Ero yinhîrî tak Kaan mîn yaka xa oyar̂akn̂e tooto warai. Ero metatan yecepu nukuknomekn̂e asakî. Xehxan xakn̂e 2 metru wicakî yahconon. Ero wicakî xa marha xakn̂e mehxan hara.

2 Kewomtopo xakn̂e 5 metru wicakî akwerî kuknomacho. Twacai xakn̂e kewomtopo. 2,5 metru wicakî xakn̂e kewomtopo wacan kawnon. Ero wicakî xakn̂e xehxan, ero wicakî xa marha xakn̂e mehxan hara. Ero yinhîrî Kaan mîn maxixin tak nukuknomekn̂e. 20 metru xakn̂e ehyatkawnon. 10 metru xakn̂e akwerî hara.

3 Ero yinhîrî anarî amtakpo yaka cekn̂e hara noro, Kaan mîn mapitawno yaka. Ero metatan yecepu nukuknomekn̂e asakî. 1 metru so xakn̂e iyahconon yukuknomacho. Ero metata xakn̂e 3 metru takweke. Twacai marha xakn̂e kewomtopo ero amtakpo yaka kewomtopo. 3,5 metru so xakn̂e ero wacan kawnon.

4 Ero yinhîrî mîîmo mapitawno tak nukuknomekn̂e hara. 10 metru xakn̂e ehyatkawnon, 10 metru marha xakn̂e akwerî hara. Yukuknomache on wara kekn̂e owya tooto warai, Kaan yamtakponî ro xa tan on, kir̂wan xa tak, kekn̂e. Ero wara kekn̂e owya.

5 Ero yinhîrî tak Kaan mîn wacan nukuknomekn̂e hara. 3 metru xakn̂e yahconon. Tamtakpoi so xakn̂e ero waaca. Yaake xakn̂e iitono amtakpo. Anarî amtakpo xakn̂e 2 metru akwerî. Ero wicakî re xakn̂e iitono amtakpo mko.

6 Etantaw re xakn̂e amtakpo mko. Rooporino xakn̂e, rakatarino xakn̂e hara, epoyino xakn̂e hara. 30 yakenon xakn̂e rooporino, ero wicakî xa marha xakn̂e rakatarino, ero wicakî xa marha xakn̂e epoyino, iyakenon ha. Sahsamaxapu ken̂e xakn̂e Kaan mîn wacan miya ro mak ahnoro. Amtakpo yecetî yapon mîn xakn̂e sahsamaxapu. Kaan mîn wacan poko etahsîra xakn̂e sahsamaxapu.

7 On wara marha xakn̂e amtakpo mko, rooporino mko xakn̂e wahra n̂he ha re. Rakatarino mko xakn̂e porin me n̂he, epoyino xakn̂e ero mko yopo n̂he hara. Kawomtopo marha xakn̂e iito. Rooporino yaw n̂ihciyakn̂e, kahsî cekn̂e rakatarino yari miya epoyino yaka. Ero wa xakn̂e kawomtopo iitono.

8 Tapoi so xakn̂e amtakpo mko Kaan mîn mamhokono mko. Kaw n̂he ciki xakn̂e ero mko yapon. Takweke marha xakn̂e, 3,5 metru wicakî xakn̂e akwerî, tooto warai yemyaw xakn̂e yukuknomacho ero wicakî so xakn̂e.

9-10 Yahcome xakn̂e amtakpo wacan mehxan, mîîmo wacan me cehsom, 2,5 metru wicakî xakn̂e yahconon. Waaca mkai tak xakn̂e esama warai mak. 10 metru wicakî xakn̂e ero yakwerî. Kaan mîn tapomriso ro xakn̂e ero esama warai.

11 Tmetatai xakn̂e amtakpo mko. Esama pona kepatakacho me xakn̂e metata mko. Asakî so xakn̂e metata mko amtakpo poko hakno. Anarî metata xakn̂e suu yaw roro kîwtotopo me, anarî xakn̂e nohce yaw roro kîwtotopo me hara. Ero wa so xakn̂e metata mko ahnoro. 2,5 metru wicakî xakn̂e esama yakwerî ha.

12 Taa, Kaan mîn roron mehxa xakn̂e anarî hara mîîmo, oesce n̂ixa. Takwekem mîn xakn̂e, 35 metru wicakî xakn̂e ero yakwerî. Ero mîîmo wacan xakn̂e 2,5 metru wicakî yahconon. Ero wicakî re xakn̂e mehxa mehxa wara. Kaw xakn̂e ero mîîmo, 45 metru xakn̂e ehyatkawnon.

