Taa, on wara xakn̂e Taniew Bewsasa exitaw rma ka kayaritomo me. Cewn̂e cimn̂ipu ka xakn̂e kayaritomo me noro yehtoponho. Ero yimaw wosowakn̂e tak Taniew tîwînîkyataw. Anarmerpan n̂een̂akn̂e twosoto. Ero ke mewrekn̂e twosotîmtoponhîrî.

2 On wara kekn̂e Taniew, Kosope on warai ween̂akn̂e owosoto, mehxarpa mokyatken̂e ocowo komo, nohce n̂ixa mokyakn̂e, suu n̂ixa, resce n̂ixa, oesce n̂ixa. Esemtaka so mokyakn̂e ocowo mko kar̂pe. Tuuna imo tak n̂ewcokocokomekn̂e.

3 Ero yimaw keskan̂e komo tak paketken̂e tuuna imo kwai. 4 mak paketken̂e. Anarmerpa so xatken̂e.

4 Yihcirî me pakaxapu xakn̂e reaw wara. Tapoke tko xakn̂e, yaimo yapoke. Pahkî n̂he ka ween̂akn̂e. Ero yinhîrî tak apothîrî mohketken̂e. Piiri tak nawomyakn̂e tooto wara. Asakî xakn̂e yîhtarî. Tooto ropotarî marha n̂ecir̂akn̂e yupun yaka.

5 Ero yinhîrî ponan̂e rma tak ween̂akn̂e uhsu warai hara. Ehcopo ro xakn̂e aporî, yîhrepu marha. Yîmtaw xakn̂e wooto yawci yocho 3 mak. Ero yipu n̂eskekn̂e. On wara tak ketken̂e iitono komo noro ya, Awomko tak ha, mer̂pora tak tonoko awotî, ketken̂e.

6 Ero yinhîrî tuuna imo wece ween̂akn̂e hara. Anarî tak pakekn̂e hara rewpahtu warai. Tarin̂em yapoke ween̂akn̂e noro. 4 xakn̂e aporî yîmkaw. 4 marha xakn̂e yîhtîpîrî. Noro tak n̂ecir̂akn̂e kayaritomo me.

7 Ero yinhîrî owosoto ween̂akn̂e xa hara kosope. Ero yimaw anarî pakekn̂e hara keskan̂e, 4-nhîrî tak. Anarmenî ro mak mîk ween̂akn̂e. Eraspetono ro mak mîk xakn̂e kopi, kar̂pe ro mak. Porin me xakn̂e iyorî, pehu me cehsom. Tonono n̂iir̂akn̂e. Tînahsîthîrî narixkekn̂e oko. Akwenhîrî tak napikyakn̂em, knuhknu kekn̂e. Anarme xakn̂e noro, tuuna imo kwai pakaxapunhîrî komo warahra ro mak. Tmeretke marha xakn̂e, 10 xakn̂e meretîrî.

8 Noro meretîrî ponaro ka wîxakn̂e. Een̂ataw rma owya yîchew tak n̂epatakekn̂e anarî hara noro meretîrî hara, wahrai tak. Ero yanme 3 tak n̂emohkekn̂e meretîthîrî, keskan̂e meretîtho. Meretîthîrî micin meero n̂emohkekn̂e. Cewkem mîk xakn̂e meretîrî, mahyaw pakaxapu. Tooto yewke rma xakn̂e. Tîmtake marha xakn̂e. Tîmtarî ke nîmtapowakn̂e cehcoyoponkacho poko kica. Noro yipu komo ween̂akn̂e keskan̂e komo.

9 Ero yinhîrî tuuna imo kwai pakaxapu komo rma ka ween̂akn̂e. Ero yimaw takî kayaritomo komo yapon n̂iir̂atken̂e yaake. Ero yinhîrî Poritomo me xa cehsom tak n̂eremekn̂e iina, pahxanî ro. Tumutwe xa xakn̂e noro ponon, yukwarî wara ro mak. Yîhpoci marha xakn̂e oper̂a poci wara. Wehto me tko tî xakn̂e apon. Wehto me marha xakn̂e noro yapon tarî, tamnon̂em.

