Taa, on wara tak wîxakn̂e owî, Taniew, yihcirî me ka keskan̂e komo ween̂akn̂e owosoto. Ero yinhîrî anarî men tak ween̂akn̂e hara. Bewsasa exitaw rma ka kayaritomo me ween̂akn̂e. Osorwaw cimn̂ipu xakn̂e kayaritomo me noro yehtoponho ero yimaw ween̂akn̂e.

2 Kayaritomo mîn yaw wîxakn̂e Susan pono yaw. Eraw rowonî rma mîn Susan. Tuuna yecihtaw wîxakn̂e Urai yecihtaw ha. Iito oyexitaw on warai ween̂akn̂e owosoto,

3 Kesewyar̂akn̂e tak, kahn̂eru tak ween̂akn̂e. Tuuna yecihtaw xakn̂e. Asakî xakn̂e noro meretîrî, kawno. Anarî xakn̂e kaw xa takrono yopo. Kawno pîn marha natîkwakn̂e yihcirî me. Ero yinhîrî kawno xa tak natîkwakn̂e hara.

4 Miya so mak cekn̂e kahn̂eru, kar̂pe ro mak cekn̂e oko. Oesce yaw roro cekn̂e, nohce yaw roro marha, suu yaw roro marha. Ero wa so cekn̂e. Noro kurunkan̂e exihra ro mak xakn̂e. Tooto pen komo yahsîche yîwya exihra ro thakwa mak xakn̂e town̂e kom hara. Tanme ro mak nîhtînoyakn̂e ahce wa na cehtopo. Miyan komo rma nahsîyakn̂e tmaywen komo me so. Noro yipu mîk ween̂akn̂e.

5 Taa, kahn̂eru ponaro oyexitaw rma anarî tak mokyakn̂e hara boce tak. Oesce n̂ixa mokyakn̂e. Cewn̂e mak xakn̂e noro meretîrî porin ha. Ewru yotaw mak xakn̂e. Kaikokoro cekn̂e noro kopi roowo yapikîra. Roowo mapitaka roro cekn̂e.

6 Kahn̂eru wece tak cekn̂e, tuuna yepu yecihtaw oyexitaw ween̂e asak hakno ke tmeretkem, noro wece cekn̂e. Kar̂pe ro mak cekn̂e, mayanakn̂e ro mak noro poko.

7 Asakno ke tmeretkem wece tak cekn̂e, noro poko tak nîrwonakn̂e ro mak. Noro pen n̂etapekn̂e kar̂pe ro mak. Meretîthîrî tak nîhkocekn̂e asakno roro rma. Kar̂pera tak xakn̂e asak hakno ke tmeretkemînhîrî pen okwe. Roowo pona tak noro pen nar̂mekn̂e cewn̂an ke tmeretkem, napikyakn̂e marha, knuhknu kekn̂e noro pen poko. Asakno ke tmeretkemînhîrî pen kurunpen̂e exihra ro thakwa mak xakn̂e.

8 Ero yinhîrî miyan komo rma tak nahsîyakn̂e cewn̂an ke tmeretkem hara, tmaywen me so nahsîyakn̂e. Kar̂pe ehtîkache rma tko n̂ehkocekn̂e tak meretîthîrî pen, porin pen. Emtaka tak natîkwakn̂e anarî kom hara meretîrî hara 4 takî. Miya miya wa so natîkwakn̂e. 4 nasî ocowo ero mko wece so natîkwakn̂e noro meretîrî mko.

9 Meretîrî mko yeen̂ataw owya anarî tak petawakn̂e. Wahra ka xakn̂e petarî. Por̂mamtîkekn̂e ha tko, kar̂pe tak n̂ehtîkekn̂e suu n̂ixan komo yopono me, resce n̂ixan komo yopono me marha, cenporem pono komo yopono me marha n̂ehtîkekn̂e.

10 Miya ro mak por̂mamtîkekn̂e kah yawno komo yaka roro. Iitono poyino komo n̂ar̂mekn̂e roowo pona. Xir̂ko mko marha tak nar̂mekn̂e roowo pona asakî mak. Ar̂mache napikyakn̂e kr̂a tak okwe, knuhknu kekn̂e mak okwe.

11 On wara tak kekn̂e noro, Yukurumîkno xa thakwa ow ha. Kaan yanan komo yantoman̂e warai xa marha ow hara, kekn̂e kica. Ero yimaw tak on wara kekn̂e noro Ixaw Yana komo ya, Awokuthîrî komo tak tîmîhra ehcoko Kaan ya, kekn̂e. Kaan mîn marha nîwîrîmekn̂e kica.

12 Kaan yanwekrî ke tîwya so Kaan yanan komo rma n̂epîrketken̂e noro mamakan me. Ero ke marha okno tîmn̂e komo tak porohkekn̂e. Ehn̂ara ro mak xakn̂e noro paaka meretîrî warai. Yaarono marha nar̂mekn̂e kpanatanmetopo, roowo pona nar̂mekn̂e. Ero wa noro xakn̂e okwe paaka meretîrî warai.

