Taa, on wara tak ciino n̂iir̂akn̂e kayaritomo, Tar̂u, tmaywen yenîn̂e komo tak n̂iir̂akn̂e, miyan komo yenîn̂e rma. Yaake n̂iir̂akn̂e ero warai me, 120.

2 N̂examro yenîn̂e komo xa hara n̂iir̂akn̂e enîn̂e komo yenîn̂e me. 3 makî tî ero warai me n̂iir̂akn̂e. Taniew, 2 xa hara tî n̂iir̂akn̂e enîno rin̂e komo yenîn̂e me. Ero warai me tî n̂examro n̂iir̂akn̂e kayaritomo yemyawno yehcamnopîra ehtome.

3 On wara tko xakn̂e Taniew, takîhso xa xakn̂e anarî komo yopo, enîno rin̂e komo yopo. Kir̂wanî ro xakn̂e noro ropotaw, ekatî. Ero ke ahnoro tmaywen komo yenîn̂e me ciri xe tî xakn̂e kayaritomo, miyan komo yenîn̂e me rma.

4 Ero ke tak on wara tî xatken̂e anarî komo kayaritomo maywen yenîn̂e komo, Taniew ponanîmto xe tî xatken̂e kica. Ero wa tî xatken̂e kica Taniew poko. Kicicme ehtopo tko tî enîhra ro mak xatken̂e, wara mak cemyawno ciitopo marha tî enîhra xatken̂e. Takîhso mak cemyawno n̂iir̂akn̂e roro, wara mak cirihra ro mak xakn̂e. Kicicme ehtopo ken̂ehra marha xakn̂e. Ero wa tî xakn̂e Taniew okre.

5 Ero yinhîrî on wara takî tî ketken̂e Taniew xatî pîn komo, Kicicme Taniew yehtopo yenîhra ro mak taxe, wara mak cemyawno ciitopo marha enîhra taxe. Ponaro cehtopo ponarono xa tko mîk ha. Ero wa ehtopo poko mak na Taniew tîtponanîmcetu, ketken̂e tî. Ero wa tî n̂esencetken̂e.

6 Ero ke kopenato komo takî tî cetken̂e kayaritomo yaka, ahce na yenîn̂e komo marha cetken̂e. On wara tî ketken̂e yîwya, Ai apa, Tar̂u, ahyaka amna moko. Waipîn me ro mak awexi xe nas amna.

7 On wara cma re amna n̂esentai ahnoro. Amaywen komo kopenato komo, n̂examro yenîn̂e kom hara, antomano rin̂e komo marha, akîhreno rin̂e komo marha, ahnoro amna n̂esentai onî yipu poko, on wara cma re mîmewresî amaywen komo n̂ewetîrî me, mîk hakî kaan komo yakro ka yîmtapotara ehcoko ahce na xe awehtopo komo poko. Tooto yakro marha ka yîmtapotara ehcoko ero poko. Kayaritomo yakro mak amtapotacoko yiixe awehtopo komo poko. 30 kaamo ero wa ehcoko. Anarî yakro amtapowataw so yiixe awehtopo komo poko awar̂mexe so kr̂a men reaw yewtarî yaka, kacho cma re mîmewresî.

8 Ero wa kacho cma re mîmewres Apa etowîn me ro mak. On wara nasî kehtopo ro komo, Metu komo yehtopo, Pehsa komo yehtopo marha. Cewetîsom mewretaw kayaritomo ya, ero yapomyaw tosotî mewretaw marha, towîhnî me ro mak nasî, ketken̂e tî. Ero wa tî ketken̂e enîno rin̂e komo kayaritomo ya.

