On wara marha kekn̂e Kporin komo owya, Pahxa n̂eraswatken̂e tooto komo Eprain yepamtho komo mtapotarî yencetaw. Ixaw Yana komo yantoman̂e me ka xatken̂e n̂examro. Ero yinhîrî tko kicicme xatken̂e Baaw komo poko hara. Ero poyero waihyatken̂e tak okwe.

2 Oroto tak kicicme n̂ehtîkexe miya xe xa. Tupurantan komo nukuyaxe mîk hak warai me ciitome. Yaana me xa n̂iir̂axe ero mko. Ero yipu ciin̂e ro komo n̂iritho mîn ha. On wara kexe ero pokono komo tokuthîrî tîmn̂e komo ya, Paaka xîkrî pun yakn̂iyataw tîmn̂e komo tak n̂ewcokacowpe paaka xîkrî warai, kexe.

3 Ero wa karî ke on wara tak naxe, kaweresî wara tak naxe pahxaxarono wara, n̂ehcamnoyaxe ro mak cicakî wara, pahxaxarono wara. Puruma pîpîtho wara marha naxe ocowo n̂arîrî wara ero yapikmocho pononho. Wehto yîsîn wara marha naxe epatakacho yaro cepatakaxmu wara.

4 Aporin komo tko Ow ha, ponaro awehtopo kom ha. Exitu poi awehtoponhîrî komo n̂ixa ro rma ponaro awehtoponhîrî komo Owî. Ponaro anarî komo yehtopo ponarora ro mak men ehcoko amyamro. Oponaro mak ehcoko. Anarî exihra ro mak nasî akurunpen̂e komo.

5 Pahxa axawa imo po awexitaw so aponaro so wîxakn̂e. Turpe ro mak xakn̂e roowo iito, tuuna mokuhra xakn̂e pahkî.

6 Ero yinhîrî tak, tok nahrî exitaw cuupu, n̂eseresmetken̂e takî tmaxmitaxi ro. Ero yimaw tak cehcoyoponkaxmu me tak xatken̂e hara kica. Ero ke opok nîtwen̂ekarînwatken̂e mak kica.

7 Ero ke reaw wara rma wasî n̂examro poko. Reopahtu wara marha n̂examro wapancesî esama yakumyaw.

8 Uhsu wara rma wasî n̂examro poko, etîmxîkaxapu wara oko. Ewanthîrî komo warixkesî oko. N̂examro pen won̂esî iito reaw wara. Reaw wara rma n̂examro pen kararakes oko.

9 Awaiketken̂e so amyamro Ixaw Yana komo okwe. Oyanwekn̂e me maxe okwe, awakronoman̂e komo yanwekn̂e me rma maxe okwe.

10 Ahto tak nai akayaritomon komo, akurunpen̂e kom ha? Ahto tak natu awantoman̂e komo, awewton pono komo yantoman̂e kom ha? On wara mîîketken̂e pahxa, Amna kayaritomon tak cirko, amna yantoman̂e komo marha, mîîketken̂e. Ahto tak natu noro yipu pen komo oroto?

11 Orwonataw akayaritomon komo wiir̂akn̂e. Orwonataw xa hara noro pen Ow waihkekn̂e hara okwe.

12 Tîmtoso nasî Eprain komo yehtoponho, kicicme ehtoponhîrî komo. Karita yaka tmewreso nasî kicicme ehtoponhîrî komo.

13 N̂erewaxe tak amn̂e oko wooxam wara rma, cewrusom wara. Rikomo wara mak naxe okwe akpîra cesehtînosom wara. Cewrutopo me exitaw tîson ropotai ewrura rma nas okwe.

14 Wara rma tko n̂examro wanîmyas hara roowo cheka ahruxapunhîrî. N̂examro wahsîyasî epethîrî pona waihtoponhîrî yai. Ai, tooto pen waihtopo amoro, ahto tak nai tooto pen yar̂man̂e me awehtoponhîrî? Ai, tooto pen yocho yewtatho amoro hara, ahto tak nai yîhcamnono ritoponho awya? Exihra tak nas okre.

15 Yîpînîn yaw sora rma tko wasî. Cemyawnoi so rma re n̂ehtîketu takno komo yopono me. Wara rma nocowon̂esî tak resce n̂ixa ro. Kporin komo n̂iritho rma mîn ocowo axawa imo n̂ixan. Ero yanme n̂examro tunatho tak n̂ewturpamtîkesî okwe tuuna pîthonho. N̂ewturpamtîkesî marha yutunathîrî komo, ahtoxapu. N̂examro yemyawnonho pen tak naar̂axe waapa komo. Ero yîmtotopo yawnonho pen exihra tak nasî cepethîkem pen komo okwe.

16 Cen̂ekaxmu me thakwa naxe Samaria pono komo. Kaan yanwekn̂e komo mîkyam kica, ponaro cehtopo komo yanwekn̂e. Ero ke kacipara ke paraxkaxapu me n̂epîrkexe oko. Yîmxîkîthîrî pen komo ciki nar̂mexe waapa komo roowo pona cecor̂or̂omaxi ro mak. Wooxam pen komo wetîhkexe marha oko tarkem pen komo. Ero wa naxe amn̂e Ixaw Yana pen komo okwe.