On wara cma re ka wîxakn̂e Ixaw Yana komo poko, n̂examro karihto xe wîxakn̂e amotoxapunhîrî. Ero yimaw rma tko n̂esenpoi kicicme Eprain komo yehtoponho. Ero yimaw marha n̂esehtînomexpoi kicicme ro mak Samaria pono komo yehtoponho hara. Emîknono rin̂e ro komo mîkyam kica. Mînînano yaka n̂ewomyaxe cen̂epan̂em komo. Anarî komo reha esama yaw tîtosom komo purantantho nahsîyaxe okwe.

2 On wara kahra ro makî tko naxe, Kicicme kehtoponhîrî komo poko yîtwen̂ekarîntara ro mak nasî Kporin komo, kahra naxe okwe. N̂examro mamhoko mak nasî kicicme ehtoponhîrî komo. Owero ro nasî ero wara ehtoponhîrî komo.

3 Tawake nasî kayaritomo tmaywen komo poko kicicme exirî ke so rma kica. Tawake xa marha naxe antomano rin̂e komo n̂examro cemarontacho poko kica.

4 Cipici komo yairono komo mak mîkyam. Puruma yuputopo wara naxe. Wehto ka n̂iriyaxe ero yupun̂e komo. Ero yinhîrî tupusom poko naxe hara, wahrututpamnotopo n̂esmesî. Esmache wehto kamehtora ka naxe puruma wahrututpamtopo momokrî poko.

5 On wara naxe n̂examro yantoman̂e komo kayaritomon komo yakro ceseresmetaw so, wehto ke ocoronpexapu wara mak naxe kica kawaxiyem yerîrî ke. Ero yimaw kayaritomo rma n̂asî kicicitho me cetaporesom komo yakronoman̂e me rma kica.

6 Wehto yen wara ro mak nas antomano rin̂e komo ropotarî. Kayaritomo yaka cexe emîknoso okwe. Tîropotarî komo yocoronpen̂e wara ro mak naxe. Enmapuche tak wehto etahsîxapu wara tak nas hara okwe. Ero wa nasî yîropotarî komo.

7 Ocoro xa naxe n̂examro, knahrî yuputopo wara. Cen̂ekan̂e komo yermomn̂e wara naxe okwe. N̂epîrkexe ahnoro n̂examro kayaritomonînho pen komo. Wara rma oyakro yîmtapotara rma naxe takronomacho komo poko.

8 Anarî yana komo yakrono me naxe Eprain komo okwe. Cuure wara rma naxe aknamanî ro wara kica.

9 Anarî yana komo naxe hara n̂examro kar̂kan̂e me okwe. Kekar̂kesî tak okwe, kahra rma tko naxe okwe. Cihxiroke cik nasî yîhpoci mînto mînto wara. Ero wara tîhpoci komo yenîhra rma naxe okwe.

10 Ow xa n̂e ro takîhsom, kan̂e me naxe Ixaw Yana komo kica. Ero rma nasî n̂examro yen̂ekacho me. Wara rma Kporin komo yaka etîramara ro mak naxe. Ahto mai Apa, kahra ro mak naxe yîwya.

11 Potkuku wara mak naxe Eprain yepamtho komo. Apehceme cesemîknoposom me mak naxe okwe, akpîra cesehtînosom me xa okwe. Anarimaw Exitu pono komo nan̂ikyaxe takronoman̂e me. Anarimaw Asiriu komo yan̂ihso cexe hara okwe.

12 Ahna na cetaw so omîyen war̂mesî n̂examro yemcinotopo. Torowo n̂emcinoyaxe yiixatî komo ero wara n̂examro pen wemcinoyasî. N̂examro tak Owî panaresî amn̂e. Ero wara rma wasî poko so esenmekyataw so.

13 N̂examro pen wemetanmekyasî ro mak ohyai emahcirî ke so okwe. Waihkesî meero oyanwekrî ke yîwya so. N̂examro yukurunpe xe cma re wasî kicicitho komo n̂emetanmekrî mera tak ehtome so. Opoko makî tko cemaronwaxe kica.

14 Cesemetanmkyataw so nîwracexe rma re. Cewru komo marha naar̂axe ro mak. Okwe okwe, kexe rma re tîkaman po so. Ooxera rma tko naxe okwe ero wa tîmtapowataw so rma kica. N̂esenmekyaxe puruma yahso, uupa yukun yeeso marha, ero po ciixapu rma. Oyanwekyaxe rma tko okwe.

15 N̂examro wîhcamhokekn̂e mîn hak poko. Aporî komo marha karihcekn̂e. Wara rma oyanwecho poko n̂esencetken̂e okwe.

16 Kaan wece cewru etaknamara ro mak naxe okwe, Yîtîhkathîrî wece cewru etaknamara. Krapa wara mak naxe, kemîknon̂e wara kica. Owîrîyakan̂e me nîmtapowaxe. Ero yanme n̂examro yantoman̂e pen komo n̂epîrkexe. Ero wa exirî komo poko rma n̂ewrexe Exitu pono komo. Ero wa naxe oyanan komo poko okwe.