Ero yinhîrî oyar̂akn̂e xa hara tooto warai. Kaan mîn metatan yaka oyar̂akn̂e, resce n̂ixan yaka.

2 Ero yimaw Kaan weyuru ween̂akn̂e, ponaro Ixaw Yana komo yehtopo weyuru. Resce n̂ixa mokyakn̂e. Noro mtapotarî marha wencekn̂e, n̂ewtunakn̂e kahxi imo wara ro mak kopi. Katpape ro mak xakn̂e roowo Noro katpan ke.

3 Pahxa rma Kaan weyuru ween̂akn̂e Noro mokyataw ewto yakn̂itopo yekatîmn̂e me. Keba yepu yecihtaw oyexitaw ween̂akn̂e. Ero warai xa marha ween̂akn̂e hara. Ero yenîche kesewnapekn̂e.

4 Ero yinhîrî Kaan mîn yaka n̂ewomyakn̂e Noro weyuru. Waaca metatan yaro n̂ewomyakn̂e resce n̂ixan yaro.

5 Ero yinhîrî oyanîmyakn̂e hara Kaan Yekatî. Kaan mîn roron pona oyar̂akn̂e mîîmo rakatawno pona. Ero yimaw ahnoro tîmîn katparekn̂e Kporin komo weyuru.

6 Iito rma xakn̂e tooto warai opanaw rma. Ero yimaw Kaanî mtapotarî wencekn̂e hara. Kaan mîn yaw rma nîmtapowakn̂e.

7 On wara kekn̂e owya, Ai, tooto xîkrî, on oyapon mîn, kayaritomo me oyesenpotopo ha. On xa ohtarî yapihtopo marha. Tantono ro me wasî Ixaw Yana chewno ro me miya roro. Oyosotî yîwîrîyakamexpora ro mak tak naxe n̂examro, kayaritomon komo marha. Mîk hak warai me enporixaputho komo pona n̂etowyatken̂e cipici yai ro cehsom wara kica. Îh po so xakn̂e kayaritomon komo yokoputho. Ero wa oyosotî yîwîrîyakamexpon̂e me xatken̂e kica. Ero wa exihra tak naxe amn̂e.

8 Tîmîn komo potarî n̂iir̂atken̂e omîn potarî mîtkoso rma kica. Tîmîn metatan yecepu marha n̂iir̂atken̂e omîn metatan yecepu wararî rma kica. Waaca mak xakn̂e n̂examro porohkacho me ohyai. Kir̂wanî ro oyosotî. Ero yipu rma tko nîwîrîyakamexpetken̂e kicicitho poko ro mak cexirî ke so. Ero ke n̂examro pen Ow waihkekn̂e tîrwon̂e xa.

9 Ero ke oroto ohyai cetowtoponhîrî komo tak nahsîpînkacowpe. Ponaro cehtoponhîrî komo nahsîpînkacowpe tîkayaritomon komo n̂enporitho ha. Ero wara ahsîpînkache yîchewno ro komo me was okre miya roro.

10 On wara marha wîîkes awya tooto xîkrî, omîn kuknomacho ekatîmtîkakî Ixaw Yana komo ya kicicme ehtoponhîrî pona tîhyapamtome so. N̂examro rma omîn nukuknomacowpe.

11 Kicicme cehtoponhîrî komo pona tîhyapamso exitaw so tak omîn yehtopo kuknon ekatîmtîkakî yîwya so. Katpanaka epatakacho mko, mîîmo yaka ewomtopo mko, amtakpo mko ahnoro yukuknon ekatîmtîkakî yîwya so. Ero wara men cirpore nasî omîn, ero wara marha cexpore nasî ero yaw awexitaw so, kacho mko marha ekatîmtîkakî yîwya so. Ekatîmîche yîwya so amtapotachonhîrî rma mewreko yîn̂enîrî komo me ero yaw roro xa ehtome so.

12 Ero wara xa nasî apanatanmetopo komo omîn yaw awehtopo komo. Îîpî meretwo nas omîn. Ero ke ahnoro ero îîpî nasî omîn yewtî ro me xa. Yikiciciren me ro mak nasî. Ero wara nasî apanatanmetopo komo omîn yaw awehtopo komo pokono.

13 Taa, on wicakî nasî owya tîmsom yakn̂itopo. Kopatu poko wukuknomesî. On wicakno mîn kopatu, 0,5 meeturu, 8 sencimeturu xa hara. Ero wicakno mîn kopatu. Ero ke on wara nasî tîmsom yakn̂itopo yukuknomacho, 1 kopatu nasî kaw ehtopo, 1 kopatu marha nasî amtarî. Ero porero nasî ahce na ero mamhokono. 22 sencimetru wicakî nasî ero mamhokono yakwerî.

14 On wara nasî akn̂itopo kuknomacho kawnon ha. Yîmîtî yai kahsî nukuknomekn̂e. 2 kopatu wicakî nasî ero kawnon. 1 kopatu wicakî nasî ero yakwerî. Ero wa xakn̂e ero yepirî. Kaw n̂he nasî anarî hara epirî. 4 kopatu wicakî nasî ero kawnon. 1 kopatu wicakî xa marha nasî ero yakwerî hara kanahtawno yakwerî.