10 Noro yamrinai cekn̂e wehto mer̂pono pîn, eepu wicakî ro makî. Mer̂pora ro mak xatken̂e anton komo, 1 mir̂aw yakenon. Yaake mir̂aw komo xatken̂e yîmtapotarî yentan̂e komo. Ero yinhîrî en̂ekano rin̂e komo tak n̂eremetken̂e hara. Ero yimaw karita komo tak n̂een̂atken̂e.

11 Taa, keskan̂e rma ka ween̂akn̂e, 4-nhîrî. Paaka meretîrî warai mtapotarî wencekn̂e. Cehcoyoponkaxmu me nîmtapowakn̂e kica. Pahkî n̂he ween̂akn̂e. Ero yimaw tak keskan̂e pen tak waihketken̂e. Yupunthîrî nakpocatken̂e, wehto ywaka tak nar̂metken̂e, rehrere kan̂e ywaka xa.

12 Waipîra rma ka xatken̂e anarî komo, keskan̂e komo. Kayaritomo mera makî ka n̂iir̂atken̂e. Waihkara rma ka xatken̂e pahkî n̂he ha re.

13 On warai marha ween̂akn̂e owosoto kosope, tooto me ewruxapu warai tak ween̂akn̂e. Kaapu smun chew nîhcekn̂e. Poritomo me xa cehsom yaka tak cekn̂e. Noro yamrinaka tak tooto me ewruxapu naar̂atken̂e iitono komo.

14 Ero yimaw tak kayaritomo me Noro n̂iir̂akn̂e Poritomo me xa cehsom, cekaiporesom me marha n̂iir̂akn̂e, yukurumîkno me marha. Noro poko tak nahwowaxe amn̂e mîk hak yana komo, mîk hak rowon pono komo, mîn hak yaro tîmtapotaxmu komo maraha. Kayaritomo me tak nasî noro miya roro towîhnî me ro mak. Noro waparî komo exihra ro mak naxe. Noro yipu ween̂akn̂e owosoto.

15-16 Ero ke ahwora ro mak wîxakn̂e, keserepokekn̂e on̂enîtho poko. Ero ke iitono yaka tak kîwcekn̂e. On wara wîîkekn̂e yîwya, Onoke pokono mîkyam wenwo keskan̂e komo warai? wîîkekn̂e. Ero ke on̂enîtho yîhtînomexpotopo n̂ekatîmyakn̂e owya.

17 On wara kekn̂e owya, 4 menwo keskan̂e komo, porin komo. Kayaritomo komo kuknon mîkyam n̂ehcow. 4 tak naxe amn̂e roowo pono kayaritomon komo. Roowo pono komo chewnonho me tak n̂esenpexe n̂examro.

18 Kaan nakir̂wamatho komo tko n̂ecir̂axe kayaritomo me so amn̂e, Yîtîhkathîrî nakir̂wamatho kom ha. Eroromero naxe kayaritomo me towîhnî me ro mak. Ero wa naxe.

19 Ero yinhîrî kaskan̂e me cehsom yehtopo yenta xe wîxakn̂e, 4-nhîrî yehtopo mak. Anarme ro mak xakn̂e noro, 4-nhîrî, yihcirî me pakaxapu komo warahra ro mak. Eraspeto ro mak xakn̂e kopi. Pehu me xakn̂e iyorî kopi, bronse me marha xakn̂e amoxoxon. Tînahsîthîrî komo tonon̂e wara xakn̂e okwe, akuhr̂apon̂e wara marha. Akwenhîrî komo yapikn̂e me xakn̂e, knuhknu kekn̂e oko.

20 Paaka meretîrî warai yehtopo yenta xe marha wîxakn̂e, 10 komo yehtopo. Ero yipu komo mahyaka pakaxapu yehtopo yenta xe marha wîxakn̂e, paaka meretîrî warai yehtopo. Ero yanme anarînhîrî tak n̂emohkekn̂e meretîthîrî komo, 3 mak. Yukurumîkno xa mîk xakn̂e mahyaka pakaxapu, meretîrî. Cewke xakn̂e, tîmtake marha. Cehcoyoponkaxmu me mak nîmtapowakn̂e kica. Anarme n̂esenpekn̂e takrono komo yopono me. Noro yehtopo yîhtînopu xe marha wîxakn̂e.

