Taa, on wara wîîkes hara awya so, Amohcoko, Kporin komo yaka cetîramacerî hara. Karixkan̂enhîrî komo rma re Mîkî. Noro rma tko kîkaricexe so hara. Ketapan̂enhîrî rma re Mîkî. Noro rma ketapachonhîrî komo n̂imiyas hara ecihnotome.

2 Asakî ro enmapuche kîkaricexe so hara. 3-înhîrî kaamo po tak kanîmn̂e wara tak nasî. Ero wara kiir̂axe so tîmîtwono me roro tak kehtome so.

3 Kporin komo tîhtînotîkacerî n̂he ha. Noro yehtopo yîhtînotîkacho ponaro xa cehcerî. Ehn̂ara ro mak n̂epatakesî kaamo. Ero wara xa marha ehn̂ara ro mak n̂esenpesî Noro. Tuuna tmohsom wara xa marha mokyasî kîhyaka so yihcirî me tmohsom wara, mapitaw tmohsom wara marha. Ero wara Noro mokyas amn̂e kîhyaka so. Ero wara kexe amn̂e Ixaw Yana komo.

4 Ahce wa xa kiir̂atu so amn̂e amyamro Eprain Yana komo? Ahce wa xa kiir̂atu so amn̂e amyamro hara Xuta yepamtho komo? Kaweresî wara mak nasî ooxe awehtopo komo pahxaxarono wara. Cicakî wara marha nasî pahxaxarono wara. Yohno n̂ehcamnoyas hara cecakînhîrî. Ero wara nas ooxe awehtopo komo awya so.

5 Ero wara awexirî ke so weronomano rin̂e komo ke rma kametken̂e so okwe. Omtapotarî ke rma kwaihketken̂e so okwe. Pepe kan̂e wara ro mak xakn̂e awemetanmetopo komo owya.

6 Etpînîn yawno me awexi xe so xa wasî. Owya tîmsom xera n̂he wasî. Kaan yîhtînon̂e me awexi xe so xa wasî. Awokuthîrî komo pun xera n̂he wasî, takn̂itîkaxmu xera.

7 Ataw pen wara rma naxe omtapotachonho yewetîn̂e pîn me okwe, Kakronomexe so oyewehcataw awya so, kacho yewetîn̂e pîn me ha. Oyemîknoyatken̂e mak iito okwe.

8 Kicicitho komo yeken mîn Xiriace, roowo ha. Tooto pen kamxukutho ken̂e nasî kica.

9 On wara naxe anarî komo, waapa komo, tînwaikarî komo wapancexe okwe. Ero wa xa marha naxe tîmsom pokono kom hara okwe. Siken yesamarî yaw tîtosom komo waihkexe okwe. Kicicitho me ro mak naxe okwe.

10 Kicicme ro mak Ixaw Yana komo yehtopo ween̂akn̂e okwe. Iito rma naxe Eprain yepamtho komo cipici yairono me so naxe okwe. Kicicme se tak naxe Ixaw Yana komo.

11 On wara wîîkesî apoko so hara Xuta yepamtho komo poko hara, aweperîrî yenmetopo tak nasî tukuknomaxi, wîîkesî, kekn̂e Kporin komo.