On wara marha kekn̂e Kporin komo Oseias ya, On wara tak kacoko awakno komo ya, Oyanan komo amyamro, kacoko. On wara marha kacoko awepeka komo ya hara, Yîpînîn yaw enxapu amyamro, kacoko. Ero wara kacoko yîwya so.

2 On wara kacoko anocwan komo ya reha, kicicme ehxapu amoro okwe, kacoko yîwya. Opici pîn mîkro anocwan komo. Noro yin̂o pîn marha Ow hara okwe. Mooxe ro mak noro to xe wasî twayamnunhîrî komo yai. Cenawnonhîrî komo tak n̂en̂epepe kr̂a tmanatîrî pokononhîrî komo.

3 Noro yipu komo yen̂epera exitaw noro men pononkes Owî. Ponomra ro mak tak wiir̂asî ewruxapu wara hara. Axawa imo wara marha kr̂a noro wiir̂asî. Turpem wara xa noro wiir̂asî roowo wara. Tuunahto yaka rma noro pen waihkes okwe.

4 Yîmxîkîthîrî komo pînîn yawra marha wasî amn̂e anarî xîkrî me exirî ke so kica.

5 Kîîrî pohkan̂e ro me mak xakn̂e kica yîson. Kica kacho me rma xakn̂e yîson. On wara kekn̂e noro twayamnu komo poko, Ooxatî komo mîkyam okre. Onahmexe, owokpexe tuuna ke, opononmexe riin̂u kahxapu ke, oper̂a poci kahxapu ke marha. On̂emerî nîmyaxe katî, owokru marha, ero yipu nîmyaxe owya. Ero ke n̂examro poko ehso kîwces hara, kekn̂e anocwan komo kica.

6 Ero ke noro yesamarî wahruyasî cekyekyem ke oko. Noro marha wamcesî waaca ke cesamarî yenîhra ro mak ehtome.

7 Tîîxatînhîrî komo yahsîso cma re cesî kar̂pe. Ahsîra rma tko nas okwe. Noro yipu komo cma re n̂epor̂asî. Enîhra ro mak tak nas okwe. Ero yimaw on wara tak kesî noro, Pahxa on̂iyo yaw mak wîxakn̂e. Noro yaka kîwces hara. Wara n̂he wîxakn̂e noro yaw oyexitaw, kesî. Ero wara kesî noro amn̂e.

8 On wara kahra ro mak xakn̂e noro, Kporin komo xa mîk onahman̂e puruma ke, owokpan̂e marha, on̂emerî tîmn̂e marha aseci. Oyemyawnoman̂e marha Mîkî prata ke, ooru ke marha, kahra ro mak xakn̂e okwe. Onmîtho rma nahsîyatken̂e Baaw ya tîmsom me mak kica. Ero wa xatken̂e kica.

9 Ero ke on wara wasî noro poko hara, onatîrî yeperîtho wowyas yîhyai. Akpîche rma wowyasî. Owokru marha wowyasî yîhyai ciixanî rma. Oponon marha wowyasî oyok pocitho kahxapu, riin̂u kahxapu marha. Ero cma re wîmyakn̂e yîwya ponomnî me exihra ehtome.

10 Oroto tak kicicme noro yehtopo wahrunkesî yiixatînhîrî komo wero ro. Yukurunpen̂e exihra ro mak nas ero yimaw emetanmekîra oyehtome.

11 Tahwore noro yehtoponho wîtîtmamnoyasî. Ahwotan me marha wiir̂asî ahwotacho ro komo yimaw so ha. Nuun̂i yepatakache roro marha esenmekîra tak nasî, cepokaretopo po roro meero esenmekîra tak nasî. Ahnoro noro yahwotachonhîrî tak wîtîtmamnoyasî.

12 Noro natîtho marha waihkesî Ow uupa yatîtho, piiku yeputho marha. On wara kekn̂e noro ero yipu poko, Ooxatî komo nîmîtho okre onatîrî, kekn̂e. Erotho mko rma waihkes Owî. Peen me mak tak wiir̂asî ewtîthîrî. Okno pîn nahri me tak nas okwe.

