Taa, ero yinhîrî takî tî cehtoponhîrî rma tak mewrekn̂e Nabukotonoso, kayaritomo ha. On wara kacho tî mewrekn̂e, On okaritan an̂enîrî komo. Mîk hak yana komo amyamro, mîk hak rowon pono komo amyamro, mîn hak yaro tîmtapotaxmu komo marha amyamro. Roowo poko hakno komo amyamro ha. Esemetanmekîn me awexi xe so wasî.

2 Oyehtoponho yekatîm xe wasî awya so. Kyopono ro me cehtopo n̂enpekn̂e Kaan owya. Keserepokesî ro mak anarme ro mak orirî ke yîwya.

3 Keserepokacho me xa nasî Kaan n̂iritho, cirihnî ciitopo. Kar̂pe xa cehtopo n̂enpesî kîwya so, kyopono ro me cehtopo. Kayaritomo me nasî Noro miya roro yîtîhkan me ro mak. Kepamthîrî komo kayaritomon me marha nas amn̂e, miya roro cesepamkaxmu komo kayaritomon me ha.

4 On wara wîxakn̂e, Nabukotonoso ow ha. Omîn yaw wîxakn̂e kayaritomo mîn yaw. Cerepore wîxakn̂e, tawake marha wîxakn̂e.

5 Ero yimaw tak kwosowakn̂e kopi. Keraswakn̂e on̂enîtho pona. Okaman po oyexitaw anarî menî ro mak ween̂akn̂e kopi owosoto. Anarmerpan poko kesehtînoyakn̂e marha. Ero yipu poko keserepokekn̂e ro mak.

6 Ero ke yuhnari yîhtînon̂e komo tak wan̂ikpekn̂e ahnoro Babiron̂a pono komo. Ero pokono xa mîn menwo, kacho yenta xe wîxakn̂e yîmtapotarî komo.

7 Ero ke mokyatken̂e yaskomo komo, Kawtew komo, yuhnarino yîhtînon̂e komo. Owosotîmtoponho tak wekatîmyakn̂e yîwya so. Camkî tko xatken̂e ero poko. Ero pokono xa mîn meen̂e, kahra rma xatken̂e owya okwe.

8 Ero yinhîrî tak Taniew mokyakn̂e ohyaka, Bewtesasa mîk noro, Ponaro oyehtopo yosokenî rma. Kir̂wanî ro Yekatî ke tîropotawnoyem xa mîk xakn̂e, Kaan Yekatî ke ha. Noro yipu mokyakn̂e. Ero ke yîwya makîrha wekatîmyakn̂e owosotîmtoponho.

9 On wara wîîkekn̂e yîwya, Ai Bewtesasa, yuhnarino yîhtînon̂e komo yenîn̂e xa amoro. Kir̂wanî ro yekatî nai ham aropotaw Kaan yekatî. Esehtînopînî ro yîhtînon̂e rma amoro. Ero ke owî cma re mîhcamhokesî owosotîmtoponho poko. Ero pokono xa mîn meen̂e ha, mîîkesî cma re owya, wîîkekn̂e yîwya.

10 On warai ween̂akn̂e owosoto okaman po oyexitaw, weewe ween̂akn̂e kawno ro mak. Roowo yakwerî yeretaw xakn̂e.

11 Kaw ro mak por̂mamtîkekn̂e kah yaka roro. Cehke xa tak n̂ehtîkekn̂e. Roowo yenatîtopo n̂ixa rma n̂esenpekn̂e kaw xa exirî ke.

12 Taaporem mîn xakn̂e. Mer̂pora marha n̂eperwakn̂e. Miyan komo nahrî me xakn̂e eperîrî. Okno komo yawarpamacho me marha xakn̂e, tarin̂em komo yetahsîtopo me marha. Miyan komo rma mokyatken̂e ero yeperîrî yahso. Tooto komo mokyatken̂e, tooto pîn komo marha.

13 On warai marha tak ween̂akn̂e hara owosoto. Okaman po oyexitaw ween̂akn̂e. Een̂ataw rma owya enîno rin̂e tak nîhcekn̂e kah yai, kir̂wanî ro.

14 Kar̂pe tak nîmtapowakn̂e noro. On wara kekn̂e, Ai, ero amacoko weewe, peremkotocoko marha. Aakacoko marha. Eperîthîrî tak ar̂macoko takpaxi ro. Okno komo marha en̂epecoko apomyawnonhîrî. Tarin̂em komo marha en̂epecoko ero pona etahsîxapunhîrî komo.

15 Iito rma tko n̂expe yîmîtîthîrî, mohkara ehcoko. Kuripara ciicoko yîmîtîthîrî yaan̂apotun me pehu. Anarî marha ciicoko aan̂apotun me hara bronse hara. Ero warai ke aan̂apotuntocoko. Cuupu chew rma n̂expe yîmîtîthîrî. Tukre n̂expe cicakî ken̂e, kah yaino ken̂e. Okno chewno me mak tak noro n̂expe cuupu yahn̂e me mak ha.

