On wara marha kekn̂e Kporin komo owya, On wara wîîkes hara awya so, Ixaw Yana komo amyamro. Etaknamacoko hara Aporin komo Kaan wece. Mepîrketken̂e kica kicicme awehtoponhîrî komo yanme.

2 Aporin komo yakro amtapotacho komo ka yîhtînocoko awtotome so tak Noro yaka. On wara kacoko yîwya, Apa kah yawno, kicicme amna yehtoponho cma re mîhcamnoyasî. Amna cma re nîmyas awya amna mtapotarî, bui pun yakn̂itopo wara rma.

3 Amna yukurunpera ro mak nasî Asiriu komo. Kawaru mkaw so tohra marha nas amna. Kaanî ro xa amoro ponaro amna yehtopo, kahra tak nas amna tîn̂enporithîrî ya rma. Amoro mak masî yîmîhnî komo pînîn yawno me.

4 On wara marha wîîkesî Ixaw Yana komo poko, n̂examro tak wehcemesî, opona enîhkan̂e me ehtoponhîrî komo wehcemesî. N̂examro xe xa tak wasî, poko so yîrwomra tak wasî.

5 Cicakî wara tak wasî Ixaw Yana komo ya. N̂epemrutunwaxe tak n̂examro epemrutun wara rma. Seeturu yepu wara marha naxe, Ribanu pono n̂imicinwasî ero wara naxe.

6 Tperemtaxmu wara marha naxe okre. Kir̂wan̂he ro mak n̂esenpexe oripera wara. Kotopore marha naxe seeturu yepu wara okre, Ribanu pono wara.

7 N̂examro yawarpamacho yaka n̂enmayaxe tooto komo. Puruma wara mak naxe tahwore tatîhtaxmu wara. Cepemrutuntaxmu wara naxe uupa yatî wara. Poxwas okre ewkuru kir̂wan̂he ro mak, Ribanu pono komo wokru wara okre.

8 On wara tak kexe Eprain komo, Ahce kacho mîk hak warai me ciixaputho pokono me wai hara kica? kexe. Ow xa weyukyasi yîmtapotarî komo, n̂examro marha wecehcesî. Siprexte yepu warai Ow ha taakem warai. Oyanme mak meperwaxe amyamro, wîîkesî.

9 Taa, onoke xa nai yuhnari yîhtînon̂e me? Ero wa exitaw yaarono me n̂encesî omtapotarî tan. Onoke xa nai tweeno me? Ero wa exitaw takîhso n̂encesî omtapotarî tan. Kir̂wan̂he ro mak nasî Kporin komo yehtopo. Noro yehtopo yaw roro naxe takîhsom komo. Noro yehtopo yukukmetaw Kporin komo yanwekn̂e komo ya reha n̂epîr̂kexe mak kica. Ero wara naxe, kekn̂e. Ero wara kekn̂e Kporin komo owya.