Ero yinhîrî on wara kekn̂e xa hara Kporin komo owya, Ai, Ixaw Yana komo, omtapotarî ka entacoko. On wara wîîkes awya so, kicicme awehtoponhîrî komo poko tan ken̂ekexe so Ow, Aporin komo. On wara wîîkes awya so, yaarono yekatîmn̂e exihra ro mak nas okwe. Tpoyino komo pînîn yawno exihra marha nas okwe. Ero wa xa nasî Kaan, kan̂e exihra marha nasî tan arowon komo po.

2 Mîn hak mak n̂etahcaxe yaarono me xa tîmtapotachonhîrî komo yentamexpotome, cemaronwaxe, waihkano n̂iir̂axe, n̂en̂epanaxe, cipici komo yairo naxe, ciin̂o komo yai ro marha naxe wooxam komo. Tpanatanmetopo komo yewetîra ro mak naxe. Waihkano n̂iir̂axe emapona roro okwe. Ero wara mak naxe tantono komo okwe.

3 Ero yanme tîwrataxmu wara nas amn̂e on arowon komo. Nakporotîkexe tak on pono komo twaihso ro. Waihyasî tak comota pono pen kom ha, waihyasî marha tarin̂em pen komo, ootî pen komo marha, tuuna imo kwawno komo marha ahnoro.

4 Apoyino komo yîwîrîyakara ehcoko. Kicicitho amoro, kahra ehcoko. Kaan mîn yenîn̂e komo yen̂ekan̂e wara rma naxe moxamu rma apoyino komo.

5 Mehrokexe katpanaw, kosope marha. Weronomano rin̂e komo meero n̂ehrokexe awakro ro so. Anocwan pen komo marha waihkes Ow hara.

6 N̂ehcamnoyaxe mak tak oyanan komo camkî cexirî ke so. Ahcamhokacho komo manwekyatken̂e kica. Ero ke owya tîmsom pokono mera tak keen̂axe so. Kaan ya apanatanmetopo komo ponarora ro mak mîxatken̂e kica. Ero ke amxîkrî komo ponarora tak was Ow hara.

7 Epamtîketaw so oyanan komo miya xe xa tak kicicme n̂ehtîketken̂e opoko okwe. Ero ke kir̂wan̂he ehtoponhîrî tak wiir̂asî yîhyapamnotopo komo me okwe.

8 Kicicme oyanan komo yehtopo nasî n̂examro nahrî wara. Tpoxwe xa nasî yîwya so akpîn me ehtopo komo.

9 Ero ke on wara tak naxe, tîmsom pokono komo yehtopo yaw roro rma naxe Ixaw Yana komo ahnoro okwe. Ero ke iito re rma n̂examro wemetanmekyasî. Kicicme ehtoponhîrî komo wepanîyasî.

10 Ero yimaw n̂eseresmexe rma re eserepotanmekîn me tko okwe. Mîk hak poko naxe cipici pîn komo poko. Epamura rma ha tko naxe okwe. Ero wa naxe Tporin komo yewetîra cexirî ke so okwe.

11 On wara cir̂mexpon̂e mîn yipici pîn poko ehtopo komo, kawaxiyem pokono me ehtopo komo marha, ciixan pokono me ehtopo komo marha wok poko. Ero yipu poko kexitaw warai makno me kirmexesî kica.

12 On wara naxe oyanan komo, weewe yakro mak nîmtapowaxe enporixaputho yakro takîhrecho komo poko kica, Amoyitho rma tî re n̂examro nakîhre. Kicicitho yekatî rma nasî anato n̂examro panatanmekn̂e me, yipici komo yai ro ehtopo poko panatanmekn̂e me. Noro rma n̂examro n̂emîknoyasî. Ero ke ponaro cehtopo komo yai ro mak naxe anarî poko okwe.

13 Îîpî meretwo ponaro cehtopo komo ya tîmsom nakn̂iyaxe. Matîwîn po marha kotoporem nakn̂iyaxe. Kahpar̂u yapomyaw so rma ero yipu nakn̂iyaxe, aramu yapomyaw so, owmeiru yapomyaw so marha, Kir̂wan̂he nasî awarpan ero yipu komo yapomyawno. Ero ke iina so nakn̂iyaxe. Ero ke wa awemsîrî komo naxe ciin̂o pîn pokono me. Ero ke marha amumuru pici komo naxe ciin̂o yairono me okwe.

14 Awemsîrî komo emetanmekîra tko wasî cikicicintaxmu me roro exirî ke so. Amumuru komo pici marha emetanmekira wasî ciin̂o yairono me exirî ke so. On wara naxe kîrkomo meero, kîîrî pohkan̂e ro komo pokono me roro naxe kica. On wara naxe anarî komo, wooxam komo, ponaro cehtopo komo mîn yaw so naxe, anarî ro mîn yaw so. Anarî ro ya tîmsom yakn̂in̂e komo pokono me naxe kica. Ero wa naxe kîrkomo. Ero ke yuhnari yîhtînon̂e pîn me cexirî ke so n̂etwîrîmexe thakwa okwe.

15 Kîîrî pohkan̂e ro wara ro mak maxe amyamro okwe Ixaw Yana komo. Wara rma on wara wîîkesî Xuta yepamtho komo ya hara, Yikicicintara ro mak ehcoko amyamro reha. Xiwkaw pona tohra ro mak men ehcoko, Bece Apen pona marha tohra ehcoko. On wara so marha yîmtapotara ehcoko, Kporin komo nasî waipîn me, kacho wara rma nas omtapotarî tan yaaro xa marha, kahra ehcoko.

16 Kanwekn̂e komo ro mak mîkyam Ixaw Yana komo. Anarimaw kanwekn̂e me nasî paaka xîkrî. Noro yipu warai rma mîkyam Ixaw Yana komo. Ero ke ahce wa thakwa re noro yipu komo wînahme oper̂a xîkrî wara? Tooku nînahmesî oper̂a xîkrî yosom woskara po porin po ero wara Ixaw Yana komo yînahmara was okwe.

17 On wara naxe Eprain yepamtho komo, ciixaputho poko etahsîxapu me mak naxe okwe. Ero ke tanme ro so mak n̂ehcowpe n̂examro.

18 Anarimaw so wokruthîrî komo n̂enahcasî. Wara rma cipici komo yairo rma naxe emapona roro. Kîhyapamnotopo xatî ro mak mîkyam n̂examro yantoman̂e komo kica.

19 Ero ke on wara naxe amn̂e, ocowo imo narîrî me mak naxe okwe. Nîhyapamyaxe tak anarî ya tînmîthîrî komo pona. Ero wara naxe amn̂e Ixaw Yana komo okwe.