On wara marha kekn̂e Kporin komo owya, Pahxa Ixaw Yana komo xe wîxakn̂e rikomo warai me ka exitaw so. Omumuru me cehsomu rma mîkyam, n̂examro wan̂ikyakn̂e Exitu poi.

2 On wara tko xatken̂e okwe, Baaw komo xatken̂e n̂examro yan̂ikn̂e wara. Ero ke miya xe n̂he n̂emoxenoretken̂e ohyai okwe. Baaw komo ya tîmsom nakn̂iyatken̂e kica. Mîk hak warai me ciixaputho ya tîmsom me nakn̂iyatken̂e kotoporem okwe.

3 On wara tko ka wîxakn̂e Eprain komo poko, rikomo warai me exitaw so n̂examro waar̂akn̂e aporî yaw yîhcamhokachome so etaritopo komo poko. Amotoyataw so n̂examro karihcekn̂e hara Ow. Tîkariton̂e komo me tko ohtînopîra rma xatken̂e okwe.

4 Yiixe so oyehtopo xakn̂e n̂examro yawyoci wara yihxitome so ohyaka. Weewe marha mohkekn̂e Ow yîpîmtarinonhîrî komo. Kîkatuwakn̂e marha n̂examro nahmacho poko.

5 On wara tko naxe n̂examro pen amn̂e, Exitu pona etîramara naxe hara. Asiriu komo maywen me xa matko naxe amn̂e okwe. Ero wara naxe kicicme cehtoponhîrî komo poxunkara ro makî cexirî ke so okwe.

6 Ero ke capa kesî tak waapa kaciparan ewto pono komo yamacho oko. N̂examro metatan yecetî mko nîhkocexe kacipara imo ke rma. Iitononhîrî pen komo waihkexe ro mak okwe kicicitho poko cesentaxmu me exirî ke so okwe.

7 On wara naxe oyanan komo opoko, opona enîhkan̂e me cehtopo komo mak nîhtînoyaxe okwe. Ero yanme Kaan yakro yîmtapowataw so rma, Yîtîhkathîrî yakro, n̂examro cirihra ro mak wasî anarî komo yopono me.

8 Awahsîpînka xera so ro mak was amyamro Eprain komo. Awar̂mapo xera so ro mak wasî amyamro Ixaw Yana komo awaparî komo ya. Atma pononho pen komo waihkekn̂e Ow, ero wara xa marha awaika xera so ro mak wasî. Seboin pono pen komo marha waihkekn̂e Ow, ero wara xa marha awaika xera so was okwe. Oyewru waar̂asî okwe. Apînîn yaw so ro mak wasî.

9 Kîrwonasî ro mak oyanan komo poko. Wara rma n̂examro pen yar̂matîkara wasî. Eprain komo yar̂matîkara xa hara wasî. Kaanî ro xa Ow ha, tooto pîn. Kir̂wanî ro Ow achewno komo rma. Tîrwon̂e tko mokuhra wasî acheka so.

10 Pahxaro tak Aporin komo wenari rma mokyaxe. Noro reha n̂emtarakesî reaw wara kopi. Noro yemtaraketaw yîmxîkrî komo tak mokyaxe oesce n̂ixa. Tatan̂e mokyaxe.

11 Torowo wara rma mokyaxe tatan̂e. Exitu poi mokyaxe, Asiriu komo chewnonho marha mokyaxe potkuku wara. Yîmînî ro komo yaka tak n̂examro wermonoyasî, wîîkes Ow Aporin komo awya so.

12 On wara naxe Eprain komo opoko, owamcexe ro mak okwe cemaro ke. Cesemîknosom me mak nîmtapowaxe roro oyakro Ixaw Yana komo. Kaan ponaro rma re naxe Xuta komo reha. Kir̂wanî ro yahsîpînkara rma naxe n̂examro, kemîknon̂e pînî ro komo yahsîpînkara naxe. Ero wara naxe.