Ero yinhîrî oyar̂akn̂e hara tooto warai, Kaan mîn roron metatan yaka oyar̂akn̂e. Resce n̂ixa kepatakacho mîn xakn̂e metata. Wara rma tahruso xakn̂e.

2 Ero yinhîrî on wara kekn̂e Kporin komo owya, Tahruso nasî on metata pahkî ro mak. Ahrunkara ro mak naxe iitono komo. Ixaw Yana Porin komo Kaan mohtoponho me nasî, ewto pona Noro yepatachonho me ha. Ero ke tahruso nasî.

3 Amn̂e tak Ixaw Yana komo yantoman̂e iina n̂eremesî metataw rma. Iito n̂eseresmesî Noro Aporin komo poko tahwotacho me. Ero yaro n̂ewomyasî omîn yaka. Ero yinhîrî ero yaro n̂epatakes hara omîn yai, kekn̂e. Ero wara kekn̂e Kporin komo owya.

4 Ero yinhîrî miya oyar̂akn̂e hara noro Kaan mîn roron metatan yaka hara, nohce n̂ixa kepatakacho yaka. Iina oyarîche Kaan mîn wece ween̂akn̂e. Katpape ro mak tak xakn̂e Kaan mîn ahnoro Kaan yehtopo ke rma oco. Ero yenîche kesewnapekn̂e tak iito rma.

5 Ero yinhîrî on wara kekn̂e hara Kporin komo owya, Ai, tooto xîkrî, tîmsom pokono komo yantomacho wekatîmyas awya. Omtapotarî men entakî, on̂enporî marha enko. Ero wa men omîn akir̂wamacoko, ero wa marha ahce na poko ehcoko ero yawno mko, kacho wekatîmyas awya. Ero ke omtapotarî men entakî takîhso ero ponaro awehtome. Omîn yaka cewomsom komo encoko, omîn yai cepatakaxmu komo marha enko takîhso.

6 Oroto tak on wara kasko Ixaw Yana komo ya, oyanwekn̂e ro komo ya rma, Ai, oyakno komo, Ixaw Yana komo amyamro, on wara kesî Kporin komo, N̂eexi tak kicicitho poko awehtoponhîrî komo.

7 Anarî yana komo mekyatken̂e omîn yaka. Etanpikan komo mîkyam mekyatken̂e okwe. Etanpikan wara marha xakn̂e yîropotarî kom hara. Ero wa omîn mîwîrîmetken̂e kica. Onahrî me tîmsomu rma re mîmyakn̂e owya, okno katîtho, okno kamxukutho marha. Ero yimaw omtapotarî yewetîra mîxatken̂e kicicitho poko awexirî ke so kica.

8 Omîn yawno yenîrî poko kantometken̂e so cma re. Ero pokohra tko mîxatken̂e okwe. Anarî komo mak mantometken̂e hara ero poko okwe.

9 On wara wîîkes Ow Aporin komo Kaan ha, Omîn yaka ewomra ro mak n̂ehcowpe anarî yana komo, yupun etanpikan komo, yîropotarî etanpikan komo marha. Ixaw Yana komo chew rma re naxe anarî yana komo. Noro yipu komo meero ewomra ro mak n̂ehcowpe omîn yaka.

10 Pahxa Ixaw Yana komo n̂etowyatken̂e ohyai. N̂examro yakro rma Repita komo n̂emoxenorekn̂e hara ohyai. Mik hak warai me tîn̂irithîrî komo ponaro tak xatken̂e okwe. Ero ke kicicme cehsom komo, kacho me tak naxe n̂examro rma okwe.

11 Wara rma omîn yaw rma re n̂etapickacowpe. Omîn metatan yenîrî poko n̂ehcowpe, ero yawno pokono me marha n̂ehcowpe. Tooto komo yoku paraxkan̂e me marha n̂ehcowpe, takn̂itîkaxmu, kicicme tpoyino komo yehtoponho yahrutopo marha. Ero yipu paraxkan̂e me n̂ehcowpe. Tooto mtapotarî yentan̂e me roro naxe ahce na poko cehtome so n̂examro yanme.