13 Mer̂pora kaamo kotoporem nakn̂iyakn̂e noro Baaw komo tawakeretopo me kica. Ero ke kesepanîyasî. On wara marha xakn̂e noro, n̂epanatarîncekn̂e, n̂eporokucekn̂e marha. Eporokutoxapu tak cekn̂e tîîxatî komo yenso. Opoko twen̂ekarî mak tak xakn̂e okwe, kesî. Ero wa kesî Kporin komo.

14 On wara marha kesî Kporin komo noro poko, Pahxaro tak noro wenpamnoyas opoko hara. Pohnîntaka tak waar̂asî. Noro yahworecho poko tak kîmtapowas akro.

15 Ero yimaw yînatîthîrî wîmyas hara yîwya uupa yatî. Akor woskaran pono wara nasî noro. Ero ke rma tko noro wiir̂as amn̂e, Kir̂wan̂he oriya ham Kaan amn̂e, kan̂e me tak wiir̂as. Ero yimaw tak n̂ewanomesî emasî me cexitawnonhîrî wara rma. Pahxa Exitu poi mokyataw n̂ewanomekn̂e ero wa tak n̂ewanomes hara okre.

16 On wara marha kesî Kporin komo yîwya, Ero yimaw tak, On̂iyo mîkro, mîîkes tak opoko. Oyantoman̂e mîkro, kahra tak mas opoko, kesî yîwya.

17 On wara marha kesî Kporin komo, Baaw komo yetacin̂e mera tak wiir̂asî. Baaw yosotî tak nîhcamnoyasî.

18 Ero yimaw marha kîmtapowasî okno pîn komo yakro, tarin̂em komo yakro marha, sehrere me tîtosom komo yakro marha. N̂examro emetanmekîra ro mak men esko, wîîkesî yîwya so oyanan komo poko. Taa, yîwîrîmara ro mak nas amna, kan̂e wara naxe. Waapa krapantho waxikwesî, waapa kaciparantho marha war̂mesî. Etar̂mara tak naxe roowo poko hakno komo. Erasîn me ro mak tak n̂etakriyaxe oyanan komo ero yimaw.

19 Opokono ro me xa tak kiir̂axe so ero yimaw etowîn me ro mak. Ero wara kiir̂axe so kir̂wanî ro me oyexirî ke, yaaro ciino rin̂e me oyexirî ke, etîxatî me oyexirî ke, etpînîn yawno me oyexirî ke marha. Ero wara xa marha kiir̂axe so opokono ro me tak awehtome so.

20 Opokono ro me tak kiir̂axe so oyahsîpînkan̂e pînî ro me tak maxe okre. Ero yimaw tak Aporin komo ro me tak Ow meen̂axe.

21 On wara marha wasî ero kaamo po, oyanan komo mtapotarî weyukyasî. Kaapu weyukyasî. Roowo tak n̂eyukyasî kaapu hara.

22 Ero yinhîrî tak roowo tak n̂eyukyas hara. Puruma warai komo ke eyukno n̂iir̂asî, uupa yukun ke marha n̂eyukyasî oroto ciixapu ke. Aseci ke marha n̂eyukyasî. Xisirew pono komo mtapotarî tak n̂eyukyasî roowo.

23 Noro tak wiir̂as orowon pona onatîrî wara rma. Yîpînîn yaw oyehtopo tak wenpesî noro ya, Yîpînîn yawra oyehtoponho mîkro, kachonho ya rma. On wara marha wîîkesî yîwya so, Oyanan pîn komo mîkyam, kachonho ya rma, Oyanan mîkyam, wîîkesî tak yîwya so. On wara tak oyeyukyaxe n̂examro hara, Ponaro xa amna yehtopo Amoro, kexe tak owya. Ero wara kexe amn̂e owya.