1-2 Taa, ero yinhîrî tak on wara wîxakn̂e hara Taar̂u exitaw Kawtew komo kayaritomon me, karita ween̂akn̂e 1-înhîrî cimn̂ipu po, kayaritomo me noro yehtoponho po. Metu komo yepamtho mîk xakn̂e Tar̂u, Asueru pen mumutho. Ero yimaw Kaan Karitan ween̂akn̂e Xeremiasî nmewretho, weronomano rin̂enho pen mîk noro nmewretho. Kporin komo mewrepekn̂e yîwya. On wara kacho mîn ween̂e, Pahkî nai Xerusaren pohra ro mak, 70 cimn̂ipu ero wa nas okwe, kacho ween̂akn̂e.

3 Ero yipu yenîche Kporin komo Kaan yakro takî kîmtapowakn̂e yiixe oyehtopo poko. Cerewre ro mak kîmtapowakn̂e, eseresmara wîxakn̂e, kumixitho mak wamruyakn̂e oponon me, wemronho cheka marha keremekn̂e.

4 Kîmtapowakn̂e Oporin Kaan yakro. Kesekatîmyakn̂e yîwya. On wara wîîkekn̂e, Apa, ponaro xa oyehtopo Amoro. Amna yopono ro mak Amoro, yukurumîkno ro mak Amoro. On wara kan̂e Amoro amna ya, Ooxe na mat ha, omtapotarî marha na mewehcatu. Ero wara awexitaw so kakronomexe so, mîîkes amna ya. Ero wa kachonho towîhra ro mak masî, ero yaw roro rma wa amna miir̂asî. Amna pînîn yaw marha masî.

5 Kicicme tko amna xakn̂e kica, akpîn me mak. Kicicitho poko ro mak amna xakn̂e okwe, amtapotarî yanwekn̂e me. Amna panatanmetopo ponarora mak amna n̂ehtîkekn̂e kica, amtapotachonhîrî ponarora marha.

6 Amna kayaritomon pen komo rma re panatanmekyatken̂e awanton kom ha, amna weronoman̂e kom ha. Kaanî mtapotarî tan wekatîmyas awya so, ketken̂e cma re amna ya. Ero wa ketken̂e amna kayaritomon pen komo ya, amna yantoman̂enho pen komo ya marha, amna porin pen komo ya marha. Ahnoro amna rowon pono pen komo ya ketken̂e. Yîmtapotarî komo ponarora tko xakn̂e amna kica.

7 Kir̂wanî ro mak Amoro Apa, amna reha nasî tîhyapamsom me mak okwe. Ero wa nas amna oroto rma. Ero wa naxe Xuta komo, Xerusaren pono komo, Ixaw Yana komo ahnoro. Tantono komo naxe ero wara, meyeno komo marha. Mooxe naxe anarî komo, amna poyino komo. Anarî komo cheka men̂epekn̂e n̂examro pen mîk hakî cheka. Ero wara so amna men̂epekn̂e amna yetowrî ke kica ahyai. Ahnoro amna nasî tîhyapamsom me apona.

8 Amna nîhyapamyasî Apa apona kicicme amna exirî ke kica apoko. Ero wa naxe amna kayaritomon komo, amna yantoman̂e komo marha. Ero wa xa marha xatken̂e amna porin pen kom hara okwe.

9 Amna pînîn yawno Amoro Apa. Kicicme amna yehtoponho yîhcamnon̂e ro marha. Wara rma amtapotarî amna nanwekyakn̂e kica.

10 Amna Porin xa Amoro, ponaro amna yehtopo xa. Amtapotarî yewetîra rma tko amna xakn̂e kica. Amna panatanmetopo cma re mekatîmyakn̂e awanton komo ya, amna weronoman̂e komo ya. Ero yipu rma tko ewetîra xakn̂e amna kica.

11 Ahnoro Ixaw Yana komo tpanatanmetopo nanwekyatken̂e an̂ekatîmthîrî. Awahsîpînketken̂e mak okwe. Amtapotarî yewetî xera ro mak amna xakn̂e kica. Ero wa amna xakn̂e. Ero ke amna mîwîrîmekn̂e ro mak okwe kicicme amna yehtoponho yepetho ha. Ero yipu n̂ekatîmyakn̂e rma re Moises pen, awanton pen ha. Yaaro xa tan wîîkesî, kacho marha nasî tmewreso. Ero wa kacho yaw roro rma amna mîwîrîmekn̂e.