12 On wara tko xatken̂e Repita komo pahxa, tooto komo yoku paraxketken̂e tîn̂irithîrî komo ya tîmsom me kica. Ero wara Ixaw Yana komo kiciciretken̂e kica. Ero ke on wara wîîkekn̂e Repita komo poko, Kicicme cehsom, kacho rma mîkyam owya, wîîkekn̂e. Tapockantaxi wîxakn̂e ero wara ketaw owya towîhnî me ro mak omtapotarî yîhtînomexpotome. Ero wara wîîkes Ow Aporin komo Kaan ha.

13 Meyehra mokuhnî me mak tak naxe n̂examro owya tîmsom poko cehtome. Omîn yawno mko yaka meyehra mokuhnî me naxe. Oyamtakponî ro yaka ewomnî me marha naxe. Porohxapu me mak n̂ehcowpe, Kicicme cehsomînhîrî komo mîkyam, kacho me marha n̂ehcowpe. Ero wara n̂ehcowpe kcicime ehxapunhîrî me cexirî ke so okwe.

14 Wara rma ahce na pokono me rma n̂examro wiir̂asî omîn yenîrî poko. Ahce na ciisom exitaw ero yaw ero yipu ciin̂e me n̂examro wiir̂asî.

15 Ero warahra tko xatken̂e tîmsom pokono komo reha. Repita komo rma re mîkyam, Satoke yepamtho komo mak ha tko. Pahxa ohyai etowyataw Ixaw Yana komo omtapotachonho n̂ewehcatken̂e rma n̂examro reha omîn yentopo pokono. Ero ke n̂examro makî reha mokyaxe meyehra omîtkoso owya tîmsom yakn̂itome. Okno katîtho, okno kamxukutho caramacho, ero yipu pokono ro me naxe n̂examro, wîîkes Ow Aporin komo Kaan ha.

16 N̂examro makî reha n̂ewomyaxe oyamtakponî ro yaka. N̂examro marha mokyaxe oyuru yapon yaka ero ciiso. N̂examro mak naxe ahce na ciisom ciin̂e me, omtapotachonho yaw roro ciin̂e me ha.

17 On wara naxe n̂examro omîn roronî ro pona mokyataw so metata yaro, riin̂u kahxapu yaw mak n̂ehcowpe poono yaw. Omîn roronî ro po ahce na ciir̂ataw oper̂a poci kahxapu yawhra ro mak n̂ehcowpe. Ero wara marha n̂ehcowpe omîn roronî ro po cexitaw so, omînî yaw cexitaw marha.

18 Riin̂u kahxapu marha namrucowpe tîxapikan komo. Riin̂u kahxapu yaw marha n̂ehcowpe kamisa yaw. Omîn yaw cexitaw so ahce na amrura ro mak n̂ehcowpe tperamukren̂e komo poono.

19 On wara tko n̂ehcowpe n̂examro roro pona tîcetaw so hara, yîmkaino pona, Tpoyino komo yenso tîcetaw on wara n̂ehcowpe hara, tponon komo mohkacowpe, Kaan mîn yaw cetapickachonhîrî komo. Oyamtakponî mko yaw mak ero yipu nînomcowpe, anarî tak tponon komo namrucowpe hara. Cetapickachonhîrî komo yaw rma tohra ro mak n̂ehcowpe so tpoyino komo yakir̂wamaxi.

20 On wara marha n̂ehcowpe Satoke yepamtho komo amn̂e, ekanamurinkara ro mak n̂ehcowpe. Tîhpoci kawnorera marha n̂ehcowpe kaw xa cehso ro. Emapona roro tîhpoci pahcowpe takîhso mak.

21 On wara marha n̂ehcowpe omîn yenîn̂e komo omîn roronî ro pona cewom xe cexitaw so, kawaxiyem yerîhra ro mak n̂ehcowpe.

