Ero yinhîrî nîmtapowakn̂e xa hara Kporin komo oyakro. On wara kekn̂e owya, Ai, tooto xîkrî, Koke waihkacho ekatîmko rma. On wara kasko yîwya, On wara men kesî Kporin komo Kaan awya, Ai Koke, awar̂matopo men wîhtînoyasî. Meseke pono komo yantoman̂e ro amoro, Tubaw pono komo yantoman̂e ro marha.

2 Kewyaknamesî tak, kihxikyasî marha. Mehxa kekyasî meyeno poi nohce n̂ixan poi. Ixaw Yana komo yîpîn pona kaar̂asî.

3 Ero yimaw tak kamokatapesî, akrapan war̂mamexpesî awemyai poowa n̂ixan yai. Awuhre marha war̂mamexpesî awemyai kaari n̂ixan yai hara.

4 Ixaw Yana komo yîpîn pona mepîrkesî. Amoro pen mepîrkesî, asowtatun pen komo, awakronoman̂e pen komo marha, mîk hak yana pen kom ha. Apunthîrî komo wîmyasî kwacinama warai komo yotî me, anarmerpan yotî me, kamara warai komo yotî me marha wîmyasî.

5 Woskara po rma mepîrkexe. Ero wara xa wîîkai. Aporin komo Kaan Ow ha.

6 Makoke pono komo pona wehto war̂mesî marha oco. Tuuna imo yecihtawno komo pona marha wehto war̂mesî, erasîra cenmaxmu komo pona. Ero yimaw on wara tak kexe opoko, Kporin komo xa Mîk ham, kexe.

7 Ero yimaw oyosotî marha wîhtînomexpesî oyanan komo ya, Ixaw Yana komo ya. Kir̂wanî ro oyosotî. Oyosotî yîwîrîyakamexpora ro mak tak wasî oyanan komo ya. Ero yimaw on wara kexe mîk hak rowon pono komo, Kporin komo xa Mîk ham ponaro Ixaw Yana komo yehtopo. Kîr̂wanî ro Mîk ham, kexe.

8 Awaikatopo komo me men n̂enmayas amn̂e, wîîkes Ow Aporin komo Kaan. Ero kaamo poko kîmtapowakn̂e pahxa rma.

9 Ero yimaw tak Ixaw Yana yewton pono komo cexe cewton komo poi so. Koke pen komo yuhretho pen nakn̂iyaxe, ecen̂anînhîrî komo porin, wahrai marha, yîkrapanthîrî komo, yuwuhrethîrî komo marha waiwî, watmanthîrî komo, yîrahnuthîrî komo. Ero warai komo nakn̂iyaxe. 7 cimn̂ipu ero yipu yenmetopo poko naxe. Twehtorî komo me n̂enmekyaxe.

10 Mararî pono yîrakara naxe twehtorî komo, comota pono yîrakara marha naxe. Waapa pen yuhretho mak nasî wehtorî komo me. Cemyawnonhîrî komo yaan̂enho yemyawnonho nahsîyaxe hara, wîîkesî. Ero wara wîîkes Ow Aporin komo Kaan ha.

11 Ero yimaw Koke pen komo yokoputho yahrutopo wukuknomesî Ixaw Yana komo chewno. Woskara pono wukuknomesî. Tuuna mehxa cexe mooxe tîtosom komo resce n̂ixa. Woskara pore cexe iitono rma wukuknomesî woskara n̂examro pen yahrutopo me. Iitoxari tîtosom komo wahkototopo me nasî mer̂pora ro mak exirî ke okoputhîrî komo. Iina n̂ahruyaxe Koke pen, noro sowtatun pen komo marha mer̂pono pîn. Ero ke on wara tak ero nosohcexe, Koke Pen Komo, Mer̂pono Pîn Pen Komo, kacho me.

12 7 nuun̂i n̂examro pen yahrutopo poko naxe Ixaw Yana komo. Tîrowon komo yakirwamachome nahruyaxe.

13 Okoputhîrî yahrutopo poko naxe ahnoro Ixaw Yana rowon pono komo. Ero kaamo po tak kayaritomo me xa tak kesenpesî. Ero kaamo marha nasî Ixaw Yana komo yahwotacho me, wîîkesî. Ero wara wîîkes Ow Aporin komo Kaan.

14 7 nuun̂i yenatîche tak kîrkomo nantomexe ero pokono ro komo, roowo yakir̂wamacho pokono ro komo. Anarî komo cexe tooto yocho yeporîrî poko. Kanan poko hakî n̂epor̂axe. Iyochîrî yenîche nahruyaxe roowo yakir̂wamachome.

15 On wara naxe iyochîrî yepor̂ataw, tooto yocho yenîche yukuknon pasahcexe ahrun̂e komo n̂enîrî me. Eronhîrî tak naar̂axe epon̂e ro komo. Koke Pen Komo Woskaran po nahruyaxe.