12 Yîmtapotachonhîrî yaw roro rma amna pen n̂emetanmekyakn̂e, amna yenîn̂enho pen komo marha. Amna nîwîrîmekn̂e ro mak okwe. Mîn hak pono komo rma re n̂emetanmekyakn̂e Kporin komo. Ero wara rma re anarî komo n̂emetanmekyakn̂e kaapu makatawno pen komo ahnoro wahra n̂hema ha tko. Xerusaren pono pen komo reha n̂emetanmekyakn̂e ro mak anarî pono komo yopo xa tak okwe.

13 Amna yîwîrîmacho xa tak amna n̂epor̂akn̂e Moises penî mtapotachonho yaw roro rma. Wara rma amna yîmtapotara rma xakn̂e amna Porin yakro, ponaro amna yehtopo yakro. Kicicme amna yehtopo yai cma re amna maknamesî Apa. Yaarono poko n̂he marha amna yîhcamhokakî, kahra xakn̂e amna awya.

14 Ero wa amna yexirî ke amna yemetanmecho ponaro mîxakn̂e. Ero tak mekmexpekn̂e. Kir̂wan̂he ciino rin̂e ro xa Amoro Apa ahce wa na ciino riyataw awya. Ero ke amna yîwîrîmacho mekmexpekn̂e awewetîra amna yexirî ke kica.

15 Apa Kaan, ayanan komo rma amna. Amna mekyakn̂e Exitu poi. Kar̂pe xa awehtopo menpekn̂e en̂exa amna yekrî ke. Ero yanme cekaiporesom me xa masî oroto. On wara wîîkes awya Apa, kicicme ro mak amna xakn̂e, akpîra amna xakn̂e kica.

16 Apa, kir̂wanî ro me awehtopo yaw roro rma cma re metîrwoxinkesî hara Xerusaren poko, awewtonî ro poko, îîpî pono poko. Amna mîtwono komo nîwîrîyakarî me mak nas okwe Xerusaren. Ero wa naxe ayanan komo ahnoro. Ero wa amna nasî kicicme amna yexirî ke, kicicme amna porin pen komo yexirî ke marha okwe.

17 Ero ke omtapotarî cma re mences Apa. Yiixe oyehtopo poko kîmtapowasî awakro. Awanton mak ow ha. Amînthîrî poko tawake tak esko, yixkaxaputho poko. Ero wa cma re masî kir̂wan̂he awehtopo yenpotome rma, miyan komo ya rma.

18 Omtapotarî cma re mencesî Apa. Awewton wece cewru tak esko ha. Wemronho me mak nas okwe amna yewtontho, awosokenî rma. Ero wa kahra nas amna awya kir̂wan̂he amna yehtopo yepetho me. Amna pînîn yawno me xa awexirî ke mak ero wa kes amna awya.

19 Taa, entak Apa, omtapotarî. Kicicme amna yehtoponho cma re mîhcamnoyasî. Omtapotarî xa entak Apa, ero yaw roro tak amna ciitome tak awya. Awanme rma cma re ecmamra masî. Awewtonî ro mîn Xerusaren, ayanan komo marha amna awosoken komo rma. Ero ke amna cma re makronomesî, wîîkes awya Ponaro Oyehtopo ya, wîîkekn̂e. Ero wa wîîkekn̂e ow Kaan ya.

20 Ero wa kîmtapowakn̂e Kaan yakro. Kicicme oyehtoponho wekatîmyakn̂e yîwya. Opoyino komo yehtoponho marha wekatîmyakn̂e yîwya, Ixaw Yana komo yehtoponho ha. Kir̂wan̂he Kaan yîpînî ro ciitopo poko marha kîmtapowakn̂e.

21 Ero wa omtapowataw rma Kabriew tak mokyakn̂e xa hara ohyaka. Pahxa on̂enîtho rma mîk mokyakn̂e. Kar̂pe xa mokyakn̂e kah yai. Oper̂a xîkrî pun tîmtopo me exitaw mokyakn̂e, kokon̂i tîmsom yakn̂itopo me exitaw ha.

