Ero yinhîrî on wara kekn̂e hara Kporin komo owya, Ai Oseias, etoko xa hara apici yaka. Yiixe rma esko. Yiixe anarî yehtopo rma re mîkro, ciin̂o yairono marha re mîkro kica. Wara rma yiixe rma esko. On wara was Ow Aporin komo Ixaw Yana komo poko, yiixe so rma wasî anarî pona enîn̂e komo rma. Uupa yuturpamnoxapu xatî mîkyam anarî ya tîmxapunhîrî kica. Wara rma yiixe so wasî, kekn̂e Kporin komo owya.

2 Ero ke noro wahsîyakn̂e opici me xa hara. Epethîrî pona wahsîyakn̂e 15 sikru pona, prata pona. Sepata marha wîmyakn̂e noro yepetho me 330 ritru wicakî.

3 Ero yinhîrî tak on wara wîîkekn̂e yîwya, Tan men esko ohyaw. Kîîrî pokohra ro mak tak esko. Ero wara xa marha was ow awece hara, wîîkekn̂e yîwya.

4 On wara kekn̂e Kporin kom hara ero yipu poko, Ero wa xa marha naxe Ixaw Yana kom hara amn̂e. Pahkî ka naxe kayaritomomnî me, antomano rin̂e ken̂ehra, Kaan ya tîmsom yakn̂itopo ken̂ehra, toopu ken̂ehra, piiri ciixapu ken̂ehra, Kaan mîn yaka tîtosom ponon ken̂ehra, ponaro cehtopo komo me ciixaputho ken̂ehra, ero yipu ken̂ehra naxe pahkî ro mak.

5 Ero yinhîrî mokyaxe hara Ixaw Yana komo ohyaka, Tporin komo yakro tîmtapota xe xa hara naxe, ponaro cehtopo komo yakro. Tapi xe marha naxe, tîkayaritomon komo xe. Tporin komo yaka mokyaxe ehsamaxi, takronomacho komo poko nîmtapowaxe oyakro. Twerî mak mokyaxe. Ero wa so mokyaxe eromanhîrî kaamo pahnoke exitaw.