13 Ero yinhîrî Kaan maywenî ro mtapotarî tak wencekn̂e. Ero yinhîrî anarî nîmtapowakn̂e xa hara noro yakro. Kaan maywenî ro xa marha mîk nîmtapowakn̂e. On wara kekn̂e yihcirî me tîmtapotaxmu ya, Ai, atî wicakî pahkî nai moso n̂enîtho yaw roro rma tak ehtome so iitono komo. Enmar̂atîxera Kaan ya tîmsom tîmn̂e komo porohkacho n̂enwo, Kaan yanwecho marha n̂enwo kîwîrîmacho ro komo. Kaan mîn yahsîtopo marha n̂enwo yiixatî pîn komo ya ahsîtopo. Kaan yanan komo yemetanmetopo marha n̂enwo, apihtopo meero. Atî wicakî pahkî nai Kaan yanan komo yîwîrîmacho? kekn̂e.

14 On wara tak kekn̂e anarî owya, 2.300 kaamo wicaki enatîche ero yimaw, N̂eexi, kacho me tak nasî. Ero yinhîrî Kaan mîn tak nakir̂wamexe hara, kekn̂e owya. Ero wa kekn̂e owya.

15 Iito rma ka wîxakn̂e, Taniew ow ha. On̂enîtho ponaro rma ka wîxakn̂e. Ahce pokono xa mîn wenwo? wîîkekn̂e rma ka ohnaw. Ero wa ketaw rma owya tooto warai tak ween̂akn̂e xa hara, oyepatai n̂ecececekn̂e.

16 Ero yinhîrî tooto mtapotarî tak wencekn̂e, Urai yecihtawno mtapotarî ha. On wara kekn̂e, Ai Kabriew, noro yîhcamhokakî yîn̂enîthîrî poko, kasko yîwya, kekn̂e tak oyepataino ya.

17 Ero ke tooto warai tak mokyakn̂e ohyaka. Keraswakn̂e ro mak kopi. Kesewnapekn̂e ro mak okwe. Ai, kekn̂e tak owya noro, tooto xîkrî amoro. On wara yîhtînoko, an̂enîthîrî nasî pahxarono me. Eromanhîrî yimawno komo pokono mîn menwo, kekn̂e.

18 Ero wa ketaw owya kîwînîkyakn̂e yuhnari ro mak. Tuupe cewru mak wîxakn̂e. Ero yimaw tak oyapeyakn̂e oyakro tîmtapotaxmu. Oyanîmyakn̂e piiri.

19 On wara tak kekn̂e owya, Pahxaro tak nasî Kaanî rwonîmtopo me. Ero yimawno komo yehtopo tan wekatîmyas awya. An̂enthîrî yaw roro tak naxe kayaritomo komo amn̂e, eromanhîrî yimaw, yukuknomaxapu yimaw ha.

20 Kahn̂eru menwo asak hakno ke tmeretkem. Kayaritomo komo pokono mîk kahn̂eru, Mecia komo kayaritomon, Pehsia komo kayaritomon marha.

21 Ero yinhîrî tak boce menwo hara. Kresia komo kayaritomon pokono mîk n̂ex hara. Meretîrî menwo noro yewru yotaw, n̂examro kayaritomon pokono mîn n̂ex ha meretîrî, yihcirî me nasî kayaritomo me noro.

22 Meretîthîrî yehkotoche 4 tak menwo meretîrî mko hara ekenhîrî to atîhtaxapu. 4 kayaritomo komo pokono mîn meretîrî mko ha. Yihcithîrî pen rowontho raconkan̂e komo mîkyam kayaritomo pen rowontho. Kar̂pera n̂he tko naxe yihcithîrî pen warahra.

23 Amn̂e tak 4 kayaritomo komo retawno komo naxe hara. Kicicme xa tak n̂ehtîkexe Kaan yanwekn̂e komo. Ero yimaw anarî tak n̂ecir̂asî kayaritomo me hara. Cewîrwoxatî xa mîkî, emîknono ritopo yîhtînon̂e xa tak kica.

24 Kar̂pe xa tak n̂ehtîkesî noro tanmerora ha tko. Waihkano tak n̂iir̂asî ro mak. Ehn̂ara ro mak nas noro cemyawno ciitopo. Karitînhîrî pen komo nar̂mesî, Kaan nakir̂wamatho pen komo marha.

25 Emîknono rin̂e me exirî ke noro emîknono rin̂e komo tak n̂epamtîkexe kica. Cehcoyoponkacho poko n̂esehtînoyasî kica. Mer̂pono pîn komo waihkesî cemyawnoyem komo rma. Kayaritomo komo kayaritomon yar̂ma xe meero nasî kopi. Waihyasî rma tko amn̂e noro tooto pîn ke tak ha.

26 Yaarono xa mîn menwo awosoto. Kokmamrî me mentai, enmarî me mentai marha, yaarono xa mîn menwo. Ahruxapu wara makî tko cirko an̂enîthîrî. Pahxarono pokono xa mîn menwo, kekn̂e. Ero wa kekn̂e owya ekatîmn̂e.

27 Ero yinhîrî kekar̂kekn̂e tak okwe. Kar̂pera tak wîxakn̂e yaake kaamo. Ero yinhîrî okaman poi tak kawomyakn̂e hara. Kayaritomo yemyawno poko xa hara wîxakn̂e. Keserepokekn̂e xa tko on̂enîtho poko. Onoke warai komo pokono na mîn ween̂e kopi, wîîkekn̂e ro mak. Ero pokono mîn ha, kan̂e exihra ro mak xakn̂e okwe. Ero wa wîxakn̂e.