Taa, Bewsasa yehtoponho tan wekatîmyas hara awya so. Kayaritomo mîk xakn̂e Bewsasa. Ero wara cexiche pahkî wooku tak n̂iir̂akn̂e. Tmaywen komo tî nan̂ikyakn̂e antomano rin̂e komo. Mer̂pono pîn tî nan̂ikyakn̂e, 1.000. Wooku tî n̂eer̂akn̂e kayaritomo an̂ihxapu komo wero ro. Ero wa tî xakn̂e Bewsasa.

2 Wooku yeer̂ataw kayaritomo ya on wara takî tî kekn̂e noro tanton komo ya, Pahxa on wara xakn̂e pooco pen, Nabukotonoso pen, parakweci komo n̂ekyakn̂e Kaan mîn yawnonho komo, Xerusaren pono yawnonho ha. Ooru rma mîn parakweci, prata reha mîn xakn̂e anarî mko. Ero mko ehtatko kwokru yeetopo. Ow weer̂as ero yai, antomano rin̂e komo, opici komo, opici wara cehsom komo marha. Ero wa ceer̂axe, kekn̂e tî.

3 Ero ke parakweci komo takî tî n̂ekyatken̂e ooru ciixapu. Kaan mîn yawnonho mîn xakn̂e, Xerusaren pono yawnonho ha. Ero ke ero yai takî tî wooku n̂eer̂atken̂e. Kayaritomo, antomano rin̂e komo, yipici komo, yipici wara cehsom komo, ero warai komo tî wok n̂eer̂atken̂e ero mko yai.

4 Wok yeer̂ataw ponaro cehtopo komo poko takî tî nahwowatken̂e kica. Ooru ciixapu, prata ciixapu, bronse ciixapu, pehu ciixapu, weewe enporixapu, toopu enporixapu, ero warai poko nahwowatken̂e kica ponaro cehtopo komo poko.

5 Ero yimaw rma takî tî tooto yamoyaran n̂esenpekn̂e kopi. Kayaritomo mîn wacan poko tî mewrekn̂e, weeyu mkaino poko, yîspomaxapu poko. Kayaritomo wero ro rma tî mewrekn̂e.

6 Ero ke nahwokekn̂e takî tî kayaritomo pen, n̂eserepokekn̂e ro mak tak, kar̂pera tak n̂ehtîkekn̂e noro petî, osokmuru marha tî n̂esetapekn̂e. Ero wa tî xakn̂e kayaritomo tooto yamoyaran yenîrî ke.

7 Ero ke xir̂ko yîhtînon̂e komo takî tî nan̂ikyakn̂e kayaritomo, Kawtew komo marha, yaskomo komo marha, ero warai komo. Mokuche so on wara tî kekn̂e yîwya so, Onoke xa tooto yamoyaran nmewretho nîmtapotare ha? On wara tak wiir̂asî ero yîmtapotaren̂enho, Ero pokono mîn, kan̂enho marha, tîswayem ke tak noro pononmesî, noro warî tak wîmyasî ooru, kopenato me n̂he tak noro wiir̂asî 3-înhîrî me tak ha, kekn̂e tî.

8 Ero ke mohtîketken̂e takî kayaritomo maywen komo, yuhnari yîhtînon̂e kom ha. Mewrexapu tko tî yîmtapotarera thakwa xatken̂e okwe. Camkî makî tî xatken̂e okwe. On warai pokono xa mîn ha, kahra marha xatken̂e camkî.

9 Ero ke n̂eserepoketîkekn̂e xa takî tî kayaritomo, nahwokekn̂e marha tî. Ahce wa tat hara okwe, ketken̂e marha tî antomano rin̂e kom ha.

10 Ero yimaw takî tî kayaritomo yon tak mokyakn̂e iina, amtakpo yaka, eseresmacho komo yaka. Kayaritomo mtapotarî tî n̂encekn̂e, antomano rin̂e komo mtapotarî marha. Ero ke mokyakn̂e. On wara tî kekn̂e noro kayaritomo ya, Ai kayaritomo, eroromero awexi xe wasî waipîn me. Eserepokara esko, ahwokara marha esko.