21 Meretîrî yeen̂ataw rma owya, mahyaka pakaxapu yeen̂ataw, Kaan nakir̂wamatho komo yakro n̂etar̂mekn̂e kopi. Iyopo so xakn̂e okwe.

22 Ero yinhîrî tko mokyakn̂e Poritomo me xa cehsom. On wara tak kekn̂e Noro tînakir̂wamathîrî komo poko, Kir̂wan komo mîkyam Kaan nakir̂wamatho kom okre, yîtîhkathîrî nakir̂wamatho kom ha, kekn̂e tak. Ero yinhîrî pahkî n̂he exiche tak kayaritomo me so tak xatken̂e Kaan nakir̂wamatho kom hara. Ero warai komo ween̂akn̂e. Ero ke iitono ya wîîkekn̂e, Onoke kuknon mîk wenwo? wîîkekn̂e yîwya.

23 On wara kekn̂e ekatîmn̂e, 4-nhîrî menwo keskan̂e warai noro nasî roowo pono komo kayaritomon kuknon me. Anarî me nasî noro anarî kayaritomo komo warahra ro mak. Roowo poko hakno komo yermomtîkan̂e wara ro mak nasî noro tmaywen komo yakro okwe. Apikn̂e wara marha nasî, akuhr̂apon̂e wara marha.

24 Paaka meretîrî warai mko menwo 10. 10 kayaritomo komo kuknon mînî mko, kayaritomo xa maywen komo rma. Kayaritomo me exitaw so n̂examro anarî tak n̂ecir̂as hara kayaritomo me. Anarme tak nasî noro, mahyaw so ecixapu. Yihcirî me ehxapu komo warahra ro mak nasî. 3 kayaritomo pen tak nar̂mesî noro.

25 Kaan yopono wara tak nîmtapowasî kica, yîtîhkathîrî yopono wara. Yînakir̂wamathîrî komo marha n̂emetanmekyasî. Nuun̂i kuknomacho tak tow xe nasî, cimn̂ipu kuknomacho marha. Kpanatanmetoponhîrî marha tow xe nasî. Kaan nakir̂wamatho komo yemetanmekn̂e me xa nas okwe. N̂examro pen tak naxe noro nar̂marî me okwe. Cewn̂e cimn̂ipu, asakî cimn̂ipu xa hara, cimn̂ipu raconho xa hara, ero wicakî pahkînon n̂examro pen n̂emetanmekyasî.

26 En̂ekano rin̂e komo rma tko n̂eremexe noro yen̂ekan̂e me. Kayaritomo mera kr̂a tak noro pen n̂iir̂axe. Kayaritomo me exihra ro mak tak nasî, pîra ro mak. Ero wa nasî noro pen, mahyaw ecixapunhîrî.

27 Ero yinhîrî tak Kaan nakir̂wamatho komo tak n̂ecir̂axe kayaritomo me hara, Yîtîhkathîrî nakir̂wamatho kom ha. Cewetîsom me xa naxe. Ahnoro kaapu mamawno komo n̂ewetîrî me naxe. Miyan komo maywenînho komo rma nahsîyaxe tmaywen me. Ero wa naxe Yîtîhkathîrî nakir̂wamatho komo. Noro xa tak nasî kayaritomo me miya roro etowîn me ro mak. Noro yewetîn̂e me naxe kayaritomo komo ahnoro, tmaywen komo yakro rma. Noro poko nahwowaxe, n̂ewehcaxe marha. Ero wa naxe amn̂e, kekn̂e. Ero wa kekn̂e iitono owya.

28 Ero wa mak ween̂akn̂e, wekatîmtîka tak awya so. Keserepokekn̂e ro mak owî, Taniew. Kewxamanwakn̂e ro mak ero yipu yeen̂ataw owya. Oropotaka mak wiir̂akn̂e on̂enîtho. Ero wa wîxakn̂e.