9 Ero ke ero wa kacho rma takî tî mewrekn̂e kayaritomo, Tar̂u ha. Tmaywen komo n̂ewetîrî me mewrekn̂e.

10 Taa, ero wa kacho mewretopo tî n̂encekn̂e Taniew. Wara rma tîmîn yaka cekn̂e xa hara. Tosokmuru po n̂eremekn̂e 3 ro ero kaamo po. Ero wa xakn̂e roro ahnoro kaamo po roro. Ponaro cehtopo yakro nîmtapowakn̂e yiixe cehtopo poko, Noro poko marha nahwowakn̂e. Pahxa cehtoponhîrî yaw roro rma xakn̂e etowra rma. Tîmîn yaw xakn̂e eporeno amtakpo yaw. Ahrura tko xakn̂e ewkanapan Xerusaren n̂ixan. Ero wara rma nîmtapowakn̂e Kaan yakro.

11 Ero wa yîmtapowataw Taniew xatî pîn komo takî tî mokyatken̂e yîmîn mîtkoso. Iina re n̂esenmekyatken̂e. Tmokuche so Tporin yakro yîmtapotarî rma tî n̂encetken̂e. Yiixe cehtopo poko nîmtapowakn̂e rma yîn̂entarî me so.

12 Ero ke kayaritomo yaka takî tî cetken̂e hara. On wara tî ketken̂e yîwya, Ai apa, mewrera ma mehxe ke amaywen komo n̂ewetîrî on wara kacho, Kayaritomo yakro makî ka nasî tîmtapotapore yiixe awehtopo komo poko. Ero wa tîmtapotapore nasî 30 kaamo. Anarî yakro amtapowataw so yiixe awehtopo komo poko kar̂mexe so kr̂a men reaw yewtarî yaka, kacho mewrera ma mehxe? ketken̂e yîwya. Nhnk, ow mewrei rma ero wara kacho. Towîhnî me ro mak wîmewrei Metu komo yehtopo yaw roro, Pehsa komo yehtopo yaw roro marha, kekn̂e tî kayaritomo.

13 Ero ke on wara takî tî ketken̂e kayaritomo ya, On wara kes amna awya, aponarora ro mak nai ham okwe Taniew, Xuta yepamtho, tahsîso ehxapu ha. Amtapotachonhîrî ponarora marha nasî. Ponaro cehtopo yakro nîmtapowasî rma 3 ro. Ahnoro kaamo po roro nîmtapowasî, ketken̂e tî.

14 Ero wa entache n̂eserepokekn̂e xa takî tî kayaritomo tpoko rma. Ahce wa xa Taniew wukrunpe ar̂mara rma oyehtome kamara imo cheka? kekn̂e cma ha tî re tîhnaw. Ero poko n̂esehtînoyakn̂e kokmamso ro.

15 Ero yinhîrî kayaritomo yaka tî cetken̂e xa hara enîno rin̂e komo yaake. On wara tî ketken̂e yîwya, Ai apa, kehtopo ro komo tîhtînopore nasî, Metu komo yehtopo, Pehsa komo yehtopo marha. Cewetîsom mewreche kayaritomo ya towîhnî me ro mak tak nasî, kan̂e ro thakwa kîwyam, ketken̂e. Ero wa tî ketken̂e kayaritomo ya.

16 Ero ke Taniew pen takî tî n̂ekpekn̂e kayaritomo, nar̂mapekn̂e marha reaw yewtarî yaka. Ar̂marî me tko on wara kekn̂e kayaritomo yîwya, Ponaro awehtopo pokono ro amoro. Ero ke Noro rma wa akurunpesî, kekn̂e. Ero wa kekn̂e kayaritomo yîwya.

17 Ero yinhîrî tak Taniew pen yar̂mache reaw yewtarî takî tî nahruyatken̂e toh ke porin ke. Ero yahkoromacho takî tî mewrekn̂e kayaritomo tamoyeknarî ke, tmaywen komo yamoyeknarî ke marha. Ero wa mewrekn̂e Taniew pen yahrunkara ro mak ehtome so tooto komo.

