On wara marha kekn̂e Kporin komo, On wara naxe Ixaw Yana komo, uupa yatî wara naxe, tahwore tatîhtaxmu wara okre. Cepetaxmu wara xa xatken̂e. On wara tko naxe kica, mer̂pora n̂he yînatîrî komo yepetache mer̂pora n̂he marha mîk hak ya tîmsom yakn̂itopo nakîhcexe hara kica. N̂examro yemyawno yepamtîketaw ero yecenarî xa marha toopu mko porokucetîkexe mîk hak yakro tîmtapotacho me so.

2 Yarpa yîhtînon̂e me mak nasî n̂examro ropotarî. Ero ke tak, Kicicitho amyamro, kacho me tak naxe. Mîk hak ya tîmsom komo yakn̂itopo mko tak nar̂mesî Kporin komo. Ero yipu porokutho marha nahkesî toopu pen.

3 Ero yimaw on wara kexe Ixaw Yana komo, Amna kayaritomon exihra tak nas Kporin komo ponarora amna exirî ke okwe. Amna kayaritomon exitaw rma tko re noro ma re kukurunpetu so, kexe.

4 On wara nîmtapowaxe anarimaw so, Kakronomexe so amn̂e. Yaaro tan wîîkes awya so, Kaan xa owaikape cemaro me omtapowataw, kexe. Tohnaw rma tko ero wa kexe kica. Ero ke esen̂ekacho komo n̂epamtîkesî ro mak okwe. Mararî pomoche natîkwasî xa hara peen, kmasmacho me cehsom natîkwasî anarimaw so kica, ero wa xa marha n̂esenpesî n̂examro yîwîrîmacho okwe.

5 Bece-Apen po nasî paaka warai enporixaputho. Ero pona n̂eraswaxe Samaria pono komo. Ero ponarono komo nîwracexe ero pînîn yaw okwe. Ero ya tîmsom pokono komo marha nîwracexe. Kir̂wanî ro mak Mîk okre ponaro kehtoponhîr̂î komo, kexe tîwratarî me so. Ero wa nîwracexe ero pen yarîrî ke amn̂e miya anarî rowon pona.

6 Miya ro mak ero naar̂axe waapa komo Asiriu komo rowon pona. Tîkayaritomon komo ya nîmyaxe yukurumîkno ya xa. Ero yimaw tooto nîwîrîyakarî me tak naxe Eprain yepamtho komo. Camkî ro mak akîhreno wiir̂e ham okwe, kexe marha Ixaw Yana komo.

7 On wara nasî Samaria pono komo kayaritomonînho pen, noro penî nîhcamnoyaxe waapa. Anarimaw weewe peremkirikirintho n̂epîrkesî aporî kwaka, uuma nîhcesî. Ero wara rma n̂ehcamnoyasî n̂examro kayaritomonînho pen okwe.

8 Mînto nai onok na ya tîmsom yakn̂itopo mko Bece-Apen po. Îîpî mko po nai. Kicicitho me Ixaw Yana yehtopo xa mîn ha. Erotho kr̂a tko n̂exixkesî. Cekyekyem tak natîkwasî tîmsom yakn̂itopotho pore, ar̂maxaputho pore ha. Ero yimaw on wara kexe Ixaw Yana komo îîpî mko ya, Ai îîpî, amna n̂he ka ahruko kopi, kexe. On wara kexe matîwîn ya so hara, Amna pona n̂he emacakakî kexe. Ero wa kexe amn̂e.

9 On wara mîxatken̂e amyamro Ixaw Yana komo, pahxa kicicme mîxatken̂e Xibea pononho pen komo yakro awetar̂metaw so. Ero wa awehtoponhîrî komo n̂ixa ro kicicme roro wa maxe okwe. Ahce wa xatken̂e Xibea pononho pen komo? Waipîra ma re xatken̂e n̂examro pen yetar̂metaw awya so?

10 Ixaw Yana komo panare xe tak oyexitaw n̂examro panaresî Owî. Anarî yana komo mokyaxe n̂examro waparî me. N̂examro pen nahsîyaxe, napomiyaxe marha. Ero wa so n̂examro panares Ow asak hakno me exirî ke kicicme ehtoponhîrî komo.

11 Paaka warai rma mîkyam Eprain komo, puruma yapikmocho poko ehcamhokaxapu warai. Tahwore nasî anarî komo paaka ero yapikmocho poko, noro warai mîkyam Eprain komo. Ero ke weewe wiir̂asî n̂examro yîpîmtari, ahce na xihtopo ha. Eprain komo wantomesî tarara yaatopo poko hara. Xuta komo naxe mararî pomon̂e me. Roowo, amnonoxapu mko yakumhon̂e me naxe Xako yepamtho kom ha.

12 On wara wîîkes awya so, anatîrî komo warai me ciicoko kir̂wan̂he awehtopo kom ha. Etpînîn yawno me marha ehcoko anatîrî komo yeperîrî yenmekn̂e wara. Amararîn komo pomon̂e wara tak ehcoko pomohnî pomon̂e wara. Oroto tak nasî Kporin komo yepotopo me awya so. Ceporpore roro nasî Noro mohtopo pona roro. Tmokuche apona so tak pahyasî kir̂wan me awehtopo komo.

13 Kicicme awehtopo komo poko makî tko mîxatken̂e kica anatîrî komo ciin̂e wara. Ero yanme akpîra awehtopo komo tak mahsîyatken̂e anatîrî yeperîrî potun̂e wara rma. Emîknoxapu me marha mîxatken̂e anatîrî yeperîrî yahn̂e wara rma. Apona so rma meen̂atken̂e okwe, asowtatun komo pona marha meen̂atken̂e mer̂pora exirî ke so.

14 Ero ke nupurwasî tak amn̂e roowo awaparî komo mokyataw. Ero yimaw tak takn̂itîkaxi nasî ahnoro asowtatun komo mîn twacayemînhîrî mko okwe. Pahxa Bece Aber pononho pen komo waihketken̂e Xawman pono komo. Rikomo yonînho pen komo meero nar̂metken̂e kr̂a roowo pona, cenawnoi so rma nar̂metken̂e okwe. Ero wa xa marha awaikexe so amn̂e okwe awaparî kom hara.

15 Ero wa awir̂axe so amyamro hara Betew pono pen komo kicicme ro mak awexirî ke so. Ero wara awaikacho komo me enmayataw tak amn̂e akayaritomonînhîrî pen komo tak waihyas okwe. Exihra ro mak tak nas okwe. Ero wa tak nas akayaritomonhîrî pen komo amn̂e.