Ai oyakno komo, tîmsom pokono komo amyamro, omtapotarî ka entacoko. Ahnoro Ixaw Yana komo, amyamro marha omtapotarî entacoko. Ero wa xa marha entacoko amyamro hara kayaritomo yanan komo. Kicicme awehtopo komo wekatîmyas awya so. Mispa pono komo yemcinon̂e wara rma mîxatken̂e. Tabo pono komo yahsîn̂e wara marha mîxatken̂e hara mîîye yakan wara kica.

2 Oyanwekn̂e komo mak n̂examro okwe. Ero poyero n̂examro weyasî rma. Wara rma waihkano rin̂e me ro makî tko naxe okwe.

3 Eprain yepamtho komo yehtoponho ween̂asî. Ceseyamso so exihra ro mak naxe Ixaw Yana komo, on̂enîrî mera exihra ro mak naxe. Mîk hak pokono me maxe kica apici komo yairo. Apici pîn pokono me ro mak maxe amyamro Eprain yepamtho komo. Yikicicirexapu me so tak naxe okwe Ixaw Yana komo.

4 Kicicme exirî ke so etaknaman me naxe Kaan wece. Worokyam nasî yîchew so cipici yai rono me ciin̂e komo. Kporin komo yehtopo yîhtînopîra ro mak naxe okwe.

5 On wara marha naxe Ixaw Yana komo, cehcoyoponkaxmu me naxe kica. Ero wara ehtopo komo rma nasî n̂examro yen̂ekan̂e me. Cehrokaxmu wara mak naxe Ixaw Yana komo kicicme cehtoponhîrî komo pona rma. Eprain yepamtho komo marha naxe ero wa kica. N̂examro yakro rma n̂ehrokexe Xuta yepamtho kom hara okwe.

6 Kporin komo yeposo rma re cexe. Tooku naar̂axe oper̂a komo, paaka komo. Noro yenîhra rma tko naxe okwe. Yîhyai so n̂emoxenorekn̂e Noro okwe.

7 Kporin komo yemîknon̂e ro mak mîkyam okwe. Nîmxîkwaxe rma re anarî xîkrî me so kica. Oroto tak n̂eseresmexe nuun̂i yepataketaw. Ero poko ehtopo komo rma nasî n̂examro yîhcamnon̂e me, ero poko ehtopo komo nasî yîrowon komo yîwîrîman̂e me.

8 Oroto tak tuu kacoko oper̂a meretîtho ke Xibea po, Hama po marha. Bece Apen po emtarakacoko. Benxamin komo amyamro, awenari so mokyaxe.

9 N̂examro yeyataw amn̂e Eprain yepamtho komo yewton tak nasî pohra ro mak okwe. Ixaw Yana komo yîwîrîmacho me thakwa tak nas amn̂e. Ero ke ero rma wentamexpesî yîwya so.

10 On wara naxe Xuta yepamtho yantoman̂e komo, roowo wokpantho yewyetakan̂e wara rma naxe kica. Ero ke kîrwonasî ro mak n̂examro poko. Mokya men okwe n̂examro yîwîrîmacho, tuuna tmohsom wara mokyasî, xii kan̂e wara ro mak.

11 Waapa komo n̂emetanmekrî me naxe okwe Eprain yepamtho komo. Tîwîrîmaxi tak naxe owya en̂ekarî komo ke rma. Ero wa naxe ero pîntho poko cexirî ke so tanmero so rma okwe.

12 Mahcaru wara mak tak wasî Eprain yepamtho komo poko, emyawnonhîrî komo yîwîrîman̂e me. Tmataxmu wara marha wasî Xuta yepamtho kom hara.

13 Kokon̂oro ceper̂an komo tak n̂een̂atken̂e Eprain yepamtho komo. Ero yimaw marha tak cerekye xatken̂e Xuta yepamtho kom hara. Ero ke Asiriu komo kayaritomon yaka cetken̂e Eprain komo. Tîmtapotarî komo n̂entamexpekn̂e kayaritomo ya, Xarebe ya. Akariton̂e pîn thakwa mîkro okwe, awerekrî yehceman̂e pîn ha.

14 Reaw wara mak wasî Eprain yepamtho komo poko amn̂e. Reaw wara marha wasî Xuta yepamtho komo poko hara, kar̂pamxan me cehsom wara. N̂examro pen warixkesî ro mak amn̂e. Owî rma warixkesî. Ero yinhîrî yîhyai so tak kîwces hara. Miya ro mak waar̂asî n̂examro pen. Yukurunpen̂e komo exihra ro mak tak nas okwe.

15 Miya tak kîwcesî oyeken pona. Iito tak wasî kicicme cehtoponhîrî komo poko esekatîmtopo komo pona roro. Ero yimaw tak oyepor̂axe oyakro tîmtapotachome so. Ahwora ro mak cexirî ke so oyepor̂axe ro mak. Ero wa naxe amn̂e ha.