16 Tooto mera ciicoko yîropotarî, okno ropotarî me tak ciicoko yîropotarî. Ero wa mak n̂expe 7 cimn̂ipu cenatkaxi ro.

17 Enîno rin̂e komo mtapotarî mîn ha, kir̂wanî ro komo mtapotarî. Ero wa n̂iir̂axe Kaan yehtopo yîhtînomexpotome tak waipîn komo ya, Tooto komo kayaritomon xa Mîk Kaan yîtîhkathîrî xa. Tanme ro mak kayaritomo me ciino rin̂e Mîk Kaan. Kicicitho komo xa rma n̂iir̂asî kayaritomo me. Ero wa Kaan yehtopo yîhtînomexpo xe nasî yîwya so. Ero ke ero wa noro pen n̂iir̂asî, kekn̂e. Ero wa kekn̂e enîno rin̂e, kah yai yîhtoxapu.

18 Ero warai ween̂akn̂e owosoto, kayaritomo owî, Nabukotonoso. Bewtesasa amoro. Ero ke owî cma re mîhcamhokesî ero poko. Camkî thakwa naxe anarî komo okwe omaywen komo. Ero wa kacho pokono xa mîn ha, kahra ro mak naxe owya okwe. Amoro reha mîhtînoyasî Kir̂wanî ro Yekatî exirî ke aropotaw, Kaan yekatî ha, wîîkekn̂e. Ero wa wîîkekn̂e Taniew ya, kekn̂e Nabukotonoso.

19 Ero yinhîrî n̂eserepokekn̂e tak Taniew, Bewtesasa ha. Pahkî n̂he cik ha re n̂eserepokekn̂e. Nahwokekn̂e marha ero yipu yentache. Ero ke on wara tak kekn̂e kayaritomo yîwya, Ai Bewtesasa, eserepokara cma re mas on̂enîtho poko. Ero pokono, kacho poko marha eserepokara esko, kekn̂e. On wara tko n̂eyukyakn̂e Bewtesasa, Apa, aaxatî pîn komo pokono me makî exi xe cma re wasî an̂enîthîrî.

20 On warai xa menwo, kekn̂e tak Taniew, weewe menwo. Por̂mamtîka tak kah yaka roro. Cehke ro mak tak n̂ehtîka. Roowo yenatîtopo n̂ixa rma tak n̂esenpekn̂e kaw xa exirî ke.

21 Taaporem xa mîn n̂eexi, mer̂pora n̂eexi eperîrî miyan komo nahrî me rma. Okno komo yawarpamacho me n̂eexi. Tarin̂em komo yetahsîtopo me marha n̂eexi.

22 Apokono rma mîn apa, weewe. Cekaiporesom me xa tak mas amoro. Kar̂pe marha mehtîkai yukurumîkno me xa tak. Kah yaka rorono wara nasî yukurumîkno me awehtopo. Roowo mapitaka rorono komo rma naxe amaywen komo me.

23 Ero yinhîrî tak tooto komo yenîn̂e menwo apa, kir̂wanî ro, kah yai tîhtosom. On wara nîîka noro, Weewetho amacoko, yîhkototîkacoko marha. Yîmîtîthîrî tko n̂expe iito, yimicin marha n̂expe yuhnaw. Yîmîtîthîrî tak aan̂apotuntocoko pehu ke, bronse ke marha. Ero wa n̂expe cuupu chewno me mak. Tukre mak n̂expe cicakî ken̂e, kah yaino ken̂e. Okno komo chewno me makî tak n̂expe cuupu yahn̂e me. Ero wa ka n̂expe 7 cimn̂ipu cenatkaxi ro, nîîka. Ero wa nîîka enîno rin̂e an̂entarî me.

24 On warai pokono mîn apa, on wara xa nasî Kaanî mtapotarî apokono, yîtîhkathîrî mtapotarî ha,

25 Ewto poi takî tî awen̂epetu amn̂e. Okno chewno me mak takî tî mai okwe. Cuupu ke makî tî anahmetu paaka wara. Tukre takî tî mai cicakî ke kah yaino ke. 7 cimn̂ipu tî ero wa mai. Apanatanmecho rma mîn ero wa awîr̂a. Tooto kayaritomon komo kayaritomon xa Mîk Kaan, yîtîhkathîrî xa. Tanme ro mak men̂ekesî kayaritomo me tîn̂irirî. Ero wa cehtopo yîhtînomexpotome awya ero wa awemetanmekyasî.

