Taa, ero yinhîrî 25 cimn̂ipu tak xakn̂e waapa nahsîtho me amna yehtoponho. Ero cimn̂ipu yihcitopo po, 10-nhîrî po kaamo po on wara wîxakn̂e. 14 cimn̂ipu xakn̂e Xerusaren pono komo yahsîtoponho. Ero po rma oyahsîn̂e wara xakn̂e Kporin komo. Xerusaren pona rma oyar̂akn̂e.

2 Iina oyan̂e wara xakn̂e Kaan, enîhnî mak n̂enpekn̂e owya. Ixaw Yana komo rowon pona oyar̂akn̂e. Îh pona oyar̂akn̂e, kawno pona. Iito xakn̂e mîîmo mko îîpî mapirî po suu n̂ixan po. Ewto imo wara xakn̂e.

3 Iina oyar̂akn̂e ewto imo warai pona. Iito tooto warai ween̂akn̂e. Bronse wara rma n̂esenpekn̂e yupun. Ewto potaw xakn̂e piiri. Xapopo warai xakn̂e noro yemyaw riin̂u yekposîxapu. Amoyi ke cemyarke marha xakn̂e ahce na kawnon yukuknomacho me.

4 Ero yinhîrî on wara kekn̂e noro owya, Ai, tooto xîkrî amoro, tantono mko wenpes awya. Ero ke takîhso men enko, takîhso marha entakî. Wenpesî awya ero ponaro men esko. On yentome mak awekpo Kaan owya. Enîche awya an̂enthîrî ekatîmtîkakî Ixaw Yana komo ya, kekn̂e. Ero wara kekn̂e tooto warai owya.

5 Ero yinhîrî tak waaca ween̂akn̂e. Kaan mîn roron mamhoko xakn̂e. Ero tak nukuknomekn̂e enpon̂e. Kaw xakn̂e yukuknomacho noro yemyawno 3,5 metru kawnonke, 8 sencimetru xa hara kawnonke. Ero ke waaca nukuknomekn̂e. Cewn̂e yukuknomacho wicakî xakn̂e kawnon. Cewn̂e yukuknomacho wicakî marha xakn̂e yahconon hara.

6 Ero yinhîrî waaca metatan yaka cekn̂e resce n̂ixan yaka. Ero yawomtopo pore kainakn̂e. Metata yakwerî nukuknomekn̂e. Cewn̂e yukuknomacho wicakî xakn̂e ero yakwerî.

7 Amtakpo marha xakn̂e iito asakî. Ero mko marha xakn̂e cewn̂e yukuknomacho wicakî so kawnon, cewn̂e so marha yukuknomacho wicakî xakn̂e akwerî. Mîîmo wacan xakn̂e amtakpo yotaw so. 3 metru wicakî so xakn̂e waaca kaw so amtakpo yotawno. Iito marha xakn̂e anarî xa hara metata Kaan mîn yemtacho po. Ero yakwerî marha xakn̂e cewn̂e yukuknomacho wicakî.

8-9 Amtakpo nukuknomekn̂e hara metata wararîno, Kaan mîn yemtacho pono. 4 metru wicakî xakn̂e kawnon. Iito marha xakn̂e metata yecepu asakî. Takweke so xakn̂e, 2,5 metru wicakî so akwerî xakn̂e.

10 On wara marha xakn̂e ero waaca metatan mîtwo amtakpo mko xakn̂e waaca poko cetahsîso rma. Metata xehxa xakn̂e 3 amtakpo, metata mehxa 3 marha xakn̂e amtakpo. Etîme re mak xakn̂e amtakpo mko, xehxan, mehxan kom ha. Etîme re marha xakn̂e metata yecepu, xehxan, mehxan kom ha.

11 Takweke xakn̂e ero metata yaka kewomtopo, 5 metru xakn̂e akwerî kuknomacho. Ehyatkaw marha xakn̂e 7 metru wicak hara.

12 Amtakpo metatan yecento xakn̂e waacaci. 0,5 metru wicakî mak xakn̂e kawnon. Ceknuke xakn̂e amtakpo mko. 3 metru wicakî so xakn̂e kawnon, ero wicakî xa marha xakn̂e akwerî.