22 Oyakro tak nîmtapowakn̂e noro oyakîrecho poko. On wara kekn̂e owya, Ai Taniew, ahyaka tak kmoko yuhnari yîhtînon̂e me awitîkaxi.

23 Yihcirî me amtapowataw rma oyantomekn̂e Kaan tîmtapotarî yekatîmtopo poko awya. Ero ke tak kmoko ahyaka. Yiixe Kaan yehtopo xa amoro. Ero ke yîmtapotarî tak entakî. An̂enthîrî poko ahcamhokacho rma mîn entak ha.

24 On wara nas amn̂e, Tukuknomaxi nasî cimn̂ipu komo. 7 nasî tukuknomaxi, 7 xa hara, 7 xa hara, Yaake ro nasî tukuknomaxi 7 mko ha, 70 ro ha. Ero wicakî pahkînon nukuknomekn̂e Kaan apoyino komo yehtopo ciitîkacho, Kaan yewtonî ro yehtopo ciitîkacho marha. Ero wicakî pahkînon marha Kaan nukuknomekn̂e tanwetoponhîrî yenatkachome, kicicme tooto komo yehtoponho yenatkachome ha, Kaanî rwoxinkatîkacho kicicme ehxapu komo poko. Ero wicakî marha nasî kir̂wan me tak ciino ritîhkacho Kaan ya, eroromerono ciitîkacho ha. Ero wicakî pahkînon marha nasî wosoto Kaan n̂enpotho yaw roro ciino ritîhkacho, ekatîmn̂enhîrî pen komo mtapotachonho yaw roro ciino ritîhkacho marha. Ero wicakî cimn̂ipu yenatîche marha Kir̂wanî ro tak nîhkapesî Kaan kayaritomo me. Ero wa Kaan n̂iir̂asî ero yimaw.

25 On poko marha kîhcamhokesî yuhnari poko. On wara kesî kayaritomo amn̂e, Xerusaren pono mko tak ciitatko hara mîîmo mko, kesî. Ero wa kachonho n̂ixa ro tukuknomapore nasî 7 komo cewn̂e ro, 62 ro marha. Ero wicakî cimn̂ipu nasî tukuknomaxi. Ero yimaw tak kayaritomo mokyasî, Kaan nîhkapetho rma. Xerusaren pono komo n̂iir̂axe hara mîîmo komo. Esama komo marha n̂iir̂axe ewto pore totopo komo. Ewto wacan marha n̂iir̂axe. Cesemetanmetopo komo chew rma ero yipu n̂iir̂axe.

26 On wara tko nasî kayaritomo me yîhkapexapu, 62 ro 7 komo exiche tak Noro pen waihkexe okwe. Cehtoponhîrî yanmera tko waihyasî. Anarî tko mokyasî kayaritomo hara. Noro maywen komo tak mokyaxe, ewto pen nakn̂iyaxe, Kaan mîn pen marha nakn̂iyaxe. Tuuna yukmacho wara rma mokyaxe ewto pono komo waparî me. N̂etar̂mexe roro yukuknomacho cenatîso ro. Mer̂pono pîn tak nasî cecahso mîîmo mko, cixkaxi so marha nasî. Ero wa nasî Kaanî mtapotarî yanme rma.

27 Ero yimaw mer̂pono pîn komo yakro tak nîmtapowasî kayaritomo. On wara kesî yîwya so, Omaywen me tak ehcoko. Ero wa awexitaw so kakronomexe so, kukurunpexe so marha. Ero wa cehcerî 7 wicakî pahkînon, kes ha re. 3 imeya wicakî mak exiche ha tko tîmtapotachonhîrî tak nowyas hara kica. Kaan ya tîmsom akn̂ipîra ro mak tak ehcoko, kesî tak kica. Ahce na tîmîhra ro mak ehcoko Kaan ya, kesî marha kica. Pohnî me Kaan mîn ciin̂e mîk kica. Kicicitho ro mak naar̂asî Kaan mîn yaka rma kica. Noro yanme tak pohnî me tak nasî ewtotho, tîwîrîmaxi ro mak nas okwe. Ero wa ka nasî Kaan mîn yîwîrîmacho cenatkaxi ro. Ero wa nasî, kekn̂e. Ero wa kekn̂e Kabriew owya.