22 On wara marha n̂ehcowpe, iin̂o waihxapu komo yahsîra ro mak n̂ehcowpe cipici komo me, ciin̂oyemînhîrî etowxapu komo marha ahsîra n̂ehcowpe. Ixaw Yana wosîn makî reha nahsîcowpe cipici komo me, kîîrî pokono pînî ro mak. Anarimaw omîn yenîn̂enho pen cinho nahsîcowpe rma ahsî xe cexitaw so.

23 Oyanan komo panatanmekn̂e me n̂ehcowpe n̂examro. Yîhcamhokano n̂iicowpe owyanî ro mko poko, owyan pîn poko marha. Akîhreno n̂iicowpe kicicme cehsom poko, kir̂wan poko marha.

24 Anarimaw n̂eseyatu na Ixaw Yana komo. Ero wa eseyataw so ceseisom komo yehtopo yentan̂e me n̂ehcowpe, kicicme ehtopo komo yetacin̂e me marha. Takîhso mak cesen̂ekaxmu yehtoponho n̂etacicowpe omtapotachonho yaw roro rma. Esenmetopo ro komo me exitaw panatanmekno n̂iicowpe omtapotachonho yaw roro marha. Kir̂wan me marha oyepokaretopo mko n̂iicowpe cemyawno ro ciitopo mera.

25 On wara marha n̂ehcowpe tîmsom pokono komo, ekicicmara n̂ehcowpe okoputho mîtkoso tmokrî ke so. Wara rma yîîm pen na waihya, yînocwan pen na, yumumuthîrî pen na, emsîthîrî pen na, aknonhîrî pen na, epekanhîrî pen ha na, iin̂omnînhîrî pen mak, noro yipu komo waipuche n̂examro yokoputho yaka rma tocowpe kicicme ceciso ro rma.

26 Ero yinhîrî n̂etakir̂wamacowpe hara kicicme ecixapu. Ero yinhîrî omîn yaka ewomra rma ka n̂ehcowpe 7 kaamo.

27 Ero yinhîrî omîn roronî ro yaka n̂ewomcowpe hara poko cehtopo ro komo ciiso xa hara. Ero kaamo po rma tko tookuthîrî komo nakn̂icowpe kicicme cehtoponhîrî komo yeyamtopo me, wîîkesî. Ero wara wîîkes Ow Aporin komo Kaan.

28 Ow xa wasî tîmsom pokono komo yeken me. Ixaw Yana komo rowon yekamyataw tîmsom pokono komo ya ekamra ro mak ehcoko. Owî mak wasî n̂examro yeken me.

29 Ixaw Yana komo n̂ekîtho xa nasî n̂examro nahrî me. Tînatîrî yeperîrî n̂ekyaxe yîhyaka so owya tîmsom me. Toh komo puntho marha nakn̂ipexe kicicme cehtoponhîrî komo yahrutopo me marha, Kicicme wasî kica, kacho me marha. Ahnoro Ixaw Yana komo n̂ekîtho Aporin komo ya tîmsom me, ero yipu nasî tîmsom pokono komo yîwyan me.

30 Anatîrî komo yeperîrî reha n̂expe tîmsom pokono komo nahrî me. Ahce na tîmî xe awexitaw so owya ero nasî noro yipu komo nahrî me, iyotî komo me marha. Puruma yaposoketaw awya so, yihcirî me aposokaxapu marha tîmcoko tîmsom pokono komo ya. Ero yipu tîmcoko yîwya so apona so mohtome awakronomacho komo, ahyawno komo yakronomacho marha.

31 On wara marha n̂ehcowpe tîmsom pokono komo, wooto yokoputho tonohra ro mak n̂ehcowpe tanmero waixapu, onok na n̂eskatho komo marha. Noro yipu yokoputho tonohra n̂ehcowpe. Ero wa n̂ehcowpe tîmsom pokono komo amn̂e, kekn̂e. Ero wa kekn̂e Kporin komo owya.