13 Ero yinhîrî waaca metatan nukuknomekn̂e amtakpo wacan yai anarî amtakpo wacan yaka, emtacho pono wacan yaka ha. 14 metru wicakî xakn̂e kawnon. Ero wicakî xakn̂e amtakpo yewtarî yai anarî amtakpo yewtarî yaka.

14 Ero yinhîrî waaca nukuknomekn̂e. 35 metru wicakî so xakn̂e kawnon. Ero wicakî xakn̂e waaca anarî amtakpo yaka, Kaan mîn roron panawno yaka.

15 Etmoxe so n̂he xakn̂e waaca metatan, anarî waaca metatan hara. 26 metru wicakî xakn̂e moxenon.

16 Cewkanapai so xakn̂e amtakpo wacan amtacmen ke so. Miya ro mak xakn̂e ewkanapan yaake. Tmewreso marha xakn̂e waaca mko, kuum yepu warai me tmewreso xakn̂e waaca porokru me.

17 Ero yinhîrî Kaan mîn roron pona oyar̂akn̂e, anarî pona hara Kaan mîn roron. Iito amtakpo xa hara ween̂akn̂e yaake. Iito marha simentu warai ween̂akn̂e tmemehsem, esama me ciixapu. Roro mamhoko xakn̂e esama. Roro wacan yaw xakn̂e amtakpo xa hara. 30 xakn̂e amtakpo mko.

18 Amtakpo metatan wararî rma xakn̂e esama, toopu ciixapu. Ehyatkaw so xakn̂e esama, amtakpo metatan wicakî rma xakn̂e ehyatkawnon. Ero wa xakn̂e esama rooporeno.

19 Ero yinhîrî roro nukuknomekn̂e metata yai anarî roro wacan yaka roro. 55 metru wicakî xakn̂e nohce yaw roro, 55 metru xa marha xakn̂e resce yaw roro hara.

20 Ero yinhîrî nohce n̂ixan makîrha nukuknomekn̂e ewto wacan metatan. Anarî pona kîwtotopo mîn xakn̂e roro pona, waaca mkaino pona kîwtotopo ha.

21 Ero wararî marha xakn̂e amtakpo mko. 3 amtakpo xakn̂e metata xehxa, 3 marha xakn̂e ero mehxa. Iito marha xakn̂e waaca mko kawno pîn. Yihcirî nukuknomekn̂e metata ero wicakî so marha xakn̂e iitono hara. 26 metru wicakî xakn̂e kawomtopo metata yaka. 13 metru wicakî xakn̂e metata yakwerî.

22 Cewtake so marha xakn̂e waaca iitono. Tmewreso marha xakn̂e waaca iito kuum yepu warai me tmewreso ha. Etîme re rma xakn̂e resce n̂ixan wara rma waaca metatan wara. 7 ketapitopo xakn̂e metata yaka kawomtopo me. Kawomtopo mîn xakn̂e ero yihcitopo to.

23 Iito marha xakn̂e anarî metata hara roro pona kîwtotopo Kaan mîn mîtwono pona kîwtotopo ha. Ero wa xakn̂e waaca metatan yemtacho po nohce n̂ixan yemtacho po. Etîme re xakn̂e iitono resce n̂ixan wara rma metata wara. Ero yinhîrî roro nukuknomekn̂e noro anarî metata yaino anarî metata yakan. 55 metru wicakî xakn̂e akwerî. Ero wa xakn̂e metata mko iitono.

24 Ero yinhîrî miya oyar̂akn̂e tooto warai suu yaw roro. Iito anarî metata ween̂akn̂e hara suu n̂ixan hara. Ero yecepu nukuknomekn̂e, ero yamtakponî mko marha. Etîme re xakn̂e ero yipu mko anarî metata wararîno mko wara xa marha.

