On wara marha kekn̂e Kporin komo owya, On wara marha naxe Eprain komo, ocowo yahn̂e wara mak naxe okwe. Resce n̂ixan yahsî xe mak naxe ocowo. Ahnoro kaamo po roro cemaronwaxe kica. Emapona roro marha waihkano n̂iir̂axe okwe. Cetakronomacerî men, kacho poko nîmtapowaxe Asiriu komo yakro. Aseci marha narpexe Exitu pono komo yaka.

2 Xuta komo marha n̂en̂ekesî Kporin komo. Ahnoro Xako yepamtho komo panaresî kicicme ehtoponhîrî komo yecenarî rma. N̂examro n̂epemesî kicicme ehtoponhîrî yecenarî.

3 On wara xakn̂e Xako pen pahxa, takno takmarun nahsîyakn̂e tîson ropotaw rma. Kar̂pamxan me cehtîkache tak Kaan yakro n̂etar̂mekn̂e.

4 Ancu yakro tî n̂etar̂mekn̂e. Ancu yopo rma tî xakn̂e. Ero yimaw rma tko tî on wara kekn̂e ancu ya, Ow cma re makronomesî, kekn̂e. Tîwratarî me tî kekn̂e. Anarimaw tî Kaan yakro n̂esepor̂akn̂e Betew po. Iito tî nîmtapowakn̂e Kaan yakro.

5 Aporin komo yakro nîmtapowakn̂e, Kaan yakro xa. Mer̂pono pîn yantoman̂e rma Mîk Kaan ha. Ero wara nai Noro yosotî, cekaiporesom ha.

6 Oroto on wara wîîkes awya so, Kaan ponaro xa hara ehcoko, ponaro awehtopo komo Mîk ha. Etîxatî me ehcoko. Yaaro xa en̂ekano rin̂e me marha ehcoko. Kaan pona xa men encoko roro, ponaro awehtopo komo pona. Ero wara xa ehcoko.

7 On wara tko naxe oyanan komo, twarawantaxmu me naxe. Yaarono pîn yosomu tko mîkyam kica, emyawno yawsîn kuknomacho yosom. Twarawan komo yemîkno xe mak naxe kica.

8 On wara kexe Eprain komo, Cemyawnoyem xa ow okre. Mer̂pora ro mak wahsîye opurantan okre. Oyehtoponho yentîketaw tko tooto komo ya akpîra rma na oyen̂atu ha re, kicicme oyehtoponho pîn xa tko mîn n̂een̂axe, kexe.

9 On wara tko wîîkes Ow, Aporin komo Ow, ponaro awehtopo komo xa. Exitu poi awekn̂enhîrî komo Ow. Pahxaro tak roona yawno me xa hara kiir̂axe so. Ero mak tak nas amn̂e amîn komo me, awahwotacho ro komo yimawno wara rma.

10 Pahxa ka kîmtapowakn̂e weronomano rin̂e komo mtari. Emapona roro wenpekn̂e yîwya so enîhnînhîrî rma. Anarî pokono wara panatanmekno wir̂pekn̂e yîwya so.

11 Kicicme marha naxe Xiriace pono komo. Poxumnî me ro mak naxe iitono komo. Bui punu rma re nakn̂iyaxe Xiwkaw po. On wara tko nas amn̂e n̂examro nîmîtho yaponho mko, cetakpaxi mak nasî mararî pore. Yîtîwîn me mak nasî pomoxapu pore. Ero wara naxe iitono komo.

12 On wara xakn̂e Xako pen pahxa, Aran pono komo cheka n̂emahciyakn̂e. Iito tak n̂etapickekn̂e cipici yepetho me. Okno yentopo poko tî xakn̂e iito cipici yepemachome.

13 Ero yinhîrî weronomano rin̂e ke Ixaw Yana komo n̂ekyakn̂e Kporin komo Exitu poi. Noro yipu ke marha n̂examro n̂ecehcekn̂e.

14 On wara tko xatken̂e Eprain komo, Aporin komo yîrwonmekn̂e me ro mak tak xatken̂e okwe. Ero ke kicicme ehtoponhîrî komo yickara ro mak nasî n̂examro Porin, waihkano rin̂e me ehtoponhîrî komo kom ha. Tîwya yîwîrîyakano ritoponho marha nîramanîyasî n̂examro pona hara. Ero wa was Ow Aporin komo n̂examro poko.