13 Ero yinhîrî Kaan mînî rma nukuknomekn̂e hara. 50 metru wicakî xakn̂e ero kawnon. Ero yinhîrî Kaan mîn roron nukuknomekn̂e hara. Mîîmo yakro rma nukuknomekn̂e oesce n̂ixan yakro. 50 metru wicakî xa marha xakn̂e ero mko kawnon.

14 Ero yinhîrî Kaan mîn roron nukuknomekn̂e xa hara mehxa tak resce n̂ixan hara. Kaan mîn potarî yakro rma nukuknomekn̂e. Ero yakwerî marha xakn̂e 50 metru wicakî.

15 Ero yinhîrî anarî mîîmo nukuknomekn̂e hara. Mehxa Kaan mîn mapitaw xakn̂e roro hara. Ero mapitaw xakn̂e mîîmo hara. Ero mîîmo nukuknomekn̂e hara, mîîmo mahcan meero nukuknomekn̂e. Ero wicakî xa marha xakn̂e ehyatkawnon, 50 metru ha.

16 Taa, on wara xakn̂e Kaan mîn potawno, Kaan mîn mapitawno marha, Kaan mîn yaka kewomtopo marha, tîmkarinomaxi xakn̂e sahsamaxapu ke, weewe ke. Ero rma xakn̂e Kaan mîn yetarî yai, ewkanapan yaka roro, Kaan mîn metatawno marha. Ewkanapan meero xakn̂e sahsamaxapu ke tîmkarinomaxi. Ahnoro xakn̂e ero wara.

17-18 On wara marha xakn̂e ero sahsamaxapu Kaan mînî ro yaka kewomtopo wacan pokono, ahnoro Kaan mîn wacan pokono marha, ero potawno wacan pokono marha, maria ke cenporiso xakn̂e kerubin kuknon, kuum yepu warai kuknon marha. Esemtaka cenporiso xakn̂e, kerubin kuknon, ero mehxa kuum yepu warai kuknon hara. Asak hakno ke so ceepatake xakn̂e kerubin kuknon. Miya roro ero wa xakn̂e cenporiso. Kaan yamtakponî ro wacan xakn̂e ero wara, Kaan mîn maxixin marha.

19 Xehxa cenporiso xakn̂e kerubin tooto yeepatarî me kuum yepu warai wece cewru. Mehxa xakn̂e reaw yeepatarî me hara kuum yepu warai wece cewru hara anarî wece hara. Ero warai me enporixapu mko xakn̂e Kaan mîn wacan poko miyan poko rma ahnoro mak.

20 On wara xakn̂e Kaan mîn maxixin wacan potawno wacan, kerubin me cenporiso xakn̂e kuum yepu warai me marha. Ero wara cenporiso xakn̂e eeta poi miya roro kewomtopo yaka roro epoyino yaka ha.

21 On wara xakn̂e Kaan mîn maxixin metatan, potawno metatan, ececenarî re xakn̂e ero mko yakwerî, ero mko kawnon marha. Ero wa xa marha xakn̂e Kaan yamtakponî ro metatan hara.

22 Iito marha xakn̂e Kaan ya tîmsom yakn̂itopo, sahsamaxapu ciixapu. 1,5 metru wicakî xakn̂e ero kawnon, 1 metru xakn̂e akwerî, 1 metru marha xakn̂e ehyatkawnon. Ahnoro ero xakn̂e sahsamaxapu ciixapu, ero yapon, ero yawxarî, ahnoro mak. Ero yinhîrî on wara kekn̂e tooto warai owya, Onî Kaan yamtakponî ro mîtwono aapo, kekn̂e. Ero wara kekn̂e owya.

23-24 Asakî xakn̂e Kaan mîn yetahrunkacho. Ero wara xakn̂e potawno metatan, Kaan yamtakponî ro metatan marha. Asakî marha xakn̂e anarî metata, asakî marha xakn̂e anarî hara metata. Ero wara xakn̂e metata, xehxan, mehxan marha.

25 Ero wara xa marha xakn̂e Kaan mîn metatan, potawno metatan ha, kerubin kuknon me, kuum yepu warai kuknon me marha cenporiso xakn̂e. Kaan mîn wacan xakn̂e cenporiso so ero wara xa marha xakn̂e metata hara. Sahsamaxapu marha xakn̂e ciiso Kaan mîn yaka kewomtopo mîn perî me.

26 On wara marha xakn̂e kewomtopo wacan, cewkanapai so xakn̂e wahrai ke so. Ewkanapa mîtwo so xakn̂e kuum yepu warai enporixapu. Ero wara xa marha xakn̂e amtakpo mko Kaan mîn mamhokono mko, ero perî warai marha xakn̂e ero wara cenporiso, weewe sahsamaxapu. Ero wara ciiso xakn̂e Kaan mîn.