26 Weewe mîtîtho n̂expe mohkara rma, kacho rma tko menta hara. On wara kacho yîhtînomexpotopo mîn ero hara, kayaritomo me xa hara tî mai amn̂e, Kah yawno xa nasî kayaritomo me, kan̂e me awexitaw tak ha.

27 Ero ke on wara cma re wîîkes awya apa, kpanatanmekyasî cma ha re ka. Kir̂wan̂he cma re mencesî omtapotarî. Kicicme awehtoponhîrî tak ahsîpînkakî. Kir̂wan̂he mak tak esko. Kicicme awehtoponhîrî ahsîpînkakî. Emyawnomnî komo pînîn yawno me tak esko. Ero wa awexitaw pahkî n̂he tak na nai emetanmekîn me awehtopo, kekn̂e. Ero wa kekn̂e Bewtesasa owya, kekn̂e. Ero wa kekn̂e Nabukotonoso.

28 Taa, ero yinhîrî takî tî ero wa kacho yaw roro rma xakn̂e kayaritomo, Nabukotonoso.

29 12 nuun̂i exiche Babiron̂a po takî tî noro xakn̂e kayaritomo mîn meretwo. N̂etar̂akn̂e tî iito.

30 On wara tî kekn̂e ero yimaw, Okre, okre, porinî ro mak on ewto Babiron̂a. On̂irpotho rma on kayaritomo yewton me. Kar̂pe oyexirî ke xa wirpoi. Kayaritomo imo me xa oyehtopo yenpotome wirpoi okre, kekn̂e tî.

31 Ero wa ketaw rma kah yawno mtapotarî takî tî n̂esencekn̂e on wara kacho, Ai kayaritomo, Nabukotonoso amoro, on wara tak men kesî Kaan apoko, kayaritomo mera tak masî oroto, kesî.

32 Ewto poi tak awen̂epexe. Okno chewno me mak tak masî. Cuupu ke mak anahmexe paaka wara. Ero wa masî 7 cimn̂ipu. Ero yimaw tak on wara mîîke hara, Tooto komo kayaritomonî ro mak Mîk Kaan, yîtîhkathîrî Kaan ha. Tanme ro mak kayaritomo ciin̂e ro Mîk ha, mîîkesî tak ero yimaw, kekn̂e tî yîwya.

33 Ero ke ero yimaw rma takî tî Kaanî mtapotarî yaw roro tak xakn̂e Nabukotonoso pen. Ewto poi takî tî noro n̂en̂epetken̂e thakwa maywenînhîrî komo rma. Cuupu takî tî nahyakn̂e paaka wara ro mak okwe. Tukre tak xakn̂e yupun cicakî ken̂e, kah yaino ken̂e. Yupun tak nîhpowakn̂e yaimo poci wara. Amoxoxon tak xakn̂e tarin̂em yamoxoxon wara. Ero wa xakn̂e Nabukotonoso pen okwe.

34 Taa, oyesemetanmetoponho yenatîche tak on wara tak wîxakn̂e ow ha, Nabukotonoso, kahsî tak ween̂akn̂e. Takîhso cesehtînosom me wîxakn̂e hara. Kahwowakn̂e tak Kaan poko, yîtîhkathîrî poko. Kir̂wanî ro xa Mîk ha, takîhso kiin̂e Mîk, waipînî ro marha, wîîkekn̂e. Ero wa nasî Noro, kayaritomo me nasî etowîn me ro mak. Miya roro ehretawnomaxapu komo kayaritomon me nasî.

35 Noro pîntho me mak keen̂atu so kîwyam reha, roowo ponotho komo. Tanme ro marha kah yawno komo n̂iir̂asî karitî komo. Tanme ro xa marha kiir̂axe so roowo pono kom hara. Noro yamorî yahsîra ro mak wa tasî yîtîtmamnotome. Ahce wa wa miirî ke? kahra ro mak wa tasî yîwya Kaan ya.

36 Ero yimaw tak takîhso cesehtînosom me wîxakn̂e hara. Kayaritomo me tak kesenpekn̂e hara. Kayaritomo ponon wamruyakn̂e hara. Tmaywei wîxakn̂e xa hara. Omaywen komo tak mokyatken̂e xa hara omtapotarî yentaxi. Kayaritomo me tak wîxakn̂e xa hara oyehtoponho yopono me xa tak ha. Ero wa wîxakn̂e.

37 Ero ke on wara tak was ow, Nabukotonoso, kah yawno komo kayaritomon poko kahwowasî. Kyopono ro xa Mîk ha, wîîkesî tak. Yaaro ciino rin̂e Mîk ha, kehtoponhîrî komo yecenarî xa kepeman̂e marha. Cehcoyoponkaxmu komo n̂iir̂asî noro pîntho me. Noro yipu Mîk Kaan, kekn̂e tî. Ero wa tî kekn̂e Nabukotonoso.