Ai, Ixaw Yana komo, on wara wîîkes hara awya so, ahwotara ehcoko anarî yana komo wara. Ponaro awehtoponhîrî komo yai ro mak mîxatken̂e okwe. Puruma yapikmocho po so nasî wooxam komo tweeno pîn. Noro yipu komo mepemexe poko so awehtome so. Tpoxwe meen̂atken̂e noro yipu komo poko awehtopo komo kica.

2 Amn̂e n̂examro nahrî exihra tak nasî puruma potutopo po so. N̂examro wokru marha n̂enahcasî uupa yewkukacho yawno. Ewkukaxan exihra tak nas okwe.

3 On wara naxe Ixaw Yana komo amn̂e, Aporin komo rowon pono me exihra tak naxe okwe. Exitu pona n̂etîramexe hara Eprain komo. Anarî komo reha kicicitho non̂exe Asiriu komo chew.

4 Ero yimaw wooku yukmamra naxe Aporin komo ya tîmsom me. Tpoxwem me enîhra ro mak nasî Noro yînmîthîrî komo. Tîyanan pen pînîn yaw tîwrataxmu komo yuru wara rma nas yînmîthîrî komo. Kicicme so tak naxe ahnoro ero yahn̂e komo. Ero rma re nokyaxe turu me so mak. Kaan mîn yaka arîhra ro mak naxe ero yipu.

5 Ahce wa tak mat amn̂e okwe awahwotacho komo po kaamo po? Tukuknonomaxi nasî Aporin komo poko awahwotacho komo. Ahce wa tak matu ero kaamo po amn̂e?

6 Twaihtopo komo yai cma re n̂emahciyaxe miya. Wara rma n̂examro pen yokoputho n̂enmekyaxe Exitu pono komo. Menpisi pono komo tak okoputhîrî komo nahruyaxe. N̂examro pen yemyawnonho exitaw prata ciixapu, ero yipu yahrun̂e me tak natîkwasî peen, cekyekyem oko. Kpata warai tak natîkwasî yîmînthîrî komo yaw.

7 Awemetanmetopo komo me tak men n̂enmayas amn̂e okwe, kicicme awehtoponhîrî komo yepemacho me ha. Ero yipu ekatîmko Ixaw Yana komo ya. Mer̂pora ro mak nasî kicicme awehtopo komo. Cerewre ro mak nasî etîxera awehtopo komo. Tohnawno poko tîmtapotaxmu ara mak n̂encexe tweronoman̂e komo. Tîmtawaimamsom wara marha n̂encexe Oyekatî yanme tîmtapotaxmu kom ha.

8 Kaanî rma nasî Eprain yepamtho komo weronoman̂e me. Weronomano rin̂e komo naxe Ixaw Yana komo pen yemcinon̂e me rma okwe, torowo yemcinon̂e wara. Ponaro ehtopo komo mîn yaw rma naxe Ixaw Yana komo yein̂e me okwe.

9 Kicicitho me ro mak tak n̂ehtîketken̂e kica oyanan komo. Xibea pononho pen komo wara rma xatken̂e okwe. Kicicme ehtoponhîrî komo ponaro tak nasî Kaan amn̂e. N̂examro tak n̂emetanmekyasî eroyepetho me.

10 Pahxa tawake wîxakn̂e Ixaw Yana komo yeen̂ataw owya. Tawake naxe axawa imo pore cetarisom komo uupa yatî yeen̂ataw ceperkem. Ero wara xa marha tawake wîxakn̂e aporin pen komo yeen̂ataw owya. Tawake taxe piiku yeperîrî yeen̂ataw yihcirî me yucutuxapu, ero wara wîxakn̂e n̂examro poko. Ero yinhîrî tko Baaw-Peo pona mokyatken̂e kica. Iitono ya n̂etîmyatken̂e hara kica, kîhyapamnoretopo ya ha. Kicicme tak n̂ehtîketken̂e yiixe cehtopo komo wara rma kica.

11 On wara nasî kir̂wan̂he Eprain komo yehtopo, miya ro mak cesî torowo wara rma okwe. Ero yimaw ewrura tak naxe n̂examro wosîn, tarke exihra marha naxe, etahsîra ro mak naxe okwe. Ero wara men naxe okwe.

12 Anarimaw so tîmxîkrî komo por̂mamnoyaxe rma re. Wara rma tko wîmxîketîkes okwe. Cewru komo naar̂axe ro mak tak yîhyai so owcetaw okwe.

13 Ciru nasî naatî wara ewtî mexan pona ciixapu wara. Ero wara xa marha ween̂akn̂e Eprain kom hara. Ero wa xa marha Eprain komo por̂mamnoyaxe tîmxîkrî komo waapa nwaikarî me mak okwe.

14 Anîmrî tîmko yîwya so Apa. Ahce mîmya yîwya so? Wosîn komo cirko cemarakxmu me. Ewkura marha cirko manatîrî kom hara.

15 Kicicme ro mak xatken̂e Ixaw Yana komo Xiwkaw po cexitaw so. Ero ke yiixatî pîn me tak wîxakn̂e iito. Kicicme exirî komo poyero n̂examro pen wen̂epesî omîn yai. N̂examro xatî me exihra tak was okwe. Oyanwekn̂e me naxe ahnoro n̂examro yantoman̂e komo.

16 Naatî wara naxe Eprain komo payantaxapu wara. Tuskurumiye tak nasî yimicin. Epetan me ro mak tak naxe okwe. Anarimaw so rma re n̂ewruyaxe tîmxîkrî komo me. Noro yipu komo rma tko waihkes Owî, yîpînîmîknonhîrî pen komo rma okwe, kekn̂e Kporin komo owya.

17 N̂examro pen tak nahsîpînkesî Kaan, ponaro oyehtopo. Tanwekrî poyero nahsîpînkesî. Ero yanme twaimamsom me mak tak naxe n̂examro pen okwe mîk hak rowon pono komo chere twaimamsom me. Ero wa mak naxe okwe.