25 Cewkanapai marha xakn̂e metata mîn mehxan wara rma. 13 metru xakn̂e metata yakwerî. Tîmîye marha xakn̂e ewto pona ewomtopo. 27 metru xakn̂e mîîmo ehyatkawnon.

26 7 xakn̂e ketapitopo metata yaka kawomtopo. Ero yihcitopo to xakn̂e mîîmo, kewomtopo mîn. Kuum yepu warai kuknon xakn̂e tmewreso metata wacan poko. Metata xehxa ero wa xakn̂e, metata mehxa marha.

27 Twacai marha xakn̂e roro Kaan mîn mîtwono. Ero metatan marha xakn̂e suu n̂ixan ha. Mooxe xakn̂e ero ewto wacan metatan yai. 53 metru wicakî xakn̂e moxenon. Noro rma nukuknomekn̂e tooto warai.

28 Ero yinhîrî roro pona oyar̂akn̂e hara Kaan mîn mîtwono pona. Suu n̂ixan yaro oyar̂akn̂e metata yaro. Ero yimaw ero nukuknomekn̂e suu n̂ixan ha. Etîme re xakn̂e yukuknomacho mko anarî metata wara rma.

29 Amtakpo marha xakn̂e iito yaake, metata yecepu marha xakn̂e. Anarî metata yecepu wicakî xa marha xakn̂e ero mko. Cewkanapai so marha xakn̂e metata, amtakpo wacan marha. 27 metru wicakî xakn̂e kewomtopo mîn kawnon. 13 metru wicakî xakn̂e metata yakwerî.

30 Miya so xakn̂e amtakpo mko. On wicakî so xakn̂e amtakpo mko, 13 metru kawnon, 3 metru wicakî akwerî. Ero wicakî so xakn̂e amtakpo mko.

31 Metata mîn xakn̂e mehxa anarî roro yaka kewomtopo me. Ero metata yecepu poko tmewreso xakn̂e kuum yepu warai. 8 ketapitopo xakn̂e ero metata yaka kawomtopo.

32 Ero yinhîrî Kaan mîn roron pona oyar̂akn̂e xa hara. Iito xakn̂e anarî waaca metatan, resce n̂ixan hara. Ero nukuknomekn̂e hara. Anarî metata wicakî rma xakn̂e ero hara.

33 Ero wicakî so marha xakn̂e iitono hara amtakpo mko, metata yecepu, yîmînî mko. Anarî metata wararîno wicakî so marha xakn̂e. Cewkanapai so marha xakn̂e iitono waaca, amtakpo mko ha. 27 metru wicakî xakn̂e iitono hara kewomtopo mîn kawnon. 13 metru wicakî xa marha xakn̂e iitono metata yakwerî hara.

34 Metata mîn xakn̂e mehxa anarî roro pona kewomtopo me. Ero metata yecepu poko tmewreso xakn̂e kuum yepu warai. 8 ketapitopo xakn̂e ero metata yehyun.

35 Ero yinhîrî anarî metata yaka oyar̂akn̂e hara, nohce n̂ixan yaka. Ero tak nukuknomekn̂e hara. Anarî metata mko wicakî xa marha xakn̂e ero hara.

36 Ero wicakî so marha xakn̂e iitono hara amtakpo mko, metata yecepu, yîmînî mko. Cewkanapai so marha xakn̂e iitono waaca, amtakpo mko ha. 27 metru wicakî xa marha xakn̂e iitono hara kewomtopo mîn ehyatkawnon. 13 metru wicakî xa marha xakn̂e iitono metata yakwerî hara.

37 Metata mîn xakn̂e mehxa anarî roro pona kewomtopo me. Ero metata yecepu poko tmewreso xakn̂e kuum yepu warai. 8 ketapitopo xakn̂e ero metata yehyun.

38 Iito marha xakn̂e anarî amtakpo hara. Metata yecepu mehxa xakn̂e. Ero amtakpo yaw okno puntho koroketken̂e takn̂itîkaxmu.

