Ero yinhîrî oyar̂akn̂e xa hara tooto warai, nohce yaw roro oyar̂akn̂e Kaan mîn roron pona, yîmkaino pona. Iito xakn̂e amtakpo hara esama yemtacho po. Roro wacanî mkai marha xakn̂e nohce n̂ixanî mkai.

2 Iito xakn̂e anarî mîîmo hara. Ero xakn̂e 50 metru wicakî kawnon, 25 metru wicakî xakn̂e akwerî. Ero metatan xakn̂e nohce n̂ixa.

3-4 Asakî xakn̂e Kaan mîn roron, rakatawno xakn̂e, wemcawno marha. Ero yotaw xakn̂e amtakpo mko yaake. Waaca me rma xakn̂e mîn amtakpo, roro mko yotakan me. Amtakpo mehxa xakn̂e toopu tmemehsem roro me ciixapu, wemcawno me ciixapu ha. Amtakpo xehxa xakn̂e toopu marha tmemehsem asakî n̂he mak ha tko. Esama me ciiso xakn̂e ero. 5 metru wicakî xakn̂e esama yakwerî. 50 metru wicakî xakn̂e kawnon. Ahnoro amtakpo metatan xakn̂e nohce n̂ixa kepatakatopo me. Etantaw re marha xakn̂e ero mko amtakpo mko ha. Rooporino mko xakn̂e, rakatarino mko marha xakn̂e, epoyino mko marha xakn̂e. Ero wara xakn̂e amtakpo mko.

5 Wahra n̂he xakn̂e epoyino mko amtakpo. Ketaritopo xakn̂e ero mko yawxaw, ero ke wahra n̂he xakn̂e. Ketaritopo exihra xakn̂e rakatarino mko yawxaw, rooporino mko yawxaw marha.

6 Epoyino mapatan exihra xakn̂e. Ero ke ero mko xakn̂e wahra n̂hema, rakatarino xawyaka, rooporino xawyaka marha.

7 Iito marha xakn̂e anarî waaca hara. Amtakpo mko yawxari cekn̂e, roro pona yîmkaino pona. Amtakpo metatan mehxa xakn̂e. Kaw xakn̂e waaca 25 metru wicakî kawnon.

8 Asakî mak xakn̂e amtakpo mko roro pona epatakacho ken̂arî mko. Cepanatoso xakn̂e 25 metru wicakî mak kawnon. Mehxa xakn̂e amtakpo hara Kaan mîn wece epatakacho ken̂arî mko hara. Mer̂pora n̂he xakn̂e ero mko. Cepanatoso marha xakn̂e 50 metru wicakî kawnon.

9 On wara xakn̂e rooporino mko metatan, resce n̂ixan, kepatakacho me xakn̂e roro ponan me, wemcawno ponan me ha.

10-11 Mehxa xakn̂e amtakpo xa hara yaake xa hara. Suu n̂ixa xakn̂e. Roro wacan porero xakn̂e wemcawno porero. Kaan mîn roronî ro wacan porero marha xakn̂e. Iito marha xakn̂e esama xa hara. Mehxanî mko wara xa marha xakn̂e nohce n̂ixanî mko wara hara. Etîme re xakn̂e kawnon komo, etîme re marha xakn̂e akwerî. Etîme re marha xakn̂e metatanî mko.

12 Yaake xakn̂e amtakpo metatan nohce n̂ixan ha. Yaake marha xakn̂e amtakpo metatan suu n̂ixan hara. Etîme re xakn̂e nohce n̂ixan, suu n̂ixan kom ha. Iito marha xakn̂e esama, roro wacan porero. Ero yaka kewomtopo xakn̂e mehxa oesce n̂ixa. Ero yaro kewomuche resce yaw roro tîhcetken̂e amtakpo mko yaka xa tak kewomtome. Ero warai n̂enpekn̂e tooto warai owya.

13 Ero yinhîrî on wara kekn̂e noro owya, On wara nasî amtakpo mko Kaan mîn roron mamhokono mko. Nohce n̂ixanî mko nai, suu n̂ixanî mko marha nai. Tîmsom pokono komo yamtakpon mîn, Kporin komo yaka tîtosom komo yamtakpon ha. Iito n̂eseresmexe, Kaan ya tîmxapu non̂exe, nokyaxe marha puruma tîmxapu. Iina n̂enmekyaxe Kaan ya tîmxapu mko, puruma, sepata, okno puntho marha kicicme ehtoponhîrî yahrutopo me tîmxapu, Kicicme wasî kica, kacho me tîmxapu marha. Ero yipu mko n̂enmekyaxe ero amtakpo mko yaka. Kaan yamtakponî mko rma mîn ero mko.

14 Ero mko yaka cewomuche tîmsom pokono komo miya ka tohra naxe mehxan pona hara, roro pona. Tponon nînomyaxe ero amtakpo yaw rma. Kaan poko etapickacho ro mak mîn ero, n̂examro ponon. Anarî ka namruyaxe hara miya totohme so tooto komo yaka hara, kekn̂e. Ero wa kekn̂e tooto warai owya.

15 Ero wara Kaan mînî mko nukuknomekn̂e noro, Kaan mîn wacan yawno mko ha. Ero yinhîrî oyar̂akn̂e hara miya Kaan mîn wacanî mkai. Waaca metatan yaro oyar̂akn̂e resce wecan yaro. Amna yepatakache iitono nukunomekn̂e hara roro xa hara.

16-20 Twacai xakn̂e ero roro. Resce n̂ixan ka nukuknomekn̂e amoyi warai ke. 250 metru wicakî xakn̂e kawnon. Nohce n̂ixan nukuknomekn̂e hara. 250 metru wicakî xa marha xakn̂e ero hara. Suu n̂ixan nukuknomekn̂e hara. 250 metru wicakî xa marha xakn̂e ero hara. Oesce n̂ixan marha nukuknomekn̂e. 250 metru wicakî xa marha xakn̂e ero hara. Ero wara Kaan mîn roron wacan nukuknomekn̂e amoyi warai ke. Mehxarpa nukuknomekn̂e waaca ahnoro. Waaca yawno xakn̂e tîmsom pokono komo mohtopo me. Waaca mkaino xakn̂e ahnoro tooto komo mohtopo me hara. Ero wara xakn̂e.