16 Iito marha nasî ewto, Mer̂pono Pîn Pen Komo, kacho mîn ewto yosot ha. Taa, ero wara Ixaw Yana rowon nakir̂wamexe, kekn̂e Kporin komo owya.

17 Ai, tooto xîkrî, on wara marha wîîkes awya, Aporin komo Kaan Ow, tarin̂em komo an̂ihko ahnoro, kamara warai komo marha. On wara kasko yîwya so, Amohcoko amyamro, mehxa mehxa wara esenmecoko. Owya tîmtopo yimawno tak wetakesî awotî komo. Mer̂pono pîn wetakesî Ixaw Yana komo yîpîn po. Iito tooto puntho mon̂exe, kamxukuthîrî komo marha meer̂axe.

18 Karitî pen komo puntho mon̂exe, roowo pono komo yantoman̂enho pen komo kamxukutho marha meer̂axe. Oper̂a puntho marha mon̂exe, oper̂a xîkîtho puntho, boce puntho, bui puntho. Ero warai komo puntho mon̂exe yupurukrexapu, Basan pononho ha. Ero warai puntho tak mon̂exe ero yimaw.

19 Owya tîmtopo yimawno min ero yimawno. Ero ke katîthîrî mahyaxe tmaxmitaxi ro. Kamxukuthîrî komo marha meer̂axe twenîmso ro. Ero wara meseresmexe owya tîmtopo yimawno me. Awotî komo me rma noro yipu komo waihkes Ow awotî komo me.

20 On̂etakatho tak mon̂exe tmaxmitaxi ro. Kawaru puntho mon̂exe, yîmkaw so toxapunhîrî puntho, karitî komo puntho, sowtatu komo puntho ha. Noro yipu komo puntho mon̂exe, wîîkesî. Ero wara wîîkes Ow Aporin komo Kaan tarin̂em komo ya, kamara warai komo ya marha.

21 Ero wara kir̂wanî ro me oyehtopo wenpesî mîk hak rowon pono komo n̂enîrî me. Owya waihkano ritopo n̂een̂axe n̂examro, kar̂pe oyamorî yehtopo marha n̂een̂axe anarî pen komo waihkarî ke owya.

22 Ero yinhîrî rma tak on wara kexe Ixaw Yana komo opoko, Kporin komo xa Mîk ham ponaro kehtopo komo, kexe opoko. Miya roro ero wara kexe.

23 On wara kexe Xenciu komo ero yimaw, Ixaw Yana pen komo naar̂atken̂e waapa komo kicicme exirî ke so, Tporin komo yai etowrî ke so, kexe. Opona enîhra tak xatken̂e Ixaw Yana komo. Ero ke yiixatî pîn komo ya war̂mapekn̂e. Ahnoro waihyatken̂e kacipara imo namatho me.

24 Kicicme ro mak ehtoponhîrî komo yaw roro rma n̂examro wemetanmekyakn̂e, oyanwetoponho yaw roro marha. Kesewyahruyakn̂e n̂examro yenîhra tak oyehtome.

25 On wara tko wîîkes hara oroto awya. Aporin komo Kaan Ow wîîkesî, Xako yepamtho komo wekyas hara waapa nahsîthonhîrî. Yîpînîn yaw so tak wasî, ahnoro Ixaw Yana komo pînîn yaw. Kir̂wanî ro me oyosotî yenpo xe marha wasî, cerewre ero wara enpo xe wasî.

26 Kicicitho me cehtoponhîrî komo tak nîhcamnoyaxe ero yimaw yîhyapamxapunhîrî. Pahxa tîrowon komo po xatken̂e erasîra ro mak waapa pona. Waparî komo exihra ro makî ka xakn̂e. Ero yimaw oyahsîpînketken̂e okwe. Ero wara cehtoponhîrî komo nîhcamnoyaxe yîhyapamxapunhîrî.

27 On wara wasî n̂examro yekîche hara Mîk hak yana komo chewnonho, yiixatî pîn komo chewnonho ha, ero yimaw kir̂wanî ro me kesenpesî mîk hak rowono pono komo ya, mer̂pono pîn komo ya. Ooxatî me tak n̂esenpexe Ixaw Yana komo yîwya so.

28 Ero yimaw Tporin komo me tak ohtînoyaxe, ponaro cehtopo komo me. Mîk hak rowon pono komo cheka rma re n̂examro warpekn̂e ahsîxapu me thakwa. Wara rma ero yimaw tak yîrowon komo pona wekyas hara. Cewn̂e etînomra ro mak nasî n̂examro poyino ahsîxapu me rma.

29 Esewyahrura tak wasî ero yimaw n̂examro yenîn̂e pîn me. Oyekatî xa matko wiir̂asî yîropotaka so okre tuuna yarkacho wara. Ero wara wasî Ixaw Yana komo poko, wîîkesî. Ero wara wîîkes Ow Aporin komo Kaan, kekn̂e. Ero wara kekn̂e Kporin komo owya.