On wara marha wîîkes awya so, tuu kacoko. Yaimo wara rma mokyaxe amn̂e waapa komo Kaan mîn yakn̂itome. Ero wa mokyaxe omtapotachonho yanwekrî ke oyanan komo ya. Kakronomexe so oyewehcataw awya so, kachonho nanwekyatken̂e. Owya tpanatanmetopo komo nanwekyatken̂e.

2 On wara rma re kexe Ixaw Yana komo owya, Apa, ponaro amna yehtopo xa Amoro. Awehtopo yentan̂e xa amna, kexe mak.

3 Kir̂wan̂he cehtopo komo tko poxunketken̂e kica. Ero ke n̂examro pen yemetanmeso men mokyaxe amn̂e okwe yiixatî pîn komo.

4 Tanme ro so mak tkayaritomon komo n̂iir̂atken̂e okwe. Oyanmera ro mak n̂iir̂atken̂e okwe. Kir̂wan̂he wa nai moso awya? kahra ro mak xatken̂e owya noro yipu komo ciitopo poko. Xakn̂e yîhyaw so prata, ooru marha. Ero rma tko n̂iir̂atken̂e ponaro cehtopo komo me kica. Ero yanme rma wa n̂examro waparî komo mokyatken̂e okwe.

5 On wara wîîkes awya so Samaria pono komo ya, ponaro awehtoponhîrî komo tak ar̂macoko paaka xîkrî wara, wîîkes awya so. On wara wasî n̂examro poko, kîrwonasî ro mak poko so. Atî wicakî pahkî natu cehn̂axmu me kir̂wan̂he cehtopo komo poko?

6 Ixaw komo n̂enporitho mîn kica paaka xîkrî warai. Ooru pokono nakîhtotho mak mîn ha. Kaan pîn mîkro. Amn̂e tak n̂etakumpesî ro mak paaka xîkrî warai, Samaria pono ha.

7 On wara naxe Ixaw Yana komo, ocowo n̂iir̂axe tînatîrî komo warai me. Ero yepetache cetapomrisom tak nasî n̂examro pen yemetanmekn̂e me hara ero yepetho me oko. Yînatîrî komo rma re nasî puruma, natîkwasî rma re eperîrî yecepu, eperîn me makî tko nasî. Anarimaw so ceperke rma re nasî, yarîhra ro mak nasî okwe eperîrî pîpîtho. Ceperke rma exitaw anarimaw so anarî yana komo tak mokyaxe ahtîkaxi okwe.

8 Cermomso mak naxe okwe Ixaw Yana komo. Mîk hak rowon pono komo chew mak tak naxe okwe. Poxumnî wara ro mak naxe iito wakanan̂itho wara.

9 Asiriu komo yaka cetken̂e. Buhu wara rma cetken̂e okno pîn wara, cewyaro twaimamsom wara okwe. Yiixe so cehtopo komo ya n̂etîmyatken̂e epethîrî pona okwe.

10 Mîk hak yana komo yanton me n̂etapicketken̂e Ixaw Yana komo epethîrî pona. N̂examro rma wa wenmekyas hara. Ero yinhîrî tak asak mak tak n̂ehtîkexe kayaritomo ya cemetanmekrî komo ke. Antomano rin̂e komo kayaritomon mîk n̂examro pen yemetanmekn̂e.

11 On wara xatken̂e Eprain komo, mer̂pora nakîhcetken̂e kicicitho ya tîmsom yakn̂itopo. Ero ke kicicme n̂examro yehtopo me rma tak nasî tîmsom yakn̂itopo yin̂irithîrî komo rma okwe.

12 Mer̂pora nasî onmewretho n̂examro panatanmetopo. Ero rma tko n̂een̂atken̂e anarî yana komo panatanmetopo me mak okwe.

13 Tookuthîrî komo rma re nakn̂iyaxe owya tîmsom me. Ero raconho rma non̂exe. Tawake exihra rma nasî Aporin komo ero yipu poko okwe. Oroto tak kicicme n̂examro yehtoponho ponaro nasî. Ero poyero tak n̂emetanmekyasî. Exitu pona cexe hara okwe.

14 Takîhton̂enhîrî komo poko tak naxe twen̂ekaraî Ixaw Yana komo okwe. Mîîmo mko n̂iir̂atken̂e porinî mko, cepethîkem ha. Ero wara xa marha xatken̂e Xuta kom hara, sowtatu mîn n̂iir̂atken̂e cewton komo po, mer̂pono pîn po. Ero yipu pona so tko wehto war̂mes amn̂e. Sowtatu mînî mko kr̂a wakn̂iyasî.