15 Kaw n̂he tak nasî wehto yen. 4 kopatu wicakî nasî kawnon. Wehto yen kanahtaw nasî paaka meretîtho warai, 4 ha. Kahsî nasî ero mko poturu.

16 Ceknuke nasî wehto yen. 12 kopatu wicakî nasî ero yakwerî, 12 wicakî xa marha nasî ero kawnon.

17 Iito nasî anarî hara ero yepirî kaw. Ero marha nasî ceknuke. 14 kopatu wicakî nasî ero yamtarî, 14 kopatu wicakî xa marha nasî ero yehyatkawnon. Cepike marha nasî ero epirî rma. 0,5 kopatu wicakî nasî ero yamtarî. On wara xakn̂e yîmîtî hara, 1 kopatu wicakî xakn̂e ero yakwerî. Ero wicakno mîn Kaan ya tîmsom yakn̂itopo. Ero yaka kawomtopo nasî resce n̂ixa, kekn̂e. Ero wara kekn̂e Kporin komo owya.

18 Ero yinhîrî on wara kekn̂e hara Kporin komo owya, Ai, tooto xîkrî, on wara wîîkes awya. Aporin komo Kaan Ow wîîkesî, apanatanmetopo komo xa hara wekatîmyas awya owya tîmsom yakn̂itopo pokono rma. Ero yakîhtoche amn̂e omtapotarî yaw roro mak okno puntho takn̂ipore nasî ero po, takn̂itîkaxmu ha. Omtapotarî yaw roro marha okno kamxukutho caramapore nasî ero pore.

19 Yihcirî me bui naacowpe tîmsom pokono komo yaka, kar̂pamxan warai ha, bui. Kicicme ehtoponhîrî komo yahrutopo me takn̂isom mîk naacowpe yîhyaka so. Repita komo mîkyam omîtkoso tmohsom kom ha, Satoke yepamtho kom ha. Noro yipu komo xa mohcowpe ohyaka xa owya tîmsom yakn̂itome, wîîkes Ow Aporin komo Kaan ha.

20 Bui pen kamxukutho poi tanîmpore nasî paaka meretîrî warai pona 4 mko pona. Ero marha cirpore nasî aapo yepirî pore aapo kanahtawno pore. Eknu pona so marha n̂iicowpe, ero mamhoko see katîkapore nasî cucure cehso ro ahnoro ero capahno ciki. Ero wara owya tîmsom yakn̂itopo nasî takir̂wamapore. Ero wara takir̂wamapore nasî, kicicme ehtopo marha nasî tahrupore.

21 Ero yinhîrî bui puntho tarpore nasî omîn yai, kicicme awehtoponhîrî komo yahrutopo me takn̂isom ha. Ero yipu yakn̂itopo ro pona naacowpe omîn yai. Iina tak nakn̂icowpe.

22 Enmapuche xa hara boce puntho nakn̂icowpe hara kicicme awehtoponhîrî komo yahrutopo me xa hara. Tupunporem mak nakn̂icowpe. Ero yimaw tîmsom yakn̂itopo nakir̂wamacowpe xa hara, paaka kamxukutho ke nakir̂wamexe ero wa xa marha.

23 Akn̂itopo yakir̂wamatîkache bui nakn̂icowpe anarî hara tupunporem xa marha. Owya tîmsom me nakn̂icowpe. Kahn̂eru puntho marha nakn̂icowpe tupunporem xa marha. Owya tîmsom me nakn̂icowpe.

24 Owya tîmsom yakn̂itopo po rma nakn̂icowpe. Akpotuche yîmîtî sahsara kacowpe tîmsom pokono komo yupunthîrî pore. Ero yinhîrî nakn̂icowpe tak owya tîmsom me, Aporin komo ya tîmsom me ha.

25 On wara marha n̂ehcowpe ero yimaw 7 kaamo po roro, boce nakn̂icowpe kicicme cehtoponhîrî komo yahrutopo me. Cewn̂e so nakn̂icowpe kaamo po roro. Kaamo po roro marha bui nîmcowpe owya kar̂pamxan. Noro puntho yakro kahn̂eru puntho marha nakn̂icowpe kaamo po roro. Tupunporem komo re mak nakn̂icowpe.

26 Ero wara kicicme akn̂itopo yehtoponho n̂ahrucowpe, nakir̂wamacowpe marha. 7 kaamo po roro ero wara nakir̂wamacowpe. Ero wara owya tîmsom yakn̂itopo ro me n̂iicowpe.

27 7 kaamo yenatîche, 8 kaamo po tak Ixaw Yana nîmîtho puntho tak nakn̂icowpe hara tîmsom pokono komo aapo pona. Takn̂itîkaxmu, Aaxe xa wasî, kacho me tîmsom marha, ero warai nîmcowpe owya ero po. Ero yimaw tawake was apoko so, wîîkesî. Ero wara wîîkes Ow Aporin komo Kaan ha, kekn̂e. Ero wa kekn̂e Kporin komo owya.