18 Ero yinhîrî tîmîn yaka takî tî cekn̂e hara kayaritomo. Eseresmara ro makî tî n̂enmayakn̂e. Tahworen̂e komo tî an̂ikîra ro mak tî xakn̂e. Yîwînkîra marha tî xakn̂e.

19 Ero yinhîrî takî tî tîmîn yai n̂epatakekn̂e kayaritomo enmarî yakro ro rma. Reaw yewtarî yaka tî cekn̂e cerekan̂e.

20 Iito cexitaw tak nîmtapowakn̂e Taniew yakro. On wara kekn̂e yîwya, Ai Tan̂iew, Kaan maywen xa amoro, waipînî ro maywen. Ponaro awehtopo na akurunpew reaw ya aweskapora ha? kekn̂e tak yîwya. Tîwrataro tî kekn̂e.

21 Ero ke on wara tak Taniew n̂eyukyakn̂e, Ai apa, waipîn me ro mak awexi xe wasî.

22 Tanton tak n̂en̂epew Kaan oona, ancu. Ponaro oyehtopo Mîk Kaan. Reaw nîmtayahru oyeskara ro mak ehtome. Ero wara okurunpew kicicime exihnî me oyexirî ke yîwya. Apoko marha kicicme exihra ro mak wîxakn̂e, kekn̂e. Ero wa kekn̂e Taniew kayaritomo ya.

23 Yîmtapotarî yencetaw tawake ro mak takî tî xakn̂e Taar̂u. Ero ke tmaywen komo tî nantomekn̂e Taniew yanîmrî poko, reaw yewtarî yai. Ero ke nanîmyatken̂e tak. Yixwiy kacho exihra ro mak xakn̂e ponaro cehtopo pona enîrî ke mak yîwya. Ero wa xakn̂e.

24 Ero yinhîrî tak Taniew ponanîmton̂enho komo n̂ekpekn̂e hara kayaritomo. N̂examro pen makîrha takî tî nar̂mapekn̂e reaw yewtarî yaka. Yîmxîkîthîrî komo marha tî nar̂mapekn̂e, yihcinhîrî pen komo marha tî. N̂examro pen tî nahsîyatken̂e reaw komo. Iyochîrî komo tî namkukyakn̂e yohno ro mak, ewtarî maxixin yaka tohra rma exitaw.

25 Ero yinhîrî takî tî tmaywen komo panatanmetopo mewrekn̂e hara kayaritomo, Tar̂u. Mîk hak yana komo n̂enîrî tî mîn mewrekn̂e, mîk hak rowon pono komo n̂enîrî marha, mîn hak yaro tîmtapotaxmu komo n̂enîrî marha. On wara kacho tî mewrekn̂e, Omaywen komo, on wara wîîkes awya so, esemetanmekîn me awexi xe so wasî.

26 On wara kacho wîmewresî apanatanmetopo komo me rma. Twerî men ehcoko ponaro Taniew yehtopo poko. Twerî xa ehcoko Noro poko tatanîmso ro. Yukurumîkno me xa Noro encoko. Waipînî ro Mîkî, miya rorono. Kayaritomo xa Mîk Noro, ar̂manî ro. Miya roro kayaritomo me nasî towîhnî me ro mak.

27 Kukurunpen̂e Mîk, kown̂e komo marha kicicitho yai. Kaan me xa cehtopo n̂enpesî kîwya so. Cirihnî n̂enpesî roowo po, kah yaw marha. Taniew nukurunpekn̂e Noro, reaw ya eskapora n̂eexi. Noro poko twerî men ehcoko, wîîkes awya so, kacho mewrekn̂e. Ero wa kacho mewrekn̂e kayaritomo.

28 Ero yinhîrî ehn̂an me xakn̂e Taniew Tar̂u exitaw ro kayaritomo me, Siru exitaw hara kayaritomo me. Ero wicakî pahkî xakn̂e Taniew ehn̂an me.