11 Tooto nasî tan arowon po Kaan yekatî ke tîropotawnoyem, Kir̂wanî ro Yekatî ke ha. Pahxa takîhso noro n̂een̂akn̂e aamo pen. Yuhnari yîhtînon̂e me marha n̂een̂akn̂e. Kaan komo wara rma tî n̂esehtînoyakn̂e takîhso. Ero ke on wara tak tî xakn̂e aporin pen, Nabukotonoso pen, noro poko, yaskomo komo yenîn̂e me takî tî n̂iir̂akn̂e noro, yuhnari yîhtînon̂e komo yenîn̂e me marha, Kawtew komo yenîn̂e me marha.

12 Ero wa noro n̂iir̂akn̂e aporin pen Kir̂wanî ro Yekatî exirî ke yîropotaw. Mîn hak yîhtînon̂e me xakn̂e, yuhnari yîhtînon̂e me, kwosotîmtoponhîrî yîhtînon̂e me, kewkukman̂e yîhtînon̂e me marha. Ero wa tî xakn̂e Taniew, Bewtesasa me osohtoxapu ha, kayaritomonhîrî pen nosohtotho ha. Ero ke noro an̂ikpoko, Taniew ha. Noro tak ahcamhokesî mîn poko mewrexapu poko, kekn̂e tî. Ero wa tî kekn̂e kayaritomo yon kayaritomo ya.

13 Ero ke Taniew tak n̂ekyatken̂e kayaritomo yaka. On wara tî kekn̂e kayaritomo yîwya, Ai Taniew, Xuta yepamtho tî amoro mehxa ehxapu ahsîxapu me. N̂examro pen n̂ekyakn̂e oporin pen n̂examro poyino rma na amoro? kekn̂e.

14 Awehtopo tak wenta. Kaan Yekatî tî nai aropotaw. Ero ke takîhso yîhtînon̂e me tî mai, yuhnari yîhtînon̂e me weeyu wara ro makî. Ahce na poko camkîra ro makî tî mai.

15 Oona mohcow oroto takîhsom komo, yaskomo komo marha. Ero cma re mîmtapotarexe mîîmo wacan pore mewrexapu, wîîka yîwya so. Yîmtapotareche on wara marha cma re mîîkexe, Ero wa kacho xa mîn ha, mîîkexe cma re owya, wîîka yîwya so. Camkî tko tî n̂ehcow ero poko. Ahce pokono na mîn ha, kacow mak okwe.

16 Ero yimaw tak awehtopo wenta. Ero wa kacho yîhtînomexpotopo xa mîn ha, kan̂e ro mîk ha, camkîno yentamexpon̂e xa, kacho wenta apoko. Ero ke mînî cma re mîmtapotaresî mewrexapu, Ero wa kacho mîn ha, mîîkesî marha cma re. Ero wa kache awya tîcamnayem ke tak kpononmesî. Kwahcesî marha tak ooru ke. Kayaritomo me takî kiir̂asî anarî komo yopono me. 3-nhîrî me tak mas amoro kopenato me xa, kekn̂e yîwya. Ero wa kekn̂e kayaritomo Taniew ya.

17 On wara tko n̂eyukyakn̂e Taniew, Apa, ahyaw rma n̂expe owya tîmsom. Anarî ya mak na mîmya ero, mewrexapu yîmtapotaretoponho yepetho. Wara rma wîmtapotaresî an̂entarî me. Ero wa kacho mîn ha, wîîkesî marha awya.

18 On wara tko ka wîîkes awya apa, on wara Kaan n̂iir̂akn̂e aporin pen, Nabukotonoso pen, kayaritomo me n̂iir̂akn̂e, kayaritomo me xa anarî komo yopono me xa. Cemyawnoi marha n̂iir̂akn̂e. Ero warai me aporin pen n̂iir̂akn̂e Kaan.

19 Kayaritomo me xa cirirî ke Kaan ya yukurumîkno me xa noro n̂een̂atken̂e tooto komo ahnoro, tatanatken̂e mak yîhyaka tmokyataw so. Ero wa noro n̂een̂atken̂e anarî yana komo, mîk hak rowon pono komo, mîn hak yaro tîmtapotaxmu komo marha. Tanme ro mak nîhtînoyakn̂e noro tînwaikarî komo, tanme ro xa marha nîhtînoyakn̂e waihkara cehsom kom hara. Tanme ro mak nîhtînoyakn̂e antomano rin̂e me tîn̂irirî komo, tanme ro marha nîhtînoyakn̂e antomano rin̂enho towtopo hara.

20 Ero yinhîrî tak cehtopo poko rma nahwowakn̂e kica. Ow xa n̂e ro takîhsom anarî komo yopo, kekn̂e ro mak ceipamtome yîropotarî. Ero yimaw tak kayaritomo mera tak n̂iir̂atken̂e hara maywenînhîrî komo. Ewetîn me ro mak tak n̂iir̂atken̂e.