39 Metata mîn yaw xakn̂e aapo mko. Asakî xakn̂e miya, asakî marha xakn̂e xiya. Okno waihkacho mîn xakn̂e aapo mko. Takn̂itîkaxmu waihketken̂e iito, kicicme cehtoponhîrî komo yahrutopo me tîmsom marha, Kicicme wasî kica, kacho me tîmsom marha. Ero wara tîmsom waihketken̂e iito okno pen.

40 Meye xakn̂e anarî aapo mko hara nohce n̂ixan yaka kîwtotopo yakumyaw. Miya xakn̂e asakî, xiya xakn̂e asak hara.

41 Metata mîtwo xakn̂e aapo mko hara. Miya 4 aapo xakn̂e, xiya 4 xakn̂e hara aapo. 8 aapo mîn xakn̂e aapo iitono okno waihkacho mko.

42 Iito marha xakn̂e 4 aapo xa hara. Toopu mîn xakn̂e enporixapu. Okno waihkacho pokono mko yapon mîn xakn̂e aapo mko. 0,75 metru wicakî kaw so xakn̂e aapo, 0,75 wicakî xakn̂e akwerî, 0,50 metru wicakî kaw so xakn̂e. Ero pona so nakriyatken̂e maria mko, kamxuku yenî mko, ahce na mko takn̂itîkaxmu pokono, ahce na me tîmsom pokono marha.

43 Miya so waaca pona takriso xakn̂e kiiwi imo warai. Kamorî wicakî kaw so xakn̂e. Aapo reha xakn̂e okno puntho yapon me, Kaan ya tîmsom yapon me ha.

44 Taa, anarî yamtakpo xakn̂e metata mîtwo so. Kaan mîn roron po xakn̂e, ero wacan metatan mîtwo xa. Waano yaan̂e komo yamtakpon mîn xakn̂e. Anarî amtakpo xakn̂e nohce n̂ixan mîtwo. Suu n̂ixa xakn̂e ero metatan. Anarî amtakpo xakn̂e hara suu n̂ixan mîtwo hara. Nohce n̂ixa xakn̂e ero metatan hara.

45 Ero yinhîrî on wara kekn̂e owya tooto warai, On amtakpo metatan nasî suu n̂ixa tmetatai. Kaan mîn yenîn̂e komo mîn me nasî.

46 Anarî amtakpo metatan nasî nohce n̂ixa hara. Ero reha nasî Kaan ya tîmsom yakn̂itopo yenîn̂e komo mîn me. Kaan mîn yenîn̂e marha mîkyam ero yenîn̂e komo, Repita komo mîkyam. Satoke yepamtho komo makî reha mîkyam. Kporin komo mîtkoso xa tîtosom mîkyam, yîwya tîmsom pokono kom ha, kekn̂e. Ero wara kekn̂e tooto warai owya.

47 Ero yinhîrî Kaan mîn roron nukuknomekn̂e hara. 55 metru wicakî xakn̂e kawnon, 55 metru wicakî xa marha xakn̂e akwerî. Etîme re xakn̂e kawnon, akwerî ha. Kaan mîn yaka kewomtopo yecen̂e rma xakn̂e Noro ya tîmsom yakn̂itopo.

48 Ero yinhîrî Kaan mîn yaka xa oyar̂akn̂e. Mîîmoci xakn̂e iito Kaan mîn metatan mîn me. Mîîmoci metatan yecepu nukuknomekn̂e. Yahcome xakn̂e mîîmoci metatan yecepu, 2,7 metru wicakî so xakn̂e. Ero wicakî xakn̂e mehxan, ero wicakî xa marha xakn̂e xehxan hara. 1,7 metru wicakî xakn̂e metata yakwerî, xehxan yakwerî. 1,7 metru wicakî xa marha xakn̂e mehxan yakwerî hara.

49 11 metru xakn̂e mîîmoci ehyatkawnon. 6 metru xakn̂e ero yakwerî hara. Ketapitopo mko xakn̂e mîîmoci yaka kawomtopo me. Iito marha xakn̂e mapata warai metata yecepu wararî. Metata xehxa xakn̂e anarî, metata mehxa xakn̂e anarî hara. Ero wara xakn̂e Kaan mîn metatan mîn.