke, etwaikacho komo ke marha. Tuuna marha wekpesî n̂examro pona xii kacho ro mak, yukmatikacho marha, saraipa marha war̂mesî pona so porin komo ro mak, wehto marha war̂mesî pona so, weeyu warai marha etahsîxapu rma oco. Ero war̂mesî Koke sowtatun komo pona, n̂examro yakronoman̂e komo pona marha, anarî yana komo pona.

23 Ero wara kar̂pe xa oyehtopo wenpesî, ponaro xa awehtopo komo me kesenpesî marha. Ero wara oyehtopo n̂een̂axe mîk hak rowon pono komo, mer̂pono pîn komo. Ero yimaw on wara tak kexe opoko, Kporin komo xa Mîk ham, kexe, kekn̂e. Ero wara kekn̂e Kporin komo owya.