21 Ewto poi tak noro pen n̂en̂epetken̂e okwe. Anarme tak xakn̂e yîropotarî, okno ropotarî wara mak. Buhu chew mak n̂enmayakn̂e okno pîn chew. Cuupu tak nahyakn̂e paaka wara. Tukre tak xakn̂e cicakî ken̂e. Ero wa noro pen n̂iir̂akn̂e Kaan pahkî, kayaritomo me xa cehtopo yîhtînomexpotome tak yîwya. Kaan mak xa men̂ekesî kayaritomo me ciisom komo, tanme ro mak nîhtînoyasî Noro tîn̂irirî komo. Ero wa nasî Kaan yîtîhkathîrî xa. Ero wa yîhtînomexpotome tak aporin pen ya ero wara noro pen n̂iir̂akn̂e. Ero wa aporin pen n̂iir̂akn̂e Kaan.

22 Taa, noro parînho tak amoro, Bewsasa. Ero wa aporin pen yehtoponho rma re mencekn̂e. Kicicitho ow ha kica, kahra ro makî tko mîxakn̂e okwe.

23 Kporin komo yanwekn̂e me xa matko mesehtînoyakn̂e kica, kah yawno yanwekn̂e me. Kyopono ro xa ow ham, mîîkekn̂e kica. Kaan mîn yawnonho mekpo kica parakweci komo. Ero yai wooku meecow ham, amoro, antomano rin̂e komo, apici komo, apici wara cehsom komo, ero warai komo meecow Kporin komo mîn yawnonho yai parakweci yai. Eer̂ataw awya so mahwotacow anarî ro poko, ponaro awehtopo komo poko mak kica. Prata ciixapu, ooru ciixapu, bronse ciixapu, pehu ciixapu, weewe enporixapu, toopu enporixapu, ero warai ciixapu poko mahwotacow okwe. Kenîn̂e pîn komo poko ro mak mahwotacow kica, kentan̂e pîn komo poko ro mak, ahce na yîhtînon̂e pîn poko ha. Kaanî ro yanme xa mesehsasî. Ahce wa so na awexitaw ero wa awin̂e rma Mîk ha. Noro yipu poko tko ahwotara ro mak mehcow kica.

24 Ero ke tooto yamoyaran tak n̂enpekn̂e Kaan awya tapota mewren̂e. On wara kacho xa mîn mewrexapu,

25 On warai mîn tapota mewrexapu, MEN̂E MEN̂E TEKEW UPAHSIN.

26 On wara kacho mîn, MEN̂E, kacho, kayaritomo me awehtopo tak nukuknometîkekn̂e Kaan. N̂enatî tak ha kayaritomo me awehtoponhîrî, kacho.

27 On wara kacho mîn hara, TEKEW, kacho, kawsîn yukuknomacho ke tak awehtoponhîrî nukuknomai Kaan. Awsîmnî me mak awen̂e okwe, kacho.

28 On wara kacho mîn hara, PERES, kacho, tîraconkaxi tak naxe amaywenînhîrî komo. Metu komo tak naxe kayaritomo me oroto, Pehsa komo marha, kacho. Ero wa kacho xa mîn mewrexapu, kekn̂e. Ero wa kekn̂e Taniew kayaritomo ya.

29 Ero wa kacho entache tmaywen komo tak nantomekn̂e Bewsasa Taniew pononmacho poko. Ero ke tîcamnayem ke pononmetken̂e. Warî marha n̂iir̂atken̂e yîpîmtari. Kayaritomo mtapotarî takî tî n̂ekatîmyatken̂e mîk hak ya. Kayaritomo me xa tak nasî Taniew 3-înhîrî me, kacho nakpetken̂e. Ero wa Taniew n̂iir̂atken̂e kayaritomo yanme.

30 Taa, ero po rma tko Bewsasa pen waparî tak mokyatken̂e kosope. Noro pen tak waihketken̂e okwe, Kawtew komo kayaritomon pen.

31 Ero yinhîrî Tar̂u tak xakn̂e kayaritomo me hara Bewsasa retawno me. Metu yepamtho mîk xakn̂e Taar̂u. 62 cimn̂ipu tî xakn̂e noro yewrutoponho kayaritomo me ecir̂ataw. Ero wa tî xakn̂e.